Stap Wok blong God blong Yu, i kam long Walter Rane

20–26 Epril

Mosaea 4–6

“Wan Bigfala Jenis”

?Wijwan long ol tijing blong King Benjamin insaed long Mosaea 4–6 nao bae i helpem gud ol pikinini we yu stap tijim blong stat blong eksperiensem “wan bigfala jenis” (Mosaea 5:2) insaed long hat blong olgeta? Raetemdaon ol filing mo ol tingting blong yu taem yu stap prea blong God i lidim yu.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Raetemdaon wanwan nem blong ol pikinini long klas blong yu, afta putum ol pis pepa ia insaed long wan kontena. Taem yu pulumaot wanwan nem long kontena, invaetem pikinini ia blong serem wan samting we hem i tingbaot abaot lesen blong las wik o wan samting we hem i lanem long Mosaea 4–6 long haos long wik ia.

Stap Tijim Doktrin: Ol Smol Pikinini

Mosaea 4:1–3, 10

Fasin blong sakem sin i mekem yumi stap glad.

Helpem ol pikinini blong lanem abaot naesfala presen we i fasin blong sakem sin we i stap from Atonmen blong Jisas Kraes.

Samfala Aktiviti we Yu Save Mekem

• Yusum Mosaea 4:1–3 mo 10 blong tijim ol pikinini mining blong sakem sin. Eksampol, helpem olgeta blong luksave se ol pipol blong King Benjamin oli sore from ol sin blong olgeta mo oli askem fogivnes (ol ves 1–2), mo King Benjamin i bin talem long olgeta blong sakem (o stopem) ol sin blong olgeta (ves 10). Ridim ves 3 long olgeta, mo askem olsem wanem nao ol pipol ia oli bin filim taem we oli bin sakem sin.

• Askem ol pikinini olsem wanem olgeta i filim taem se klos blong olgeta i doti. ?Yumi filim olsem wanem taem yumi kam klin bakegen? Eksplenem se semmak olsem we yumi stap wasem ol doti klos blong yumi, yumi save sakem sin taem yumi mekem wan rong. Soem wan pikja blong Jisas Kraes, mo testifae se Hem i gat paoa blong karemaot ol sin blong yumi mo mekem yumi kam klin bakegen sapos yumi sakem sin. Sing tugeta long nambatu ves blong “Help Me, Dear Father” (Children’s Songbook, 99). Askem ol pikinini wanem nao singsing ia i tijim abaot fasin blong sakem sin.

Mosaea 4:13–26

Mi mas tritim ol narafala man wetem lav mo kaen fasin.

?Olsem wanem nao yu save yusum Mosaea 4:13–26 blong tijim ol pikinini “blong lavem wanwan long olgeta mo blong wok blong wanwan long olgeta”? (ves 15).

Samfala Aktiviti we Yu Save Mekem

• Dro wan smol hat (♥) long bod. Invaetem ol pikinini blong serem ol wei we oli save stap kaen long ol narafala man. Evri taem oli serem wan samting, waepemaot hat ia mo dro wan hat we i bigwan moa. Testifae se lav blong yumi long ol narafala man i gro taem yumi stap kaen long olgeta. Givim long ol pikinini ol pepa hat, mo invaetem olgeta blong dro long ol hat ia, ol wei we olgeta i save soemaot lav mo kaen fasin.

• Helpem ol pikinini blong faenem sam aksen we oli save mekem taem oli sing long wan singsing abaot lavem ol narafala man, olsem “Jesus Said Love Everyone” o “Love One Another” (Children’s Songbook, 61, 136).

Mosaea 5:5–15

Taem mi mekem ol kavenan wetem God, mi tekem long mi nem blong Kraes.

Tingting hevi long olsem wanem yu save helpem ol pikinini we yu tijim blong stap rere blong mekem ol kavenan blong baptaes wetem God mo “blong oli singaotem [olgeta] ol pikinini blong Kraes” (Mosaea 5:7).

Samfala Aktiviti we Yu Save Mekem

• Helpem ol pikinini blong mekem ol baj we i soemaot nem ia “Jisas Kraes” mo pinim i go long ol sot blong olgeta kavremap hat blong olgeta (luk aktiviti pej blong wik ia). Eksplenem se King Benjamin i bin tijim ol pipol blong hem se taem yumi mekem wan kavenan, o ol promes, wetem God, hem i olsem we yumi “holem nem ia mo raetem oltaem long hat blong [yumi]” (Mosaea 5:12). ?Wanem nao yumi promes blong mekem taem yumi kasem baptaes mo tekem sakramen? (luk long Mosaea 5:8; D&K 20:37,77, 79).

• Askem ol pikinini wanem bae oli mekem blong kam fren wetem wan (eksampol: toktok wetem hem, mekem samting wetem hem, mo spendem taem wetem hem). Ridim Mosaea 5:13 long ol pikinini. ?Wanem nao yumi save mekem blong kam blong save gud Jisas Kraes blong mekem se bae Hem i no wan “strenja” long yumi?

Stap Tijim Doktrin: Ol Bigfala Pikinini

Mosaea 4:1–11

Mi save sakem sin.

?Olsem wanem nao yu save helpem ol pikinini blong andastanem se, blong sakem sin, i minim wanem? ?Wijwan ves long Mosaea 4:1–11 nao yu filim se bae i helpem olgeta?

Samfala Aktiviti we Yu Save Mekem

• Raetem toktok ia fogivnes long bod. Rid tugeta long Mosaea 4:1–3, mo askem ol pikinini blong lukaotem ol toktok long ves 3 we i tokbaot ol blesing we bae i kam taem yumi sakem sin mo kasem fogivnes.

• Askem ol pikinini blong talem sam samting we yumi mas mekem blong sakem sin fulwan wetem wan tru hat. Helpem olgeta blong faenem sam long ol samting ia long Mosaea 4:10, mo toktok raon long mining blong ol toktok we i stap long ves ia. Serem wan stori we i givim wan pikja abaot fasin blong sakem sin, maet aot long laef blong yuwan, o aot long wan las Jos magasin.

• Helpem ol pikinini blong faenem ol toktok long Mosaea 4:6,9 mo 11 we i tokbaot Papa long Heven. ?From wanem nao hem i impoten blong andastanem se Papa long Heven i olsem wanem taem yumi nid blong sakem sin? Serem testemoni blong yu long olsem wanem nao yu bin filim lav blong God taem yu bin sakem sin.

Mosaea 4:12–26

Gospel i givim insperesen long mi blong tritim ol narafala man wetem lav mo kaen fasin.

King Benjamin i bin tijim se taem yumi kam long Kraes mo kam klin aot long ol sin blong yumi, “lav blong God bae i fulumap yufala” (Mosaea 4:12), we i lidim yumi blong lavem mo stap kaen long narafala man.

Samfala Aktiviti we Yu Save Mekem

• Helpem ol pikinini blong lukaot long Mosaea 4:13–16 26 mo faenem sam toktok we i tokbaot olsem wanem yumi save givim seves long ol narafala man. Invaetem olgeta blong aktemaot sam long ol samting ia o dro ol pikja blong olgeta, mo letem ol nara pikinini i traem talem se wanem ia. ?Olsem wanem nao yumi save soem lav mo kaen fasin long hom, skul, o long Jos?

• Invaetem ol pikinini blong serem wan eksperiens we oli bin lavem o givim seves long wan, mo oli filim olsem wanem long eksperiens ia. ?From wanem nao sam pipol bae i no wantem givim seves long ol narafala man? Askem ol pikinini se bae oli talem wanem long wan blong winim tingting blong hem blong helpem ol pipol we oli stap long nid. Oli save faenem sam tingting long Mosaea 4:16–26.

Jisas Kraes i bin tijim yumi blong stap kaen long ol narafala man.

Mosaea 5:5–15

Taem mi kasem baptaes mo tekpat long sakramen, mi tekem long mi nem blong Kraes.

Plante long ol pikinini we yu tijim maet oli bin kasem baptaes mo oli stap riniu ol kavenan tru long sakramen. Rimaenem olgeta se wan impoten pat blong kavenan blong baptaes blong olgeta, hem i blong tekem long olgeta nem blong Jisas Kraes.

Samfala Aktiviti we Yu Save Mekem

• Dro wan sekol long bod, mo putum wan pikja blong Jisas Kraes long medel blong sekol ia. Invaetem ol pikinini blong dro ol pikja blong olgetawan taem yu stap ridim Mosaea 5:8 tugeta. ?Wanem nao ves i stap talem blong yumi mas tekem long yumi? ?Wanem nao yumi “bin mekem”? Invaetem ol pikinini blong raetem nem blong Kraes long pikja blong olgetawan mo putum ol pikja ia insaed long sekol wetem Sevya. ?Wanem nao ol kavenan we yumi stap mekem taem yumi kasem baptaes mo taem yumi stap tekem mo kakae sakramen? (luk long Mosaea 18:8–9; D&K 20:77, 79).

• Tokbaot wetem ol pikinini from wanem ol pipol oli mas putum ol nem blong olgeta long ol samting, olsem ol skul wok, ol yunifom blong spot, mo sam moa (luk long Mosaea 5:14–15). ?Olsem wanem nao yumi save soemaot se yumi gat nem blong Kraes we yumi “raetem oltaem long hat blong [yumi]”? Mosaea 5:12

• Invaetem wan yang man o woman long wod blong kam visitim klas blong yu mo eksplenem ol kavenan we yumi stap mekem bakegen taem yumi stap tekem mo kakae sakramen. Ridim ol prea blong sakramen long Doktrin mo Ol Kavenan 20:77 mo 79 wetem ol pikinini, invaetem olgeta blong lukaotem ol toktok we i tokbaot wanem yumi promes blong mekem mo wanem God nao i promes long yumi.

Stap Leftemap Tingting blong Lanem Samting long Hom

Invaetem ol pikinini blong dro wan samting we oli lanem tedei mo blong oli yusum droing ia blong tijim ol famli blong olgeta.

Stap Kam Antap long Fasin blong Yumi Blong Stap Tij

Tijim ol pikinini blong raetemdaon ol filing mo ol tingting. Iven ol pikinini oli save lanem fasin ia blong raetemdaon ol filing o tingting long saed blong spirit—eksampol, taem oli stap makem ol skripja, dro ol pikja, o raet smol long wan jenol.