“14–20 Septemba. 3 Nifae 8–11: ‘Girap mo Kam Fored long Mi,’” Kam Folem Mi—Blong Wanwan Man, Woman mo Famli: Buk blong Momon 2020 (2020)
“14–20 Septemba. 3 Nifae 8–11,” Kam Folem Mi—Blong Wanwan Man, Woman mo Famli: 2020
Mi Mi Laet blong Wol, i kam long James Fullmer
14–20 Septemba
3 Nifae 8–11
“Girap mo Kam Fored long Mi”
Long 3 Nifae 8–11, ol pipol oli bin harem voes blong God we i stap toktok long olgeta. Taem yu stap ridim olgeta japta ia, luklukgud long wanem nao voes blong Hem i stap talem long yu.
Raetemdaon Ol Filing mo Tingting blong Yu
“Luk, mi mi Jisas Kraes, we ol profet oli bin testifae se bambae mi kam long wol” (3 Nifae 11:10). Wetem ol toktok ia, Sevya we i bin laef bakegen long ded i bin presentem Hemwan, mo long wei ia, i bin mekem ol profesi we oli bin tokbaot insaed long Buk blong Momon ova long 600 yia i pas, oli kam blong hapen. “Taem ia we Hem i bin kamkamaot mo toktok ia we Hem i bin talem, Elda Jeffrey R. Holland i raetem se, oli “stap olsem stret poen ia, bigfala taem ia, long ful histri blong Buk blong Momon. Hem i taem we i soemaot Hem, mo i toktok we i bin talem mo i bin givim insperesen long evri profet blong Ol Man Nifae. … Evriwan i bin toktok abaot Hem, oli bin singsing abaot Hem, oli bin drim abaot Hem, mo oli bin prea blong Hem i kamkamaot—be Hem i bin stap ia oltaem nomo. !Hemia i bin dei ia blong evri dei! God we i stap tanem evri naet we i tudak i kam laet blong moning, i bin kam” (Christ and the New Covenant [1997], 250–51).
Sam Aedia blong Skripja Stadi blong Yuwan
Jisas Kraes i Laet blong Wol.
Yu maet luk se ol stamba toktok we oli go wetem tudak mo laet—long saed blong wol ia mo long saed blong spirit—oli ripripitim truaot long 3 Nifae 8–11. ?Wanem nao yu lanem aot long ol japta ia abaot tudak long saed blong spirit mo laet long saed blong spirit? ?Wanem i tekem tudak i kam insaed long laef blong yu? ?Wanem i tekem laet i kam? ?From wanem nao yu ting se Sevya i jusum blong presentem Hemwan olsem “laet mo laef blong wol ia”? (3 Nifae 9:18; 11:11). ?Olsem wanem nao Jisas Kraes i wan laet insaed long laef blong yu?
Sapos mi sakem sin, Sevya bae i tekem mi, i protektem mi, mo i hilim mi.
?Yu ting se ol pipol ia, oli filim olsem wanem afta we oli gotru long taem we oli prapa spolem gud olgeta mo taem blong tudak we oli tokbaot long 3 Nifae 8? ?Yu ting se oli filim olsem wanem taem oli harem voes blong Sevya i stap tokbaot laet, sore, mo fasin blong pemaot man insaed long ol japta 9 mo 10?
Nomata we Sevya i bin talem se taem ia, Hem i bin prapa spolem nogud olgeta, be hemia i risal blong sin blong ol pipol; mo Hem i bin promesem se bae Hem i hilim olgeta we bae oli gobak long Hem mo sakem sin (luk long 3 Nifae 9:2, 13). Elda Neil L. Andersen i bin talem: “Mi mi sapraes we Sevya i stap raonem ol han blong Hem we oli fulap long sore mo lav, i go raon long olgeta we oli sakem sin, i nomata se sin ia i nogud olsem wanem. Mi testifae se Sevya i save mo i wantem tumas blong fogivim ol sin blong yumi” (“Repent … That I May Heal You,” Ensign o Liahona, Nov. 2009, 40).
Luk long 3 Nifae 9–10 blong luk ol pruf blong sore blong Kraes, mo hamas nao Hem i wantem blong fogivim man. Eksampol:?Wanem nao yu faenem insaed long 3 Nifae 9:13–22 mo 10:1–6 we i save helpem yu blong filim lav mo sore blong Sevya? Tingting hevi long ol eksperiens we yu bin filim Hem i “karem” mo “givim gudfala kaekae” long yu (luk long 3 Nifae 10:4). Tingting blong raetemdaon ol eksperiens ia insaed long wan jenol, o blong serem olgeta wetem olgeta we yu lavem olgeta.
Mi save lanem blong harem mo andastanem voes blong God.
?Yu yu harem finis se yu gat hadtaem blong andastanem wan mesej we God i stap talemaot long yu? Maet eksperiens blong ol pipol we oli tokbaot insaed long 3 Nifae 11:1–8, oli save helpem yu blong andastanem voes blong God. I gud blong yu luk wanem kaen voes blong God nao ol pipol oli bin harem mo wanem oli bin mekem blong oli andastanem gud moa voes ia. ?Olsem wanem nao stori ia i go wetem ol traehad blong yu blong harem mo luksave voes blong God insaed long laef blong yu tru long revelesen we i blong yuwan nomo?
Jisas Kraes i stap invaetem mi blong mi kasem wan testemoni blong miwan abaot Hem.
I bin gat samples 2,500 pipol we oli bin kam tugeta long Plante, ples we Jisas i bin kamkamaot long olgeta (luk long 3 Nifae 17:25). Nomata long bigfala namba ia, Sevya i bin invaetem olgeta, “wan afta wan” blong oli filim mak blong nil long han mo leg blong Hem (3 Nifae 11:14–15). ?Samting ia i talem wanem long yu abaot hamas i impoten blong gat ol eksperiens blong yumiwan we i bildimap fet blong yumi long Jisas Kraes? ?Long wanem wei nao Sevya i stap invaetem yu blong “girap mo kam fored” long Hem? (3 Nifae 11:14). ?Wanem eksperiens nao i bin helpem yu blong kasem wan testemoni se Hem i Sevya blong yu? Maet yu save tekem olsem wanem nao eksampol blong Sevya, long ol ves ia, i save givim insperesen long ol traehad blong yu blong givhan long ol narawan.
Wan afta Wan, i kam long Walter Rane
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting.
3 Nifae 8–9
Blong helpem famli blong yu i save tekem ol eksperiens we oli stap long 3 Nifae 8–9 i kam long olgetawan, yu save talem bakegen, o lisin long wan rekoding blong samfala pat blong ol japta ia long wan rum we i tudak. ?Bae i olsem wanem blong stap long tudak long tri dei? Toktok raon long poen ia. Afta, yufala i stap tokbaot olsem wanem Jisas Kraes i “laet… blong wol ia” (3 Nifae 9:18).
3 Nifae 10:1–6
Pikja ia, blong wan mama faol i pulum tugeta ol smol pikinini blong hem, hem i wan tijing we i gat paoa blong helpem ol pikinini oli andastanem fasin mo misin blong Sevya. Yufala i save ridim olgeta ves ia long semtaem we famli blong yufala i lukluk long wan pikja blong wan mama faol mo ol pikinini blong hem. ?From wanem nao wan mama faol bae i wantem pulum tugeta ol pikinini blong hem? ?From wanem Sevya i wantem blong pulum yumi i go kolosap long Hem? ?Wanem bae i hapen sapos wan smol pikinini i no go tugeta taem oli singaotem hem?
3 Nifae 11:1–7
Maet yufala i save ridim sam long ol ves ia long wan voes we i sofsof mo i “smol” (3 Nifae 11:3). ?Wanem nao ol pipol oli mas mekem blong andastanem voes we i kam long heven? ?Wanem nao yumi save lanem aot long eksperiens blong olgeta?
3 Nifae 11:21–38
?I gat wan insaed long famli blong yu we i stap rere blong kasem baptaes? Sapos oli ridim 3 Nifae11:21–38, i save helpem olgeta blong oli rere. ?Olsem wanem nao we, taem yu stap tingting hevi long ol tijing blong Sevya insaed long ol ves ia, i save helpem ol memba blong famli we oli bin kasem baptaes finis?
3 Nifae 11:29–30
?Wanem nao ol ves ia oli stap tijim yumi long saed blong fasin blong raorao? ?Olsem wanem nao yumi save lego fasin blong raorao insaed long hom blong yumi? (3 Nifae 11:30).
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Stap Kam Antap long Stadi blong Yuwan
Raetemdaon ol tingting mo ol filing blong yu. Elda Richard G. Scott i talem: “Save, we oli raetemdaon gud, hem i save we i kam long taem blong nid. … [Blong stap raetemdaon ol tingting mo filing long saed blong spirit, i mekem se yu gat moa janis blong kasem moa laet” (“Acquiring Spiritual Knowledge,” Ensign, Nov. 1993, 88).
Wan Man blong Lukaot long Sipsip,i kam long Howard Lyon