“14–20 Septemba. 3 Nifae 8–11: ‘Girap mo Kam Fored long Mi,’” Kam Folem Mi—Blong Praemeri: Buk blong Momon 2020 (2020)
“14–20 Septemba. 3 Nifae 8–11,” Kam Folem Mi—Blong Praemeri: 2020
Mi Mi Laet blong Wol, i kam long James Fullmer
14–20 Septemba
3 Nifae 8–11
“Girap mo Kam Fored long Mi”
Ridim 3 Nifae 8–11 mo gat ol pikinini we yu stap tijim oli stap long maen blong yu. Ol aedia insaed long aotlaen ia oli save helpem yu blong lidim yu long taem we yu stap rere.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Soem wan pikja blong Jisas Kraes we i kamkamaot long Ol Amerika, semmak olsem hemia we i stap long aotlaen blong wik ia insaed long Kam Folem Mi—Blong Wanwan Man, Woman o Famli. Invaetem ol pikinini blong poenemaot ol ditel insaed long pikja, mo serem wan samting we oli save abaot stori we i stap long pikja ia.
Stap Tijim Doktrin: Ol Smol Pikinini
Jisas Kraes i invaetem mi blong go long Hem.
Bae yu no save serem wetem ol pikinini evri ditel blong taem ia we Sevya i bin kamkamaot long ol pipol blong Nifae, be yu save helpem olgeta blong oli filim lav ia we Hem i bin soem long ol pipol, olsem we i stap long 3 Nifae 8–11.
Samfala Aktiviti we Yu Save Mekem
-
Tokbaot long ol pikinini abaot ol strong win mo tudak, olsem we i stap long 3 Nifae 8, mo yu lukaotgud blong yu no mekem olgeta oli fraet o filim nogud. Yu save yusum “Japta 42: Ol Saen blong Taem we Kraes Bae I Hang long KrosOl Stori long Buk blong Momon, 117—19, o vidio blong hem long ChurchofJesusChrist.org). Askem ol pikinini olsem wanem bae oli filim sapos oli bin stap long wan long ol strong win mo tudak long tetaem ia. Eksplenem se ol strong win mo tudak, oli bin ol saen se Jisas i bin ded, mo soem wan pikja blong taem we oli hangem Kraes long kros (luk long Gospel Art Buk, namba 57). Afta, ridim 3 Nifae 9:13. ?Wanem nao Jisas i bin talem se bae Hem i mekem long olgeta we oli sakem sin blong olgeta? Helpem ol pikinini blong andastanem se toktok ia “mekem i kam oraet” long ves ia, i minim se Jisas bae i fogivim olgeta.
-
Soem pikja we i stap long aotlaen blong wik ia we i stap long Kam Folem Mi—Blong Wanwan Man, Woman mo Famli, taem yu stap talem, wetem toktok blong yu, taem ia we Sevya we i bin laef bakegen long ded i bin kamaot long Ol Man blong Nifae mo Ol Man blong Leman. Ridim ol sot skripja long 3 Nifae 11 we bae i helpem olgeta blong filim se taem ia, i bin wan tabu taem. Invaetem olgeta blong sarem ae blong olgeta, mo traem pikjarem olsem wanem bae oli filim sapos oli kam blong luk Jisas. O soem fas minit blong vidio ia: “My Joy Is Full” (ChurchofJesusChrist.org). Talem long ol pikinini olsem wanem nao yu filim taem yu stap ridim mo tingting hevi long ol taem ia. Testifae se Jisas i wantem se yumi evriwan i mas kam long hem mo filim lav blong Hem. Finisim aktiviti pej ia wetem ol pikinini.
Jisas i stap protektem ol pipol blong Hem semmak olsem wan mama faol i stap protektem ol smol pikinini faol blong hem.
Pikja ia, blong wan mama faol i pulum tugeta ol smol pikinini blong hem, i tijim abaot kamfot mo proteksen we Sevya i givim sapos yumi go long Hem.
Samfala Aktiviti we Yu Save Mekem
-
Soem wan pikja blong wan mama faol we i stap kea long ol pikinini faol blong hem. Ridim 3 Nifae 10:6, mo talem long ol pikinini abaot wei we wan mama faol i singaotem ol pikinini faol blong hem, mo i protektem olgeta andanit long ol wing blong hem taem i gat wan denja. Toktok raon long wei we Jisas i semmak long mama faol mo yumi olsem ol pikinini faol. ?Olsem wanem nao yumi save go long Hem blong save faenem wan sef ples?
-
Putum wan pikja blong Jisas Kraes antap long wol. Invaetem ol pikinini blong wokbaot raon long klasrum taem yu stap ridim 3 Nifae 10:4 wetem wan laod voes. Talem long olgeta blong muv i go kolosap long pikja blong Jisas taem oli harem ol toktok ia “karem” o “karem i kam.” Ripitim aktiviti ia taem yu stap ridim ol ves 5 mo 6. Serem wetem ol pikinini olsem wanem yu kam long Sevya blong faenem wan sef ples, mo testifae se bambae Hem i protektem yumi long ol denja long saed blong spirit taem yumi stap obei ol komanmen blong Hem.
Jisas Kraes i wantem mi blong kasem baptaes.
Ol pikinini we yu stap tijim, oli stap rere blong kasem baptaes. Ol tijing blong Kraes, long ol skripja ia, i save helpem olgeta blong save from wanem nao baptaes i impoten.
Samfala Aktiviti we Yu Save Mekem
-
Ridim 3 Nifae 11:21–26, mo invaetem ol pikinini blong stanap evri taem oli stap harem toktok ia, “baptaes.” Eksplenem se Jisas i bin tijim yumi raet fasin blong kasem baptaes. Soem wan pikja blong wan pikinini we i kasem baptaes (luk long Gospel Art Buk, namba 104). Sapos ol pikinini oli bin luk wan baptaes bifo, invaetem olgeta blong tokbaot wanem we oli bin luk. ?Huia nao i bin mekem baptaes, mo hem i mekem baptaes ia olsem wanem?
-
Longtaem bifo klas, invaetem wan papa blong wan long ol pikinini blong kam long klas blong yu mo serem, wetem ol pikinini, from wanem hem i impoten blong yumi kasem baptaes andanit long wota tru long wan we i holem prishud. Hem i save eksplenem tu long ol pikinini wanem bae i hapen taem oli baptaes, mo ol blesing we bae oli kasem. Leftemap tingting blong papa ia blong yusum 3 Nifae 11:23–26 long wanem we bae hem i eksplenem.
Stap Tijim Doktrin: Ol Bigfala Pikinini
Taem mi stap long tudak, Jisas Kraes i laet blong mi.
Wan mesej we i gat paoa long ol japta ia, i we, Jisas Kraes i laet blong wol ia, mo Hem i save laet blong laef blong yumi.
Samfala Aktiviti we Yu Save Mekem
-
Tugeta, ridim 3 Nifae 8:5–7, 11–23, mo 10:9–13 (sapos i posibol, mekem rum i tudak smol taem yu stap rid). Stop wanwan taem, mo askem ol pikinini se bae i olsem wanem blong filim ol samting ia we i bin hapen. Wetem ol pikinini, ridim sam long ol toktok we Jisas Kraes i talem long ol pipol taem oli bin stap long tudak (luk long 3 Nifae 9:13–14, 18). ?From wanem Jisas Kraes i bin singaotem Hemwan Laet blong Wol? ?Wanem nao Jisas i bin invaetem ol pipol, mo yumi tu, blong mekem, blong mekem se Hem i kam laet blong yumi? (luk long 3 Nifae 9:20–22).
-
Soem long ol pikinini wan map blong wol, mo helpem olgeta blong faenem Jerusalem mo Ol Amerika. Eksplenem se taem blong prapa spolem gud evri samting, olsem we i stap long 3 Nifae 8 i bin wan saen long ol pipol long Ol Amerika se Jisas Kraes i bin hang antap long kros long Jerusalem. Tugeta, ridim 3 Nifae 11:1–15, mo askem ol pikinini blong talem long yu taem oli faenem wan samting insaed long ol ves ia we i helpem olgeta blong filim lav we God i gat long olgeta. Serem ves 37, mo testifae se Sevya i lavem evri pikinini. Serem testemoni blong yu abaot trutok abaot wanem yu stap ridim.
Wan afta Wan i kam long Walter Rane
Mi save lanem olsem wanem blong haremsave voes blong God insaed long laef blong mi.
Long fas taem, ol pipol oli no bin andastanem voes we oli bin harem we i kam long heven. ?Wanem nao ol pikinini oli save lanem aot long ol stori ia abaot fasin blong kasem revelesen?
Samfala Aktiviti we Yu Save Mekem
-
Ridim 3 Nifae 11:1–4 wetem ol pikinini, mo stop blong askem ol kwestin olsem “?Yu ting se from wanem nao ol pipol oli no bin save andastanem voes ia?” Afta, askem olgeta blong ridim ol ves 5–7 blong faenemaot wanem nao ol pipol oli bin mekem blong helpem olgeta blong andastanem voes ia insaed long hat blong olgeta. ?Olsem wanem nao yumi save traem blong lisin long God taem hem i stap toktok long hat blong yumi tru long Tabu Spirit?
-
Plei wan rekoding blong wan hym, o wan singsing blong ol pikinini, i slo we i slo, we i had blong harem. Askem ol pikinini sapos oli save andastanem ol toktok blong singsing ia. Afta, helpem ol pikinini blong luklukgud insaed long 3 Nifae 11:3 mo faenem ol ples we i tokbaot gud voes we i kam long heven. ?From wanem God i no stap toktok long yumi long wan voes we i “laod” o i “strong”? ?Wanem nao yumi save mekem blong harem Hem i gud moa?
Stap Leftemap Tingting blong Lanem Samting long Hom
Invaetem ol pikinini blong talem long wan abaot visit blong Jisas long Ol Amerika—sapos i posibol, wan we i no save wan samting abaot stori ia.
Stap Kam Antap long Fasin blong Yumi blong Stap Tij
Toktok raon long fasin blong spolem man wetem lav. “Samtaem, wan pikinini i mekem sam samting long wan wei we bae i stopem ol narawan blong lanem samting insaed long klas. Taem hemia i hapen, gat longfala tingting, gat lav, mo andastanem olgeta from ol jalenj we maet pikinini ia i stap fesem. … Sapos pikinini ia we i stap spolem ol narawan i gat ol spesel nid, toktok long wod o stek disabiliti speselis, o visitim disabilities.ChurchofJesusChrist.org blong faenemaot wei blong lukluk gud long olgeta we oli gat ol spesel nid” (Teaching in the Savior’s Way, 26).