“7–13 Septemba. 3Nifae 1–7: ‘Leftemap Hed blong Yu mo Stap Glad,’” Kam Folem Mi—Blong Wanwan Man, Woman mo Famli: Buk blong Momon 2020 (2020)
“7–13 Septemba. 3Nifae 1–7,” Kam Folem Mi—Blong Wanwan Man, Woman mo Famli: 2020
Wan Dei, Wan Naet, mo Wan Dei, i kam long Jorge Cocco
7–13 Septemba
3 Nifae 1–7
“Leftemap Hed blong Yu mo Stap Glad”
Ol Man blong Nifae oli witnesem ol merikel saen, be wetem taem, oli bin fogetem wanem we oli bin luk (luk long 3 Nifae 2:1). Raetemdaon ol filing mo tingting blong yu we bae i helpem yu blong tingbaot ol eksperiens we yu bin gat long saed blong spirit taem yu bin stap stadi 3 Nifae 1–7.
Raetemdaon Ol Filing mo Tingting blong Yu
Long sam wei, mi filim se hem i wan gudfala taem blong stap biliv long Jisas Kraes. Ol profesi oli stap kamtru—ol bigfala saen mo merikel long medel blong ol pipol oli bin stap soem se Sevya bae i bon i no longtaem. Long nara han, i bin wan taem blong wari blong olgeta we oli bin biliv, from se, nomata ol merikel ia, olgeta we oli no bin stap biliv, oli stap strong se “taem ia i pas finis” blong Sevya i bon i kam long wol ia (3 Nifae 1:5). Olgeta pipol ia, oli “mekem wan bigfala trabol truaot long graon,” (3 Nifae 1:7) mo oli iven putum wan deit blong kilimded evriwan we oli bin biliv sapos saen ia we Samuel, Man blong Leman i bin profesae from—wan naet we i no gat tudak—i no bin kamaot.
Long ol situesen blong tes ia, profet Nifae “i prea strong long God blong hem from ol pipol blong hem” (3 Nifae 1:11). Ansa blong Lod i save givim insperesen long eniwan we i stap fesem fasin blong agens, o i gat tu tingting, mo i nidim blong save se laet bae i winim tudak: “Leftemap hed blong yu mo stap glad; … bae mi mekem evri samting i hapen we mi bin mekem se oli talemaot tru long maot blong ol tabu profet blong mi” (3 Nifae 1:13).
Sam Aedia blong Skripja Stadi blong Yuwan
Lod bae i mekem evri toktok blong Hem oli hapen.
?Yu ting se bae yu filim olsem wanem sapos yu yu bin wan long olgeta we i bin biliv long taem ia we oli tokbaot long 3 Nifae 1–7? ?Yu ting se bae yu filim olsem wanem, eksampol, blong stap wet blong naet ia we bae i no gat tudak i kam; we i taem ia nao we oli anaonsem se bae Sevya i bon i kam long wol, mo semtaem, yu save se bae oli kilimded yu sapos samting ia i no hapen? Taem yu stap ridim 3 Nifae 1:4–21 mo 5:1–3, lukaotem wanem nao Nifae mo ol narawan we oli biliv oli bin mekem blong holemtaet fet blong olgeta long taem ia we i bin had. ?Olsem wanem nao Lod i bin blesem olgeta? ?Wanem nao yu lanem we i save helpem yu taem yu stap mo stap wet from ol blesing we Lod i bin promesem?
Taem mi fogetem ol eksperiens long saed blong spirit, i mekem se mi no strong mo stanap long wan ples we Setan i save kam temtem mi nomo.
Maet bae yu tingting se blong witnesem wan samting we i wan bigfala merikel olsem, we i wan naet we i no gat tudak, bae i wan samting we bae i stap wetem yu blong wan longfala taem, mo bae i wan angka blong testemoni blong yu. Be ol memori blong ol saen mo ol sapraes we Ol Man blong Nifae oli bin witnesem, oli go lus wetem taem. ?Wanem i mekem olgeta oli fogetem olgeta samting ia, mo wanem nao risal blong stap fogetem ol samting ia? (luk long 3 Nifae 1:22; 2:1–3).
?Wanem nao bae yu stap mekem blong tingbaot olgeta samting ia mo riniu witnes blong yu abaot ol trutok ia long saed blong spirit? Eksampol: tingting blong raetemdaon ol eksperiens blong yu long saed blong spirit; hemia i save helpem yu. ?Olsem wanem bae yu serem witnes blong yu wetem olgeta we oli kolosap long yu, blong helpem olgeta blong oli save biliv?
Luk tu long Alma 5:6; Henry B. Eyring, “O Remember, Remember,” Ensign o Liahona, Nov. 2007, 66–69; Neil L. Andersen, “Fet I No Kam Tru long Janis, Be Tru long Joes,” Ensign o https://www.ChurchofJesusChrist.org/general-conference/2015/10/faith-is-not-by-chance-but-by-choice?lang=bis, Nov. 2015.
3 Nifae 2:11–12; 3:1–26; 5:24–26
Lod i mekem olgeta Sent blong Hem oli kam strong moa agensem ol denja long saed blong spirit.
Long taem blong yumi, yumi no stap fesem nomo ol grup blong ol stilman we oli fosem yumi blong aot long ples blong yumi, mo go stap tugeta long wan ples. Be, yumi stap fesem ol denja long saed blong spirit, mo eksperiens blong Ol Man blong Nifae oli gat ol lesen we oli save helpem yumi. Lukaotem ol lesen ia taem yu stap ridim 3 Nifae 2:11–12 mo 3:1–26.
Long 3 Nifae 5:24–26, yumi stap rid abaot kam tugeta blong ol pipol blong Lod long ol las dei. ?Wanem nao ol ves ia oli tijim yumi, abaot hao Lod i stap pulum yumi i kam tugeta long wan ples long taem tedei?
Luk tu long “Worldwide Devotional for Youth: Messages from President Russell M. Nelson and Sister Wendy W. Nelson,” 3 Jun 2018, ChurchofJesusChrist.org; “Isrel—Kam Tugeta blong Isrel,” Gaed long Ol Skripja, scriptures.ChurchofJesusChrist.org.
Mi mi wan disaepol blong Jisas Kraes.
?Yu ting se i minim wanem blong stap olsem wan disaepol blong Jisas Kraes? (Luk long D&K 41:5). Long 3 Nifae 5:12–26, Momon i bin stopem wok blong hem blong raetemsot ol histri blong Ol Man blong Nifae, mo talemaot se hem i wan disaepol blong Jisas Kraes. Afta, long 3 Nifae 7:15–26, hem i stap tokbaot seves blong wan nara disaepol, we i profet Nifae. ?Wanem nao yu faenem, insaed long tufala skripja ia, we i helpem yu blong andastanem wanem i minim blong stap olsem wan disaepol blong Jisas Kraes?
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting.
3 Nifae 3:13–14, 25–26
?Wanem nao Ol Man blong Nifae oli stap mekem blong protektem olgeta long enemi ia we oli stap fesem? ?Wanem nao yumi stapmekem blong mekem se hom blong yumi i wan ples blong sefti mo proteksen agensem ivel insaed long wol ia?
3 Nifae 2:1–3; 6:15–17
Blong helpem famli blong yu i lanem olsem wanem Setan i save giaman long yumi, droem wan bodi, mo taem famli blong yu i stap ridim 3 Nifae 2:1–3 mo 6:15–17, makem ol defren pat blong bodi we ol skripja ia oli stap tokbaot. Folem ol ves ia, ?wanem nao sam long ol wei we Setan i stap temtem yumi long hem blong yumi stap fogetem God mo tanem yumi long sin?
3 Nifae 4:7–12, 30–33
?Wanem nao Ol Man blong Nifae oli mekem taem oli bin luk Ol Stilman blong Gadianton oli kam? ?Wanem nao famli blong yumi i save lanem aot long Ol Man blong Nifae taem yumi fesem ol situesen we oli had tumas? ?Wanem nao yumi lanem aot long ol toktok blong Ol Man blong Nifae afta we Lod i bin helpem olgeta long ol taem ia we oli had?
3 Nifae 5:13; Doktrin mo Ol Kavenan 41:5
Ridim 3 Nifae 5:13 mo Doktrin mo Ol Kavenan 41:5, mo toktok raon long mining blong stap olsem wan disaepol blong Kraes. Mebi ol memba blong famli oli save tokbaot ol taem we oli bin luk wan narawan long olgeta i stap olsem wan disaepol. Sapos yu gat ol smol pikinini, yu save mekem wan baj we i talem: “Mi mi wan disaepol blong Jisas Kraes,” mo letem olgeta oli werem baj ia taem yu luk olgeta oli stap folem Sevya.
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Stap Kam Antap long Fasin blong Yumi blong Stap Tij
Helpem famli blong yu blong yusum ol skripja i kambak long laef blong olgetawan. Nifae i bin talem: “mi yusum evri skripja long laef blong mifala, blong hem i save stap blong helpem mifala mo blong mifala i lanem samting” (1 Nifae 19:23). Blong helpem famli blong yu blong yusum ol skripja long laef blong olgetawan, yu save invaetem olgeta blong tingting hevi long wanem nao oli save mekem sapos oli bin stap long medel blong olgeta ia we oli bin biliv, we oli tokbaot olgeta long 3 Nifae 1:4–9. (Luk long Teaching in the Savior’s Way, 21.)
Wan Dei, Wan Naet, mo Wan Dei, i kam long Walter Rane