“Jun 22–28. Alma 17–22: ‘Bae Mi Mekem Yufala I Kam Wan Tul long Ol Han blong Mi,’” Kam Folem Mi—Blong Praemeri: Buk blong Momon 2020 (2020)
“Jun 22–28. Alma 17–22” Kam Folem Mi—Blong Praemeri: 2020
Amon mo King Lamonae, i kam long Scott M. Snow
Jun 22–28.
Alma 17–22
“Bae Mi Mekem Yufala I Kam Wan Tul long Ol Han blong Mi”
Semmak olsem Lamonae mo ol narafalawan insaed long stori ia oli bin gat ol eksperiens we i bin jenisim laef blong olgeta, ol pikinini we yu stap tijim oli save gat ol eksperiens olsem long saed blong spirit wetem ol skripja, we i save gat paoa long laef blong olgeta blong plante yia we bae i kam. Kipim hemia long maen blong yu taem yu stap tingting hevi long olsem wanem bae yu stap tijim olgeta.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Soem wan pikja we i stap soemaot taem ia long Alma 17–22 (luk long aotlaen blong wik ia long Kam Folem Mi—Blong Wanwan Man, Woman mo Famli). Askem ol pikinini blong talem long yu abaot wanem oli luk long pikja ia.
Stap Tijim Doktrin: Ol Smol Pikinini
Mi save serem gospel wetem ol narafala man.
?Olsem wanem nao eksampol blong ol boe blong Mosaea i save givim insperesen long klas blong yu blong serem ol testemoni blong olgeta wetem ol narafala man?
Samfala Aktiviti we Yu Save Mekem
-
Helpem ol pikinini blong aktemaot stori blong Amon long Alma 17–19. Yu save lukluk tu long “Japta 23: Amon: Wan Gud Wokman” (Ol Stori long Buk blong Momon, 64–68 o vidio blong hem long ChurchofJesusChrist.org) Sapos yu ting se bae ol pikinini bae oli laekem, karem sam simpol klos blong oli dresap long hem i kam. Talem long ol pikinini wanem yu bin lanem aot long stori ia, mo invaetem olgeta blong mekem semmak samting.
-
Soem wan tul, mo tokbaot long ol pikinini se oli yusum blong mekem wanem. ?Wanem sam narafala tul we oli save long hem? Invaetem olgeta blong priten blong yusum tul ia. Eksplenem se semmak olsem we yumi yusum ol tul blong mekem ol wok, Papa long Heven i save yusum yumi blong mekem wok blong Hem. Ridim Alma 17:11, mo eksplenem se Amon mo ol brata blong hem oli ol tul blong Papa long Heven blong helpem Ol Man blong Leman blong lanem gospel.
-
Invaetem ol pikinini blong ron tugeta mo priten blong noknok long ol doa taem yu stap talem stori blong Abis we i stap go olbaot long ol haos blong talem long ol pipol abaot paoa blong God (luk long Alma 19:16–34). Helpem ol pikinini blong tingbaot ol wei we oli save kam olsem Abis mo serem gospel wetem ol narafala man.
-
Invaetem ol pikinini blong dro wan pikja blong olgetawan we oli stap serem gospel wetem wan narafala man. Helpem olgeta blong tingting long sam stret samting we oli save serem. Singsing tugeta long wan singsing abaot fasin blong serem gospel, olsem, “I Want to Be a Missionary Now” (Children’s Songbook, 168). Givim olgeta wan janis blong serem ol filing blong olgeta abaot ol samting we Amon i bin tijim.
Mi save helpem ol narafala man blong kam long Kraes taem mi stap soem lav blong mi long olgeta.
Lav mo seves blong Amon i bin mekem hat blong King Lamonae mo papa blong hem i sopsop. ?Wanem nao ol pikinini oli save lanem aot long ol stori ia?
Samfala Aktiviti we Yu Save Mekem
-
Stori long Alma 17:21–25 long ol pikinini, poenemaot se Amon i wantem givim seves long Lamonae. Invaetem ol pikinini blong serem ol eksperiens abaot ol taem we oli bin givim seves long wan. Rimaenem ol pikinini se bigfala seves blong Amon i bin helpem King Lamonae blong wantem lanem abaot gospel (luk long Alma 18:15–23). Invaetem ol pikinini blong tingbaot wan man we oli save givim seves long hem tedei, mo tokbaot olsem wanem oli save givim seves long man o woman ia.
-
Talem long ol pikinini stori we i stap long Alma 20:8–27. Yu save yusum “Japta 24: Amon i Mitim Papa blong King Lamonae” (Ol Stori long Buk blong Momon, 69–70 o vidio blong hem long ChurchofJesusChrist.org). Askem ol pikinini blong tingbaot ol defren aksen we oli save mekem evri taem we yu talem nem blong Amon, Lamonae o Papa blong Lamonae. Poenemaot se wan risen we hat blong papa blong Lamonae i bin jenis hem i from se Amon i lavem Lamonae tumas. Invaetem ol pikinini blong dro pikja blong wan samting we oli save mekem blong soemaot lav long wan narafalawan.
Tijim Doktrin: Ol Bigfala Pikinini
Testemoni blong mi i gro taem mi ridim ol skripja, prea, mo livim kakae.
Ol boe blong Mosaea oli gro strong long saed blong gospel mo oli kam ol strong misinari from se oli stadi long skripja wetem strong tingting, prea, mo livim kakae. Ol semmak samting ia i save helpem tu ol pikinini we yu stap tijim.
Samfala Aktiviti we Yu Save Mekem
-
Karem i go long klas ol samting we i ripresentem ol skripja, prea, mo fasin long livim kakae, olsem ol skripja, wan pikja blong wan man i stap prea, mo wan pikja blong kaekae, mo eksplenem wanem wanwan samting i ripresentem. Ridim Alma 17:1–4, mo askem ol pikinini olsem wanem ol samting ia i bin helpem ol boe blong Mosaea. ?Olsem wanem nao fasin blong stap ridim ol skripja, prea, mo livim kakae i helpem yumi blong kam kolosap moa long Papa long Heven?
-
Yusum topics index (indeks blong ol topik) insaed long Children’s Songbook blong helpem yu blong faenem ol singsing abaot skripja stadi mo prea. Singsing sam long ol singsing ia tugeta, mo helpem ol pikinini blong luksave wanem ol singsing ia oli tijim abaot, olsem wanem nao ol blesing oli kam taem yumi stap mekem ol samting ia.
Mi save helpem ol narafala man oli kam long Kraes taem mi stap soem lav blong mi long olgeta.
Strong tingting blong Amon blong kam wokman blong Lamonae i bin lid i go long wan janis blong tijim Lamonae taem we hat blong hem i open mo rere blong kasem gospel.
Samfala Aktiviti we Yu Save Mekem
-
Helpem ol pikinini blong ridim ol ves long Alma 17:21–39 we i tokbaot stori blong seves blong Amon i go long King Lamonae. Invaetem olgeta blong dro ol pikja blong ol pipol o ol samting we i bin hapen long stori ia, mo afta, talem stori ia long ol toktok blong olgetawan. Helpem ol pikinini blong luksave olsem wanem nao seves blong Amon i bin pulum tingting blong king (luk long Alma 18:9–23). ?Wanem nao yumi save lanem aot long stori ia abaot wei blong helpem ol narafala man we oli wantem blong lanem moa abaot gospel?
PikjaAmon i sevem sipsip blong KingMinerva K. Teichert (1888–1976), Amon I Sevem Ol Animol blong King, 1935–1945, oel long mesonaet, 35 x 48 inj. Brigham Yang Yunivesiti Miusiom blong Art
-
Ridim Alma 22:1–3, mo askem ol pikinini blong lisin long olsem wanem nao gudfala eksampol blong Amon i tajem papa blong King Lamonae. Invaetem olgeta blong tingbaot wan man we oli save, we i nid blong save abaot gospel. Serem tingting wetem ol pikinini se maet lav mo gud eksampol blong olgeta i save helpem wan man blong luksave se gospel i gud tumas. Helpem ol pikinini blong tingbaot ol wei we oli save stap olsem ol gud eksampol mo soem lav long ol pipol we oli stap tingbaot.
-
Invaetem ol fultaem misinari o wan misinari we i jes kambak blong serem stori blong Amon long Alma 17–18. Askem olgeta blong serem wanem oli bin lanem abaot misinari wok long Amon mo pat we seves blong hem i bin mekem long olgeta. Tokbaot wetem ol pikinini ol wei we oli save folem eksampol blong Amon.
-
Olsem wan klas, raetem wan lis long bod, blong ol samting we ol pikinini oli save mekem blong givim seves long ol memba blong famli. ?Olsem wanem nao bae ol seves ia oli blesem ful famli?
Mi save serem gospel wetem ol narafala man.
?Olsem wanem nao yu save yusum ol stori long ol ves ia blong givim insperesen long ol pikinini blong kam ol misinari olsem Amon mo Abis?
Samfala Aktiviti we Yu Save Mekem
-
Soem ol pikja we i ripresentem samfala trutok we Amon i bin serem wetem King Lamonae we i stap long Alma 18:24–40 (luk long aktiviti pej blong wik ia). Invaetem ol pikinini blong priten se oli ol misinari mo serem wanem oli save abaot ol trutok ia wetem wanwan long olgeta bakegen.
-
Ridim stori blong Abis wetem ol pikinini (luk long Alma 19:16–20, 28–29). Invaetem ol pikinini blong oli kam, wan afta wan, mo priten se oli Abis mo noknok long doa blong klasrum mo testifae long wanem we i hapen long Alma 19:1–17. ?Olsem wanem nao yumi save stap olsem Abis mo testifae long ol trutok we yumi save?
Stap Leftemap Tingting blong Lanem Samting long Hom
Invaetem ol pikinini blong prea from wan gol wetem famli blong olgeta blong serem gospel wetem wan narafala man.
Stap Kam Antap long Fasin blong Yumi Blong Stap Tij
Folemap ol invitesen blong tekem aksen. Taem yu invaetem ol pikinini blong tekem aksen folem wanem we oli stap lanem, folemap invitesen ia long nekis klas. Hemia i soem long ol pikinini se yu kea abaot olsem wanem gospel i stap blesem laef blong olgeta. Taem oli stap serem ol eksperiens blong olgeta, bae oli kam moa strong mo bae i helpem olgeta blong laef folem gospel (luk long Teaching in the Savior’s Way, 35).