“3–9 Ogis. Alma 43–52: ‘Stanap Strong long Fet long Kraes,’” Kam Folem Mi—Blong Praemeri: Buk blong Momon 2020 (2020)
“3–9 Ogis. Alma 43–52,” Kam Folem Mi—Blong Praemeri: 2020
From Ol Blesing blong Fridom, i kam long Scott M. Snow
3–9 Ogis
Alma 43–52
“Stanap Strong long Fet long Kraes”
Taem yu stap mekem plan blong ol aktiviti, yu save faenem sam aedia blong tijim tugeta, ol yangfala pikinini mo ol pikinini we oli bigwan moa.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Askem ol pikinini blong oli serem wanem oli tingbaot abaot sam long ol pipol mo ol stori long Alma 43–52, olsem Kapten Moronae, o taetol blong fridom. Blong helpem olgeta blong tingbaot, soem ol pikja we oli stap long Ol Stori long Buk blong Momon, long Gospel Art Buk, o Kam Folem Mi—Blong Wanwan Man, Woman mo Famli.
Stap Tijim Doktrin: Ol Smol Pikinini
Alma 43:17–21; 48:7–8; 49:1–5; 50:1–6
Mi save faenem proteksen long saed blong spirit insaed long gospel.
Blong difendem Ol Man blong Nifae agensem Ol Man blong Leman, Moronae i bin mekem ol pipol blong hem oli rere wetem wan klos blong faet mo wetem ol strong fanis raon long ples blong olgeta. Ol hadwok blong hem oli tijim yumi olsem wanem yumi save faenem wan sef ples long saed blong spirit.
Samfala Aktiviti we Yu Save Mekem
-
Talem long ol pikinini wan smol samting abaot wo bitwin Ol Man blong Nifae mo Ol Man blong Leman (luk long Alma 43), mo talem bigwan se Ol Man blong Nifae oli bin werem wan klos blong faet blong protektem olgeta. Yu save yusum “Japta 31: Kapten Moronae I Winim SerahemnaOl Stori long Buk blong Momon,85–88 o vidio blong hem long ChurchofJesusChrist.org Ridim Alma 43:19, mo invaetem ol pikinini blong poenem ol pat blong bodi blong olgeta taem oli stap harem nem blong ol insaed long skripja ia.
-
Eksplenem se, olsem we Ol Man blong Nifae oli bin stap long wan wo yumi tu, yumi stap long wan wo long saed blong spirit agensem Setan, we i no wantem yumi blong stap obei long ol komanmen blong God. Droem wan pikinini long bod, mo helpem ol pikinini blong oli tingting long ol samting we oli stap protektem yumi long saed blong spirit, semmak olsem ol klos blong faet oli stap protektem ol bodi blong yumi (eksampol, prea, skripja riding, o blong stap kipim olgeta komanmen). Evri taem we ol pikinini oli tokbaot wan samting, droem wan pis blong klos blong faet ia long pikinini we yu droem antap long bod.
Tul blong Difendem Wan Siti blong Ol Man blong Nifae i kam long Minerva K. Teichert
Alma 46:11–16; 48:11–13, 16–17
Mi save fetful olsem Kapten Moronae.
Moronae i wan bigfala eksampol blong fet, strong paoa long tingting, mo fasin blong givim seves. Tingting long wei we yu save givim insperesen long ol pikinini blong folem eksampol blong hem.
Samfala Aktiviti we Yu Save Mekem
-
Soem wan pikja blong Moronae, we i stap long aotlaen blong wik ia long Kam Folem Mi—Blong Wanwan Man, Woman mo Famli. Talem long ol pikinini abaot taetol blong fridom mo wanem nao oli bin raetem long hem , mo yusum ol toktok we oli kamaot long Alma 46:11–16. Yu save go long “Japta 32: Kapten Moronae I Leftemap Taetol blong Fridom” (Ol Stori long Buk blong Momon, 89–90, o vidio we i go wetem long ChurchofJesusChrist.org). Letem ol pikinini oli help blong talem stori ia folem hamas i posibol. Poenemaot se Moronae i yusum taetol blong fridom ia blong helpem Ol Man blong Nifae blong tingbaot wanem nao i impoten long olgeta.
-
Helpem ol pikinini blong oli krietem wan taetol o flagblong fridom blong olgetawan, o blong klas blong yu. Blong stat, helpem olgeta blong tingting long sam samting we oli biliv long olgeta, o sam samting we Papa long Heven i wantem olgeta blong oli tingbaot. Letem olgeta oli dro ol pikja blong ol samting ia long wan bigfala pis pepa, o yu save tekem ol pikja ia blong oli putum long pepa ia.
-
Askem ol pikinini blong talem abaot sam pipol we oli wantem kam olsem, mo from wanem oli wantem blong kam olsem olgeta. Afta, serem wetem olgeta sam toktok we oli kam long Alma 48:11–13 we i tokbaot Moronae, mo invaetem olgeta blong oli traem faenem huia nao ol toktok ia oli stap tokbaot. Soem wan pikja blong Moronae, mo tokbaot ol wei we yumi save kam olsem hem.
Stap Tijim Doktrin: Ol Bigfala Pikinini
Alma 43:17–21; 48:7–8; 49:1–5; 50:1–6
Mi save faenem proteksen long saed blong spirit insaed long gospel.
Wol ia i gat fulap denja long saed blong spirit, be i gat plante samting we ol pikinini oli save lan aot long Ol Man blong Nifae abaot hao oli protektem olgetawan.
Samfala Aktiviti we Yu Save Mekem
-
Invaetem wanwan pikinini blong rid long maen blong olgeta, ol ves ia we i tokbaot olsem wanem Ol Man blong Nifae oli bin rere blong go long faet agensem Ol Man blong Leman: Alma 43:19; 48:8; 49:1–5; mo 50:2–4. Askem ol pikinini blong serem wanem we oli bin lanem (askem sapos yu save helpem olgeta.) Eksplenem se yumi stap long wan wo long saed blong spirit agensem Setan, mo yumi mas protektem yumi long saed blong spirit, semmak olsem Ol Man blong Nifae oli bin protektem bodi blong olgeta long Ol Man blong Leman. ?Wanem kaen klos blong faet long saed blong spirit nao, o wanem fanis nao bae yumi bildim blong protektem yumi long taem blong ol faet long saed blong spirit?
-
Helpem ol pikinini blong mekem wan sil aot long wan bigfala pis pepa o wan katen, mo askem olgeta blong raetem antap long hem, ol samting ia we bae oli protektem yumi long saed blong spirit. Givim long wanwan pikinini wan pis pepa mo invaetem olgeta blong raetem wan nogud samting we maet Setan i save temtem yumi blong mekem (olsem giaman, stil, o no stap kaen). Askem olgeta blong benbenem pepa blong olgeta olsem wan balong, mo sakem i go long sil ia blong soem olsem wanem gospel i save kipim yumi i sef long Setan (luk long Efesas 6:16).
Alma 46:11–16; 48:11–13, 16–17
Mi save fetful olsem Kapten Moronae.
Moronae i wan fetful mo strong disaepol blong Jisas Kraes, we i bin givim insperesen long Ol Man blong Nifae blong oli laef folem gospel (luk long Alma 48:17). ?Wanem nao ol pikinini, we oli stap long klas blong yu, oli save lanem aot long eksampol blong hem?
Samfala Aktiviti we Yu Save Mekem
-
Tugeta, ridim Alma 46:11–16. ?Wanem nao Moronae i bin wantem Ol Man blong Nifae blong oli tingbaot? (luk long ves 12). ?Olsem wanem nao hem i bin helpem olgeta blong oli tingbaot olgeta samting ia? Askem ol pikinini blong raetemdaon wan lis blong ol samting we Papa long Heven i wantem yumi blong tingbaot. Letem ol pikinini oli mekem “ol taetol blong fridom” blong olgetawan wetem ol toktok o ol pikja we bae i helpem olgeta blong tingbaot olgeta samting ia.
-
Askem wan pikinini blong ridim Alma 48:17. Blong helpem ol pikinini blong oli andastanem from wanem yu invaetem olgeta blong oli kam olsem Moronae, invaetem olgeta blong stadi long Alma 48:11–13, 16. Askem olgeta blong faenem ol toktok mo ol sentens we bae i helpem yumi andastanem from wanem Moronae i bin wan bigfala disaepol blong Jisas Kraes. Taem oli stap serem wanem we oli bin faenem, leftemap tingting blong olgeta blong tingting long sam spesifik samting we oli save mekem blong kam moa olsem Moronae.
Setan i temtem mo i giaman long yumi smol smol i go.
Ol pikinini oli nidim blong save se Setan bae i traem blong temtem yumi blong mekem ol smol sin we bae i lidim yumi blong mekem ol bigfala sin moa.
Samfala Aktiviti we Yu Save Mekem
-
Ridim tugeta sam ves aot long Alma 47:4–19, mo eksplenem long ol pikinini olsem wanem Amalekaea i kam blong kontrolem ami blong Lihontae, iven we ol memba blong ami ia, oli “gat strong tingting long tingting blong olgeta” se bae oli no fosem olgeta blong faet agensem Ol Man blong Nifae. ?Wanem nao bae i hapen sapos Amalekaea i bin talem long Lihontae wanem nao hem i bin plan blong mekem stat long stat? ?Wanem nao ol ves ia oli stap tijim yumi abaot wei we Setan i stap traem blong giaman long yumi?
-
Soem wan pikja blong wan haos we oli lukaot gud long hem, mo wan haos we oli no lukaot gud long hem; o soem wan pikja blong wan helti garen, mo wan garen we i fulap long ol rabis gras. Letem ol pikinini oli tokbaot wanem we oli stap luk long ol pikja ia, mo olsem wanem ol jenis ia oli bin hapen wetem taem we i pas. ?Wanem nao ona blong haos o garen ia i bin save mekem blong mekem se hemia i no hapen? Eksplenem se, sloslo, ol pipol oli save foldaon long sin sapos oli no stanap agensem ol temtesen blong Setan blong stap mekem ol smol sin (olsem blong no stap ones, o blong lukluk ponografi) mo ol moa bigfala sin. ?Wanem nao samfala nogud samting we yumi nidim blong stanap agensem long laef blong yumi?
Stap Leftemap Tingting blong Lanem Samting long Hom
Askem wan pikinini blong talem nem blong wan samting we hem i bin harem o filim tedei, mo i wantem serem wetem wan memba blong famli. Leftemap tingting blong olgeta blong gohed wetem ol plan blong olgeta.
Stap Kam Antap long Fasin blong Yumi blong Stap Tij
Helpem pikinini blong bildimap tras long olgetawan. Sam pikinini bae oli filim se oli no gat paoa blong lanem gospel olgetawan. Wan wei blong bildimap tras blong olgetawan i blong presem olgeta taem oli tekpat insaed long klas.