Yangfala Alma i stap prij, i kam long Gary L. Kapp

25–31 Mei

Mosaea 29–Alma 4

“Oli Stanap Strong mo Oli No Muvmuv”

Ol pikinini we yu tijim oli save lanem plante samting long klas blong yu, be bae oli save lanem moa samting sapos oli developem wan fasin blong stadi ol skripja long hom. Tingting long sam wei we yu save leftemap tingting blong olgeta mo sapotem fasin blong lanem gospel insaed long hom.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Invaetem ol pikinini blong sidaon long wan sekol long flo, afta rolem wan bol i go long wan long olgeta. Askem wan pikinini blong serem wan samting we hem i jes lanem abaot gospel long hom o long Praemeri. Afta askem pikinini ia blong rolem bol i go long wan narafala pikinini. Ripitim olsem kasem evri pikinini i gat janis blong serem wan samting.

Stap Tijim Doktrin: Ol Smol Pikinini

Alma 1:2-9, 26-30

Olsem wan memba blong Jos, mi sud gat lav mo givim seves long ol narafalawan.

Maet bae yu no jusum blong tokbaot plante abaot ol tijing blong Nehor, be bae i gud blong olgeta i save se, insaed long Jos, yumi givim seves from se yumi lavem ol narafala man, be i no from se yumi wantem kam rij o mekem plante man i save long yumi.

Samfala Aktiviti we Yu Save Mekem

• Serem wetem ol pikinini, long ol toktok we bae oli save andastanem, stori blong Alma mo Nehor (luk long Alma 1; “Japta 20: Alma mo Nehor,” Ol Stori long Buk blong Momon 54–55 o vidio blong hem long ChurchofJesusChrist.org). Poenemaot se iven taem Nehor mo ol man blong hem oli bin nogud long ol memba blong Jos, plante long ol memba blong Jos oli bin gohed blong stap kaen mo gat lav.

• Ridim Alma 1:30 long ol pikinini, mo helpem olgeta blong andastanem se ol pipol blong Jos oli bin serem wanem we oli gat wetem ol pipol we oli nidim help. Helpem ol pikinini blong tingbaot sam samting we oli save serem mo ol pipol we oli save serem wetem. Leftemap tingting blong ol pikinini blong dro ol pikja blong ol plan blong olgeta.

• Singsing tugeta wan singsing abaot lav mo seves, olsem “Kindness Begins with Me” (Children’s Songbook, 145), mo helpem ol pikinini blong tingbaot sam aksen we oli save mekem wetem singsing ia.

Alma 2:38–30

God bae i ansarem ol prea blong mi.

Taem we Alma mo Ol Man blong Nifae oli bin filim “plante fraet” (Alma 1:23), oli bin prea from help mo oli bin kam strong moa. Helpem ol pikinini blong lanem samting aot long ol eksampol blong olgeta.

Samfala Aktiviti we Yu Save Mekem

• Yusum ol pikja long aotlaen blong wik ia insaed long Kam Folem Mi—Blong Wanwan Man mo Famli o long “Japta 21: Ol Man blong Amlisae” (Ol Stori long Buk blong Momon, 56–57, o vidio blong hem long ChurchofJesusChrist.org), mo talem long ol pikinini olsem wanem Ol Man blong Nifae oli bin kasem paoa blong winim Ol Man blong Amlisae. Askem ol pikinini abaot sam samting we i bin mekem olgeta oli fraet o i bin had long olgeta, mo testifae se oli save prea long Papa long Heven from help wetem ol samting ia.

• Serem wan eksperiens we God i bin helpem yu afta we yu bin prea long Hem. Invaetem ol pikinini blong serem ol eksperiens we oli bin gat wetem prea.

Alma 4:19

Testemoni blong mi i save mekem narafala man i kam strong moa.

Plante taem “klin testemoni” (Alma 4:19) blong wan pikinini i save gat strong paoa long tingting blong narafala man. ?Olsem wanem nao yu save helpem ol pikinini blong faenem ol wei blong oli serem ol testemoni blong olgeta?

Samfala Aktiviti we Yu Save Mekem

• Openem ol skripja i go long Alma 4:19, mo eksplenem se taem we Alma i bin luk hamas nogud fasin ol pipol oli stap mekem, nao hem i gat tingting se wan gudfala wei blong helpem olgeta hem i blong serem wan “klin testemoni” long olgeta. Yusum aktiviti pej blong wik ia blong tijim ol pikinini wanem ia testemoni mo wanem i stap insaed long wan testemoni. Leftemap tingting blong olgeta blong serem ol testemoni blong olgeta.

• Kapsaetem sam klin wota i go long wan glas, mo eksplenem we wota ia i olsem testemoni blong yumi, from se yumi save serem wetem ol narafala man. Kapsaetem glas wota ia i go long wan smol kap blong wanwan pikinini, mo talem long olgeta se taem yumi serem testemoni blong yumi, yumi stap helpem ol narafala man blong gat ol strong testemoni tu.

• Sapos ol pikinini oli wantem, letem oli praktis blong serem testemoni blong olgeta. Serem tingting long plante defren wei we oli save soemaot se olgeta oli save se gospel i tru, mo tu, mo wan wei hem i tru long aksen blong olgeta .

Stap Tijim Doktrin: Ol Bigfala Pikinini

Alma 1:2–9

Mi save lanem blong luksave ol tijing we oli no tru.

Long sam taem long ol laef blong yumi, yumi evriwan i mas fesem ol man olsem Nehor—olgeta we oli traem blong giaman long yumi wetem ol mesej we yu harem se i naes be oli no tru mo oli save spolem yu. Sapos yu serem stori long Alma 1:2–9 i save helpem ol pikinini blong rere blong fesem ol kaen taem olsem ia long ol laef blong olgeta.

Samfala Aktiviti we Yu Save Mekem

• Helpem ol pikinini blong ridim Alma 1:2–4 blong luklukbak long sam samting we Nehor, wan giaman tija, i bin stap tijim. Helpem olgeta blong mekem sam tru-o-no tru kwestin, yusum ol toktok long ves ia. ?From wanem nao, Setan, samtaem i stap miksimap trutok wetem ol giaman samting? Helpem ol pikinini blong tingbaot sam eksampol.

• Afta we yufala i luklukbak long Alma 1:2–9 tugeta, askem long wanwan pikinini blong ridim wan long ol skripja ia: Matiu 7:21–23; 2 Nifae 26:29–31; Mosaea 18:24–26; mo Hileman 12:23–26. ?Olsem wanem nao ol skripja ia i sakemaot ol tijing blong Nehor? ?Olsem wanem nao yumi save yusum ol skripja blong mekem ol testemoni blong yumi long gospel i kam strong moa?

Alma 1:26–30; 4:6–13

Olsem wan memba blong Jos, mi mas lavem mo givim seves long ol narafala man.

Samtaem ol memba blong Jos long taem blong Alma oli kaen mo save serem samting, mo long ol narafala taem oli no kaen mo oli gat hae tingting. Helpem ol pikinini we yu stap tijim blong lanem samting aot long ol eksperiens ia.

Samfala Aktiviti we Yu Save Mekem

• Helpem ol pikinini blong rid long Alma 4:6–13, mo talemaot mining blong ol toktok olsem “ol man oli no hae long olgeta,” “givim hadtaem,” mo “luklukdaon” (yusum wan diksonari sapos i nid). ?Yumi filim olsem wanem taem ol man oli tritim yumi long ol kaen fasin olsem? Invaetem ol pikinini blong faenem ol toktok ia long Alma 1:26–30 we i tokbaot gud olsem wanem Papa long Heven i wantem yumi blong tritim wanwan long yumi.

• Askem ol pikinini blong ridim Alma 1:27, 30 mo mekem wan lis blong ol defren kaen pipol we ol memba blong Jos oli stap helpem olgeta. Invaetem ol pikinini blong tingbaot ol pipol we oli laef raon long olgeta, o long ol skul blong olgeta, we maet oli “stap long nid” (Alma 1:30,) we oli nidim lav mo help blong olgeta. Blong sapotem prinsipol ia, singsing tugeta wan singsing abaot fasin blong stap kaen, olsem “I’ll Walk with You” (Children’s Songbook, 140–41).

Alma 4:8–20

Testemoni blong mi i save mekem narafala man oli kam strong moa.

Alma i givimaot posisen blong hem olsem jif jaj blong hem i save spendem moa taem blong serem testemoni blong hem mo helpem ol pipol blong sakem sin. Eksampol blong hem i save givim insperesen long ol pikinini blong serem ol testemoni blong olgeta oltaem.

Samfala Aktiviti we Yu Save Mekem

• Ridim Alma 4:8–12, 15 wetem ol pikinini, mo askem olgeta blong talemaot ol problem we oli stap hapen insaed long Jos, olsem we ol ves ia oli talemaot gud. Invaetem ol pikinini blong givim tingting abaot sam samting we Alma i save mekem blong stretem ol problem ia. Helpem olgeta blong faenemaot, long Alma 4:16–20, wanem Alma i bin disaed blong mekem. ?From wanem nao testemoni i gat moa paoa?

• Blong helpem ol pikinini blong andastanem wanem ia testemoni mo wanem i stap insaed long hem; soem vidio ia “Apostle Testimony Montage” (ChurchofJesusChrist.org); singsing tugeta wan singsing abaot topik ia, olsem “Testimony” (Hymns, no. 137); o yusum aktiviti pej blong wik ia. Askem ol pikinini blong serem wanem we oli bin lanem abaot ol testemoni aot long ol risos ia.

Leftemap Tingting blong Lanem Samting long Hom

Helpem ol pikinini blong tingbaot wan we oli save serem testemoni blong olgeta wetem long nekis wik. Leftemap tingting blong olgeta blong raetem wan plan blong helpem olgeta blong winim gol blong olgeta.

Stap Kam Antap long Fasin blong Yumi Blong Stap Tij

Askem ol kwestin we i invaetem wan blong serem testemoni. “Blong stap askem ol kwestin we i leftemap tingting blong olgeta we oli stap lan blong serem testemoni abaot ol prinsipol we oli bin tijim, hem i wan wei we i gat moa paoa blong invaetem Spirit” (Teaching in the Savior’s Way, 32). Blong invaetem ol pikinini blong serem testemoni, askem ol kwestin we bae i mekem olgeta blong oli tingting abaot, mo blong oli serem olsem wanem oli filim abaot Sevya mo gospel blong Hem. Yu save askem olgeta tu abaot ol eksperiens we oli bin gat wetem prea, seves, ol odinens olsem baptaes, o filim Tabu Spirit.