Samuel, Wan Man blong Leman Antap long Wol i kam long Arnold Friberg

31 Ogis–6 Septemba

Hileman 13–16

“Ol Gudnius blong Bigfala Glad”

Rere blong tij taem yu ridim Hileman 13–16 mo stap tingting hevi long wijwan aktiviti nao bae i gudwan blong ol pikinini oli lanem ol trutok long ol japta ia.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Soem wan pikja blong Samuel, wan Man blong Leman, mo invaetem ol pikinini blong serem wan samting we oli save abaot hem. Eksampol: oli save storian long stori blong Samuel we i stap tij antap long wol, o oli save storian abaot ol saen we hem i talem se bae oli kamkamaot long taem blong Jisas bae i bon?

Stap Tijim Doktrin: Ol Smol Pikinini

Hileman 13:2–5

Tabu Spirit i save toktok long hat blong yumi.

Taem we Samuel, wan Man blong Leman i bin kasem oda blong prij long Ol Man blong Nifae, Papa long Heven i bin helpem hem blong save, insaed long hat blong hem, wanem nao hem i mas talem.

Samfala Aktiviti we Yu Save Mekem

• Tijim long ol pikinini se, yumi, yumi toktok long wanwan long yumi we yumi yusum ol toktok, be Tabu Spirit i save pasem toktok tru long ol filing we yumi filim insaed long hat blong yumi. Invaetem olgeta blong holem han blong olgeta ova long hat blong olgeta evri taem we yu ridim toktok ia, “hat” long Hileman 13:2–5. Helpem olgeta blong flasem ol pis pepa we oli gat ol hat sep we i talem se: “Spirit i stap toktok long mi insaed long hat blong mi.”

• Talem long ol pikinini we taem bae oli baptaes mo kasem konfemesen, bae oli kasem presen we I Tabu Spirit blong helpem olgeta blong save wanem nao Papa long Heven i wantem olgeta blong mekem mo talem. Helpem olgeta blong tingting long ol samting we Tabu Spirit i save talem long olgeta, mo invaetem olgeta blong serem wanem oli save mekem blong folem ol kwaet toktok blong Hem.

Hileman 14:2–7, 20–25

Ol profet oli tij abaot Jisas Kraes.

Stori blong Samuel, Man blong Leman i wan janis blong stap tijim ol pikinini se evri profet oli stap tij abaot Jisas Kraes.

Samfala Aktiviti we Yu Save Mekem

• Soem pikja blong Samuel, Man blong Leman we i stap long aotlaen blong wik ia insaed long Kam Folem Mi—Blong Wanwan Man, Woman mo Famli, mo talem long ol pikinini, long simpol toktok, abaot eksperiens blong hem we i stap long Hileman 13–16. Mo tu, yu save yusum “Japta 40: Samuel, wan Man blong Leman I Stap Talem Abaot Jisas Kraes” (Ol Stori long Buk blong Momon 111–13, o vidio we i go wetem long ChurchofJesusChrist.org). Letem ol pikinini oli serem wanem oli save abaot Samuel, Man blong Leman.

• Singsing tugeta long “Samuel Tells of the Baby Jesus” o namba seven ves blong “Book of Mormon Stories” (Children’s Songbook, 36, 118–19). Serem wan samting we yu laekem tumas abaot Samuel, mo letem ol pikinini oli serem wanem we oli laekem abaot stori blong hem.

• Haedem ol pikja raon long klasrum we i ripresentem ol saen we Samuel i bin profesae long hem insaed long Hileman 14:2–7 mo 20–25. Ridim wan sentens we i tokbaot gud wan long ol saen ia, mo askem ol pikinini blong faenem pikja blong saen ia. Eksplenem se ol saen ia oli bin helpem Ol Man blong Nifae blong save abaot Jisas Kraes. Testifae se, olsem Samuel, evri profet oli testifae abaot Jisas Kraes.

Profet i poenem yumi i go long Jisas Kraes.

Hileman 16:1–6

Mi kasem blesing taem mi folem profet.

Papa blong yumi long Heven i givim yumi wan profet blong helpem yumi blong save tingting blong Hem mo blong yumi save folem plan blong Hem. Yumi gat blesing taem yumi stap lisin long ol toktok blong profet mo stap obei.

Samfala Aktiviti we Yu Save Mekem

• Helpem ol pikinini blong bildim wan smol wol wetem ol lego brikis o wetem ol buk. Yusum wan smol pleiplei man blong ripresentem Samuel, mo letem ol pikinini oli tekem taem blong helpem “Samuel” blong klaem long wol blong tijim ol pipol abaot Jisas Kraes. (Luk tu long aktiviti pej blong wik ia.) Serem sam sentens aot long Hileman 16:1 mo 5 blong eksplenem se sam pipol oli biliv long Samuel mo oli bin kasem baptaes. Yusum ol sentens we oli kam long Hileman 16:2 mo 6 blong soem se ol narawan oli no bin biliv mo oli bin kros long Samuel. Testifae se ol pipol we oli stap folem ol profet, oli kasem blesing.

• Soem wan pikja blong Sevya, mo askem wan pikinini blong ripresentem profet mo lidim ol nara pikinini oli go raon long rum mo semtaem oli singsing sam ves blong “Follow the Prophet” (Children’s Songbook, 110–11) o, wan nara singsing abaot ol profet. Afta, askem pikinini we i ripresentem profet blong lidim ol pikinini i go long pikja blong Sevya. Testifae se sapos yumi stap folem profet, bambae hem i lidim yumi long Jisas Kraes. Serem sam samting we ol profet blong yumi oli tijim abaot Jisas i no longtaem i pas. ?Olsem wanem nao yumi save folem kaonsel blong hem?

Stap Tijim Doktrin: Ol Bigfala Pikinini

Hileman 13:2–4

Tabu Spirit i save toktok long hat blong yumi.

Sam dei, ol pikinini we yu stap tijim bambae oli nidim blong save olsem wanem blong mekem wanem we Samuel i bin mekem: serem mesej we Lod i putum insaed long hat blong olgeta.

Samfala Aktiviti we Yu Save Mekem

• Soem pikja blong Samuel, wan man blong Leman (olsem hemia insaed long Kam Folem Mi—Blong Wanwan Man, Woman mo Famli), mo askem ol pikinini olsem wanem Samuel i bin save wanem blong talem taem we hem i bin stap prij antap long wol blong siti. Invaetem olgeta blong luklukgud long Hileman 13:2–4 blong kasem wan ansa. Tokbaot wan taem we Tabu Spirit i bin helpem yu blong save insaed long hat blong yu wanem nao God i bin wantem yu blong mekem o talem. Askem ol pikinini blong serem eni semmak eksperiens olsem we oli bin gat.

• Soem wan pikja blong profet we i stap laef we i stap toktok long wan jeneral konfrens. Talem long ol pikinini se God i talem long profet wanem blong talem long yumi, semmak olsem we Hem i bin talem Samuel wanem blong talem long Ol Man blong Nifae. Toktok tugeta abaot ol samting we profet i bin talem we oli bin wan insperesen long yu o long ol pikinini.

Hileman 14:2–28

Ol profet oli tij abaot Jisas Kraes.

Stamba tingting blong mesej blong Samuel i blong testifae abaot Jisas Kraes mo blong invaetem ol pipol blong oli sakem sin mo blong oli kam long Kraes. Ol profet blong yumi tedei, oli gat semmak wok.

Samfala Aktiviti we Yu Save Mekem

• Invaetem haf blong ol pikinini blong ridim Hileman 14:2–6 mo droem ol pikja blong ol saen blong taem we Jisas i bon i kam long wol. Invaetem nara haf blong klas blong ridim Hileman 14:20–28 mo droem ol pikja blong ol saen blong taem we Jisas i ded. Afta, askem wanwan grup blong serem wanem oli bin droem. Tugeta, ridim Hileman 14:11–12, mo askem ol pikinini blong oli lisin long risen we Samuel i bin profesae abaot ol saen ia. ?Tedei, olsem wanem nao yumi kam blong lanem abaot Jisas Kraes?

• Eksplenem se, semmak olsem Samuel, wan man blong Leman i bin tij abaot Jisas Kraes, nao ol profet we oli laef oli mekem semmak tedei. Serem wan toktok we i kamaot long las jeneral konfrens, we insaed long hem, profet we i stap laef i stap testifae abaot Kraes. Askem ol pikinini blong serem wanem profet i bin tijim olgeta abaot Jisas Kraes.

Hileman 16:1–6

Mi kasem blesing taem mi folem profet.

Papa blong yumi long Heven i givim yumi wan profet blong helpem yumi blong save tingting blong Hem mo blong yumi save folem plan blong Hem. Yumi gat blesing taem yumi stap lisin long mo stap obei ol toktok blong profet.

Samfala Aktiviti we Yu Save Mekem

• Ridim laod Hileman 16:1 mo 5, mo askem ol pikinini blong stanap taem oli harem wan samting we ol pipol oli bin stap mekem taem oli bin bilivim ol toktok blong Samuel. Afta, ridim ol ves 2 mo 6, mo askem ol pikinini blong sidaon taem oli harem wan samting we oli save se ol pipol oli mekem taem oli no stap biliv. ?Olsem wanem nao yumi save soem se yumi bilivim ol toktok blong profet we i stap laef?

• Soem wan pikja blong profet we i stap laef, mo askem ol pikinini blong oli serem wanem we oli save abaot hem. Serem olsem wanem yu stap traem blong folem ol tijing blong hem mo olsem wanem we, taem yu mekem olsem, i bin blesem yu.

Stap Leftemap Tingting blong Lanem Samting long Hom

Invaetem ol pikinini blong lanem abaot wan samting we profet i bin talem mo serem wetem klas long nekis wik.

Stap Kam Antap long Fasin blong Yumi blong Stap Tij

Leftemap tingting blong ol pikinini blong oli askem kwestin. “ hem i traehad blong luk ol kwestin blong ol pikinini olsem ol janis, be i no olsem wan samting we i kam spolem yumi, mo i blokem lesen blong yu. Ol kaen kwestin olsem, oli givim ol bigfala niu tingting long wanem ol pikinini oli stap tingting long hem, long wanem wari oli gat yet, mo olsem wanem blong fesem ol samting we oli stap lanem (luk tu long Teaching in the Savior’s Way, 25–26).