Minerva K. Teichert (1888-1976), Amon long Fored blong King Limhae, 1949-1951, oel long mesonaet, 35 15/16 x 48 inj. Brigham Yang Yunivesiti Miusiom blong Art, 1969.

27 Epril–3 Mei

Mosaea 7–10

“Wetem Paoa Blong Lod”

Wetem prea, ridim Mosaea 7–10, mo tingting hevi long ol filing mo tingting we yu stap kasem. ?Olsem wanem nao ol trutok long ol japta ia oli helpem yu blong lukluk long ol nid blong ol pikinini we yu stap tijim?

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Leftemap tingting blong ol pikinini blong serem eni samting we oli save abaot ol samting we i bin tekem ples long ol japta ia. Maet yu save faenem sam help long “Japta 13: Senif” (Ol Stori long Buk blong Momon, 36–37, o vidio blong hem long ChurchofJesusChrist.org).

Stap Tijim Doktrin: Ol Smol Pikinini

Mosaea 7:18–20, 33

God i bin helpem ol pipol insaed long ol skripja, mo bae Hem i save helpem mi.

Ol pipol blong Limhae, we oli bin stap olsem ol slef blong Ol Man blong Leman, oli bin nidim fet se bae God i helpem olgeta, taswe Limhae i stap rimaenem olgeta long ol taem we God i bin stap helpem ol pipol blong Hem.

Samfala Aktiviti we Yu Save Mekem

• Askem ol pikinini blong serem wan taem we oli bin nidim help. Eksplenem se ol pipol blong King Limhae oli bin stap long trabol, taswe hem i serem wan stori ia blong helpem olgeta blong gat fet. Ridim Mosaea 7:19 long ol pikinini, mo soem wan pikja blong ol pikinini blong Isrel we oli wokbaot oli krosem Red Si (luk long Moses Parting the Red Sea, ChurchofJesusChrist.org). Luklukbak long stori ia mo stori blong mana, mo helpem ol pikinini blong aktemaot ol stori ia (luk long ol japta 17 mo 18 long Old Testament Stories, o vidio blong hem long ChurchofJesusChrist.org). ?Olsem wanem nao Lod i bin helpem ol pipol? Testifae se Lod i save helpem yumi.

• Ridim Mosaea 7:33 long ol pikinini, mo helpem olgeta blong andastanem wanem ves ia i stap tijim yumi blong mekem blong save kasem help we i kam long Lod. Helpem ol pikinini blong tingbaot sam aksen blong ripresentem ol samting ia, mo ripitim ves ia taem oli mekem ol aksen ia. ?Wanem nao samfala samting we yumi nidim help wetem? ?Olsem wanem nao yumi save soemaot se yumi gat tras long Lod? Serem wan eksperiens blong wan taem we yu bin gat tras long Lod mo Hem i bin helpem yu.

• Jusum sam ves long “Book of Mormon Stories” o “Nephi’s Courage” (Children’s Songbook, 118–19, 120–21) blong singsing wetem ol pikinini. Helpem olgeta blong luksave olsem wanem Lod i bin helpem ol pipol insaed long Buk blong Momon. Serem sam narafala skripja stori we yu filim se bae i helpem ol narafala pikinini blong lanem blong gat tras long Lod.

Mosaea 8:16–17

God i givim long yumi ol profet, ol sia, mo ol reveleta.

?Olsem wanem nao yu save yusum Mosaea 8:16–17 blong tijim ol pikinini abaot wok blong wan profet olsem wan sia.

Samfala Aktiviti we Yu Save Mekem

• Soem long ol pikinini olsem wanem blong leftemap ol han blong olgeta i go long ol ae blong olgeta olsem we oli stap lukluk tru long wan spaeglas. Ridim Mosaea 8:17, mo askem long ol pikinini blong putum ol “spaeglas” blong olgeta evri taem oli harem toktok ia “sia.” Eksplenem se God i bin givim ol profet long yumi mo wan long ol wok blong wan profet hem i blong stap olsem wan “sia” from se hem i save “luk” ol samting we oli stap kam. Serem sam eksampol blong ol samting we ol profet oli bin luk mo talemaot long yumi (i tekem tu, ol skripja), o serem wan eksampol blong wan taem we wan profet i stap olsem wan sia (olsem long 1 Nifae 11:20–21).

• Mekem ol trak blong leg aot long pepa, mo dro long ol pepa ia, ol pikja blong ol samting we ol profet i bin givim kaonsel long yumi blong mekem. Putum ol trak blong leg ia long wan rod we i go raon long rum, mo tokbaot ol pikja ia. Letem ol pikinini oli gat janis blong priten se oli olsem wan profet mo gaedem ol pikinini blong folem ol trak blong leg ia.

• Soem pikja blong aotlaen blong wik ia long Kam Folem Mi—Blong Wanwan Man, Woman mo Famli, mo askem ol pikinini blong tokbaot wanem we oli luk. Eksplenem se Profet Josef Smit hem i wan sia. Lod i bin givim ol tul long hem we oli singaotem se, Yurim mo Tumim mo wan sia ston, blong hem i yusum blong transletem Buk blong Momon.

• Soem wan sot vidio blong wan mesej blong konfrens we i jes pas blong Presiden blong Jos (o soem wan pikja blong hem we i stap ridim wan samting we hem i bin tijim). Serem testemoni blong yu se hem i wan profet, sia mo reveleta.

Stap Tijim Doktrin: Ol Bigfala Pikinini

Mosaea 7:18–20, 33; 9:14–19; 10:6–10, 19–21

God i bin helpem ol pipol insaed long ol skripja, mo bae Hem i save helpem mi.

Senif mo ol pipol blong hem, we oli bin stap long graon blong Ol Man blong Leman, Ol Man blong Leman oli bin atakem olgeta mo oli nidim help blong God. ?Wanem nao ol pikinini oli save lanem aot long stori ia abaot fasin blong God blong helpem ol pikinini blong Hem?

Samfala Aktiviti we Yu Save Mekem

• Seraotem ol pikinini i go long tri grup, mo invaetem wanwan grup blong stadi wan long ol skripja stori ia: Ol Man Isrel oli stap wokbaot krosem Red Si (luk long Eksodas 14:10–14, 21–31), famli blong Lihae i stap wokbaot i go long waelples (luk long 1 Nifae 16:9–16; 17:1–6), mo ol pipol blong Senif we oli bin kam fri, oli aot long Ol Man blong Leman (luk long Mosaea 9:14–19; 10:6–10, 19–21). ?Olsem wanem nao ol pipol long ol stori ia oli bin soemaot se oli gat tras long God? ?Olsem wanem nao God i bin helpem olgeta? ?Olsem wanem nao Hem i stap helpem yumi taem yumi gat tras long Hem?

• Invaetem tri pikinini blong raet long bod, abaot wan tes o wan jalenj we oli bin fesem. Askem ol pikinini blong ridim Mosaea 7:33, mo leftemap tingting blong olgeta blong waepemaot wan long ol tes o jalenj ia evri taem oli harem abaot wan samting we oli save mekem blong save kasem help blong Lod. ?Olsem wanem nao taem yumi stap gat tras long Lod i save helpem yumi blong winim ol jalenj blong yumi?

Mosaea 8:12–19

God i givim ol profet, ol sia, mo ol reveleta blong helpem ol man.

Yumi sastenem Fas Presidensi mo Olgeta Twelef Aposol olsem ol profet, ol sia, mo ol reveleta. ?Olsem wanem nao yu save tijim ol pikinini abaot hamas ol profet oli impoten?

Samfala Aktiviti we Yu Save Mekem

• Jusum sam impoten toktok long Mosaea 8:12–19, mo raetem long bod. Invaetem wan pikinini blong ridim ol ves ia, mo askem long ol narafala pikinini blong leftemap han blong olgeta evri taem oli harem wan toktok we i stap long bod. Stop rid mo toktok raon long wanwan toktok ia wetem ful klas.

• Askem ol pikinini blong luklukbak long Mosaea 8:16–18 blong lanem se wanem ia hem i wan sia. Raetem toktok ia long bod: Wan sia hem i olsem . Helpem ol pikinini blong tingbaot samfala wei we oli save finisim sentens ia blong eksplenem from wan sia hem i wan blesing long yumi—eksampol, wan sia hem i olsem wan man blong sevem ol man long solwota; hem i givim woning abaot ol denja.

• Jusum wan sentens long Mosaea 8:16–17, mo raetem long bod, mo jenisim wanwan toktok wetem wan saen we yu mekemap. Givim wan lis blong ol saen ia long ol pikinini wetem ol toktok we oli ripresentem, mo letem oli faenem mining o “transletem” toktok ia olsem we ol sia oli stap mekem. ?Wanem samfala wei we ol profet, ol sia, mo ol reveleta oli “bigfala help” long yumi? (Mosaea 8:18).

Mosaea 9:14–18; 10:10–11

Taem mi no strong, Lod i save mekem mi kam strong moa.

Taem ol pikinini oli gat ol jalenj, samtaem oli save filim se oli no strong mo no gat help. Yusum stori blong ol pipol blong Senif blong tijim ol pikinini se yumi save kasem paoa we i kam long Lod.

Samfala Aktiviti we Yu Save Mekem

• Askem ol pikinini blong serem ol wei we oli save kam strong long saed blong bodi. ?Hem i minim wanem blong gat “paoa blong ol man”? (luk long Mosaea 10:11). ?Hem i minim wanem blong gat “paoa blong Lod”? (luk long Mosaea 9:17–18; 10:10). ?Olsem wanem nao yumi stap kasem paoa blong Lod?

• Invaetem ol pikinini blong dro wan pikja blong wan man we oli filim se hem i gat paoa blong Lod mo serem from wanem oli dro wetem man o woman ia.

Stap Leftemap Tingting blong Lanem Samting long Hom

Invaetem ol pikinini blong serem wetem ol famli blong olgeta wan stori long skripja we i givim insperesen long olgeta blong “putum tras [blong olgeta] long God” (Mosaea 7:19).

Stap Kam Antap long Fasin blong Yumi blong Stap Tij

Askem ol kwestin we i givim insperesen. Askem ol kwestin we i invaetem ol pikinini blong serem ol testemoni blong olgeta long saed blong ol trutok blong gospel. Eksampol, sapos yu stap tokbaot ol profet, yu save askem long ol pikinini blong serem olsem wanem ol profet oli stap blesem olgeta.