30 Maj–12 Epril. Ista: ‘Bae Hem I Girap long Ded, wetem Paoa blong Hiling long Ol Wing blong Hem,’” Kam Folem Mi—Blong Ol Praemeri: Buk blong Momon 2020 (2020)
30 Maj–12 Epril. Ista,” Kam Folem Mi—Blong Praemeri 2020
Kraes mo Olgeta Aposol, i kam long Del Parson
30 Maj–12 Epril
Ista
“Bae Hem I Girap long Ded, wetem Paoa blong Hiling long Ol Wing blong Hem”
Taem yu ridim ol skripja we oli stap long ples ia mo long Kam Folem Mi—Blong Wanwan Man, Woman mo Famli bae Spirit i helpem yu blong save wanem stret blong mekem blong helpem ol pikinini blong filim lav blong Sevya long Ista Sandei.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Tokbaot wetem ol pikinini ol samting we yu stap mekem blong tingbaot Sevya long Ista. Invaetem olgeta blong serem wanem we oli stap mekem.
Stap Tijim Doktrin: Ol Smol Pikinini
1 Nifae 11:27; Mosaea 3:5; 15:7; Hileman 14:16–17
Ol profet long Buk blong Momon oli save se bae Jisas Kraes i kam.
Blong stap lanem abaot wanem ol profet long Buk blong Momon oli bin tijim abaot misin blong Jisas Kraes mo ministri blong Hem long wol ia, i save givim moa paoa long fet we ol pikinini oli gat long Hem.
Samfala Aktiviti we Oli Save Mekem
-
Soem ol pikja blong Sevya we i stap kasem baptaes, i stap hilim ol narafala man, oli hangem Hem long kros, mo taem we Hem i bin wan man we i laef bakegen long ded (luk aktiviti pej blong wik ia o Gospel Art Buk, namba 35, 41, 57, 59). Askem ol pikinini blong talem long yu wanem nao i stap hapen long wanwan pikja. Eksplenem se plante yia bifo Jisas Kraes i kam long wol ia, God i bin talemaot long ol profet long Buk blong Momon se bae Hem i mekem ol samting ia. Ridim 1 Nifae 11:27; Mosaea 3:5; 17:7; mo Hileman 14:16–17, mo helpem ol pikinini blong majem ol skripja ia wetem ol stret pikja.
-
Taem ol pikinini oli stap wok long aktiviti pej blong wik ia, tokbaot ol profet we oli stap long ol pikja mo wanem nao oli bin tijim abaot Jisas Kraes. Serem wetem ol pikinini sam long ol naesfala samting we Jisas Kraes i bin mekem.
Jisas i bin laef bakegen long ded.
Tijim ol pikinini se antap long ol pipol we oli bin luk Sevya we i laef bakegen long ded long Jerusalem, taosen man oli bin luk Hem taem Hem i bin kamaot long olgeta long Ol Amerika.
Samfala Aktiviti we Oli Save Mekem
-
Soem ol pikja blong ded blong Sevya mo Laef Bakegen long Ded blong Hem. Askem ol pikinini wanem oli save abaot ol taem ia. Olsem we bae yu nidim, yusum “Japta 53: Oli Bin Krusifaem Jisas” mo “Japta 54: Jisas I Laef Bakegen” (Ol Niu Testeman Stori, 136–38, 139–44 o ol vidio blong hem long ChurchofJesusChrist.org) blong talem ol stori ia long ol pikinini.
-
Yusum ol pikja long Gospel Art Buk o Kam Folem Mi—Blong Wanwan Man, Woman mo Famli, mo talem long ol pikinini abaot visit blong Sevya we i laef bakegen long ded i go long Ol Amerika, olsem we oli tokbaot long 3 Nifae 11:1–17. Ripitim stori ia plante moa taem, mo stap invaetem ol pikinini blong helpem yu. Tokbaot moa ol pat we yu filim se bae i gat mining long ol pikinini. Tokbaot moa nao se i nomata se Jisas i bin ded long kros, ol man oli save luk se naoia Hem i laef bakegen long ded. Letem wanwan pikinini i gat janis blong talem stori ia wetem ol toktok blong olgeta bakegen.
-
Sing tugeta “Easter Hosanna” o las ves blong “Book of Mormon Stories” (Children’s Songbook, 68–69, 118–19). Invaetem ol pikinini blong dro ol pikja blong wan samting we singsing i stap tokbaot. Afta askem ol pikinini blong serem ol droing blong olgeta mo oli ting se bae oli filim olsem wanem sapos oli bin stap long tetaem ia we Sevya i bin visitim Ol Man blong Nifae.
Jisas Kraes i save olsem wanem blong givim kamfot long mi.
From se Jisas Kraes i bin harem nogud from “ol soa blong bodi mo ol sik blong ol pipol blong hem” (Alma 7:11), Hem i save olsem wanem yumi stap filim, iven sapos i no gat wan man i save.
Samfala Aktiviti we Yu Save Mekem
-
Ridim long ol pikinini ol fas laen blong Mosaea 3:7, mo invaetem olgeta blong priten se oli filim “ol harem nogud long bodi … , hanggri, tosta, mo filim [taed]”. Askem olgeta blong serem ol taem we oli bin filim ol samting ia. Afta, talem long ol pikinini se ol ves ia oli stap tokbaot sam samting we Jisas Kraes i bin filim taem we hem i stap safa insaed long Garen blong Getsemane. From hemia nao, i mekem se Hem i save olsem wanem blong helpem yumi sapos yumi stap filim ol samting ia.
-
Ridim Alma 7:11 laod, mo askem ol pikinini sapos oli save wan man we i sik o i stap harem bodi i soa. Testifae se Jisas Kraes i bin filim evri “harem nogud long saed blong bodi blong mit mo bun mo sik” blong bae hem i save andastanem olsem wanem blong givim kamfot long yumi (Alma 7:12).
Stap Tijim Doktrin: Ol Bigfala Pikinini
2 Nifae 9:10–15; Alma 11:41–45; 40:21–23
From se Hem i bin girap bakegen long ded, mi tu, mi save girap bakegen long ded.
Buk blong Momon i talem klia wanem nao girap bakegen long ded i minim mo huia nao bae i girap bakegen long ded. ?Olsem wanem nao yu save helpem ol pikinini ia blong faenem ol trutok ia?
Samfala Aktiviti we Yu Save Mekem
-
Askem ol pikinini blong talem long yu wanem nao oli save abaot ded mo laef bakegen long ded blong Jisas Kraes. Raetem ol kwestin olsem ia long bod ?I minim wanem blong laef bakegen long ded? mo ?Hu bae i laef bakegen long ded? Helpem ol pikinini blong faenem ol ansa long 2 Nifae 9:10–15; Alma 11:41–45; mo Alma 40:21–23 mo serem wetem klas wanem we oli faenem.
-
Tokbaot wetem ol pikinini wan man we yu save, we i ded finis. Askem olgeta blong priten se yu no save abaot Laef Bakegen long Ded. ?Olsem wanem nao bae oli helpem yu blong save se wanem ia? Leftemap tingting blong olgeta blong yusum 2 Nifae 9:10–15; Alma 11:41–45; o Alma 40:21–23 blong tijim yu abaot laef bakegen long ded. Invaetem olgeta tu blong serem testemoni blong olgeta abaot Laef Bakegen long Ded blong Sevya olsem pat blong ansa blong olgeta.
Getsemane, i kam long Michael T. Malm
Inos 1:2–8; Mosaea 27:8–24; Alma 13:11–12; 24:7–19
Atonmen blong Jisas Kraes i klinim mi mo i jenisim mi.
Buk blong Momon i givim plante eksampol blong ol man we oli jenis from Atonmen blong Sevya. Tingbaot wei we ol eksperiens ia oli save givim insperesen long ol pikinini blong sakem sin mo tanem olgeta i kam long Sevya.
Samfala Aktiviti we Yu Save Mekem
-
Soem long ol pikinini wan klin waet sot mo wan toti waet sot. Rid tugeta long Alma 13:11–12. ?Olsem wanem nao ol pipol ia oli kam klin aot long ol sin blong olgeta? ?Hemia i mekem olgeta oli filim olsem wanem abaot sin? Tokbaot olsem wanem nao yu stap filim taem yu sakem sin mo kasem fogivnes, mo serem testemoni blong yu abaot paoa blong Sevya blong mekem yumi kam klin aot long ol sin blong yumi.
-
Invaetem ol pikinini blong jusum wan long ol pipol ia blong lanem moa abaot: Inos (luk long Inos 1:2–8), Yangfala Alma (luk long Mosaea 27:8–24), o Ol Antae-Nifae-Lihae (ol man we oli agensem Nifae o Lihae) (luk long Alma 24:7–19). Taem yu stap ridim stori ia tugeta, invaetem ol pikinini blong luksave olsem wanem nao man ia o grup ia i jenis from Atonmen blong Jisas Kraes. ?Olsem wanem nao yumi save folem ol eksampol blong ol pipol ia?
Jisas Kraes i karem long hem ol sin, ol sobodi mo ol sik blong mi.
Antap long ol safaring from ol sin blong yumi, Sevya i safa tu from ol sobodi, ol sik, mo ol narafala samting we yu no strong long olgeta, blong mekem se bae Hem i save olsem wanem blong kamfotem yumi.
Samfala Aktiviti we Yu Save Mekem
-
Givim wok long wanwan pikinini blong lukaotem wan long ol ves ia blong faenem wanem nao Jisas Kraes i safa from: Mosaea 3:7; Mosaea 15:5; o Alma 7:11. Invaetem olgeta blong mekem wan lis long bod blong ol samting we oli faenem, mo blong tingbaot wan taem we oli bin filim sam long ol samting ia. Olsem we i stap long Alma 7:12, ?From wanem nao Jisas i safa from evri samting ia? ?From wanem nao hem i impoten blong save se Hem i bin safa from ol samting ia?
-
Sing tugeta wan hym abaot Sevya, olsem “Mi Save Ridima Hem I Laef” (STSP, pej 38). Invaetem ol pikinini blong lukaot insaed long hym ia ol toktok we i tokbaot olsem wanem nao Sevya i givim kamfot long yumi, mo tokbaot from wanem nao ol toktok ia oli gat mining long olgeta. Serem ol filing blong yu abaot Jisas Kraes, mo invaetem ol pikinini blong serem blong olgeta.
Stap Leftemap Tingting blong Lanem Samting long Hom
Invaetem ol pikinini blong lukaotem wan man long wik ia we i nidim kamfot. Leftemap tingting blong olgeta blong serem wetem man ia, wanem we oli bin lanem abaot Sevya we i tekem long Hemwan ol harem nogud blong yumi blong bae Hem i save leftemap tingting blong yumi.
Stap Kam Antap long Fasin blong Yumi Blong Stap Tij
Invaetem Ol Pikinini blong Serem Wanem Oli Gat. Askem ol pikinini abaot ol tingting, filing, mo ol eksperiens blong olgeta. Bambae yu faenemaot se oli gat ol simpol be sam dip lukluk.