Nambatri Nifae: Olgeta Twelef Ia Nao we Mi Mi Jusum, i kam long Gary L. Kapp

21–27 Septemba

3 Nifae 12–16

“Mi Mi Loa mo Laet”

Taem yu stap stadi long 3 Nifae 12–16, lukaotem ol trutok we oli gat mining long laef blong ol pikinini we yu stap tijim olgeta. Aotlaen ia i tokbaot sam trutok, be Spirit bae i save poenem yu i go long ol nara trutok.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Pasem wan pikja blong Jisas long ol pikinini. Mekem ol pikinini oli tekem taem blong holem pikja, mo serem wan samting we Jisas i tijim, olsem wan samting we oli bin lanem long hom long wik ia.

Stap Tijim Doktrin: Ol Smol Pikinini

3 Nifae 12:14–16

Mi save stap olsem wan gud eksampol long ol narawan.

Samtaem, ol pikinini oli no save luksave hamas eksampol blong olgeta i save blesem ol narawan. Yusum ol ves ia blong leftemap tingting blong olgeta blong letem laet blong olgeta i saen.

Samfala Aktiviti we Yu Save Mekem

• Talem long ol pikinini se 3 Nifae 12:14–16 i abaot olgeta, mo afta, ridim skripja ia laod. Eni taem we yu ridim “yufala” o “blong yufala,” poenem ol pikinini, mo askem olgeta blong oli poenem olgetawan bakegen.

• Soem wan tojlaet long ol pikinini, mo invaetem wan long olgeta blong onem tojlaet ia. Eksplenem se taem yumi folem Sevya, i olsem we yumi stap onem wan laet we i save helpem ol narawan blong folem Hem tu. Afta, kavremap o haedem laet, mo askem ol pikinini blong talem sam samting we oli save mekem blong stap ol gud eksampol long ol narawan. Evri taem we oli mekem, mekem olgeta oli karemaot wanem i kavremap laet (luk tu long aktiviti pej blong wik ia.)

• Singsing wan singsing tugeta, we i leftemap tingting blong ol pikinini blong oli saen olsem wan laet, olsem “Shine On” o “I Am like a Star” (Children’s Songbook, 144, 163). Talem long ol pikinini abaot laet we yu stap luk long olgeta taem oli mekem “ol gudfala wok,” mo eksplenem long olgeta olsem wanem laet mo eksampol blong olgeta i stap helpem ol narawan mo i givim insperesen long yu tu blong mekem ol gudfala wok.

3 Nifae 14:7

Papa long Heven i ansarem ol prea blong mi.

Ves ia i save helpem ol pikinini blong andastanem se God bae i harem mo ansarem ol prea blong olgeta.

Samfala Aktiviti we Yu Save Mekem

• Taem yu stap ridim 3 Nifae 14:7, invaetem ol pikinini blong mekem ol aksen we i ripresentem wanwan long ol invitesen blong Sevya insaed long ves ia. Eksampol, oli save resemap han blong olgeta (askem), mekem spaeglas wetem han blong olgeta (lukaotem), o mekem oli noknok long doa (noknok). Helpem ol pikinini blong tingting long sam samting we oli save talem mo askem long prea blong olgeta. Eksplenem se, yumi save talem eni samting long Papa long Heven, mo bambae Hem i lisin from se Hem i lavem yumi.

• Invaetem ol pikinini blong soem long yu wanem nao oli stap mekem wetem han blong olgeta, mo wetem ae mo hed blong olgeta taem oli stap prea. Yusum wan singsing olsem “We Bow Our Heads” (Children’s Songbook, 25) blong helpem yu. ?Huia nao yumi stap toktok long hem taem yumi stap prea? Serem testemoni blong yu se Papa long Heven i stap harem ol prea blong yumi.

3 Nifae 14:24–27

Sevya i wantem mi blong harem mo mekem wanem we Hem i stap tijim.

Blong harem nomo ol toktok blong Sevya, hem i no inaf. Olgeta nomo we oli stap laef folem ol tijing blong hem oli save stanap agensem ol strong win blong laef.

Samfala Aktiviti we Yu Save Mekem

• Singsing tugeta long “The Wise Man and the Foolish Man” (Children’s Songbook, 281), o ridim 3 Nifae 14:24–27. Helpem ol pikinini blong oli riplesem nem blong “waes man” wetem nem blong olgeta taem oli stap singsing. ?From wanem haos blong waes man i stanap strong long taem blong strong win? Luklukbak long ves 24 blong poenemaot gud se hem i bin mekem tugeta, hem i harem mo hem i mekem wanem we Sevya i talem long hem.

• Soem wan ston mo sam sanbij long ol pikinini. Askem olgeta blong poen i go long ston taem yu tokbaot wan joes blong folem Sevya, mo poen i go long sanbij taem yu tokbaot wan joes blong no stap folem Hem. Testifae se, taem yumi mekem wanem Sevya i talem, yumi stap strong olsem wan haos we oli bildim antap long wan strong ston.

Stap Tijim Doktrin: Ol Bigfala Pikinini

3 Nifae 12:6

Mi mas hanggri mo tosta from stret mo gud fasin.

Evriwan i save andastanem fasin blong stap hanggri mo tosta; Sevya i tokbaot ol filing ia blong tijim yumi wei we yumi sapos blong fil abaot fasin blong lukaotem stret mo gud fasin.

Samfala Aktiviti we Yu Save Mekem

• No letem ol nara pikinini oli harem, nao yu askem wan pikinini blong priten blong kakae o blong drink, mo yu letem ol nara pikinini oli traem talem se hem i stap mekem wanem. ?I fil olsem wanem blong kakae ol gudfala kaekae, o dring klin wota ?Olsem wanem nao yumi stap fidim spirit blong yumi? Invaetem ol pikinini blong ridim 3 Nifae 12:6 blong faenemaot wanem we Sevya i wantem yumi blong “hanggri o tosta” from. ?Olsem wanem nao yumi soem se yumi wantem stret mo gud fasin semmak olsem we yumi wantem kaekae mo drink?

• Tekem sam pikja we i soem drink mo kaekae, mo putum nem blong wanwan pikja wetem ol skripja refrens, olsem Ol Sam 119:103; Jon 6:35; 2 Nifae 32:3; Inos 1:4; o 3 Nifae 20:8. Askem ol pikinini blong ridim ol skripja mo tokbaot wanem oli stap tijim abaot wanem oli save mekem blong soem se yumi stap hanggri mo stap tosta from stret mo gud fasin. Serem wan eksperiens we yu bin filim se “yu fulap long Tabu Spirit,” mo invaetem ol pikinini blong serem eksperiens blong olgeta.

3 Nifae 13:1–8, 16–18

Mi mas mekem ol gudfala samting from ol raet risen.

Olgeta ves ia oli stap talem se ol gudfala wok oli no naf—ol wok blong yumi, lav we yumi gat long God nao i mas pusum yumi blong mekem olgeta, mo from yumi wantem blong wok blong Hem.

Samfala Aktiviti we Yu Save Mekem

• Askem wanwan pikinini blong stadi gud long 3 Nifae 13:1–4, 5–8, o 16–18 mo faenemaot ol gudfala wok we oli tokbaot long ol ves ia (eksplenem se “givhan” long ol ves ia, i minim blong givim samting long ol puaman). ?From wanem nao Sevya i talem se bae yumi no olsem sam long ol pipol we oli stap mekem olgeta samting ia?

• Givim long wanwan pikinini wan pis pepa wetem wan stret mo gud aksen we oli raetem long hem (o letem olgeta oli tingting long eksampol blong olgetawan bakegen). Askem olgeta blong tingting long sam gud risen mo sam nogud risen blong stap mekem olgeta samting ia. Leftemap tingting blong olgeta, blong oltaem mekem ol gudfala samting from ol raet risen.

3 Nifae 14:21–27; 15:1

Sefti long saed blong spirit i kam taem yumi harem mo mekem wanem we Sevya i stap tijim.

“Ren” mo “ol bigfala wota we oli ron” oli kam long yumi evriwan long laef, be yumi save gotru long ol tes sapos yumi mekem tugeta ia, yumi harem mo yumi mekem wanem we Jisas i stap tijim.

Samfala Aktiviti we Yu Save Mekem

• Olsem wan klas, ridim 3 Nifae 14:21–27 mo 15:1, mo askem ol pikinini blong stanap evri taem we yu ridim toktok ia “mekem.” ?From wanem nao Sevya i poenem bigwan blong mekem ol samting we Hem i talem, be i no jes blong harem nomo o blong stap tingbaot nomo? Invaetem ol pikinini blong droem wan pikja blong ol ves 24–25 mo raetem “Jisas” long ston, mo raetem wan samting we Jisas i tijim yumi blong mekem. Singsing tugeta “The Wise Man and the Foolish ManChildren’s Songbook,281).

• Invaetem ol pikinini blong stanap, mo askem olgeta blong traem tingting se wan leg i ripresentem fasin blong stap harem ol toktok blong Sevya, mo nara leg i ripresentem fasin blong mekem ol toktok blong Sevya. Invaetem olgeta blong leftemap “mekem” leg mo balensem olgeta long “harem” leg. ?Bae wanem i hapen sapos wan strong win i blo i kam insaed long rum? Yusum eksampol ia blong soemaot from wanem hem i sef moa blong mekem wanem we Sevya i talem, be i no jes blong harem ol toktok blong Hem.

Stap Leftemap Tingting blong Lanem Samting long Hom

Invaetem ol pikinini blong jusum wan samting we oli lanem abaot tijing blong Jisas tedei, mo disaed olsem wanem nao bae oli go mekem. ?Olsem wanem nao aksen blong olgeta bae i wan laet long ol famli mo fren blong olgeta?

Stap Kam Antap long Fasin blong Yumi blong Stap Tij

Stretem ol aktiviti folem ol nid we i stap. No tekem se ol aotlaen ia oli ol instraksen we yu mas folem. Be, yusum olgeta olsem wan ples blong kasem sam aedia blong givim laet long insperesen blong yuwan taem yu stap tingting hevi long ol nid blong ol pikinini we yu stap tijim. Long sam kes, maet bae yu filim insperesen blong stretem wan aktiviti blong ol smol pikinini blong tijim i go long ol pikinini we oli moa bigwan, o nara wei raon.