Ol Antae-Nifae-Lihae Oli Berem Ol Tul blong Faet blong Olgeta, i kam long Jody Livingston

29 Jun–5 Julae

Alma 23–29

Oli “Neva Foldaon I Go Lus”

Wetem prea, stadi long Alma 23–29, mo lukaotem insperesen abaot wanem nao ol pikinini oli nidim mo olsem wanem blong helpem olgeta.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Droem wan hapi fes long wan pis pepa, mo letem wanwan pikinini i holem. Taem oli stap holem pepa ia, invaetem olgeta blong talem wan samting we oli stap lanem aot long Buk blong Momon we i stap mekem oli stap glad.

Stap Tijim Doktrin: Ol Smol Pikinini

Alma 24:6–24

Mi kasem blesing taem mi stap kipim ol promes blong mi.

?Wanem nao yu bin lanem long stadi blong yu blong Alma 24: 6 -24 we i save helpem ol pikinini blong andastanem hamas i impoten blong kipim wan promes we i stret?

Samfala Aktiviti we Yu Save Mekem

• Ridim samfala ves o sentens we i kamaot long Alma 24:6–24 blong tijim ol pikinini abaot Ol Antae-Nifae-Lihae, promes we oli bin mekem, mo olsem wanem nao oli bin kipim promes ia. Mo tu, yu save yusum pikja we i stap long aotlaen blong wik insaed long Kam Folem Mi—Blong Wanwan Man, Woman mo Famli o “Japta 26: Pipol blong Amon” (Ol Stori blong Buk blong Momon, 73–74, o vidio we i go wetem we i stap long ChurchofJesusChrist.org).

• Tokbaot olsem wanem nao Ol Antae-Nifae-Lihae oli bin kipim promes blong olgeta taem oli berem ol tul blong faet blong olgeta. Invaetem ol pikinini blong dro wan naef blong faet, mo afta, priten se yu stap digim wan hol mo berem naef blong faet blong olgeta. Helpem ol pikinini blong tingting long ol promes we oli bin mekem. ?From wanem hem i impoten blong kipim ol promes? Eksplenem se taem yumi kasem baptaes, yumi mekem ol promes wetem God mo Hem i stap mekem ol promes wetem yumi. Oli singaotem hemia ol kavenan. Testifae se yumi kasem blesing taem yumi kipim olgeta promes blong yumi wetem God.

Alma 26; 29

Gospel i tekem glad i kam long mi, mo mi save serem glad ia wetem ol narafalawan.

Amon, we i bin help blong tijim gospel long Ol Antae-Nifae-Lihae,i bin kasem bigfala glad taem i stap prijim gospel. Alma, we i bin tijim gospel tu long plante pipol, i bin kasem semfala glad ia. Yumi save gotru long semmak glad taem yumi stap serem ol testemoni blong yumi wetem ol narawan.

Samfala Aktiviti we Yu Save Mekem

• Jusum samfala sentens we oli kamaot long Alma 26 o 29 we i tokbaot glad, mo ridim i ko long ol pikinini (leksampol, luk long, Alma 26:11, 13 o Alma 29:13–14). Invaetem ol pikinini blong stanap evri taem oli harem ol toktok ia “glad” o “glad tumas.”. Helpem ol pikinini blong andastanem se, fasin blong serem gospel i mekem Alma mo Amon i hapi. Serem wan eksperiens abaot wan taem we, fasin blong serem gospel, i karem glad i kam long yu.

• Invaetem ol pikinini blong dro ol pikja blong ol samting we i mekem oli gat glad. Invaetem wanwan pikinini blong givim droing blong hem long wan nara memba blong klas mo hem i eksplenem long hem. Poenemaot se, taem wan samting i mekem yumi glad—olsem gospel—glad blong yumi i gro taem yumi serem.

• Givim wan kopi blong Buk blong Momon long wan pikinini mo letem hem i praktis blong serem buk ia wetem wan nara memba blong klas. Leftemap tingting blong ol pikinini blong eksplenem olsem wanem oli filim abaot Buk blong Momon. ?From wanem yumi serem Buk blong Momon wetem ol narawan?

Alma 27:20–30

Mi save helpem ol fren blong mi blong laef folem gospel.

Ol Man blong Nifae oli protektem Ol Antae-Nifae-Lihae long ol enemi blong olgeta, mo oli bin helpem olgeta blong kipim olgeta kavenan we oli bin mekem wetem Lod.

Samfala Aktiviti we Yu Save Mekem

• Talem long ol pikinini, stori blong Ol Antae-Nifae-Lihae we oli stap mekem wan promes blong nomo faet (luk long Alma 27:20–30). Eksplenem se from promes blong Ol Antae-Nifae-Lihae, oli no save difendem olgetawan long ol enemi blong olgeta. Ridim Alma 27:23, mo eksplenem se ol fren blong olgeta we oli stap long medel blong Ol Man blong Nifae oli bin jusum blong protektem Ol Antae-Nifae-Lihae blong mekem se oli save kipim promes blong olgeta. ?Olsem wanem nao yumi save helpem ol fren blong yumi blong oli kipim ol promes blong olgeta? Tokbaot wan taem we wan fren i bin helpem yu blong yu kipim ol promes blong yu wetem God.

• Wetem ol pikinini, mekem sam rolplei blong ol situesen we oli save mekem, long wan kaen wei, blong helpem ol narawan blong jusum raet. Eksampol: ?Wanem nao yumi save talem long wan fren we i wantem giaman o i wantem mekem nogud long wan narawan?

Stap Tijim Doktrin: Ol Bigfala Pikinini

Alma 24

Ol kavenan oli ol promes we mi mekem wetem God mo Hem i mekem wetem mi.

Ol Antae-Nifae-Lihae oli bin berem ol tul blong faet blong olgeta mo oli bin promes se bae oli neva kilimded man bakegen. Semmak olsem, ol pikinini we yu stap tijim, oli save kipim olgeta kavenan blong olgeta.

Samfala Aktiviti we Yu Save Mekem

• Givim sam smol ston long evri pikinini, mo invaetem olgeta blong raetem toktok ia kavenan long ston blong olgeta. Eksplenem se wan kavenan, hem i wan promes bitwin Papa long Heven mo ol pikinini blong Hem. ?Olsem wanem nao ol kavenan blong yumi oli mekem yumi strong o “strong” olsem wan ston? (Alma 24:19). Ridim tugeta Alma 24:16–25 blong lanem wanem kavenan ol pipol blong Amon oli bin mekem, mo olsem wanem nao oli bin ona long ol kavenan blong olgeta. Invaetem ol pikinini blong tekem ol ston blong olgeta i gohom blong stap mekem olgeta oli tingbaot blong kipim olgeta kavenan blong olgeta.

• Ridim Alma 24:16–19 wetem ol pikinini, mo toktok raon long wanem nao Ol Antae-NifaeLihae oli bin mekem blong soem long God se oli bin sakem sin. ?Long kavenan blong olgeta, wanem nao oli bin kavenan se bae oli no mekem? Eksplenem se ol kavenan we yumi stap mekem, oli olsem “wan testemoni long God” se yumi wantem stap folem ol komanmen blong Hem (ves 18). ?Wanem sam kavenan we oli pikinini oli bin mekem?

• Invaetem ol pikinini blong dro ol pikja blong ol tul blong faet blong Ol Antae-Nifae-Lihae. Afta, invaetem olgeta blong oli raetem, long baksaed blong ol tul blong faet blong olgeta, wan samting we oli filim se oli mas jenisim blong save folem Jisas Kraes moa fulwan. Bae oli priten se oli berem ol tul blong faet blong olgeta mo mekem wan plan blong tekem aksen folem wanem oli raetem.

Alma 24:7–10; 26:23–34; 27:27–30

From se Papa long Heven i gat sore, yumi save sakem sin mo jenisim fasin blong yumi.

I no longtaem i pas, ol pikinini oli bin stap lanem abaot Alma, Amon, mo Ol Antae-Nifae-Lihae. ?Olsem wanem nao yu save yusum ol stori ia blong soem se Papa long Heven i gat sore long olgeta we oli sakem sin wetem tru hat?

Samfala Aktiviti we Yu Save Mekem

• Raetem toktok ia Bifo mo Afta long bod. Askem sam long ol pikinini blong oli ridim olgeta ves ia blong faenemaot se Ol Man blong Leman oli bin olsem wanem bifo Amon mo ol brata blong hem oli bin tijim olgeta: Alma 17:14–15; 26:23–24. Askem ol narafala pikinini blong oli ridim olgeta ves ia blong faenemaot olsem wanem Ol Man blong Leman oli bin jenisim fasin blong olgeta: Alma 26:31–34; 27:27-30. Invaetem ol pikinini blong listimdaon wanem we oli bin faenem anda long wanwan heding. Afta, invaetem olgeta blong faenemaot long Alma 24:7–10, olsem wanem nao Ol Man blong Leman oli bin save jenis fulwan. Serem testemoni blong yu long paoa blong God blong save fogivim yumi mo helpem yumi blong sakem sin mo jenisim laef.

• Invaetem ol pikinini blong rid tugeta long Alma 26: 21–22, mo lukaotem ol blesing we oli kam long olgeta we oli sakem sin. Invaetem ol pikinini blong oli tokbaot sam long ol blesing ia long save blong olgeta nomo.

Alma 26; 29

Gospel i tekem glad i kam long mi, mo mi save serem glad ia wetem ol narafalawan.

Olgeta japta ia oli gat fulap eksampol abaot glad ia we i kam taem wan i laef folem mo i serem gospel. Olsem wanem yu save yusum Alma 26 mo 29 blong givim insperesen long ol pikinini blong oli lukaotem glad ia?

Samfala Aktiviti we Yu Save Mekem

• Helpem ol pikinini blong faenem ol toktok ia “glad” mo “stap glad” insaed long Alma 26 mo 29. Ridim sam ves we oli faenem tugeta, mo toktok raon long wanem nao ol ves ia oli tijim abaot glad. ?Wanem nao i givim glad long Amon mo Alma? Serem wan eksperiens we yu bin filim glad from se yu bin laef folem gospel o yu bin serem gospel, o invaetem ol pikinini blong oli serem ol eksperiens blong olgetawan.

• Invaetem tu pikinini blong fesfesem tufala mo luk hu i save mekem narawan i smael faswan. ?Wanem nao samfala wei we yumi save pasem glad ia long ol narawan? ?Olsem wanem nao fasin blong stap serem gospel i save paspasem glad i go? Helpem ol pikinini blong oli tingting long samfala wei we oli save serem glad blong gospel wetem ol fren mo ol famli blong olgeta.

Stap Leftemap Tingting blong Lanem Samting long Hom

Invaetem ol pikinini blong kipim ol promes blong olgeta olsem Ol Antae-Nifae-Lihae.

Stap Kam Antap long Fasin blong Yumi blong Stap Tij

Lanem wan skripja. Jusum wan skripja sentens o wan sot ples long skripja we yu ting se bae i helpem ol pikinini long klas blong yu, mo helpem olgeta blong oli lanem skripja ia baehat. Ol pikja mo ol aksen wetem han i save help.