“24 Febwari–1 Maj. 2 Nifae 26–30: ‘Wan Gudfala Wok mo Wan Sapraes,’” Kam Folem Mi—Blong Praemeri: Buk blong Momon 2020 (2020)
“24 Febwari–1 Maj. 2 Nifae 26–30,” Kam Folem Mi—Blong Praemeri: 2020
Bae I Tekem Han blong Yu, I Lidim Yu, i kam long Sandra Rast
24 Febwari–1 Maj
2 Nifae 26–30
“Wan Gudfala Wok mo Wan Sapraes”
Bifo yu stat blong planem ol aktiviti blong ol pikinini blong lanem samting, long klas blong yu, stadi long 2 Nifae 26–30. Hemia bae i invaetem spirit blong helpem yu taem yu stap mekem plan blong yu.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Leftemap wan kopi blong Buk blong Momon, mo eksplenem se Nifae i bin luk finis se Buk blong Momon bae hem i impoten long dei blong yumi. Askem ol pikinini blong serem wan samting we olgeta i bin lanem abaot Buk blong Momon long yia ia.
Stap Tijim Doktrin: Ol Smol Pikinini
Jisas i wantem evri man blong kam long Hem.
Nifae i bin testifae se Sevya i lavem evri man, i nomata huia olgeta, mo Hem i invaetem evriwan blong “tekempat long gud fasin blong hem”
Samfala Aktiviti we Yu Save Mekem
-
Soemaot sam pikja blong ol man wei oli kam long ol defren kantri mo oli gat ol defren kastom (bae yu save faenem sam long ol magasin blong Jos) Askem long ol pikinini blong tokbaot sam samting we oli luk long ol pikja ia. Openem skripja long 2 Nifae 26:33 mo ridim “[Jisas Kraes i invaetem] evriwan blong kam long hem.” Ripitim toktok ia wetem ol pikinini taem yu stap poen long wanwan pikja. Afta poenem wanwan pikinini mo talem, “Jisas i stap invaetem yu blong kam long Hem.” ?Wanem nao yumi save mekem blong kam long Sevya?
-
Sing wan singsing wetem ol pikinini abaot fasin blong lavem evriwan, olsem “I’ll Walk with You” o “We Are Different” (Children’s Songbook, 140–41, 263). Poenemaot ol toktok long singsing ia we yu filim se i sapotem mesej long 2 Nifae 26:33.
Buk blong Momon i wan blesing.
Tingbaot olsem wanem bae yu helpem ol pikinini long klas blong yu blong filim save se Buk blong Momon hem i wan “blesing long olgeta, we i kam long han blong God” (2 Nifae 30:6).
Samfala Aktiviti we Yu Save Mekem
-
Soem long ol pikinini wan Buk blong Momon we yu kavremap olsem wan presen, mo talem long olgeta se i gat wan impoten samting insaed. Letem olgeta i holem presen ia, mo talem sam toktok we bae i helpem olgeta blong traem talem se wanem ia i stap insaed; eksampol, hem i wan samting we Lod i givim long yumi, hem i helpem yumi blong biliv long Jisas Kraes, mo sam moa. Ridim 2 Nifae 30:6: “Hemia i was blesing, long olgeta, we i kam long han blong God.” Letem ol pikinini oli openem presen ia, mo eksplenem se yumi mas openem Buk blong Momon mo ridim blong save kasem ol blesing we i stap insaed long hem.
-
Ridim 2 Nifae 28:2 long ol pikinini Eksplenem se taem we Nifae i luk se Buk blong Momon “bae i gat bigfala yus” long yumi, we i minim se bae i helpem mo blesem yumi. Talem long ol pikinini from wanem nao Buk blong Momon i gat bigfala yus long yu. Serem wan ves o stori long Buk blong Momon we yu laekem tumas, mo invaetem ol pikinini blong serem blong olgeta. Soem ol pikja long Gospel Art Buk blong givim sam tingting long olgeta.
Papa long Heven i tijim mi smol, afta smol bakegen.
Maet yu save tingbaot wan lesen o wan aktiviti we yu yusum samting long hem blong helpem ol pikinini blong luk se i minim wanem blong lanem “tijing folem tijing.” Ol tingting andanit ia i save givim sam tingting long yu.
Samfala Aktiviti we Yu Save Mekem
-
Helpem ol pikinini blong putum tugeta wan isi pasol gem o bildim wan samting aot long ol wud blok. Givim ol pis blong pasol gem ia o wud blok ia wanwan taem, mo taem olgeta i stap bildimap, eksplenem se hemia hem i wan wei we Papa long Heven i stap tijim yumi—wan trutok long wan taem. ?Wanem bae i hapen sapos yumi traem blong putum evri pis wantaem?
-
Tijim ol pikinini blong mekem wan samting folem ol step, olsem blong fasem wan rop o dro wan pikja. Ridim 2 Nifae 28:30: “Bae mi givim long ol pikinini blong ol man tijing folem tijing, … smol long ples ia mo smol longwe.” ?From wanem nao God i tijim yumi smol, afta smol moa i go?
Stap Tijim Doktrin: Ol Bigfala Pikinini
Jisas Kraes i wantem evriwan blong kam long Hem.
Helpem ol pikinini blong filim save se invitesen ia blong kam long Kraes i stap kam long olgeta mo long evriwan.
Samfala Aktiviti we Yu Save Mekem
-
Tokbaot wetem ol pikinini abaot ol taem we olgeta i bin invaetem sam fren o famli blong kam long wan spesel taem, olsem wan betdei selebresen ?Wanem nao olgeta i bin mekem blong leftemap tingting blong ol man blong kam? Ridim 2 Nifae 26:23–28, 33, wetem ol pikinini, mo helpem olgeta blong faenemaot wanem nao Lod i stap invaetem yumi blong mekem. Askem ol pikinini blong mekem wan kad o leta blong invaetem wan blong kam long Jisas Kraes. Leftemap tingting blong olgeta blong yusum ol toktok long ol ves ia long invitesen blong olgeta (sapos i nid, raetem sam toktok ia long bod blong helpem olgeta).
-
Ridim 2 Nifae 26:33 wetem ol pikinini, mo helpem olgeta blong mekem wan lis blong huia nao, olsem we i stap long ves ia, oli stap invaetem blong “tekem pat long gud fasin [blong Lod].” (Maet bae yu nid blong eksplenem se toktok ia “no gat respek long tru God” hem i olgeta we oli no biliv long God.) Invaetem olgeta blong ademap nem blong olgetawan long lis ia. ?Olsem wanem nao bae yumi tekem pat long gud fasin blong Lod?
-
Tokbaot smol wetem ol pikinini ia abaot olsem wanem ol pikinini raon long wol oli defren, mo testifae se Lod i lavem olgeta evriwan (luk long 2 Nifae 26:24, 33). Invaetem ol pikinini blong dro wan pikja blong Jisas wetem plante defren pikinini.
Papa long Heven i talemaot trutok “tijing folem tijing.”
Nifae i givim woning agensem fasin ia se yumi nomo nidim trutok we i kam long God. Helpem ol pikinini blong luk fasin blong stap lanem abaot gospel olsem wan samting we bae yu stap mekem oltaem, mo gohed blong mekem truaot long laef.
Samfala Aktiviti we Yu Save Mekem
-
Jusum wan toktok long 2 Nifae 28:30, mo askem long wan pikinini blong raetem fas toktok long bod. Afta askem wan nara pikinini blong raetem nara toktok, mo gohed olsem kasem taem oli raetemdaon ful ves ia . ?Olsem wanem nao aktiviti ia i semmak long wei we God i stap givim trutok long yumi?
-
Helpem ol pikinini blong rid mo andastanem 2 Nifae 28:27–30, mo stap lukaotem ol ansa blong wan kwestin olsem ia: ?Wanem nao ol ves ia oli stap tijim abaot ol man we oli bilif se oli gat inaf trutok mo oli nomo nidim sam moa? Askem olgeta blong givim sam tingting long ol wei we yumi save soem long Lod se yumi wantem kasem moa trutok long Hem.
Buk blong Momon mo Baebol i wok tugeta.
From se yumi gat Baebol, sam man oli biliv se yumi no nidim Buk blong Momon. Ol ves ia oli save helpem ol pikinini blong andastanem, mo eksplenem long ol narafala man, from wanem nao yumi mas glad from tugeta buk blong ol skripja.
Samfala Aktiviti we Yu Save Mekem
-
Givim wan kopi blong Buk blong Momon long wan pikinini mo kopi blong Baebol long wan nara pikinini. Askem long olgeta olsem wanem nao ol buk ia i semmak mo olsem wanem nao oli defren. Soem long ol pikinini wan map blong wol, mo helpem olgeta blong soem weaples long wol nao wanwan buk ia i kam long hem. Ridim mo toktok raon long 2 Nifae 29:8. ?From wanem nao God i givim long yumi tufala “testemoni” o buk blong skripja we i tijim yumi abaot Hem?
-
Askem ol pikinini blong tingting long maen blong olgeta se wan fren i talem se: “Mi no nid blong ridim Buk blong Momon. Mi ridim Baebol finis.” Ridim tugeta 2 Nifae 29:7–11, mo sapos i nid, eksplenem ol toktok mo ol tingting. Afta askem olgeta blong serem ol tingting abaot wanem nao maet oli save talem long fren blong olgeta.
Stap Leftemap Tingting blong Lanem Samting long Hom
Invaetem ol pikinini blong eksplenem long ol famli blong olgeta olsem wanem nao Baebol mo Buk blong Momon i wok tugeta blong testifae abaot Jisas Kraes.
Stap Kam Antap long Fasin blong Yumi blong Stap Tij
Lukluk nomo long ol pipol, i no long ol lesen. Ol aedia long aotlaen ia oli ol tingting nomo. Yu save jenisim folem nid mo save blong ol pikinini we yu stap tijim.