“17–23 Ogis. Hileman 1–6: ‘Strong Ston blong Ridima blong Yumi,’” Kam Folem Mi—Blong Praemeri: Buk blong Momon 2020 (2020)
“17–23 Ogis. Hileman 1–6,” Kam Folem Mi—Blong Praemeri: 2020
17–23 Ogis
Hileman 1–6
“Strong Ston blong Ridima blong Yumi”
Ol aktiviti insaed long aotlaen ia oli stap blong givim ol aedia mo insperesen nomo long hat mo maen blong yu. Ol bes aedia oli stap kam taem yu stap prea mo yu stap tingting hevi long ol skripja mo ol nid blong ol pikinini we yu stap tijim.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Blong sapotem ol pikinini long rod blong olgeta blong lanem gospel insaed long hom, invaetem sam long olgeta blong serem wan samting we oli bin lanem long wik ia. Tokbaot olsem wanem yu stap stadi long gospel long hom, mo tokbaot ol wei we ol pikinini oli save helpem famli blong olgeta blong lanem samting aot long Buk blong Momon.
Stap Tijim Doktrin: Ol Smol Pikinini
Mi save bildim fandesen blong mi long Jisas Kraes.
Hileman i bin tijim ol boe blong hem, Nifae mo Lihae, blong oli bildimap laef blong tufala antap long strong ston blong Ridima blong yumi. Tingting hevi long wei we bae yu mekem semmak samting wetem ol pikinini we yu stap tijim.
Samfala Aktiviti we Yu Save Mekem
-
Soem wan pikja blong wan tempol o wan nara bilding, mo eksplenem se ol bilding oli nidim ol strong fandesen blong mekem se bae oli no foldaon long win mo strong win. Blong soem hemia, invaetem ol pikinini blong muvum wan ston taem i blo long hem. Ridim ol fasfala laen blong Hileman 5:12, mo askem ol pikinini blong leftemap han blong olgeta taem oli harem huia ia i “strong ston”we i mas stap olsem fandesen blong yumi.
-
Invaetem ol pikinini blong mekem ol aksen taem yu stap ridim Hileman 5:12. Eksampol: oli save saksakem han blong olgeta lef i go raet taem yu ridim abaot “bigfala strong win” blong devel mo oli save stanap long wan ples taem yu rid abaot “strong ston blong Ridima blong yumi.”
-
Invaetem ol pikinini blong helpem yu blong yusum ol brikis o ol nara samting blong bildim wan haos. Stat blong mekem wan “sua fandesen,” mo tokbaot olsem wanem Jisas Kraes i mas stap olsem fandesen blong laef blong yumi. Askem ol pikinini blong serem ol samting we oli save mekem blong folem Jisas Kraes, mo letem olgeta oli ademap wan lego brikis i go long fandesen blong haos blong wanwan samting we oli serem.
-
Invaetem ol pikinini blong kalarem aktiviti pej, mo helpem olgeta blong katemaot pej ia. ?Wanem nao yumi save mekem blong bildimap laef blong yumi antap long fandesen blong Jisas Kraes? Serem sam wei we yu bin bildimap laef blong yu long Sevya mo olsem wanem we, taem yu bin mekem hemia, i bin blesem laef blong yu.
Tabu Spirit i toktok long wan voes we i kwaet, i smol.
Olsem wanem oli tokbaot voes ia long Hileman 5:29–30, 45–47 we i voes we Ol Man blong Leman oli bin harem, i semmak long wei ia we plante taem yumi tokbaot se i wei ia we Tabu Spirit i stap toktok long yumi. Yu save yusum ol ves ia blong helpem ol pikinini blong luksave voes blong Spirit.
Samfala Aktiviti we Yu Save Mekem
-
Serem stori blong Nifae mo Lihae long kalabus. Maet yu save yusum “Japta 37: Nifae mo Lihae long Kalabus” (Ol Stori long Buk blong Momon, 99–102 o vidio blong hem long ChurchofJesusChrist.org). Taem yu tokbaot voes ia we Ol Man blong Leman oli bin harem, toktok long wan voes we i kwaet. Ripitim stori ia plante taem, mo invaetem ol pikinini blong wispa wetem yu. Talem long ol pikinini abaot ol taem we Tabu Spirit i bin wispa long yu mo i bin mekem testemoni blong yu i kam strong moa.
-
Ridim Hileman 5:30, mo singsing wetem ol pikinini long wan singsing abaot Tabu Spirit, olsem “The Still Small Voice” (Children’s Songbook, 106–7). Poenemaot ol toktok insaed long skripja ves mo singsing ia we i tokbaot wei we Tabu Spirit i toktok long yumi (luk long Hileman 5:45–47). Yusum Hileman 5:29 mo eksperiens blong yuwan blong serem wetem ol pikinini samfala eksampol blong ol gudfala samting we Tabu Spirit i save givim insperesen long yumi blong mekem.
Stap Tijim Doktrin: Ol Bigfala Pikinini
Taem mi putum tingting i stap daon, Papa long Heven bae i blesem mi.
Buk blong Momon, insaed long hem i gat plante eksampol blong ol denja blong gat hae tingting, mo ol blesing blong fasin blong gat tingting i stap daon, mo sam moa eksampol oli stap long Hileman 1–6. Taem yu stap stadi ol japta ia, tingting hevi long olsem wanem nao bae yu yusum ol eksampol ia blong tijim ol pikinini insaed long klas blong yu.
Samfala Aktiviti we Yu Save Mekem
-
Letem ol pikinini oli helpem yu blong dro daegram ia long bod abaot “raon rod blong hae tingting.” Tugeta, ridim Hileman 3:24, 33–34 mo 4:11–15, mo invaetem ol pikinini blong poenem ol pat blong raon rod ia we ol ves ia oli stap tokbaot.
-
Raetem ol toktok ia Gat Tingting I Stap Daon mo Gat Hae Tingting long bod. Raetem samfala eksampol blong ol aksen we oli mekem wetem tingting i stap daon mo sam we oli mekem wetem hae tingting long sam pis pepa, mo invaetem ol pikinini blong oli kam, wan afta wan, blong jusum wan pepa mo putum long saed blong toktok long bod we i tokbaot aksen ia. ?Wanem nao sam long ol wei we yumi save jusum blong gat tingting i stap daon?
“Raon rod blong hae tingting.”
Bae mi bildimap fandesen blong mi long Jisas Kraes.
Hileman 5:12 i gat ol strong eksampol blong fasin blong stap bildimap fandesen blong yumi long Jisas Kraes. ?Olsem wanem nao yu save yusum ol eksampol ia blong soemaot prinsipol ia long ol pikinini? Taem yu mekem olsem, bae i helpem ol pikinini blong oli rere from ol temtesen mo ol tes we bae oli fesem.
Samfala Aktiviti we Yu Save Mekem
-
Tekem samfala samting i kam long klas we oli ripresentem ol fandesen we oli no strong, mo olgeta we oli strong (olsem koten, o wan flat ston, o wan tael). Invaetem ol pikinini blong bildim wan taoa; bae oli yusum ol lego brikis o ol nara samting long ol defren kaen fandesen. ?Wanem nao i mekem sam fandesen oli strong moa bitim ol narawan? Tugeta, ridim Hileman 5:12, mo askem ol pikinini from wanem oli ting se Jisas Kraes i wan “sua fandesen” blong laef blong olgeta. ?Olsem wanem nao yumi save bildimap laef blong yumi long Hem? Invaetem olgeta blong luklukgud insaed long Hileman 3:27–29, 35 mo Ol Toktok blong Bilif 1:4 blong faenem ol aedia.
-
Invaetem ol pikinini blong rid tru long Hileman 5:5—14 mo kaontem hamas taem toktok ia “tingbaot” i kamaot. ?Wanem nao Hileman i tijim long ol boe blong hem blong oli tingbaot? ?Olsem wanem nao taem yumi stap rimemba ol samting ia, i stap helpem yumi blong mekem Jisas Kraes i fandesen blong laef blong yumi?
Fasin blong sakem sin i riplesem tudak long saed blong spirit wetem laet.
Ol Man blong Leman we oli bin go long kalabus blong kilimded Nifae mo Lihae, tudak nao i bin raonem olgeta. Taem yumi sin, yumi stap long tudak long saed blong spirit. Hileman 5:20–52 i tijim yumi se oli save karemaot “klaod blong tudak ia (ves 41).
Samfala Aktiviti we Yu Save Mekem
-
Mekem ol klasrum oli tudak olsem we i posibol; afta, ridim o talem sot stori long Hileman 5:20–40 mo yusum wan smol tojlaet. ?Yu ting se Ol Man blong Leman oli bin filim olsem wanem taem oli bin stap long tudak? Invaetem ol pikinini blong lisin long wanem Aminadab i bin tijim ol pipol blong mekem blong karemaot tudak, mo afta, ridim ves 41. Afta, onem ol laet, mo ridim ol ves 42–48 tugeta. ?Wanem nao ol ves ia oli stap tijim yumi abaot ol blesing we fasin blong sakem sin i tekem i kam insaed long laef blong yumi?
-
Invaetem ol pikinini blong traem pikjarem se oli stap tijim wan pikinini we i yang moa, abaot Tabu Spirit. ?Olsem wanem nao bae oli yusum Hileman 5:29–33, 44–47 blong tijim se voes blong Spirit i filim olsem wanem, mo wanem sam long ol samting we Spirit i stap talem long yumi? ?Olsem wanem Tabu Spirit i givim insperesen long yu blong yu sakem sin? Invaetem ol pikinini blong serem ol eksperiens blong ol taem we oli bin filim pis mo kamfot blong Tabu Spirit.
Stap Leftemap Tingting blong Lanem Samting long Hom
Invaetem ol pikinini blong askem ol memba blong famli abaot wei we oli bildimap laef blong olgeta long Jisas Kraes. O, oli save serem wetem ol famli blong olgeta olsem wanem oli stap plan blong bildimap laef blong olgeta long Hem.
Stap Kam Antap long Fasin blong Yumi blong Stap Tij
Testifae abaot Jisas Kraes. Yu gat wan tabu janis blong help blong mekem ol testemoni blong ol pikinini blong klas blong yu oli gro. Helpem olgeta blong filim lav we Jisas i gat long olgeta, mo serem testemoni blong yu abaot Hem plante taem.