Yangfala Alma i stap prij, i kam long Gary L. Kapp

25–31 Mei

Mosaea 29–Alma 4

“Oli Stanap Strong mo Oli No Muvmuv”

Taem yu ridim olgeta skripja, hem i stap invaetem revelesen i kam. Mekem tingting mo filing blong yu i open long ol mesej we Lod i wantem givim long yu.

Raetemdaon Ol Filing mo Tingting blong Yu

Sam bae oli luk se tingting blong King Mosaea blong riplesem ol king wetem ol jaj we oli jusum olgeta, i olsem wan niu wei blong mekem politik. Be long Ol Man blong Nifae, speseli olgeta we oli stap laef antap long rabis King Noa, jenis ia i gat mining long saed blong spirit. Oli bin luk olsem wanem wan king we i no stret mo i no gud i bin mekem “rabis fasin” long medel blong ol pipol, mo i “prapa spolem gud” ol pipol (Mosaea 29:17), mo oli bin “wantem tumas” blong kam fri long kaen fasin olsem. Jenis ia, bae i letem olgeta oli responsibol blong lukaotem stret mo gud fasin blong olgeta, mo “ansa from sin blong olgetawan” (Mosaea 29:38; luk tu long D&K 101:78).

Mo tu, en blong rul blong ol king i no minim en blong ol problem long sosaeti blong Ol Man blong Nifae. Ol pipol oli waes long giaman fasin, olsem Nehor mo Amlisae, oli bin stap tokbaot bigwan ol giaman aedia; olgeta we oli no biliv oli givim hadtaem long Ol Sent, mo plante memba blong Jos oli kam blong gat hae tingting mo oli foldaon. Be, “olgeta we tingting blong olgeta i stap daon we oli stap folem God,” oli gohed blong “stanap strong mo oli no muvmuv” i nomata wanem i stap hapen raon long olgeta (Alma 1:25). Mo from jenis ia we Mosaea i statem, bae oli save “givim voes blong olgeta” blong lidim tingting blong sosaeti blong mekem gud (Alma 2:6).

Sam Aedia blong Skripja Stadi blong Yuwan

Mosaea 29:11–27; Alma 2:1–7

Mi save stap olsem wan gud paoa blong lidim man blong mekem gud insaed long ol komuniti blong mi.

Jes faef yia afta stat blong rul blong ol jaj, wan trabol i kam antap we bae i testem toktok blong Mosaea, se voes blong ol pipol, plante taem, bae i jusum wanem we i raet (luk long Mosaea 29:26). Poen we i stap, insaed long hem i gat fridom blong relijin: wan man, we nem blong hem i Amlisae, i lukaot blong “tekemaot ol raet blong [ol pipol] mo ol raet blong jos” (Alma 2:4). ?Yu yu bin luk finis we ol raet blong relijin oli stap long denja insaed long nesen o komuniti blong yu? ?Wanem nao yu lanem abaot wei we Ol Man blong Nifae oli folem taem oli fesem denja ia? (luk long Alma 2:1–7).

I tru se i gat plante impoten samting o trabol we komuniti blong yu i stap fesem i stap. ?Olsem wanem, yu, semmak olsem Ol Man blong Nifae, i save meksua se voes blong yu i stap insaed long “voes blong ol pipol”? Maet yu stap laef long wan ples we voes blong ol pipol i no lidim tumas tingting blong gavman; sapos i olsem, ?i gat ol nara wei we yu save kam wan gudfalawan blong save lidim tingting blong komuniti blong yu?

Alma 1

Mi save luksave mo sakemaot giaman doktrin.

Nomata we Nehor i bin konfes long en se wanem we hem i bin tijim, i no tru, ol tijing blong hem oli bin gohed blong lidim tingting blong Ol Man blong Nifae blong plante yia (luk long Alma 1:15–16; 2:1–2; 14:14–18; 15:15; 21:4; 24:28). ?From wanem nao ol pipol oli bin faenem se ol tijing blong Nehor oli swit? Taem yu stap ridim Alma 1:2–4, luk sapos yu save faenemaot ol giaman insaed long ol tijing blong Nehor; bae yu save luk se hem i bin tijim olgeta wetem sam haf trutok.

Gidion i stanap agensem Nehor “wetem ol toktok blong God” (Alma 1:7, 9). ?Yu yu save tingting long sam skripja we i sakemaot ol giaman tijing blong Nehor? Hemia sam eksampol, be i gat plante narawan moa: Matiu 7:21–23; 2 Nifae 26:29–31; Mosaea 18:24–26; mo Hileman 12:25–26. ?Olsem wanem ol skripja ia oli save helpem yu blong sakemaot ol giaman tijing we oli stap tijim tedei?

Wan nara wei blong mekem stadi blong yu blong Alma 1, hem i blong komperem Nehor mo olgeta we oli stap folem hem (ol ves 3–9, 16–20) wetem “ol pipol blong God” (ol ves 25–30; luk tu long 2 Nifae 26:29–31). ?Olsem wanem yu save kam moa olsem ol pipol blong God? ?Yu yu luk eni “wok blong giaman pris” insaed long seves blong yu?

Alma 1:27–31; 4:6–15

Ol tru disaepol blong Jisas Kraes oli no putum hat blong olgeta long ol rij samting.

Ol japta 1 mo 4 blong Alma, oli stap tokbaot ol taem we Jos i bin kam antap, be ol memba blong Jos oli no mekem semfala samting long tufala defren taem ia. ?Wanem samting we i defren we yu bin luk? Folem wanem we yu faenem, ?hao nao bae yu tokbaot fasin we “olgeta we tingting blong olgeta i stap daon we oli stap folem God,” (Alma 4:15) oli gat long saed blong ol rij samting mo fasin blong kam antap gud long laef? ?Wanem nao yumi filim insperesen blong go jenisim long fasin blong yuwan?

Alma 4

“Toktok blong God” mo “klin testemoni” i save jenisim hat.

?Wanem nao i mekem Alma i gat “bigfala harem nogud” (Alma 4:15) long Alma 4? Ating sam oli bin talem se ofis blong jif jaj bae i putum Alma long wan moa gud ples blong stretem ol problem we hem i bin luk long medel blong ol pipol blong hem. Be Alma i filim se i gat wan wei we i gud moa. ?Wanem nao i kam long filing mo tingting blong yu abaot wei blong hem blong stap helpem ol pipol blong hem? Stadi blong yu bae i save givim insperesen blong yu gat sam tingting long haos yu save, wetem stret mo gud fasin, lidim tingting blong olgeta raon long yu; sapos i hapen olsem, tekem aksen folem ol tingting ia.

Sam Aedia blong Famli Skripja Stadi mo Famli Haos Naet

Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:

Alma 1:19–25

Maet famli blong yu i save lanem samting taem hem i faenemaot ol defren wei we ol memba blong Jos oli stap fesem fasin blong agens insaed long ol ves ia. Mebi yu save praktisim sam wei blong fesem ol narawan long wan stret wei taem oli atakem bilif blong yu. Ol vidio long ChurchofJesusChrist.org/religious-freedom/examples oli save help.

Alma 3:4

?Wanem mesej nao Ol Man blong Amlisae oli wantem blong pasem taem oli “bin makem olgeta long [wan] mak”? (luk long Alma 3:4, 13). ?Wanem mesej nao yumi save sendem—we yumi minim o yumi no minim blong sendem—folem wei we yumi stap mekem yumi? Ating hemia i wan gud taem blong luklukbak long “Dress and Appearance” insaed long For the Strength of Youth (2011), 6–8.

Alma 4:2–3

?Wanem nao ol samting o ol eksperiens we oli bin “wekemap olgeta blong tingbaot ol wok blong olgeta” long God? (Alma 4:3). Mebi bae i wok gud blong serem ol ves ia afta we yu wekemap famli blong yu long moning. Afta, yu save toktok raon long hao nao ol jalenj blong wekap, hemia blong wekemap bodi, i helpem yumi blong andastanem ol jalenj blong yumi wekap long saed blong spirit.

Alma 4:10–11

?Olsem wanem nao bae yumi no kam “olsem wan bigfala ston we i blokem rod blong olgeta we oli no blong jos”? (Alma 4:10). Bae i gud mo i help blong tokbaot olsem wanem yumi save meksua se ol aksen blong ol narawan, speseli olgeta fren we oli memba blong Jos, oli no kam ol bigfala ston we oli blokem yumi blong progres.

Alma 4:19

Blong helpem famli blong yumi blong andastanem paoa blong testemoni, yu save askem olgeta blong tingting long wan taem we, taem oli bin lisin long testemoni blong wan, i bin tajem olgeta bigwan. ?From wanem nao, Alma, i jusum blong yusum testemoni blong hem mo toktok blong God blong tajem hat blong ol pipol? (luk tu long Alma 31:5). ?From wanem nao hemia i wok i gud moa bitim ol nara wei we ol pipol oli bin yusum blong winim tingting blong ol narawan blong oli jenis? ?I gat ol pipol we fet blong olgeta i save kam strong moa sapos yumi serem testemoni blong yumi wetem olgeta?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Stap Kam Antap long Stadi blong Yuwan

Stap yusum ol skripja i kambak long laef blong yumiwan. Tingting long hao nao ol stori mo ol tijing blong ol skripja, oli go stret wetem laef blong yumi? Eksampol: yu save faenem samting i ron semsemmak bitwin wol blong tedei mo ol problem blong sosaeti we Ol Man blong Nifae oli bin fesem long Alma 1–4.

Alma mo Amlisae, i kam long Scott M. Snow