wan man i stap prea

Ol pikja oli kam long Joshua Dennis

20–26 Julae.

Alma 36–38

“Yu Luk long God mo Stap Laef”

Taem yu stap stadi wetem prea long Alma 36–38, bae ol tingting mo filing oli kam long yu abaot ol pikinini we yu stap tijim olgeta. Raetemdaon ol tingting mo filing ia; maet oli stat givim sam aedia blong mekem ol aktiviti blong lanem samting.

Raetemdaon Ol Filing mo Tingting blong Yu

serem pikja bokis

Invaetem Ol Pikinini blong Serem Wanem Oli Gat

Invaetem evri pikinini blong serem wan samting we papa mo mama blong olgeta i bin tijim olgeta. Askem long olgeta sapos oli save wanem nao Alma i bin tijim long ol boe blong hem.

tijing pikja bokis

Stap Tijim Doktrin: Ol Smol Pikinini

Alma 36:6, 20, 24

Fasin blong sakem sin i mekem mi mi stap glad.

Taem yumi tijim ol pikinini blong yumi, taem oli smol, abaot glad blong stap sakem sin, bae i save givim insperesen long olgeta blong sakem sin taem oli kam bigwan.

Samfala Aktiviti we Yu Save Mekem

• Ridim Alma 36:20 i go long ol pikinini, mo askem olgeta blong oli lisin long hao nao Alma i bin filim. Invaetem olgeta blong oli talem nem blong sam samting we i mekem olgeta oli glad. Soem wan pikja blong Sevya, mo eksplenem se Alma i bin filim glad from se Jisas i bin fogivim ol sin blong hem.

• Givim long wanwan pikinini wan pis pepa wetem wan glad fes long wan saed mo wan fes we i no glad long narasaed. Askem olgeta blong oli lisin taem yu stap ridim Alma 36:6 mo blong oli jusum wijwan fes nao blong oli holem i go antap. Eksplenem se Alma i bin sakem sin blong hem mo i bin filim glad from se Jisas Kraes i bin fogivim hem from ol rong joes blong hem. Askem ol pikinini blong oli lisin taem yu stap ridim Alma 36:24 abaot ol gud joes we hem i bin mekem afta, mo blong oli holem stret fes i go antap.

• Sing tugeta wan singsing abaot Jisas Kraes, olsem “He Sent His Son” (Children’s Songbook, 34–35). Talem testemoni blong yu se Jisas i bin kam long wol ia blong sevem yumi long sin mo blong tekem glad i kam long yumi.

Alma 37:6–7

“Tru long ol smol mo simpol samting, ol bigfala samting oli kam blong hapen.”

?Olsem wanem yu save tijim ol pikinini blong oli luksave se Lod i stap yusum ol smol, o ol simpol samting blong mekem wok blong Hem i hapen?

Samfala Aktiviti we Yu Save Mekem

• Ridim Alma 37:6–7, mo invaetem ol pikinini blong oli benem olgeta i go daon evri taem yu ridim toktok ia, “smol.” Soem olgeta samfala smol samting we i save mekem ol bigfala samting oli hapen, o i save muvum ol bigfala samting, olsem wan batri o wan ki blong trak. ?Wanem sam bigfala samting oli hapen, o muv from ol smol samting ia? Helpem ol pikinini blong tingting long sam smol mo simpol samting we God i wantem yumi blong mekem. ?Wanem sam bigfala samting oli hapen, from ol smol mo simpol komanmen ia?

• Soem wan pikja blong wan o tu smol samting, we oli hipap gogo oli kam ol bigfala samting; hemia olsem wan smol gras mo wan bigfala fil, o wan smol drop blong ren mo wan bigfala lek. Testifae se iven ol smol mo simpol aksen oli save mekem wan bigfala samting i defren long laef blong yumi mo long laef blong ol narawan. Leftemap tingting blong ol pikinini blong tokbaot sam simpol, gud samting we oli stap mekem evri dei, o yu save serem sam eksampol blong yuwan. Invaetem ol pikinini blong pikimap wan simpol mo gud samting we oli save mekem long wik ia, mo blong oli droem wan pikja we i soem olgeta we oli stap mekem samting ia. Invaetem olgeta blong tekem droing blong olgeta i gohom mo oli serem olgeta wetem ol famli blong olgeta.

Alma 37:38–47

Ol skripja oli save helpem yumi evri dei.

I gat plante yang pikinini we oli no save rid yet; yu save helpem olgeta blong kasem wan testemoni blong paoa blong skripja blong lidim evri dei laef blong olgeta.

Samfala Aktiviti we Yu Save Mekem

• Soem wan pikja blong Liahona (olsem hemia we i stap long Gospel Art Buk, no. 68), o invaetem ol pikinini blong droem wan, mo semtaem oli stap serem wanem oli tingbaot abaot Liahona (luk long 1 Nifae 16:10, 28–29). Holem wan skripja buk i go antap, mo askem ol pikinini blong serem olsem wanem ol skripja oli olsem Liahona. Yusum Alma 37:38–47 mo aktiviti pej blong wik ia blong ademap moa long toktok insaed long klas.

• Singsing tugeta wan singsing abaot skripja stadi, olsem “Search, Ponder, and Pray” o “As I Search the Holy Scriptures” (Children’s Songbook, 109; Hymns, no. 277). -?Wanem nao ol blesing blong skripja stadi we oli tokbaot insaed long singsing ia?

  woman we i stap ridim ol skripja

  Ol skripja oli tijim yumi olsem wanem blong folem God.

tijim samting pikja bokis

Stap Tijim Doktrin: Ol Bigfala Pikinini

Alma 36

Mi save “bon long God” taem mi stap folem Jisas mo stap sakem ol sin blong mi.

“Fasin blong jenisim laef … i taem fasin blong yumi i jenis evriwan. Hem i wan bigfala jenis, mekem se Lod mo ol profet blong Hem oli tokbaot se i olsem wan i “bon bakegen” (“Conversion,” Gospel Topics, topics.ChurchofJesusChrist.org).

Samfala Aktiviti we Yu Save Mekem

• Luklukbak, wetem ol pikinini, long stori blong Yangfala Alma taem hem i bin jenisim laef blong hem, we i stap long Alma 36:6-21. Long sam pis pepa, raetem ol toktok mo ol sentens aot long ol ves ia we oli tokbaot olsem wanem Alma i filim, mo putum olgeta antap long bod. Askem ol pikinini blong putum ol pis pepa i go long tu grup: ol samting we Alma i bin filim bifo hem i tingbaot wanem papa blong hem i tijim hem abaot Sevya, mo ol samting we hem i bin filim afta we hem i bin tingbaot. Ridim tugeta Alma 36:17–20, mo testifae long ol pikinini se Jisas Kraes i stap fogivim yumi taem yumi sakem sin.

• Raetem Bon long God mo olgeta skripja refrens ia antap long bod: 1 Jon 4:7; Mosaea 5:7; 27:25–26; Alma 5:14; 22:15. Helpem ol pikinini blong oli ridim olgeta ves mo oli lukaotem ol sentens we oli tokbaot se i minim wanem blong bon long God. ?Olsem wanem wan man o woman i mekem samting afta we hem i bon long God? ?Olsem wanem nao yumi save soem se yumi bin bon long God?

Alma 37:6–9, 38–47

“Tru long ol smol mo simpol samting, ol bigfala samting oli kam blong hapen.”

Helpem ol pikinini we yu stap tijim blong luk se blong ridim ol skripja blong wan sot taem nomo, evri dei, i save tekem ol bigfala blesing i kam long olgeta.

Samfala Aktiviti we Yu Save Mekem

• Droem o soem wan baket. ?Hamas drop blong wota i save fulumap ful baket ia? Helpem ol pikinini blong luksave se bae i nidim plante smol drop blong fulumap baket ia. ?Olsem wanem hemia i go wetem Alma 37:6–7? ?Olsem wanem nao fasin blong stap ridim ol skripja, i olsem blong ademap ol drop blong wota long wan baket?

• Invaetem ol pikinini blong luk long Alma 37:6–9 mo faenem ol blesing we oli kam, we oli stap long ol “histri,” o long ol skripja. Olsem wan klas, mekem wan lis blong olgeta samting we oli faenem. ?Olsem wanem nao blong ridim olgeta skripja i blesem laef blong yumi? Serem testemoni blong yu abaot ol skripja, mo leftemap tingting blong ol pikinini blong mekem semmak samting.

• Soem wan pikja blong Liahona (olsem hemia we i stap long Gospel Art Buk, no. 68), mo askem ol pikinini blong luklukbak long wanem oli tingbaot abaot Liahona we i stap long 1 Nifae 16:10, 28. Helpem ol pikinini blong ridim Alma 37:38–42. ?Olsem wanem nao Liahona i wok? ?Olsem wanem nao hemia i semmak long wei we ol skripja oli wok? Ridim tugeta ol ves 43–47 blong help blong ansarem kwestin ia. Invaetem ol pikinini blong oli finisim aktiviti pej olsem pat blong aktiviti ia.

lanem samting pikja bokis

Stap Leftemap Tingting blong Lanem Samting long Hom

Leftemap tingting blong ol pikinini blong oli serem wan risen from wanem oli talem tangkyu from ol skripja, mo blong oli invaetem ol memba blong famli blong olgeta blong mekem semmak samting.

Stap Kam Antap long Fasin blong Yumi blong Stap Tij

Helpem ol pikinini blong oli kam blong lanem samting long wan moa gud wei. Stamba tingting blong yu blong tijim ol pikinini i no jes blong serem trutok wetem olgeta. Yu mas helpem olgeta blong oli dipen long olgetawan long fasin blong stap lukaotem trutok. Eksampol: no talem ol trutok long ol pikinini we yu faenem insaed long stori we Alma i jenisim laef; be yu save mekem plan blong ol aktiviti, mo long ol aktiviti ia, bambae oli faenemaot ol trutok olgetawan, insaed long stori ia.

aktiviti pej: ol skripja oli tekem yumi i kam kolosap moa long Kraes