“1–7 Jun. Alma 5–7: ‘?Yufala I Ting se Yufala I Bin Kasem Bigfala Jenis Ia long Hat blong Yufala?’” Kam Folem Mi—Blong Wanwan Man, Woman mo Famli: Buk blong Momon 2020 (2020)
1–7 Jun. Alma 5-7,” Kam Folem Mi—Blong Wanwan Man, Woman mo Famli: 2020
Oli No Fogetem Yu, i kam long Jon McNaughton
Jun 1–7
Alma 5–7
“?Yufala I Ting se Yufala I Bin Kasem Bigfala Jenis Ia long Hat blong Yufala?”
Alma 5–7 i save help blong tingtingbak long hamas yu stap gohed blong jenisim laef blong yu i go long Jisas Kraes. Taem yu stap rid, raetemdaon wanem nao Spirit i stap tijim yu.
Raetemdaon Ol Filing mo Tingting blong Yu
Alma i no bin save abaot ol fasin blong tedei blong katem man mo operetem hat blong man blong sevem laef blong man, we i mekem se oli save riplesem wan hat we i sik wetem wan we i helti. Be hem i bin save abaot wan “jenis long hat” we i mekem ol merikel (Alma 5:26)—wei ia we Sevya i stap yusum blong givim yumi wan niu laef long saed blong spirit, we i olsem se yumi “bon bakegen” (luk long Alma 5:14, 49). Alma i bin save luk se, jenis blong hat ia, i wanem we plante long Ol Man blong Nifae oli bin nidim. Sam oli bin rij, mo sam oli bin pua, sam oli gat hae tingting, mo sam tingting blong olgeta i stap daon, sam oli mekem nogud long man, mo ol narawan oli gat ol hadtaem from man i mekem nogud long olgeta (luk long Alma 4:6–15). Be evriwan i bin nidim blong kam long Jisas Kraes blong oli kam oraet evriwan—semmak olsem we yumi evriwan i nidim tedei. Sapos yumi stap wantem blong winim hae tingting, o blong stap strong tru long ol hadtaem, mesej blong Alma i semmak nomo: “kam mo no fraet” (Alma 7:15). Letem Sevya i jenisim wan hat we i strong, we i sin, o i karekil, i kam wan hat we tingting blong hem i stap daon, i klin evriwan mo i niu.
Sam Aedia blong Skripja Stadi blong Yuwan
Mi mas gat eksperiens—mo gohed blong filim—wan bigfala jenis insaed long hat.
Ol kwestin we Alma i bin askem ol pipol blong Sarahemla blong oli luklukbak long laef blong olgetawan, we oli stap long Alma 5:14–33, i save helpem yu blong luklukgud long sol blong yuwan bakegen, mo andastanem wanem hem i minim blong gotru o gat eksperiens blong wan “bigfala jenis long hat” truaot long laef blong yu. Presiden M. Russell Ballard i bin eksplenem valiu blong ol kwestin ia: “Mi nidim blong tekem taem blong askem miwan oltaem: ‘?Mi, mi olsem wanem?’ Hem i olsem se yu stap gat wan praevet intaviu abaot yuwan, wetem yuwan bakegen. … Olsem wan gaed blong mi, long taem blong praevet intaviu abaot miwan, wetem miwan, mi laekem blong ridim mo tingting hevi long ol kwestin we i kambak long miwan, we mi save faenem long japta blong Alma” (“Return and Receive,” Ensign o Liahona, May 2017, 64).
Tingting blong ridim ol kwestin blong Alma olsem se yu stap intaviu long yuwan, mo yu stap luklukgud evri pat blong hat blong yu. Yu save raetemdaon ol ansa blong ol kwestin ia. ?Wanem nao yumi filim insperesen blong go mekem olsem risal blong intaviu ia?
Luk tu long Dale G. Renlund, “Preserving the Heart’s Mighty Change” Ensign o Liahona, Nov. 2009, 97–99.
Wanwan disaepol blong Kraes i mas gotru long wan “jenis long hat.”
Mi save kasem witnes blong miwan abaot Sevya mo gospel blong Hem tru long Tabu Spirit.
Alma i bin serem ol strong testemoni abaot Sevya mo gospel blong Hem, mo tu, Hem i bin eksplenem olsem wanem hem i bin kasem testemoni ia. Taem hem i stap testifae, hem i no bin talem eksperiens blong hem se hem i bin luk mo i bin harem wan enjel (luk long Mosaea 27:10–17) be, hem i tokbaot praes we hem i mas pem blong save trutok, hemia blong hemwan. ?Wanem nao yu lanem aot long Alma 5:44–51 abaot wei we Alma i kam blong save trutok? ?Olsem wanem yu save folem eksampol blong hem long ol traehad blong yu blong kasem testemoni blong yu, mo mekem i kam strong moa? ?Wanem nao yu stap lanem abaot Sevya aot long ol tijing blong Alma we i stap long Alma 5:33–35, 48–50, mo 57–60?
Fasin blong stap strong blong stap obei bambae i helpem mi blong stap “long rod we i go long kingdom blong God;
Ol pipol blong Gidion, oli bin stap traehad wetem semfala problem olsem hemia blong ol pipol long Sarahemla, mekem se Spirit i bin helpem Alma blong hem i luksave nid blong olgeta mo tijim olgeta long wan defren wei (luk long Alma 7:17, 26). Yu save luk ol samting we oli defren bitwin ol mesej blong Alma long Sarahemla (luk long Alma 5) mo ol mesej blong hem long Gidion. Eksampol: Alma i bin kasem se ol pipol blong Gidion, oli bin stap “long rod ia we i go long kingdom blong God” (Alma 7:19). Truaot long toktok blong hem we i go long olgeta, Alma i tijim olgeta plante samting abaot fasin blong stap long rod ia (luk long Alma 7). ?Wanem advaes nao hem i bin givim long olgeta? ?Wanem nao yu save yusum insaed long laef blong yu naoia?
Sevya i tekem long Hemwan ol sin blong yumi, ol sobodi blong yumi, mo ol hadtaem blong yumi.
?Yu bin filim se i olsem se i no gat wan i andastanem ol traehad o ol jalenj blong yu? Sapos i olsem, ol trutok we oli stap tijim insaed long Alma 7:7–16 oli save help. Elda David A. Bednar i bin testifae: “Pikinini blong God i save gud mo i andastanem, from se Hem i bin filim mo tekem ol trabol blong wanwan long yumi. Mo from sakrifaes blong Hem we i no gat en mo i blong taem we i no save finis (luk long Alma 34:14), Hem i andastanem gud yumi mo Hem i save stretem han blong sore blong Hem i kam long yumi” (“Bear Up Their Burdens with Ease,” Ensign o Liahona, May 2014, 90).
Taem yu stap rid long Alma 7-16, tingtingbak long wanem nao ol ves ia oli bin helpem yumi blong andastanem abaot ol stamba tingting blong sakrifaes blong Sevya. ?Olsem wanem yumi tekem paoa blong Hem i kam insaed long laef blong yumi? Gat tingting blong raetemdaon ol tingting blong yu.
Luk tu long Aesea 53:3–5.
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:
Alma 5:6–13
?From wanem Alma i bin wantem ol pipol blong hem blong oli tingbaot sore we Lod i bin gat long ol bubu blong olgeta? ?Wanem stori aot long famli histri blong yufala we i stap tijim yufala abaot sore blong Hem? Mebi yu save visitim familysearch.org/myfamily blong raetemdaon ol stori blong yufala.
Alma 5:14–33
Ol memba blong famli blong yu, maet oli save filim se i olsem wanem taem wan i rere—o i no rere—blong go kamp, blong mekem wan tes long skul, o gat wan intaviu blong wok. ?Wanem eksperiens oli save serem blong soem hamas i impoten blong stap rere? Yu save invaetem ol memba blong famli blong luklukbak long Alma 5:14–33 mo faenem ol kwestin we Alma i bin askem blong mekem ol pipol blong hem oli rere blong mitim God. Maet wanwan memba blong famli i save jusum wan kwestin mo i serem olsem wanem i save helpem yumi blong rere blong mitim God. Famli blong yu i save soem samfala kwestin blong Alma raon long haos blong yufala blong ol memba blong famli oli save tinting long hem.
Alma 6:4-6
?Wanem nao sam risen from wanem yumi stap kam tugeta olsem Ol Sent? ?Olsem wanem nao yumi save mekem taem we yumi spendem long Jos i helpem moa, yumiwan, mo ol narawan?
Alma 7:9-16
?Wanem nao yumi lanem insaed long ol ves ia we i stap helpem yumi blong “no fraet” (Alma 7:15) taem yumi nidim blong sakem sin mo jenis? ?Wanem nao ol ves ia oli stap tijim yumi abaot fasin blong tanem yumi i go long Sevya taem yumi nidim help? ?Wanem ol nara samting we yumi bin mekem blong kasem help blong hem? ?Olsem wanem nao Hem i bin helpem yumi?
Alma 7:23
?Huia we yumi save we i wan gud eksampol blong wan o moa long ol kwaliti we oli raetemdaon long ves ia. ?From wanem hem i impoten blong developem olgeta kwaliti ia?
Blong gat moa aedia blong stap tijim ol pikinini, luk long aotlaen blong wik ia insaed long Kam Folem Mi—Blong Praemeri.
Stap Kam Antap long Fasin blong Yumi blong Stap Tij
Askem ol kwestin we i stap invaetem ol memba blong famli blong tekem aksen. Tingting long ol kwestin we i pusum ol memba blong famli blong tingtingbak long wei we oli save laef folem gospel i moa fulwan. “Olgeta ia, oli no kwestin blong toktok raon long olgeta; oli blong yu tingtingbak yuwan long olgeta” (Teaching in the Savior’s Way, 31).
Loya blong Yumi, i kam long Jay Bryant Ward