“24–30 Ogis. Hileman 7–12: ‘Tingbaot Lod,’” Kam Folem Mi—Blong Praemeri: Buk blong Momon 2020 (2020)
“24–30 Ogis. Hileman 7–12,” Kam Folem Mi—Blong Praemeri: 2020
Pikja blong Nifae insaed long wan taoa long garen we i kam long Jerry Thompson
24–30 Ogis
Hileman 7–12
“Tingbaot Lod”
Taem yu stap ridim Hileman 7–12, tingting hevi long wei we ol stori mo ol prinsipol insaed long ol japta ia oli save blesem ol pikinini we yu stap tijim. Ol tingting insaed long aotlaen ia oli kam sapotem insperesen we yu kasem.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Askem ol pikinini wanem nao oli save abaot profet Nifae, pikinini blong Hileman (luk long Hileman 7–12). Sapos i nid, eksplenem wanem i defren bitwin profet ia, we nem blong hem i Nifae, mo profet ia, we nem blong hem i Nifae we i stap long stat blong Buk blong Momon.
Stap Tijim Doktrin: Ol Smol Pikinini
Lod i wantem mi blong tingbaot Hem.
Nifae i stap askem hemwan se, olsem wanem nao ol pipol blong hem oli tanem baksaed blong olgeta long God mo oli fogetem Hem. ?Olsem wanem nao yu save helpem ol pikinini blong lanem ol wei we oli save tingbaot Papa long Heven mo Jisas?
Samfala Aktiviti we Yu Save Mekem
-
Serem wetem ol pikinini wan eksperiens we yu bin fogetem wan impoten samting. Askem olgeta sapos i bin gat wan taem we oli bin fogetem wan samting. Ridim Hileman 7:20 long olgeta, mo eksplenem se Ol Man blong Nifae oli bin jusum blong fogetem God. Profet Nifae i wantem olgeta blong oli tingbaot God. Putum insaed long wan basket, ol pikja we oli ripresentem ol wei we ol pikinini oli save tingbaot Papa long Heven mo Jisas. Letem ol pikinini oli gat janis blong jusum wan pikja, mo serem olsem wanem yumi save tingbaot God evri dei.
-
Helpem ol pikinini blong finisim aktiviti pej blong wik ia.
Ol profet oli testifae abaot Jisas Kraes.
Nifae i testifae se bae Jisas Kraes i kam, mo hem i bin invaetem ol pipol blong hem blong oli sakem sin, mo oli folem Hem. Yusum ol japta ia blong tijim long ol pikinini se ol profet oli testifae abaot Jisas Kraes.
Samfala Aktiviti we Yu Save Mekem
-
Soem wan pikja blong Jisas Kraes, mo talem long ol pikinini se ol profet, semmak olsem Nifae, oli stap invaetem yumi blong folem Jisas. Ridim ol toktok ia abaot ol profet we oli kam long Hileman 8:22: “Oli bin testifae long saed blong taem we Kraes bae i kam, mo oli bin wet long hem mo oli bin hapi long dei blong hem, we bae i kam.” Serem wetem ol pikinini sam samting we profet blong yumi we i stap laef i bin talem abaot Sevya.
-
Sing tugeta wan singsing abaot ol profet, olsem “Follow the Prophet” (Children’s Songbook, 110). Pikimap wan ki sentens aot long singsing ia, mo raetem wan toktok aot long sentens ia long plante defren pepa we yu katem olsem sep mak blong leg. Afta, putum ol pepa ia long floa, mo mekem se oli lidim man i go long pikja blong Sevya. Invaetem ol pikinini blong folem trak blong ol mak blong leg ia, mo helpem olgeta blong oli ridim ol toktok.
Bambae mi obei long Papa long Heven.
Eksampol blong Nifae blong stap obei, i save givim insperesen long ol pikinini we yu stap tijim blong obei long Lod.
Samfala Aktiviti we Yu Save Mekem
-
Ridim Hileman 10:2, 11–12, mo helpem ol pikinini blong oli andastanem se Nifae i bin obei long God. Invaetem ol pikinini blong aktemaot wanem Nifae i bin mekem. Eksampol, askem olgeta blong wokbaot i go from wan saed blong rum (olsem se oli stap gobak hom), stop, tanem raon, mo wokbaot i go long nara saed blong rum (olsem se oli stap gobak tijim ol pipol). Helpem olgeta blong luk se Nifae i wantem blong obei long Lod iven we hem i gat ol had samting blong mekem.
-
Helpem ol pikinini blong oli andastanem se, samtaem, Papa long Heven i wantem yumi blong mekem wan samting we i defren long wanem we yumi wantem mekem, be yumi save obei long Hem semmak olsem we Nifae i bin mekem. Serem ol toktok olsem: “Samtaem, mi wantem kros, be Papa long Heven i wantem mi blong stap … ,” mo letem ol pikinini oli finisim sentens ia. Leftemap tingting blong ol pikinini blong oli rimemba blong stop mo tingbaot wanem Papa long Heven i wantem olgeta blong mekem, mo afta, go mekem samting ia.
Stap Tijim Doktrin: Ol Bigfala Pikinini
Bae mi sef long saed blong spirit taem mi stap folem profet.
Presiden James E. Faust i tijim: “Sefti blong yumi i stap taem yumi stap mekem folem wanem we [Presiden blong Jos] i stap talem, mo stap folem kaonsel blong hem” (“Continuous Revelation,” Ensign, Nov. 1989, 10).
Samfala Aktiviti we Yu Save Mekem
-
Invaetem ol pikinini blong mekem wan lis, antap long bod, blong ol samting we wan profet i stap mekem (luk long “Profet,” Gaed long Ol Skripja, scriptures.ChurchofJesusChrist.org). Helpem olgeta blong lukluk insaed long Hileman 7:1–2, 27–29; 8:22–23; mo 10:3–4, 6–7 blong luk olsem wanem Nifae i bin mekem sam long ol samting ia long lis blong olgeta. ?Wetaem nao yumi bin luk profet blong yumi tedei, i stap mekem olgeta samting ia? Serem testemoni blong yu abaot profet we i stap laef. Blong soemaot hamas ol profet oli impoten, soem fas minit blong vidio ia “Watchman on the Tower” (ChurchofJesusChrist.org).
-
Tugeta, ridim Hileman 11:3–7 (o luklukbak long“Japta 39: Nifae I Kasem Bigfala Paoa,” Ol Stori long Buk blong Momon, 108–10, o vidio we i go wetem long ChurchofJesusChrist.org). Askem ol pikinini blong lisin long wanem i bin hapen long ol pipol we oli no bin lisin long ol profet. ?Wanem i save hapen taem yumi no stap lisin long profet? ?Olsem wanem nao yumi kasem blesing taem yumi stap folem Hem? Serem wan samting we profet blong yumi i bin tijim, mo leftemap tingting blong ol pikinini blong folem ol tijing blong hem.
Lod i wantem mi blong tingbaot Hem.
Ol pikinini we yu stap tijim bae oli fesem ol samting we i karemaot tingting blong olgeta, mo bae i mekem olgeta oli fogetem Papa mo Jisas Kraes. ?Olsem wanem nao yu save givim insperesen long ol pikinini blong oli givim taem long ol samting long saed blong spirit?
Samfala Aktiviti we Yu Save Mekem
-
Tugeta, ridim Hileman 7:20–21, mo askem ol pikinini se oli ting se i minim wanem blong fogetem God. Eksplenem se toktok ia, fogetem i save minim tu se “no wantem save,” o “minim blong no wantem save.” Soem wan pikja blong Sevya, mo invaetem ol pikinini blong droem ol samting we oli spenem tumas taem blong mekem we i save mekem olgeta oli fogetem Lod. Putum droing blong olgeta long fored blong pikja blong Jisas. Askem ol pikinini blong tingting long sam samting we oli save mekem evri dei blong tingbaot Papa long Heven mo Jisas. Taem oli stap serem ol tingting blong olgeta, tekemaot ol droing ia, wan afta wan, kasem taem we pikja blong Sevya i kamkamaot.
-
Invaetem ol pikinini blong finisim aktiviti pej blong wik ia.
Taem mi tingting hevi long ol toktok blong God, mi save kasem revelesen.
?Olsem wanem long ol pikinini we yu stap tijim? ?Oli save mining blong stap tingting hevi? Helpem olgeta blong andastanem se Nifae i kasem blesing blong kasem revelesen taem hem i bin tingting hevi long wanem Lod i bin soem long hem.
Samfala Aktiviti we Yu Save Mekem
-
Helpem ol pikinini blong andastanem we i minim wanem blong tingting hevi (luk long “Tingting Hevi,” Gaed long Ol Skripja, scriptures.ChurchofJesusChrist.org). Invaetem olgeta blong tingting long sam nara toktok we i save talem se tingting hevi i minim wanem. Afta, askem olgeta blong ridim Hileman 10:1–3 mo riplesem toktok ia tingting hevi wetem ol toktok we oli stap tingting long hem. ?Wanem i bin hapen taem we Nifae i bin tingting hevi long ol skripja? (luk long Hileman 10:3–7). Serem wan taem we yu bin kasem wan revelesen afta we yu bin tingting hevi long wan skripja, o long wan revelesen blong tedei, o wan eksperiens long saed blong spirit.
-
Givim taem long ol pikinini blong oli ridim Hileman 10, o ridim japta ia tugeta, mo leftemap tingting blong olgeta blong faenem wan ves we bae oli wantem tingting hevi long hem long wik we i stap kam. Invaetem olgeta blong raetem ves ia we oli jusum long wan pepa o kad, mo oli putum samples blong mekem olgeta oli tingbaot ves ia long wik we i stap kam. Long wan nara klas long fiuja, givim taem long olgeta blong oli serem wanem oli bin lanem taem oli bin stap tingting hevi long ves ia.
Stap Leftemap Tingting blong Lanem Samting long Hom
Askem ol pikinini blong serem wetem ol famli blong olgeta wanem nao oli plan blong mekem blong tingbaot Papa long Heven mo Jisas Kraes evri dei. Oli save invaetem famli blong olgeta tu blong joenem olgeta long gol ia blong olgeta.
Stap Kam Antap long Fasin blong Yumi blong Stap Tij
Givim ol invitesen we i respektem fridom blong joes blong wanwan man. Taem yu stap invaetem ol pikinini blong tekem aksen long wanem yu bin tijim olgeta, tingting long sam wei blong givim ona long fridom blong joes blong olgeta taem oli stap mekem wanem we oli stap lanem. Eksampol: Afta long wan lesen abaot Sevya, yu save askem: “?Wanem nao bae yu yu mekem blong tingbaot Sevya long wik ia?