Wan Dei, Wan Naet, mo Wan Dei, i kam long Jorge Cocco

7–13 Septemba

3 Nifae 1–7

“Leftemap Hed blong Yu mo Stap Glad”

Sapos yu nidim sam moa aedia taem yu stap rere blong tij, luk long “Sam Moa Risos blong Stap Tijim Ol Pikinini” mo luk long “Stap Lukluk long Ol Nid blong Ol Smol Pikinini” long stat blong buk ia.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Invaetem ol pikinini blong oli serem wanem we oli rimemba se oli bin lanem long las wik abaot ol saen we Samuel, wan man blong Leman i bin talem se bae i helpem ol pipol blong save se Jisas i bon i kam long wol. Talemaot long ol pikinini se, tedei, bae oli tokbaot ol pipol we oli bin luk ol saen ia oli kamaot.

Stap Tijim Doktrin: Ol Smol Pikinini

3 Nifae 1:4–15, 19–21

Wan niu sta i kamkamaot taem we Jisas Kraes i bon i kam long wol ia.

Stori long Niu Testeman abaot taem we Sevya i bon i kam long wol, man i save gud, iven ol pikinini tu oli save. Long wik ia, hem i wan gudfala janis blong tijim ol pikinini insaed long klas blong yu abaot ol merikel we Ol Man blong Nifae oli bin witnesem taem we Jisas i bin bon i kam long wol.

Samfala Aktiviti we Yu Save Mekem

• Bifo klas i stat, putum wan sta antap long wol. Invaetem ol pikinini blong lukaotem wan samting long wol we i no stap long wol oltaem. Talem long ol pikinini se Ol Man blong Nifae oli bin luk wan niufala sta long skae taem we Jisas i bon i kam long wol. Talem sot stori we i stap long 3 Nifae 1:4–15, mo 19–21. Mo tu, yu save yusum “Japta 41: Ol Saen blong Taem we Kraes Bae I Bon” (Ol Stori long Buk blong Momon, 114–16, o vidio we i go wetem long ChurchofJesusChrist.org).

• Soem long ol pikinini wan pikja blong taem we Sevya i bon i kam long wol (luk long Gospel Art Buk, no. 30), mo singsing wan Krismes singsing we yu laekem tumas olsem “The Nativity Song” (Children’s Songbook, 52–53). Helpem ol pikinini blong oli andastanem se Ol Man blong Nifae oli bin stap longwe long ples we Jisas i bon long hem, be oli bin save se Hem i bon i kam long wol from se oli bin luk ol saen. Testifae se iven we yumi no bin luk taem ia we Sevya i bon long hem, Tabu Spirit i save helpem yumi blong save se ol stori abaot taem ia, we oli stap insaed long ol skripja, oli tru.

3 Nifae 1:20

Oltaem, ol toktok blong ol profet oli kamtru.

Lod i bin talem long Nifae: “[Bae mi] soem long wol se bae mi mekem evri samting i hapen we mi bin mekem se oli talemaot tru long maot blong ol tabu profet blong mi” (3 Nifae 1:13).

Samfala Aktiviti we Yu Save Mekem

• Soem sam pikja we i soem olsem wanem God i bin toktok tru long ol profet, olsem Noa (Gospel Art Buk, Inos. 7–8; luk long Jenesis 6–7) mo Samuel, Man blong Leman (Gospel Art Buk, namba 81; luk long Hileman 14:1–7). Invaetem ol pikinini blong serem wanem oli save abaot ol stori ia.

• Ridim 3 Nifae 1:20 i go long ol pikinini mo serem testemoni blong yu se ol toktok blong ol profet oli kamtru oltaem. Invaetem ol pikinini blong lisin long profet long nekis jeneral konfrens.

3 Nifae 5:13

Mi save folem Jisas Kraes.

Momon i bin talem: “Mi mi wan disaepol blong Jisas Kraes.” ?Olsem wanem nao yu save helpem ol pikinini blong oli luk olgetawan olsem ol disaepol tu?

Samfala Aktiviti we Yu Save Mekem

• Ridim 3 Nifae 5:13, mo invaetem ol pikinini blong ripitim sentens ia: “Mi mi wan disaepol blong Jisas Kraes.” Tijim olgeta se wan disaepol blong Jisas Kraes, hem i traem blong stap folem Hem oltaem. Serem samfala samting we Momon i bin mekem blong hem i kam olsem Jisas, olsem blong stap tijim toktok blong God, mo blong stap obei long ol komanmen blong God (luk long 3 Nifae 5:13–18). Helpem ol pikinini blong tingbaot sam wei we oli save stap olsem ol disaepol.

• Long wan pis pepa, helpem ol pikinini blong oli droem han blong olgeta mo oli katem. Raetem: “Mi mi wan disaepol blong Jisas Kraes” long wan saed, mo invaetem olgeta blong droem wan samting we oli save mekem blong stap wan disaepol long nara saed (maet bae yu nidim blong helpem olgeta blong tingting long sam aedia). Singsing tugeta wan singsing abaot wei blong folem Sevya, olsem “Mi Traem blong Kam Olsem Jisas” (Liahona, Epril 2012, 64).

Stap Tijim Doktrin: Ol Bigfala Pikinini

3 Nifae 1:4–21

Ol promes blong God, we Hem i givim tru long ol profet blong Hem, oltaem oli kamtru.

Stori we i stap long 3 Nifae 1:4–21 i save help blong bildimap fet blong ol pikinini, se, oltaem, God i stap kipim ol promes blong Hem.

Samfala Aktiviti we Yu Save Mekem

• Invaetem ol pikinini blong komperem profesi blong Samuel, Man blong Leman, we i stap long Hileman 14:1–7 mo taem we profesi ia i kamtru long 3 Nifae 1:19–21. Testifae se ol promes blong God we ol profet blong Hem oli stap talem, oltaem oli kamtru.

• Wetem ol pikinini, ridim stori we i stap long 3 Nifae 1:4–10. Askem ol pikinini olsem wanem bae oli filim sapos oli bin wan long olgeta ia we i stap biliv, we i stap long tetaem ia. Invaetem ol pikinini blong ridim haf blong stori long ol ves 11–15 mo givim sam tingting abaot sam wei blong finisim sentens ia: “Lesen blong stori ia, hem i … “? ?Olsem wanem yumi save soem tras blong yumi long God taem yumi stap wari o filim tingting i slak?

• Serem wan samting we profet blong yumi we i stap laef i bin promesem yumi. ?Wanem nao yumi save mekem blong soem fet blong yumi se ol toktok blong profet oli kam long God?

3 Nifae 2:11–12; 3:13–14, 24–26

Yumi kam strong moa taem yumi kam tugeta long wan ples.

Ol Man blong Nifae oli mas kam tugeta blong stap sef long laef long wol ia. ?Olsem wanem yu save helpem ol pikinini blong oli luk se, blong kam tugeta wetem ol stret mo gud fren, i save givim paoa long saed blong spirit?

Samfala Aktiviti we Yu Save Mekem

• Wetem ol pikinini, ridim olgeta ves ia mo invaetem olgeta blong lukaotem ol risen from wanem Ol Man blong Nifae oli bin kam tugeta, mo ol blesing we i bin go long olgeta: 3 Nifae 2:11–12 mo 3:13–14, 24–26. ?From wanem i impoten blong yumi “kam tugeta” tedei long ol famli blong yumi, mo tu, long jos? ?Olsem wanem nao we blong kam tugeta i mekem yumi kam strong long saed blong spirit?

• Yusum samting blong tijim lesen; tijim se yumi kam strong tugeta bitim we taem yumi go wanwan. Eksampol: invaetem ol pikinini blong traem brekem wan stik, mo afta, traem brekem wan bandel stik, o blong terem wan pis pepa, mo afta terem wan hip blong pepa. ?Long wanem wei nao, yumi, yumi olsem bandel stik, o pepa ia? ?Olsem wanem yumi save mekem wanwan long yumi i kam strong moa taem yumi kam tugeta wan ples insaed long ol famli blong yumi, o long jos?

• Eksplenem se Jisas i stap pulum tugeta ol pipol blong Hem i kam insaed long Jos tedei tru long misinari wok (luk long 3 Nifae 5:24–26). Invaetem wan fultaem misinari o wan wod misinari blong hem i serem ol eksperiens we i soemaot ol pipol olsem wanem oli bin kam strong moa taem oli bin stap kam tugeta long Jos.

3 Nifae 4:30–33; 5:12–26; 6:14; 7:15–26

Mi mi wan disaepol blong Jisas Kraes.

?Olsem wanem yu helpem ol pikinini blong oli luk olgetawan olsem ol disaepol blong Jisas Kraes, semmak olsem we Momon i bin mekem? (luk long 3 Nifae 5:13).

Samfala Aktiviti we Yu Save Mekem

• Soem wan pikja blong Momon (olsem hemia blong Gospel Art Buk, namba 73). Invaetem wanwan pikinini blong i kam mo ripitim wanem Momon i bin talem long 3 Nifae 5:13: “Mi mi wan disaepol blong Jisas Kraes.” ?Hem i minim wanem blong stap wan disaepol blong Jisas Kraes? (luk long D&K 41:5).

• Divaedem klas i go long ol smol grup, mo givim wok long wanwan grup blong ridim abaot wan long ol eksampol ia blong ol disaepol: Ol Man blong Leman we oli bin jenisim laef blong olgeta (luk long 3 Nifae 4:30–33; 6:14), Momon (luk long 3 Nifae 5:12–26), mo Nifae (luk long 3 Nifae 7:15–26). ?Olsem wanem nao ol pipol ia oli ol tru disaepol blong Jisas Kraes? ?Wanem nao yumi save mekem blong folem eksampol blong olgeta?

Stap Leftemap Tingting blong Lanem Samting long Hom

Invaetem ol pikinini blong tingting long wan samting we bae oli mekem long wik ia blong stap ol disaepol blong Kraes. Leftemap tingting blong olgeta blong raetemdaon mo serem hemia wetem ol famli blong olgeta.

Stap Kam Antap long Fasin blong Yumi blong Stap Tij

Hangem wan skripja i stap. Jusum wan ves we yu luk se i gat mining long yu, (o invaetem ol pikinini blong jusum wan) mo raetem mo hangem long wan ples insaed long klasrum we bae oli luk plante taem. Yu save hangem skripja ia i stap blong plante wik, mo gobak long hem wanwan taem.