15–21 Jun. Alma 13–16: ‘Go Insaed long Kingdom blong Lod,’” Kam Folem Mi—Blong Wanwan Man, Woman mo Famli: Buk blong Momon 2020 (2020)

15–21 Jun. Alma 13–16,” Kam Folem Mi—Blong Wanwan Man, Woman mo Famli: 2020

Pikja

Alma mo Amulek, tufala i wokaot long kalabus

Pikja i soem Alma mo Amulek we tufala i kam fri long kalabus, i kam long Andrew Bosley

15–21 Jun.

Alma 13–16

“Go Insaed long Kingdom blong Lod”

Insperesen we yu stap kasem taem yu stap tingting hevi long olgeta skripja ia, i gat bigfala praes mo i impoten tumas. Yu save soem se yu wantem holemtaet taem yu raetemdaon mo yu stap tekem aksen folem.

Raetemdaon Ol Filing mo Tingting blong Yu

Long plante wei, laef long Amonaeha i no bin gud long Amulek mo long Siesrom. Amulek i wan “man we oli save nem blong hem” we hem i gat plante famli mo fren, mo plante rij samting (Alma 10:4). Siesrom, hem i wan “nambawan man” long medel blong ol loya mo hem i gat plante bisnis” (Alma 10:31). Afta, Alma i kasem Amonaeha wetem tabu invitesen ia blong sakem sin mo “save go insaed long kingdom blong Lod” (Alma 13:16). Long Amulek, Siesrom mo ol narawan, blong akseptem invitesen ia, i minim blong mekem wan sakrifaes, mo iven, i lidim olgeta blong fesem plante agens.

Be yes, stori ia i no stop ia. Long Alma 13–16, yumi lanem wanem i hapen long en long olgeta we oli stap biliv “long paoa blong Kraes, blong kasem fasin blong sevem man” (Alma 15:6). Samtaem, man i kam fri, samtaem, man i kam hiling—mo samtaem, ol samting oli no kam isi moa long laef ia. Be oltaem, “Lod i tekem olgeta long hem bakegen, long glori” (Alma 14:11). Oltaem, Lod i “givim paoa … , folem fet blong [yumi] we i stap long Kraes” (Alma 14:28). Mo oltaem, “fet long Lod” ia i givim yumi “hop se bae [yumi] save kasem laef we i no save finis” (Alma 13:29). Taem yu stap ridim olgeta japta ia, yu save gat kamfot long ol promes ia, mo yu save kam blong andastanem gud moa wanem we Alma i minim taem hem i tokbaot “kingdom blong Lod.”

Pikja

stadi blong yuwan pikja bokis

Sam Aedia blong Skripja Stadi blong Yuwan

Alma 13:1–19

Ol prishud odinens oli helpem mi blong kasem fasin blong pemaot man tru long Jisas Kraes.

Maet bae yu tingbaot se long Alma 12, Alma i tijim abaot plan blong God blong pemaot man (luk long Alma 12:24–27). Long japta 13, hem i tokbaot ol pris we God i odenem olgeta blong “blong tijim ol samting ia long ol pipol” (Alma 13:1). Ol toktok blong Alma i soemaot plante strong trutok abaot prishud. Maet yu save faenem wan trutok long wanwan ves long Alma 13:1–9. Hemia samfala prinsipol we yu save stat wetem:

Ves 1:Prishud, oli singaotem tu “oda blong Pikinini [blong God]” (luk tu long D&K 107:1–4).

Ves 2:God i stap odenem ol pris blong helpem ol pipol blong lukaot Pikinini blong Hem blong kasem fasin blong pemaot man.

Ves 3:Olgeta we oli kasem prishud, God i bin mekem olgeta oli rere from responsabiliti blong olgeta “stat long stat blong wol ia.”

?Wanem samting moa yu faenem? ?Yu filim olsem wanem abaot prishud taem yu stap tingting hevi long olgeta trutok ia? ?Olsem wanem ol prishud odinens ia oli helpem yu blong lukluk i go long Kraes blong kasem fasin blong pemaot man?

Hem i intresting blong luk se plante long ol pipol blong Amonaeha oli bin stap folem Nehor (luk long Alma 14:18; 15:15). ?Olsem wanem nao ol pris blong oda blong Nehor (luk long Alma 1:3–6) oli defren long olgeta pris we oli bin odenem olgeta “folem Oda blong Pikinini blong God” (DC 107:3), we Alma i tokbaot? Luk long Alma 32:28–43

Luk long Dale G. Renlund, “Prishud mo Paoa blong Atonmen blong Sevya,” Ensign o https://www.ChurchofJesusChrist.org/languages/bis/content/general-conference/2017/10/the-priesthood-and-the-saviors-atoning-power, Okt 2017.

Ol prishud odinens oli helpem yumi blong lukluk i go long Jisas Kraes blong kasem fasin blong pemaot man.

Alma 13:3

Olgeta we oli kasem prishud, ?olgeta nomo oli “singaotem olgeta mo mekem rere olgeta stat long stat blong wol ia”?

Ol tijing blong Alma long Alma 13:3 i tokbaot speseli olgeta we oli kasem prishud. Be, prinsipol we hem i tijim—i we wanwan i kasem ol wok, mo God i mekem olgeta oli rere blong mekem ol wok ia oli kamtru “stat long stat blong wol ia”—hemia i laef yet tedei mo i blong yumi evriwan. Presiden Spencer W. Kimball i talem: “Long wol ia bifo yumi kam long ples ia, long wol ia, ol fetful woman oli bin kasem samfala wok, mo ol fetful man, God i bin odenem olgeta finis blong mekem sam spesel prishud wok. I nomata we naoia i stap yumi no tingbaot evri ditel blong hem, hemia i no jenisim se wanem we yumi bin agri long hem fastaem, i stap yet i stap” (Teachings of Presidents of the Church: Spencer W. Kimball [2006], 215–16; luk tu long D&K 138:55–56).

Alma 14

Samtaem, God i letem olgeta stret mo gud pipol blong oli safa.

Alma 14 i tokbaot ol stret mo gud pipol we oli bin safa, mo tu, oli bin ded from bilif blong olgeta. Yu save askem yuwan, olsem we plante oli mekem, from wanem ol bigfala nogud samting i stap hapen long ol pipol we oli stap traem blong laef long wan stret mo gud fasin. Maet bae yu no faenem evri ansa long had kwestin ia long Alma 14, be i gat fulap samting blong lanem aot long wei we Alma mo Amulek oli fesem ol situesen we oli bin fesem. ?Wanem nao ol toktok mo aksen blong olgeta oli tijim yu abaot from wanem, samtaem Lod i stap letem ol stret mo gud pipol oli stap safa? ?Wanem nao yumi lanem aot long olgeta abaot fasin blong fesem agens?

Luk tu long Matiu 5:43–44; Mak 14:55–65; Rom 8:35–39; 1 Pita 4:12–14; Doktrin mo Ol Kavenan 122:5–9.

Alma 15:16, 18

Fasin blong stap olsem disaepol i nidim blong mekem sakrifaes.

Bae i intresting blong mekem wan lis blong ol samting we Amulek i givap long hem blong akseptem gospel (luk long Alma 10:4–5; 15:16) mo komperem long wan lis blong wanem samting hem i bin winim afta (luk long Alma 15:18; 16:13–15; 34:8). ?Wanem nao yu yu glad blong sakrifaesem blong mekem se yu kam wan moa fetful disaepol?

Pikja

famli stadi pikja bokis

Sam Aedia blong Famli Skripja Stadi mo Famli Haos Naet

Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:

Alma 13

Famli blong yu bae i save lan sapos hem i raetemdaon evri taem we toktok ia “kingdom” i kamaot long Alma 13. ?Wanem nara toktok o aedia i kamaot wetem toktok ia? ?Olsem wanem hemia i helpem yumi blong andastanem wanem hem i mining blong “kingdom blong Lod”. ?Olsem wanem nao hemia i defren long spel long bodi?

Alma 13:10–12

Blong helpem famli blong yu blong gat pikja blong wanem ol ves ia oli stap tijim, mebi yu save wasem wan samting tugeta—olsem sam waet klos. ?Yumi filim olsem wanem taem yumi doti? ?Yumi filim olsem wanem taem kam klin bakegen? ?Olsem wanem nao ol filing ia oli semmak long wanem yumi stap filim taem yumi sin, mo afta, taem yumi sakem sin mo kam klin tru long Atonmen blong Sevya?

Alma 15:1–12

?Wanem nao yumi lanem aot long eksperiens blong Siesrom abaot paoa blong Lod blong mekem yumi kam strong moa mo hilim yumi, iven taem yumi mekem ol mistek? ?Wanem wol nao prishud i plei blong yumi save kasem paoa mo hiling blong Hem?

Alma 16:1–10

Afta we yu ridim ol ves ia, yu save ridim Alma 9:4. ?Wanem nao yumi stap lanem taem yumi luk wanem i defren long wei we Soram i filim abaot ol toktok blong profet, wetem wei we ol pipol blong Amonaeha oli bin filim? ?Wanem nao yumi, yumi stap mekem blong stap fetful long ol toktok blong profet blong yumi we i stap laef?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Stap Kam Antap long Fasin blong Yumi blong Stap Tij

Yu rere oltaem. Ol taem blong tij oli pas kwiktaem, mekem se yu mas holem evri janis taem oli kamkamaot. Wan bigfala trabol long wol, bae i wan janis blong serem ol prinsipol we oli stap long Alma 14 abaot from wanem, samtaem, Lod i stap letem olgeta we oli no gat rong oli stap safa. (Luk long Teaching in the Savior’s Way, 16.)