“27 Julae–2 Ogis. Alma 39–42: ‘Bigfala Plan blong Hapines,’” Kam Folem Mi—Blong Praemeri: Buk blong Momon 2020 (2020)
“27 Julae–2 Ogis. Alma 39–42” Kam Folem Mi—Blong Praemeri: 2020
Woman, ?From Wanem Nao Yu Krae? i kam long Mark R. Pugh
27 Julae–2 Ogis
Alma 39–42
“Bigfala Plan blong Hapines”
Taem yu stap stadi wetem prea long Alma 39–42, mekem plan blong gat sam aktiviti blong helpem ol pikinini blong oli lan. Bae yu save faenem ol aedia long medel blong ol aktiviti ia we yu save stretem blong yusum wetem eni yia grup.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Askem wan pikinini blong stanap serem wan samting we hem i jes lanem abaot gospel long hom o long jos.
Stap Tijim Doktrin: Ol Smol Pikinini
Mi save stap wan gud eksampol.
Alma i leftemap tingting blong Korianton blong lanem samting aot long gudfala eksampol blong ol brata blong hem, mo i bin givim woning long Korianton blong no stap olsem wan nogud eksampol long ol nara pipol.
Samfala Aktiviti we Yu Save Mekem
-
Eksplenem se Siblon mo Korianton, tufala i brata, mo we Siblon i bin wan gudfala eksampol long Korianton. Invaetem ol pikinini blong ripitim kwestin ia wetem yu: “Luk, hem i no bin soemaot wan gudfala eksampol long yu?” (Alma 39:1). Askem ol pikinini blong tokbaot wan we i wan gudfala eksampol long olgeta.
-
Plei wan gem o singsing wan singsing we ol pikinini oli stap folem yu o oli folem aksen blong yu; wan singsing olsem “Do as I’m Doing” (Children’s Songbook, 276). Mekem wanwan pikinini i gat wan taem blong hem i lida, o i eksampol. Askem ol pikinini olsem wanem nao oli save stap wan gud eksampol long wan narawan.
-
Soem ol pikja blong Jisas we i stap mekem ol gudfala samting, mo eksplenem long olgeta se Hem i eksampol we i stret evriwan long yumi. Eksplenem se yumi save stap ol gud eksampol, semmak olsem Jisas i bin wan gudfala eksampol. Invaetem ol pikinini blong dro ol pikja, we insaed long pikja, olgeta nao oli stap olsem ol gud eksampol.
Papa long Heven mo Jisas Kraes oli save helpem mi blong stretem ol mistek blong mi.
I nomata ol yangfala pikinini oli no nid blong sakem sin, talem long olgeta se Korianton i save helpem olgeta blong oli andastanem wanem nao hem i mining blong fasin blong sakem sin.
Samfala Aktiviti we Yu Save Mekem
-
Yu no tokbaot tumas long ditel se wanem i ol sin blong hem, be eksplenem se Korianton i bin mekem wan rong joes. ?Wanem nao bae yumi save talem long hem we bae i helpem hem? Ridim long ol pikinini wanem we Alma, papa blong Korianton, i talem long hem: “Yu sakem sin, mo lego fogud ol sin blong yu” (Alma 39:9). Talem long olgeta se “sakem sin” i minim se yumi askem Papa long Heven mo Jisas Kraes blong Tufala i fogivim yumi, mo Tufala i helpem yumi blong stretem ol mistek blong yumi, mo bae afta, yumi traem blong stap moa olsem Tufala.
-
Givim wan hevi samting long wan pikinini i holem, mo semtaem yu talem stori blong wan we i bin mekem wan nogud samting mo i filim nogud from. Talem long ol pikinini, se samting ia we i hevi, i olsem ol nogud filing we yumi gat taem yumi mekem wan mistek. Tekem hevi samting ia long pikinini ia, mo semtaem testifae se Papa long Heven mo Jisas Kraes, Tufala i save tekemaot hevi, nogud filing ia, mo Tufala i save helpem yumi blong stretem ol mistek blong yumi taem yumi sakem sin. Tugeta, singsing wan singsing abaot fasin blong sakem sin, olsem “Repentance”(Children’s Songbook, 98).
Bae mi laef bakegen long ded.
Helpem ol pikinini blong luk fored i go long dei ia, taem we, olgeta mo olgeta we oli lavem olgeta, bae oli laef bakegen long ded.
Samfala Aktiviti we Yu Save Mekem
-
Taem yu stap ridim laod Alma 40:23, mekem ol pikinini oli yusum aktiviti pej blong wik ia blong helpem olgeta blong gat wan pikja blong wanem ves ia i stap tijim. Invaetem wanwan pikinini blong hem i yusum aktiviti pej blong tijim wan nara pikinini long wanem nao hem i laef bakegen long ded.
-
Soem wan pikja blong Sevya we i laef bakegen long ded, mo tijim ol pikinini long wan singsing abaot Laef Bakegen long Ded, olsem “Did Jesus Really Live Again?” o “Hem I Raesap” (Children’s Songbook, 64; STSP, pej 55). Stop oltaem blong eksplenem mining blong ol toktok mo ol sentens.
-
Askem ol pikinini sapos oli save wan man o woman we i ded finis. Serem testemoni blong yu se, bae wan dei, man o woman ia mo evri narawan, bae oli laef bakegen long ded from Jisas Kraes. Sapos i nid, yusum aktiviti pej blong wik ia blong eksplenem se i minim wanem blong laef bakegen long ded.
PikjaMeri mo JisasMeri mo Lod we I Laef Bakegen long Ded, i kam long Harry Anderson
Stap Tijim Doktrin: Ol Bigfala Pikinini
Mi save stap wan gud eksampol.
Kaonsel blong Alma i go long Korianton i save helpem ol pikinini blong oli andastanem hamas i impoten blong stap folem mo stap ol gudfala eksampol.
Samfala Aktiviti we Yu Save Mekem
-
Eksplenem se boe blong Alma, Korianton, i mekem ol bigfala sin taem hem i sapos blong prijim gospel. Ridim las haf blong Alma 39:11 wetem ol pikinini, mo askem olgeta blong oli lisin long wei we ol sin blong Korianton i spolem Ol Man blong Soram. Helpem ol pikinini blong tingting long sam pipol we ol aksen blong olgeta i save jenisim fasin blong olgeta. ?Olsem wanem nao yumi save stap ol gudfala eksampol blong ol pipol ia?
-
Ridim tugeta Alma 39:1. ?Long wanem wei nao brata blong Korianton, Siblon i bin wan gudfala eksampol? Askem ol pikinini blong faenem sam moa ansa long kwestin ia long Alma 38:2–4. Talem abaot sam gudfala eksampol long laef blong yu, mo invaetem ol pikinini blong mekem sem samting. Soem vidio ia: “Lessons I Learned as a Boy” (ChurchofJesusChrist.org), mo askem ol pikinini olsem wanem nao boe ia we i bigwan, i bin wan gudfala eksampol.
-
Tekem wan tojlaet o pikja blong san, mo komperem laet ia long paoa blong wan eksampol we i stret mo gud. Semmak olsem we laet blong wan tojlaet o san i save helpem yumi blong luk rod we yumi nidim blong folem, wan eksampol we i stret mo gud i soem yumi wanem blong mekem blong save folem Papa long Heven. Serem wan eksperiens blong wan taem we gudfala eksampol blong wan i bin helpem yu. ?Wanem nao ol pikinini oli save mekem blong stap olsem wan gud eksampol long ol narawan? Testifae se Jisas Kraes i eksampol blong yumi we i stret evriwan.
Mi save sakem sin taem mi mekem ol mistek.
Semmak olsem yumi evriwan, ol pikinini we yu stap tijim, oli mekem sin mo oli mekem ol mistek. ?Olsem wanem nao bae yu givim insperesen long olgeta blong oli “lego fogud” sin blong olgeta, mo sakem sin? (Alma 39:9).
Samfala Aktiviti we Yu Save Mekem
-
Askem ol pikinini blong serem wan taem we wan i bin mekem nogud long olgeta. ?Wanem nao oli bin mekem blong mekem se soa ia i kam oraet bakegen? Eksplenem se sin i givim soa long spirit blong yumi, be Sevya i save hilim yumi taem yumi sakem sin.
-
Askem ol pikinini blong faenem sentens ia, “sakem sin mo lego fogud ol sin blong yu” insaed long Alma 39:9, mo helpem olgeta blong andastanem wanem nao “sakem sin” mo “lego fogud” i minim. Testifae se fasin blong sakem sin, i posibol tru long Jisas Kraes mo Atonmen blong Hem. Tugeta, ridim Alma 39:10–14 blong faenem ol nara samting we yumi save mekem we bae i helpem yumi blong sakem sin mo stap longwe long sin.
Afta long ded, spirit blong yumi oli go long spirit wol, oli wet long Laef Bakegen long Ded mo Jajmen.
Hem i stret nomo blong stap askem yumiwan se wanem nao i hapen long yumi afta we yumi ded. Ol toktok blong Alma oli save helpem ol pikinini blong faenem ol ansa we oli kam tru long insperesen.
Samfala Aktiviti we Yu Save Mekem
-
Raetem ded, spirit wol, laef bakegen long ded, mo jajmen long ol seperet pis pepa, mo putum olgeta long wan bod long ol defren oda. Helpem ol pikinini blong andastanem mining blong ol toktok ia. Ridim Alma 40:6–7, 11–14, mo 21–23 wetem ol pikinini, mo askem olgeta blong putum ol toktok long bod folem oda we oli hapen long hem.
-
Long bod, raetem lis blong ol kwestin we ansa i kam long Alma 40:6–7, 11–14, mo 21–23, mo invaetem ol pikinini blong joenem kwestin wetem ol ves we oli ansarem kwestin ia. Eksampol: “Taem bae mi laef bakegen long ded, ?bae bodi blong mi i olsem wanem?” Ansa i save stap long Alma 40:23. Sapos i nid, eksplenem ol had toktok long ol pikinini taem oli stap rid. Leftemap tingting blong ol pikinini blong oli serem from wanem oli talem tangkyu from plan blong Papa long Heven.
Stap Leftemap Tingting blong Lanem Samting long Hom
Leftemap tingting blong ol pikinini blong talem tangkyu long wan memba blong famli we i bin wan gudfala eksampol long olgeta, mo tingting long wan wei we oli save stap ol gudfala eksampol long wik ia.
Stap Kam Antap long Fasin blong Yumi blong Stap Tij
Yusum ol samting we ol defren pat blong bodi oli save mekem. “Plante long ol pikinini (mo ol adalt) oli lanem gud ol samting taem oli yusum ol plante defren samting we bodi blong olgeta i save mekem. Faenem ol wei blong helpem ol pikinini blong olgeta blong oli yusum ol ae, ol sora, mo ol han blong olgeta taem oli stap lanem samting” (Teaching in the Savior’s Way, 25).