“15–21 Jun. Alma 13–16: ‘Go Insaed long Kingdom blong Lod,’” Kam Folem Mi—Blong Praemeri: Buk blong Momon 2020 (2020)
“15–21 Jun. Alma 13–16” Kam Folem Mi—Blong Praemeri: 2020
Pikja i soem Alma mo Amulek we tufala i kam fri long kalabus, i kam long Andrew Bosley
15-21 Jun.
Alma 13–16
“Go Insaed long Kingdom blong Lod”
Yu stap wetem ol pikinini long klas blong yu blong wan sot taem nomo evri wik. Bae yu blesem laef blong olgeta bigwan sapos yu save givim insperesen long olgeta blong gohed blong lanem samting aot long Buk blong Momon aotsaed long klas—speseli wetem ol famli blong olgeta.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Givim ol janis long ol pikinini blong serem wanem we oli save finis abaot ol stori long Alma 13–16. Blong helpem olgeta, soem ol pikja olsem olgeta ia long Kam, Folem Mi—Blong Wanwan Man, Woman mo Famli” o (Japta 22: Misin blong Alma I Go long Amonaea” (Ol Stori long Buk blong Momon58–63).
Stap Tijim Doktrin: Ol Smol Pikinini
Prishud i helpem mi blong kam long Kraes.
Wetem prea, tingting hevi long wanem ol pikinini long klas blong yu oli nid blong andastan long wanem we Alma i bin tijim abaot prishud long ol ves ia.
Samfala Aktiviti we Yu Save Mekem
-
Askem ol pikinini blong ripitim wetem yu wan simpol mining blong prishud, olsem “prishud hem i paoa blong God”
-
Openem ol skripja i go long Alma 13:2, mo talem long ol pikinini se God i singaotem ol man we oli gat prishud “blong lukluk long taem we Pikinini blong hem bae i pemaot olgeta.” Blong soemaot olsem wanem ol man we oli gat prishud oli mekem hemia, soem ol pikja blong ol wei we ol man we oli gat prishud oli stap givim seves (luk long Gospel Art Buk, namba 38–41, 103–9), afta serem ol stori abaot ol wei we Jisas i bin givim seves (luk long Matiu 26:26–28; Mak 5:22–24, 35–43).
-
Tanem i go long Alma 13:6, mo eksplenem se ol man we oli gat prishud oli “tijim ol komanmen blong [God] long ol pikinini blong ol man.” Helpem ol pikinini blong tingbaot sam man, we oli save, we oli gat prishud. ?Olsem wanem nao oli tijim ol komanmen? Invaetem ol pikinini blong dro wan pikja blong wan man we i gat prishud, we oli save long hem, we i stap tijim wan man abaot ol komanmen blong God.
Ol odinens blong prishud i helpem yumi blong luk long Kraes blong pemaot yumi.
Papa long heven i mekem mi kam strong moa folem fet blong mi.
Stori blong Alma mo Amulek we i kamaot long kalabus i save givim insperesen long ol pikinini blong go long Lod taem oli nidim help.
Samfala Aktiviti we Yu Save Mekem
-
Soem ol pikja blong Alma mo Amulek long aktiviti pej blong wik ia taem yu stap talem stori long Alma 14:18–29. Yu save lukluk tu long “Japta 22: Misin blong Alma I Go Long Amonaea” (Ol Stori long Buk blong Momon 58–63 o vidio blong hem long ChurchofJesusChrist.org) Letem ol pikinini oli gat janis blong yusum ol pikja ia blong talem stori. Poenemaot se Alma mo Amulek i bin kasem paoa blong ronwe long kalabus “folem fet blong [tufala] we i stap long Kraes” (Alma 14:26).
-
Helpem ol pikinini blong gat pikja long maen blong olgeta long olsem wanem nao maet Alma mo Amulek i bin filim taem we tufala i stap long kalabus, mo invaetem olgeta blong aktemaot ol filing ia (luk long ves 22). Eksplenem se Alma i bin askem help long Lod (luk long ves 26). Testifae se God bae i mekem yumi kam moa strong taem yumi prea wetem fet.
-
Yusum aktiviti pej blong wik ia blong tijim ol pikinini abaot sam wei we God i stap mekem olgeta we oli gat fet oli kam strong moa. Taem ol pikinini oli stap kalarem aktiviti pej, tokbaot wan taem we God i bin givim ful paoa long yu.
Mi kasem blesing taem mi folem profet.
Soram, jif kapten blong ol ami blong Ol Man blong Nifae, i bin save se Alma hem i wan profet mo i askem help blong hem. From hemia, Soram hem i gat sakses.
Samfala Aktiviti we Yu Save Mekem
-
Serem stori ia long Alma 16:1–8 wetem ol toktok blong yuwan. Poenemaot se from se Soram mo ol ami blong Ol Man blong Nifae oli bin folem profet Alma, Ol Man blong Nifae oli save sevem ol fren blong olgeta we Ol Man blong Leman oli bin holem i stap long kalabus. Serem wan eksperiens we yu bin kasem blesing from se yu bin folem profet.
-
Soem wan pikja blong Presiden blong Jos, mo serem sam samting we hem i bin tijim yumi blong mekem. Helpem ol pikinini blong tingbaot sam wei we oli save folem Jisas taem oli stap mekem wanem we ol profet oli stap tijim long yumi.
-
Soem ol pikja blong ol profet (luk long Gospel Art Buk, namba 6–9, 14, 18, 26–27) taem yu singsing wan singsing abaot ol profet olsem, “Follow the Prophet” (Children’s Songbook, 110–11). Poenemaot ol sentens long singsing ia we i tijim yumi from wanem yumi mas folem profet.
Stap Tijim Doktrin: Ol Bigfala Pikinini
Prishud i helpem mi blong kam long Kraes.
Taem yu stap ridim Alma 13:1–19, ?wanem nao yu faenemaot we i mekem se yu gat moa respek long prishud? ?Wanem yu filim, we i kam tru long insperesen, blong yu serem wetem ol pikinini we yu stap tijim? Maet samfala aedia i save givhan.
Samfala Aktiviti we Yu Save Mekem
-
Ridim wetem ol pikinini, Alma 13:10 mo 13, mo lukaotem ol fasin we wan man we i gat prishud i mas gat. Askem olgeta blong tingting long ol man we oli save, we oli ol gudfala eksampol blong ol fasin ia.
-
Helpem ol pikinini blong mekem wan lis blong ol odinens we yumi stap kasem tru long prishud (luk long “Odinens” insaed long Stap Tru long Fet, 122–124). Askem wan blong i ridim Alma 13:16. ?Olsem wanem nao, ol odinens ia oli helpem yumi blong “luk fored long [Jisas Kraes] blong kam klin aot long ol sin blong [yumi]”?
-
Askem ol pikinini sapos oli save olsem wanem nao Melkesedek Prishud i kasem nem blong hem. Helpem olgeta blong faenem ansa long Alma 13:14–19 mo Doktrin mo Ol Kavenan 107:1–4. ?Wanem nao yumi lanem aot long Melkesedek abaot olsem wanem nao yumi sapos blong yusum prishud?
Papa long Heven i mekem mi kam strong moa folem fet blong mi.
Alma mo Amulek i bin stap long kalabus blong plante dei bifo Lod i mekem tufala i kam fri. Stori ia i save helpem ol pikinini blong lanem abaot ol tes long laef blong olgeta we i no gat wan kwik o isi ansa, be Lod i save mekem oli kam strong moa “folem fet blong [olgeta]” (Alma 14:26).
Samfala Aktiviti we Yu Save Mekem
-
Raetem ol kwestin long bod we i save helpem ol pikinini blong faenem ol ansa insaed long Alma 14:18–29; ol kwestin olsem ?Wanem nao ol jaj oli bin mekem long Alma mo Amulek insaed long kalabus? o ?Olsem wanem nao oli bin soemaot fet blong olgeta long Jisas Kraes? Givim long wanwan pikinini wan o tu ves blong ridim, mo stap lukaotem ol ansa blong ol kwestin.
-
Invaetem ol pikinini blong dro ol pikja blong sam pat blong stori long Alma 14:18–29, mo letem oli yusum ol pikja blong olgeta blong talem stori. ?Olsem wanem nao yumi save stap olsem Alma mo Amulek?
-
Serem wan eksperiens we yu bin soem fet blong yu long Lod mo Hem i bin givim yu paoa blong winim o stap strong tru long wan tes long laef. Leftemap tingting blong ol pikinini blong serem ol semmak eksperiens olsem we oli bin gat.
Gospel i save jenisim ol hat.
Siesrom i bin agensem bigwan Alma mo Amulek fastaem, be ol testemoni blong tufala i bin tajem hat blong hem mo givim insperesen long hem blong sakem sin. Taem yu stadi long ol ves ia, tingbaot olsem wanem maet ol eksperiens blong Siesrom i save givim insperesen long ol pikinini we yu stap tijim.
Samfala Aktiviti we Yu Save Mekem
-
Luklukbak, wetem ol pikinini, long wanem we oli bin lanem abaot Siesrom long wik ia. Rid tugeta long Alma 15:3–12 blong faenemaot olsem wanem nao hem i bin jenis.
-
Invaetem ol pikinini blong tingbaot se oli bin mitim Siesrom bifo hem i bin sakem sin. ?Wanem nao bae oli talem long hem blong helpem hem blong biliv long gospel? Oli save komperem wanem we olgeta bae i talem wetem wanem we Alma mo Amulek i bin tijim long Siesrom (luk long Alma 11:40–46; 15:6–11). ?From wanem nao blong save ol trutok ia i save helpem wan man blong wantem blong jenis?
Stap Leftemap Tingting blong Lanem Samting long Hom
Invaetem ol pikinini blong tingbaot wan samting we oli save mekem long wik ia blong soemaot fet blong olgeta long Lod. Leftemap tingting blong olgeta blong serem ol plan mo ol eksperiens blong olgeta wetem ol famli blong olgeta.
Stap Kam Antap long Fasin blong Yumi blong Stap Tij
Lanem blong luksave revelesen. “Revelesen i stap kam ‘tijing folem tijing’ (2 Nifae 28:30), i no kam evriwan wantaem. … Taem yu tingting hevi long olsem wanem nao ol gospel prinsipol we yu stap tijim i save blesem ol memba blong klas blong yu, ol tingting mo ol filing bae i kam long yu evri dei truaot long evri dei laef blong yu—taem yu stap travel i go long wok, taem yu stap mekem ol wok long haos, o stap wetem ol famli o ol fren” (Teaching in the Savior’s Way, 12).