“13–19 Epril. Mosaea 1–3: ‘Fulap long Lav long God mo long Evri Man,’” Kam Folem Mi—Blong Praemeri: Buk blong Momon 2020 (2020)
“13–19 Epril. Mosaea 1–3,” Kam Folem Mi—Blong Praemeri: 2020
Minerva K. Teichert (1888–1976), King Benjamin I Talem Tata, 1935, oel long mesonaet, 36 x 48 inj. Brigham Yang Yunivesiti Miusiom blong Art
13–19 Epril.
Mosaea 1–3
“Fulap long Lav long God mo long Evri Man”
Taem yu ridim Mosaea 1–3, prea blong save olsem wanem nao yu save helpem ol pikinini we yu stap tijim blong andastanem ol impoten trutok we King Benjamin i bin tijim. Raetemdaon ol tingting we oli kam long yu tru long Tabu Spirit.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Soem wan pikja blong King Benjamin we i stap tij, we i stap long aotlaen blong wik ia long Kam Folem Mi—Blong Wanwan Man, Woman mo Famli. Askem ol pikinini blong serem wanem oli save abaot pikja ia.
Stap Tijim Doktrin: Ol Smol Pikinini
Taem mi givim seves long ol narafala man, mi stap givim seves tu long God.
?Wanem nao bae yu mekem blong helpem ol pikinini blong andastanem se taem yu stap givim seves long ol narafala man, hem i wan wei blong givim seves long God?
Samfala Aktiviti we Yu Save Mekem
-
Letem ol pikinini oli gat janis blong werem wan hat blong king (aktiviti pej blong wik ia i gat wan eksampol), mo mekem oli stanap long wan jea o stul blong priten se oli King Benjamin. Oli save stap mekem hemia taem yu serem samfala samting we King Benjamin i bin tijim long ol pipol blong hem, we yu save faenem long Mosaea 2–3. Luk tu long “Japta 12: King Benjamin” (Ol Stori long Buk blong Momon, 32–35 o vidio blong hem long ChurchofJesusChrist.org.)
-
Invaetem ol pikinini blong ripitim ol toktok ia sloslo taem oli stap klapem han folem wanwan silabol wetem yu:“Taem we yufala i stap wok blong ol narafala man, yufala i stap mekem wok blong God blong yufala nomo”(Mosaea 2:17). Ripitim hemia kasem taem we ol pikinini oli lanem sam, o evri toktok ia. Testifae se taem yumi stap helpem ol narafala man, yu stap helpem tu Papa long Heven mo Jisas, mo mekem Tufala i hapi. Askem ol pikinini blong serem ol wei we oli save helpem narafala man.
-
Helpem ol pikinini blong dro ol han blong olgeta long wan pis pepa mo dro wan samting we oli save mekem blong givim seves long ol famli blong olgeta. Sing tugeta wan singsing abaot seves, olsem “When We’re Helping” (Children’s Songbook, 198).
King Benjamin i bin tijim se yumi save givim seves long God taem yumi stap helpem ol narafala man.
Evri blesing blong mi oli kam long Papa long Heven.
Taem ol pikinini oli luksave se God hem i stamba blong evri blesing blong olgeta, bae oli save putum tingting blong olgeta i stap daon mo stap talem tangkyu from.
Samfala Aktiviti we Yu Save Mekem
-
Eksplenem se King Benjamin i bin tijim se evri blesing blong yumi i kam long Papa long Heven. Invaetem ol pikinini blong lisin long wan blesing we Papa long Heven i bin givim long yumi taem yu stap ridim Mosaea 2:21. ?Wanem nao ol narafala blesing we Papa long Heven i bin givim long yumi? ?Olsem wanem nao yumi save soem se yumi talem tangkyu from olgeta samting ia? (luk long Mosaea 2:22).
-
Plei wan gem we ol pikinini oli pasem wan samting i go raon taem oli stap sing wan singsing abaot fasin blong talem tangkyu o lisin long wan (luk “Gratitude” long topik gaed blong Children’s Songbook). Stopem singsing o stopem miusik long sam pat, mo invaetem huia we i stap holem samting ia blong serem wan blesing we hem i wantem talem tangkyu from.
Mi biliv long Jisas Kraes.
Wan enjel i talem long King Benjamin ol impotem trutok abaot laef mo seves blong Jisas Kraes. Lukaotem, long ol ves ia, ol trutok abaot Jisas we yu filim se i impoten blong ol pikinini oli lanem.
Samfala Aktiviti we Yu Save Mekem
-
Soem sam pikja blong ol samting we oli bin hapen bifo, we oli tokbaot long Mosaea 3:5–10 (luk, olsem eksampol, Gospel Art Buk, namba 30, 41, 42, 57, 59). Askem ol pikinini blong talem se wanem nao i stap hapen long ol pikja ia, mo helpem olgeta sapos oli nidim help. Ridim Mosaea 3:5–10, sloslo, mo invaetem ol pikinini blong leftemap ol han blong olgeta taem yu rid abaot wan samting long wan long ol pikja ia. Invaetem ol pikinini blong serem sam narafala samting we oli save se Jisas i bin mekem taem we Hem i stap long wol ia.
-
Dro wan san antap long bod blong ripresentem heven. Dro plante rod we i lid i go long plante defren ples raon long bod ia be wan rod nomo we i lid i go long heven. Askem ol pikinini blong faenem rod ia mo putum wan pikja blong Jisas long hem. Ridim Mosaea 3:17, mo testifae se blong folem Jisas Kraes hem i wan rod ia nomo blong gobak long Papa long Heven.
Stap Tijim Doktrin: Ol Bigfala Pikinini
Taem mi givim seves long ol narafala man, mi stap givim seves tu long God.
?Olsem wanem nao yu save helpem ol pikinini blong lanem samting aot long eksampol blong seves blong King Benjamin?
Samfala Aktiviti we Yu Save Mekem
-
Soem long ol pikinini wan pikja blong King Benjamin we i stap tijim ol pipol blong hem (luk long aotlaen blong wik ia long Kam Folem Mi—Blong Wanwan Man, Woman mo Famli o Gospel Art Buk, namba 74). Helpem ol pikinini blong luk long Mosaea 2:11–18 blong faenemaot wanem nao King Benjamin i bin mekem blong givim seves. ?From wanem nao hem i givim seves long ol pipol blong hem? ?From wanem nao bae yumi mas givim seves long wanwan long yumi?
-
Raetem long bod ol toktok ia we i kam long Mosaea 2:16–17 mo lego sam toktok. Invaetem ol pikinini blong lukluk long ol skripja blong faenem ol toktok ia we i no gat. Askem olgeta blong eksplenem wanem nao ol ves ia i minim long olgeta. Invaetem olgeta blong serem ol eksperiens abaot sam taem we ol narafala man oli bin givim seves long olgeta o olgeta i bin givim seves long narafala man. ?Olsem wanem nao olgeta i bin filim long ol eksperiens ia?
-
Givim long ol pikinini ol pis pepa blong raetemdaon ol wei we oli save givim seves long ol famli memba blong olgeta, mi givim long wanwan pikinini wan basket blong putum ol pepa ia insaed long hem. Leftemap tingting blong ol pikinini blong kam pikimap wan pepa aot long basket ia mo mekem seves ia long wan man.
Mi no mas tokflas abaot seves mo ol gudfala wok blong mi.
Tingbaot olsem wanem nao yu save helpem ol pikinini we yu tijim blong andastanem se seves blong yumi i mas kam olsem wan insperesen tru long lav we yumi gat long ol narafala man mo long God.
Samfala Aktiviti we Yu Save Mekem
-
Invaetem ol pikinini blong serem olsem wanem nao bae oli save talem mining blong toktok ia tokflas, o helpem olgeta blong faenem mining blong hem long wan diksonari. Helpem olgeta blong lukaot long Mosaea 2:15–24, ol risen from wanem nao King Benjamin i no tokflas abaot seves blong hem long ol narafala man. ?From wanem nao yumi mas givim seves long ol narafala man? Afta ol pikinini oli serem ol tingting blong olgeta, helpem olgeta blong andastanem se yumi mas stap faenem ol janis blong givim seves long ol narafala man from se yumi lavem olgeta mo God, be i no blong ol man oli luk se yumi gud.
-
Askem ol pikinini blong serem ol situesen we wan man i stap tokflas abaot wan samting. ?From wanem i rong blong tokflas long ol situesen olsem? Invaetem olgeta blong yusum ol kaonsel long toktok blong King Benjamin long Mosaea 2:15–24 blong helpem olgeta wetem ol ansa blong olgeta.
Jisas Kraes i klinim mi aot long sin mo helpem mi blong kam olsem wan sent.
Blong kam olsem Papa blong yumi long Heven, yumi nid blong mekem moa i bitim blong kam klin aot long ol sin blong yumi nomo—hat blong yumi i mas jenis. Olsem we King Benjamin i bin tijim, yumi nid blong winim ol tingting blong mekem sin mo kam olsem ol sent tru long Atonmen blong Sevya.
Samfala Aktiviti we Yu Save Mekem
-
Dro tu man long bod—wan blong ripresentem “man” mo narawan blong ripresentem “sent.” (Maet bae yu nid blong talemaot mining blong ol toktok ia.) Rid tugeta long Mosaea 3:19, mo invaetem ol pikinini blong faenem ol jenis we man i nid blong mekem blong kam olsem wan sent. ?Wanem nara toktok o sentens nao ol pikinini oli maet nidim help blong andastan?
-
?Ol pikinini we yu tijim oli bin helpem ol mama mo papa blong olgeta blong mekem kaekae folem wan resipi samtaem o nogat? Sapos oli bin stap mekem, maet yu save invaetem olgeta blong yusum Mosaea 3:19 blong mekem wan “resipi” blong olsem wanem nao yumi save kam olsem Jisas Kraes. ?From wanem nao Atonmen blong Jisas Kraes hem i “kaekae” we i moa impoten insaed long resipi ia?
Stap Leftemap Tingting blong Lanem Samting long Hom
Invaetem ol pikinini blong yusum aktiviti pej blong wik ia blong serem wetem ol famli mo fren blong olgeta olsem wanem nao bae olgeta i folem eksampol blong King Benjamin blong givim seves long ol narafala man.
Stap Kam Antap long Fasin blong Yumi blong Stap Tij
Ol pikinini oli lanem samting aot long fasin blong stap ripitim samting. No fraet blong ripitim ol aktiviti plante taem, speseli wetem ol smol pikinini. Fasin blong stap ripitim samting i helpem ol pikinini blong tingbaot wanem we oli bin lanem.