“23–29 Maj. Inos–Ol Toktok blong Momon: Hem I Wok Tru long Mi blong Mekem Samting we Hem I Wantem” Kam Folem Mi—Blong Praemeri: Buk blong Momon 2020 (2020)
“23–29 Maj. Inos–Ol Toktok blong Momon,” Kam Folem Mi—Blong Praemeri: 2020
Jekob mo Inos, i kam long Scott Snow
23–29 Maj.
Inos–Ol Toktok blong Momon
Hem I Wok Tru long Mi blong Mekem Samting we Hem I Wantem
Inos, Jerom, Omnae, mo Ol Toktok blong Momon oli ol sotfala buk we oli gat plante naesfala lesen blong ol pikinini we yu stap tijim. Lukaotem ol lesen ia, mo tingting hevi long ol wei we yu save helpem ol pikinini blong lanem ol lesen ia. Ol tingting long aotlaen ia oli save helpem yu.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Helpem pikinini blong tingbaot wanem oli bin lanem aot long lesen blong las wik. ?Oli bin serem wanem we oli bin lanem wetem ol famli blong olgeta o narafala man?
Stap Tijim Doktrin: Ol Smol Pikinini
Mi save toktok long Papa long Heven long tru long prea.
Eksperiens blong Inos i tijim yumi abaot samfala trutok long saed blong prea. ?Olsem wanem nao bae yu givim insperesen long ol pikinini blong oli save folem eksampol blong Inos taem oli prea?
Samfala Aktiviti we Oli Save Mekem
-
Soem wan pikja blong Inos; eksampol, luk long aotlaen blong wik ia long Kam Folem Mi—Blong Wanwan Man, Woman mo Famli, o yusum pikja ia Inos I Stap Prea (Gospel Art Buk, namba 72). Askem ol pikinini blong tokbaot wanem i stap hapen long pikja ia, afta serem eksperiens blong Inos wetem olgeta. Yu save yusum “Japta 11: Inos” (Ol Stori long Buk blong Momon, 30–31 o vidio blong hem long ChurchofJesusChrist.org).
-
Askem ol pikinini blong serem ol samting we oli laekem blong stap tokbaot wetem ol mama mo papa blong olgeta. Eksplenem se taem yumi stap prea long Papa long Heven i semmak olsem we yumi stap toktok long Hem. Taem yu ridim Inos 1:1–4 long ol pikinini, invaetem olgeta blong priten se olgeta nao Inos taem oli aktem se oli go lukaotem ol animol long bus, oli nildaon blong prea, mo samfala moa. Eksplenem se Papa long Heven i harem prea blong Inos mo fogivim hem long ol sin blong hem.
-
Sing tugeta wan singsing abaot prea, olsem “A Child’s Prayer” (Children’s Songbook, 12–13). Invaetem ol pikinini blong leftemap han blong olgeta evri taem oli harem toktok ia “prea” o wan narafala toktok we i ripit. Testifae long paoa blong prea long laef blong yu.
Olsem ol pikinini blong God, yumi save prea i go long Papa blong yumi long Heven.
Mi save blesem ol narafala man taem mi stap lisin long Tabu Spirit.
Taem hem i stap putum tugeta Buk blong Momon, Momon i gat wan filing blong putum insaed ol smol buk blong Nifae. Hem i no save from wanem i nid blong gat ol smol buk ia, be tedei, yumi kasem blesing from se hem i mekem folem filing ia. Eksampol ia i save givim insperesen long ol pikinini blong folem Spirit.
Samfala Aktiviti we Yu Save Mekem
-
Invaetem ol pikinini blong serem ol stori we oli bin lanem long Buk blong Momon long yia ia (ol pikja insaed long Kam Folem Mi—Blong Wanwan Man, Woman mo Famli o Gospel Art Buk i save helpem olgeta blong tingbaot). Eksplenem se yumi gat ol stori ia insaed long Buk blong Momon from se Momon i bin lisin taem we Tabu Spirit i bin talem long hem blong raetemdaon ol stori ia. ?From wanem nao Papa long Heven i wantem yumi blong gat ol stori ia?
-
Serem wan stori long ol Jos magasin o long wan jeneral konfrens mesej abaot wan man we i folem ol filing we i kam long Tabu Spirit. O serem wan long ol eksperiens blong yuwan. Invaetem ol pikinini blong dro ol pikja blong stori ia. ?Olsem wanem nao ol pipol long stori ia oli bin kasem blesing from se oli bin folem Tabu Spirit?
-
Askem wan wod memba blong visitim klas mo serem wan eksperiens long wan taem we hem i bin folem filing we i kam long Tabu Spirit. ?Olsem wanem nao aksen blong hem i bin blesem ol narafala man? Eksplenem se Papa long Heven i wantem yumi blong helpem mo blesem ol narafala man, mekem se Hem i sendem Tabu Spirit blong helpem yumi.
-
Sing tugeta wan singsing abaot Tabu Spirit, olsem “The Still Small Voice” (Children’s Songbook, 106–7). Singsing long hem plante taem long ol defren wei, olsem hariap, slo, o kwaet. Taem yu singsing kwaet, tanem i go long Ol Toktok blong Momon 1:7, mo poenemaot se Momon i tokbaot Tabu Spirit olsem wan kwaet voes.
Stap Tijim Doktrin: Ol Bigfala Pikinini
Papa long Heven i harem mo i ansarem ol tru prea blong mi.
Hem i isi nomo blong yumi stap ripitim semmak prea oltaem. Eksperiens blong Inos hem i blong rimaenem yumi se blong kasem ol ansa long ol prea, samtaem i nid blong yumi “traehad” mo gat “plante longfala hadwok” (Inos 1:2, 11).
Samfala Aktiviti we Yu Save Mekem
-
Invaetem ol pikinini blong sarem ol ae blong olgeta mo tingting long maen blong olgeta se oli stap luk fes mo stap toktok wetem Papa long Heven. ?Wanem nao bae olgeta i laekem blong tokbaot wetem Hem? Helpem ol pikinini blong stap tingbaot se oli stap lukluk fes blong Papa long Heven evri taem we oli prea.
-
Invaetem ol pikinini blong wok long ol grup blong tu mo ridim Inos 1:1–5. Askem olgeta blong lukaotem ol toktok we i tokbaot ol prea blong Inos long ol ves ia mo serem wanem we oli faenem wetem klas. ?Wanem nao ol toktok ia oli stap talem abaot Inos mo eksperiens blong hem? Letem ol pikinini oli serem eni nara samting we oli laekem abaot ol prea blong Inos. Serem wan eksperiens taem we sol blong yu i “bin hanggri” mo yu “bin prea wetem wan strongfala prea” i go long Lod (Inos 1:4). Letem ol pikinini oli tingting hevi long wan samting we oli save mekem blong mekem se ol prea blong olgeta i gat plante moa mining.
-
Askem ol pikinini blong mekem wan lis blong ol samting we oli stap prea from oltaem, long bod o long aktiviti pej blong wik ia. Afta invaetem olgeta blong lukaot long Inos 1:2,9, 13–14 mo 16 ol samting we Inos i bin prea from, mo ademap ol samting ia i go long lis. Tokbaot olsem wanem nao ol pikinini i save folem eksampol blong Inos long ol prea blong olgeta; eksampol, yu save tokbaot from wanem nao Inos i wantem prea from Ol Man blong Leman—we oli ol enemi blong hem—mo invaetem ol pikinini blong prea long wik ia from wan we i no bin kaen long olgeta.
Mi save blesem ol narafala man taem mi lisin long Tabu Spirit.
Lod i bin save se ol fasfala 116 pej blong translesen blong Buk blong Momon bae oli lus (luk long D&K 10; Ol Sent,Buk 1 japta 5). Blong putumbak wanem we bae i lus ia, Hem i givim insperesen long Momon, tru long Tabu Spirit blong putum insaed ol smol buk blong Nifae long Buk blong Momon. ?Olsem wanem nao yu save givim insperesen long ol pikinini blong folem eksampol blong Momon mo lisin long Spirit?
Samfala Aktiviti we Yu Save Mekem
-
Askem ol pikinini blong gat ol janis, wan finis narafalawan, blong ridim ol ves long Ol Toktok blong Momon 1:3–8 afta helpem olgeta blong talem wanem nao oli bin lanem aot long wanwan ves ia. Eksplenem se Momon i bin folem Spirit taem hem i putum insaed ol smol buk blong Nifae (we naoia yumi gat olsem 1 Nifae kasem Omnae) insaed long Buk blong Momon. ?Olsem wanem nao yumi kasem blesing from se Momon i bin lisin long Spirit? ?Olsem wanem nao bae Buk blong Momon i defren sapos se hem i no bin lisin? Serem wan eksperiens we yu bin kasem filing long Tabu Spirit blong mekem wan samting we i bin blesem wan narafala man. Invaetem ol pikinini blong serem ol semmak eksperiens olsem ia we maet oli bin gat.
-
Invaetem wan pikinini blong ridim Ol Toktok blong Momon 1:7 mo wan narawan blong ridim Doktrin mo Ol Kavenan 8:2–3. ?Wanem nao ol ves ia oli tijim yumi, abaot hao Tabu Spirit i stap toktok long yumi? Helpem ol pikinini blong luksave ol taem we oli bin kasem ol filing we oli kam long Tabu Spirit. Yusum Moronae 7:12 blong eksplenem se, sapos wan tingting i gud mo hem i givim insperesen long yumi blong mekem samting we i gud, hem i kam long Papa long Heven. Eksampol, tingting blong soem vidio “Preparation of Thomas S. Monson: Always Follow the Promptings of the Spirit” (ChurchofJesusChrist.org). Invaetem ol pikinini blong lisin mo mekem folem ol filing blong mekem samting we i gud.
Stap Leftemap Tingting blong Lanem Samting long Hom
Leftemap tingting blong ol pikinini blong askem ol famli memba blong olgeta blong serem ol eksperiens we oli bin gat wetem prea o Tabu Spirit.
Stap Kam Antap long Fasin blong Yumi blong Stap Tij
Yusum miusik. Ol singsing blong Praemeri mo ol hym oli save helpem ol pikinini blong ol defren yia blong oli andastanem mo tingbaot ol trutok blong gospel. Singsing i save mekem ol pikinini i tekpat gud long eksperiens ia blong stap lanem samting. (Luk long Teaching in the Savior’s Way, 22.)