Stap Tijim Tru Doktrin, i kam long Michael T. Malm

8–14 Jun

Alma 8–12

Bae Jisas Kraes I Kam blong Pemaot Ol Pipol blong Hem

Taem yu ridim wanem Alma mo Amulek i bin tijim long ol pipol blong Amonaea, ?wanem nao yu filim se i stret long ol pikinini we yu stap tijim

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Invaetem ol pikinini blong tokbaot gud wanem ol misinari oli stap mekem, mo tu, blong oli talem long yu abaot wan we oli save, we i stap long misin. ?Wanem nao ol misinari oli stap tijim long ol pipol? Helpem ol pikinini blong luksave se Alma mo Amulek i bin ol misinari we oli bin serem gospel long ol pipol blong Amonaea.

Stap Tijim Doktrin: Ol Smol Pikinini

Alma 8

Mi save serem gospel.

Alma i bin travel raonem ol ples blong prijim gospel, mo Amulek i bin prij long taon blong hem nomo, long ol fren mo ol neiba blong hem. ?Olsem wanem nao yu save givim insperesen long ol pikinini blong oli folem eksampol blong tufala mo serem gospel wetem ol narafala man?

Samfala Aktiviti we Yu Save Mekem

• Ridim tugeta fas haf blong “Japta 22: [Misin] blong Alma I Go long Amonaea” (Ol Stori long Buk blong Momon, 58–63; luk tu long vidio blong hem long ChurchofJesusChrist.org). Invaetem ol pikinini blong joenem han wetem wan narafala fren mo priten se olgeta oli Amulek mo Alma, we oli bin tijim gospel tugeta, taem oli sing long wan singsing abaot misinari wok, olsem “I want to Be a Missionary Now” (Children’s Songbook, 168).

• Helpem ol pikinini blong ripitim plante taem wan trutok long saed blong gospel, olsem, “Buk blong Momon i testifae abaot Kraes” o “Mi save se Jisas i lavem mi.” Afta invaetem wanwan pikinini blong praktis blong serem trutok ia wetem wan narawan long klas. Olsem pat blong aktiviti ia, yu save helpem ol pikinini blong finisim aktiviti blong wik ia.

• Askem ol pikinini blong tokbaot long yu sam samting we oli bin serem wetem wan memba blong famli blong olgeta o wan fren—olsem wan pleplei o wan loli. Helpem olgeta blong mekem lis blong sam impoten samting we yumi save serem wetem ol narafala abaot Jisas Kraes. Eksplenem se from se gospel hem i impoten tumas, Alma i bin go blong serem wetem ol pipol long plante narafala taon blong olgeta tu oli save lanem olsem wanem blong stap glad.

Alma 8:18–22

Mi save stap olsem wan gud fren.

Seves blong Amulek i go long Alma hem i wan gudfala eksampol long ol pikinini blong olsem wanem nao olgeta i save lavem mo givim seves long ol narafala man.

Samfala Aktiviti we Yu Save Mekem

• Invaetem wan pikinini blong priten se hem i Amulek mo wan narawan blong priten se hem i Alma taem yu stap talem stori long Alma 8:18–22. Letem ol pikinini oli help blong talem stori ia, mo invaetem ol defren pikinini blong stap olsem Alma mo Amulek. ?Olsem wanem nao Amulek i stap olsem wan gud fren long Alma? Askem ol pikinini blong tokbaot olsem wanem nao wan man i stap olsem wan fren long olgeta. ?Eksperiens ia i bin mekem olgeta i fil olsem wanem? ?From wanem nao God i wantem yumi blong stap olsem ol gudfala fren long ol narafala man?

• Faenem o dro wan pikja blong abaot frensip (olsem tu man i stap hag o wan hat), afta katemaot long ol pis blong wan pasel gem. Biaen long wanwan pis blong pasel gem ia, raetem wan samting we Alma mo Amulek i bin mekem blong stap olsem ol gud fren o ol samting we yumi save mekem blong stap olsem ol gud fren. Invaetem ol pikinini blong gat ol janis blong jusum wan pis mo ademap i go long pasel gem ia taem yu stap ridim wanem we oli raetem biaen long hem. Helpem olgeta blong tingbaot sam man we olgeta i save fren wetem hem. Testifae se Jisas Kraes i gudfala fren ia we yumi save gat.

Yumi save stap olsem ol gud fren long ol narafalawan.

Alma 11:43–44

Afta long ded, bambae mi laef bakegen long ded.

Amulek i bin tijim ol pipol blong Amonaea abaot Laef Bakegen long Ded. ?Olsem wanem nao yu save helpem ol pikinini we yu tijim blong andastanem se i minim wanem blong laef bakegen long ded?

Samfala Aktiviti we Yu Save Mekem

• Yusum han blong yu blong ripresentem wan spirit, mo yusum wan hanglav blong ripresentem bodi blong mit mo bun. Tekemaot han blong yu long hanglav ia blong soem se ol spirit mo bodi blong yumi bae i wanwan taem yumi ded. Afta putum han blong yu i gobak insaed long hanglav blong soem se spirit mo bodi bae i kambak joen tugeta bakegen long taem ia blong Laef Bakegen long Ded. Letem ol pikinini i gat janis blong werem hanglav ia mo tekemaot bakegen taem yu stap rid long Alma 11:43 long olgeta. Soem wan pikja blong Meri mo Jisas Kraes we i Laef Bakegen long Ded (Gospel Art Buk, namba 59), mo testifae se Jisas Kraes i bin mekem i posibol blong evri man i save laef bakegen long ded.

• Invaetem ol pikinini blong dro ol pikja blong ol fren o ol memba blong famli blong olgeta, wetem ol memba blong famli we oli no stap kolosap long olgeta. Taem ol pikinini oli stap serem ol pikja blong olgeta, poenem wanwan fren, ol memba blong famli we oli bin droem, mo eksplenem se, hem tu, bae i laef bakegen long ded. Testifae se Jisas i mekem i posibol blong yumi save stap wetem ol famli blong yumi blong oltaem.

Stap Tijim Doktrin: Ol Bigfala Pikinini

Alma 8–10

Mi save serem gospel.

Alma mo Amulek i bin serem gospel, iven long taem we hem i no bin isi. ?Olsem wanem nao bae strong paoa long tingting mo fet blong olgeta i save givim insperesen long ol pikinini we yu tijim?

Samfala Aktiviti we Yu Save Mekem

• Long ol toktok blong yuwan, tokbaot smol wanem we i bin tekem ples long Alma 8–10. Jusumaot samfala prinsipol long ol taem ia we i save helpem ol pikinini blong serem gospel, olsem fasin blong no givap (luk long Alma 8:8–13), stap testifae long Kraes (luk long Alma 9:26–27), mo blong gat wan kompanion (luk long Alma 10:7–11). Invaetem ol pikinini blong ridim ol ves we yu bin jusum mo tokbaot wanem nao oli bin lanem abaot fasin blong serem gospel. ?From wanem nao hem i impoten blong tokbaot gospel long ol narafala man?

• Invaetem ol pikinini blong serem ol eksperiens blong ol taem we oli bin serem gospel wetem wan narafala man, o serem eksperiens blong yuwan. Invaetem ol pikinini blong lisin long ol wei we oli save stap rere blong serem gospel taem oli sing wan singsing abaot misinari wok, olsem, “We’ll Bring the World His Truth” (Children’s Songbook, 172). ?From wanem nao Papa long Heven i wantem yumi blong serem gospel? Helpem ol pikinini blong planem ol wei we oli save serem gospel wetem ol fren blong olgeta, olsem taem oli givim wan kopi blong Buk blong Momon long olgeta o invaetem olgeta i kam long wan Jos aktiviti. Givim taem long olgeta blong aktemaot wanem bae oli talem o mekem long ol situesen olsem.

Alma 11–12

Plan blong God hem i wan plan blong fasin blong pemaot man.

?Olsem wanem nao bae yu yusum Alma 11–12 blong “mekem [ol pikinini] oli save long plan blong fasin blong pemaot man? (Alma 12:30).

Samfala Aktiviti we Yu Save Mekem

• Raetem long bod sam prinsipol we i go wetem plan blong fasin blong pemaot man we yu save faenem insaed long Alma 11–12, olsem Foldaon blong Adam mo Iv, Atonmen blong Jisas Kraes, fasin blong sakem sin, ded, laef bakegen long ded, mo jajmen. Ridim sam ves long Alma 11 o 12 we i tij abaot ol prinsipol, mo givim taem long ol pikinini blong dro wan pikja we i ripresentem wanwan prinsipol. ?Wanem nao pat blong Sevya long plan ia? Afta invaetem ol pikinini blong yusum ol pikja blong olgeta blong aktemaot se oli stap tijim wan fren abaot plan blong God.

Alma 12:10

Sapos mi no mekem hat blong mi i strong, bae mi save kasem moa aot long toktok blong God.

Taem yumi kam blong lanem ol trutok long saed blong spirit, hat blong yumi i mas klin semmak olsem ol maen blong yumi.

Samfala Aktiviti we Yu Save Mekem

• Ridim tugeta Alma 12:10, mo toktok raon se, i minim wanem blong mekem hat blong yumi i “kam strong”. ?From wanem wan strong hat i mekem i moa had blong lanem samting long God?

• Blong soemaot prinsipol ia, soem long ol pikinini wan sponj [blong wasem plet] mo wan ston, mo askem long olgeta se wijwan nao i save holem gud wota. ?Olsem wanem nao yumi save soem long Lod se yumi wantem hat blong yumi i sopsop olsem sponj ia?

Stap Leftemap Tingting blong Lanem Samting long Hom

Invaetem ol pikinini blong faenem ol janis blong serem gospel o helpem wan narafalawan long wik ia.

Stap Kam Antap long Fasin blong Yumi Blong Stap Tij

Serem testemoni blong yu long klas. Wan testemoni hem i save simpol nomo olsem “Mi save se Papa long Heven i lavem wanwan long yufala” o “Mi harem gud taem mi lanem abaot Jisas Kraes.” (Luk tu long Teaching in the Savior’s Way, 11.)