Evri Samting I Talem se I Gat Wan God (Alma mo Koriho),i kam long Walter Rane

6–12 Julae

Alma 30–31

“Paoa mo Atoriti blong Toktok blong God”

Stadi Alma 30-31 wetem ol pikinini we yu stap tijim oli stap long maen blong yu. Taem yu stap tingting hevi long wanem oli strong long hem mo wanem nao ol nid blong olgeta, Tabu Spirit bae i helpem yu blong save olsem wanem blong tijim olgeta.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Invaetem ol pikinini blong serem ol ansa long ol kwestin olsem: ?Wetaem nao yumi sapos blong prea? ?Wanem nao yumi talem taem yumi prea? ?I gat eniwan we i save serem smol samting abaot wei we Ol Man blong Soram oli bin prea, o olsem wanem nao Alma i bin prea?

Stap Tijim Doktrin: Ol Smol Pikinini

Alma 30:44

Evri samting i testifae abaot God.

Alma i stap poen i go long ol samting we oli stap long skae mo long wol ia, se oli testifae se God i stap laef mo i stap lidim yunives ia. ?Wanem sam samting we yu save helpem ol pikinini blong luk raon long olgeta we oli testifae abaot God?

Samfala Aktiviti we Yu Save Mekem

• Ridim Alma 30:44, i go long ol pikinini, mo askem ol pikinini blong lisin mo luksave ol samting we Alma i bin talem we bae i helpem yumi blong save se God i ril. Soem ol pikja blong sam long ol samting ia, mo askem ol pikinini blong poen i go long ol pikja taem yu rid abaot olgeta insaed long ves ia. Invaetem ol pikinini blong dro ol pikja blong ol samting we i stap helpem olgeta blong biliv long God.

• Sapos i posibol, go wokbaot aotsaed wetem ol pikinini, o askem olgeta blong stanap long wan windo taem yu stap ridim Alma 30:44. Askem olgeta blong poenemaot ol samting we oli luk we i helpem olgeta blong save se God i ril. Ol aktiviti blong wik ia tu oli save help.

• Askem ol pikinini blong sidaon long wan sekol mo singsing tugeta long wan singsing abaot kriesen blong God, olsem “My Heavenly Father Loves Me” (Children’s Songbook, 228–29). Taem ol pikinini oli stap singsing, invaetem olgeta blong pasem wan samting i go raon, wan samting olsem wan smol balong. Taem miusik i stop, askem pikinini we i holem balong o nara samting blong talem wan samting we Papa i bin krietem, we hem, hem i wantem talem tangkyu from.

Alma 31:5

Toktok blong God i gat paoa.

Taem ol pikinini oli tingting long paoa, oli maet tingting abaot ol samting olsem ol supa hiro, ol kwin, o ol king. Yu save helpem olgeta blong andastanem se toktok blong God i gat moa paoa bitim “eni nara samting” (Alma 31:5).

Samfala Aktiviti we Yu Save Mekem

• Dro wan naef blong faet long bod. Ridim Alma 31:5 i go long ol pikinini, mo invaetem olgeta blong lisin long wanem Alma i talem we i gat moa paoa bitim wan naef blong faet. Serem wan eksperiens blong wan taem we toktok blong God i bin gat strong paoa long yu.

• Sing tugeta wan singsing abaot ol skripja, olsem “Scripture Power” (music.ChurchofJesusChrist.org), mo askem ol pikinini blong lisin mo faenem olsem wanem ol skripja oli stap helpem yumi. Ripitim sentens ia, “Toktok blong God i gat moa paoa bitim …” plante taem, mo askem ol pikinini blong helpem yu blong komplitim sentens ia.

Alma 31:8–35

Papa long Heven i harem ol prea blong mi.

Alma i harem nogud taem hem i luk olsem wanem Ol Man blong Soram oli bin stap prea (luk long Alma 31:24)—oli no bin biliv long Jisas Kraes, mo oltaem oli talem ol prea long wan ples we evriwan i save luk olgeta (Alma 31:13–14). Be prea blong Alma, hem i mekem wetem tingting we i stap daon, mo hem i soem fet blong hem long Kraes.

Samfala Aktiviti we Yu Save Mekem

• Talem sot stori blong Alma mo Ol Man blong Soram long ol pikinini, mo yusum ol ves long Alma 31:8-35. Yu save yusum “Japta 28: Ol Man blong Soram mo Ramiamtam” (Ol Stori long Buk blong Momon,27–29, o vidio blong hem long ChurchofJesusChrist.org). Poenem ol samting we oli defren bitwin wei we Ol Man blong Soram oli bin prea, mo olsem wanem nao Alma i bin prea. Invaetem ol pikinini blong pikjarem se oli bin mitim wan long ol pikinini blong Ol Man blong Soram. ?Wanem nao bae oli tijim long pikinini ia abaot wei blong prea?

• Helpem ol pikinini blong faenemaot ol samting we Ol Man blong Soram oli bin stap talem long prea blong olgeta (luk long Alma 31:15–18) long semtaem we oli stap helpem yu blong bildim wan Ramiamtam taoa wetem ol pleiplei brikis o ol ston. Eksplenem se hemia i no wei we yumi mas prea. Askem ol pikinini olsem wanem yumi mas prea, mo letem olgeta oli karemaot wan brikis o ston blong evri samting we bae oli talemaot.

Stap Tijim Doktrin: Ol Bigfala Pikinini

Alma 30

Buk blong Momon i givim woning long yumi agensem ol giaman tijing.

Ol giaman tijing blong Koriho oli stap long Buk blong Momon blong helpem yumi blong luksave mo sakemaot ol sem kaen tijing long taem blong yumi.

Samfala Aktiviti we Yu Save Mekem

• Soem sam samting (olsem mane o kaekae) mo sam pleiplei mane o kaekae. ?Wijwan nao bae ol pikinini oli wantem tekem? Helpem ol pikinini blong luklukgud longAlma 30:12-18 blong faenem ol giaman, o ol giaman tijing we Koriho i bin stap tijim abaot God.

• Helpem ol pikinini blong faenemaot ol giaman we Koriho i bin stap tijim, mo raetemdaon olgeta long ol pis pepa we bae oli putum antap long bod (luk long Alma 30:12–18, 24). Askem ol pikinini blong luklukgud insaed long Alma 30:32-35, mo lukaotem ol wei we Alma i yusum blong fesem ol giaman blong Koriho. Askem ol pikinini olsem wanem bae oli save se ol samting we Alma i bin tijim oli tru.

  

  Koriho I Fesem Alma i kam long Robert T. Barrett

Alma 31:5

Toktok blong God i gat moa paoa bitim eni nara samting.

?Wetaem nao yu bin filim paoa blong toktok blong God? Tingbaot olsem wanem ol eksperiens blong yu i save givim insperesen long ol pikinini we yu stap tijim.

Samfala Aktiviti we Yu Save Mekem

• Invaetem ol pikinini blong tingting long wan samting, o wan man o woman we i gat paoa, o soem ol pikja blong sam samting we oli gat paoa. ?Wanem nao i mekem se ol samting ia oli gat strong paoa? Ridim Alma 31:5 tugeta, mo askem ol pikinini se oli ting se ves ia i minim wanem. ?Olsem wanem nao toktok blong God i gat moa paoa bitim wan naef blong faet? ?Hem i gat paoa blong mekem wanem?

• Toktok long sam pikinini longtaem bifo klas, mo askem olgeta blong tingting long wan eksperiens blong serem long klas abaot wan taem we ol skripja o wan toktok blong wan lida blong Jos i bin helpem olgeta blong mekem samting we i gud. ?From wanem toktok blong God i mekem olgeta oli wantem mekem ol gudfala samting?

• Singsing long wan singsing abaot toktok blong God, olsem “Search, Ponder, and Pray” o “Follow the Prophet” (Children’s Songbook, 109, 110–11). Oli save singsing tu long “Scripture Power” (music.ChurchofJesusChrist.org).

Alma 31:8–35

Mi save gat tingting we i stap daon.

Aot long evri mistek we Ol Man blong Soram oli bin mekem, hae tingting blong olgeta nao i bin mekem se Alma i stap harem nogud. Maet i wan janis blong tijim ol pikinini hamas i impoten blong gat fasin blong putum tingting i stap daon.

Samfala Aktiviti we Yu Save Mekem

• Helpem ol pikinini blong oli andastanem wanem i defren bitwin hae tingting mo tingting we i stap daon (luk long “Pride” mo “Humble, Humility” insaed long Gaed blong Ol Skripja). Askem ol pikinini blong wanwan, wan afta wan, i kam mo ridim Alma 31:24-28. O ridim tugeta “Japta 28: Ol Man blong Soram mo Ramiamtam” (Ol Stori long Buk blong Momon,27–29). Taem oli stap rid i go, askem olgeta blong luksave olsem wanem Ol Man blong Soram oli bin soem se oli gat hae tingting. ?Olsem wanem nao Alma i bin soem se hem i gat tingting i stap daon (luk long Alma 31:30-33).

• Serem ol pikinini i go long ol grup, mo askem wanwan grup blong disaed wijwan i ansa blong ol kwestin olsem: ?Wanem nao Ol Man blong Soram oli putum hat blong olgeta long hem? (luk long Alma 31:24, 28). ?Wanem nao sam samting blong wol we ol pipol oli stap putum hat blong olgeta i stap long hem tedei? ?From wanem nao ol pipol oli ting se oli moa gud bitim ol nara pipol? Taem wanwan grup i serem wan ansa, letem olgeta oli dro wan pat blong Ramiamtam taoa antap long bod. Afta, askem olgeta blong waepemaot ol pat blong taoa, evri taem oli tingting long wan wei we oli save soem se oli gat tingting i stap daon.

Stap Leftemap Tingting blong Lanem Samting long Hom

Invaetem ol pikinini blong tijim ol famli blong olgeta long wan samting we oli bin lanem abaot paoa longtoktok blong God.

Stap Kam Antap long Fasin blong Yumi blong Stap Tij

Helpem ol pikinini blong lanem samting aot long skripja. Ol smol pikinini, maet oli no save rid tumas, be yu save yusum olgeta blong lanem samting aot long ol skripja. Eksampol, yu save ridim wan smol pat long skripja mo invaetem olgeta blong stanap o leftemap han blong olgeta taem oli harem wan semmak toktok o sentens. Afta, helpem olgeta oli andastanem toktok o sentens ia. (Luk long Teaching in the Savior’s Way,20–21.)