Stori olsem Parabol blong Olif Tri, i kam long Brad Teare

16–22 Maj

Jekob 5–7

Lod I Stap Wok Wetem Yumi

Stadi, tingting hevi, mo mo prea blong save olsem wanem blong tijim gud ol pikinini blong save ol trutok we i stap long Jekob 5–7 Raetemdaon ol filing mo tingting we yu kasem.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Blong stat blong toktok raon long ol mesej we oli stap insaed long Jekob 5–7, invaetem ol pikinini blong tokbaot ol samting long laef blong olgeta we i helpem olgeta blong filim lav blong Papa long Heven mo Jisas Kraes. ?Olsem wanem nao bae yumi soemaot lav blong yumi long ol narafala man?

Stap Tijim Doktrin: Ol Smol Pikinini

Jekob 5

Ol Misinari oli stap givim seves long ol pikinini blong Papa long Heven.

Tingting hevi long olsem wanem nao yu save serem stori blong ol olif tri long ol pikinini blong oli save andastanem

Samfala Aktiviti we Yu Save Mekem

• Soem wan pikja blong wan tri, o go wokbaot aotsaed blong luk wan tri, mo tekem sot taem blong luklukbak long ol stamba lesen long stori olsem parabol blong ol olif tri insaed long Jekob 5. Eksampol: masta blong plantesen (we i save ripresentem Jisas) i wok had tumas blong lukaotem ol olif tri blong hem (we i save ripresentem ol pipol long wol ia) from se hem i kea tumas from olgeta. Hem i singaotem ol wokman (we i save ripresentem ol misinari) blong help blong kea long ol tri ia. Jusum wan o tu ves long Jekob 5 blong ridim long ol pikinini (olsem ol ves 71–72).

• Askem ol pikinini sapos oli save wan we i bin go long wan misin, o blong oli tokbaot wan we yu save. Helpem ol pikinini blong faenem long map ol ples we ol misinari ia oli stap long hem. Eksplenem se Jekob i komperem wol ia olsem wan bigfala grup blong ol olif tri. Ol tri ia oli olsem ol man long wol ia, mo blong stap kea long ol tri ia hem i olsem wanem we ol misinari oli stap mekem blong ol pikinini blong God. ?Wanem nao ol misinari oli stap mekem blong blesem ol pikinini blong Papa long Heven? Lukaotem sam ansa blong kwestin ia tugeta long wan singsing olsem “Called to Serve” (Children’s Songbook, 174–75). ?Olsem wanem nao yumi save stap olsem ol misinari?

Misinari wok hem i wan wei we yumi save helpem ol pikinini blong God blong gobak stap wetem Hem.

Jekob 6:5

Papa long Heven i lavem yumi.

?Olsem wanem nao yu save tijim klas blong yu se God i lavem evri pikinini blong Hem mo stap stretem “han blong sore blong Hem” i go long olgeta?

Samfala Aktiviti we Yu Save Mekem

• Invaetem ol pikinini blong haggem olgeta. ?Yu stap filim olsem wanem taem se wan we yu lavem i givim wan bigfala hag long yu? Ridim Jekob 6:5 long ol pikinini, mo eksplenem se ol toktok ia “[God] i stap tru long yufala” mo “stretem han blong sore blong hem i go long yufala” i tijim yumi se Papa long Heven i lavem yumi mo i wantem yumi blong kambak long Hem wan dei.

• Sing tugeta wan singsing abaot lav, olsem “I Feel My Savior’s Love” (Children’s Songbook, 74–75). Invaetem ol pikinini blong talem sam samting we i stap helpem olgeta blong filim lav blong Sevya.

Jekob 7:1–23

Mi save faet from wanem we mi save se i tru.

Jekob hem i wan gudfala eksampol blong wan man we strong testemoni blong hem i helpem hem blong faet from trutok long fes blong ol enemi.

Samfala Aktiviti we Yu Save Mekem

• Talem stori blong Jekob mo Serem (Jekob 7:1–23) long wan wei we ol pikinini bae oli andastanem. Yu save yusum “Japta 10: Jekob mo Serem” (Ol Stori long Buk blong Momon, 27–29, o vidio blong hem long ChurchofJesusChrist.org). Afta talem stori ia bakegen, be naoia letem ol pikinini oli help blong finisim stori ia. Askem long olgeta se wanem nao oli lanem aot long Jekob ?Olsem wanem nao yumi save folem eksampol blong hem?

• Invaetem ol pikinini blong sing wan singsing abaot fasin blong stap jusum raet, olsem “Dare to Do Right” o “Stand for the Right” (Children’s Songbook, 158, 159). Askem olgeta blong stanap taem oli sing ol toktok olsem raet o tru.

Tijim Doktrin: Ol Bigfala Pikinini

Jekob 5

Lod i stap kea long ol pipol blong Hem

Jekob i serem stori blong ol olif tri blong help blong invaetem ol pipol blong Hem blong kam long Kraes. Hem i save mekem semfala wok ia tu wetem ol pikinini we yu stap tijim.

Samfala Aktiviti we Yu Save Mekem

• Ridim mo eksplenem long ol pikinini ol impoten ves we oli stap tokbaot stori olsem parabol blong ol olif tri, olsem Jekob 5:3–4, 28–29, 47 mo 70–72, mo invaetem ol pikinini blong dro ol pikja blong wanem nao ol ves ia oli stap tokbaot. ?Wanem nao yumi lanem aot long ol ves ia abaot olsem wanem nao Lod i stap filim abaot ol pipol blong Hem? Askem long ol pikinini blong priten blong stap lukaot long wan olif tri taem yu stap rid long ol ves 61–71 (maet bae oli aktem se oli stap digim hol, wotarem, mo samfala moa). Invaetem sam pikinini blong ridim Jekob 5:11, 41, 47 mo 72, mo lukaotem ol samting we i soemaot se Lod blong plantesen (Jisas Kraes) i kea from ol tri. ?Wanem nao Sevya i mekem blong soemaot se hem i stap kea from yumi? Vidio blong “Old Testament Olive Vineyard” (ChurchofJesusChrist.org) i save givhan wetem aktiviti ia.

• Mekem wan lis blong sam long ol saen long Jekob 5 long bod, olsem plantesen, masta blong plantesen, ol wokman, mo ol olif tri. Afta mekem wan narafala lis, i no folem oda, blong ol samting we ol saen ia i ripresentem, olsem wol, Sevya, ol lida blong Jos o misinari, mo ol pipol blong God. Ridim tugeta ol ves long Jekob 5 we i talem smol abaot ol saen ia, mo helpem ol pikinini blong dro ol laen long bod blong konektem ol saen ia wetem ol mining blong olgeta (luk, olsem eksampol, ol ves 3–4, 28–29, 47, 70–72).

Jekob 6:4–5

Papa long Heven i lavem mi mo bae i fogivim mi sapos mi sakem sin.

Hem i impoten blong helpem ol pikinini we yu stap tijim blong oli andastanem se God i lavem olgeta mo bae i oltaem fogivim olgeta sapos oli sakem sin wetem wan tru hat.

Samfala Aktiviti we Yu Save Mekem

• Mekem wan jat long bod we i gat tu kolom,mo putum nem blong wan se Papa long Heven mo narafala se Yumi. Ridim tugeta Jekob 6:4–5, mo askem haf blong klas blong lukaotem ol toktok we i tokbaot God mo nara haf blong klas blong lukaotem ol toktok we i tokbaot yumi. Raetemdaon wanem we oli faenem long stret kolom blong hem. Helpem olgeta blong faenemaot mining blong ol toktok we oli no andastanem.

• Serem stori blong Elda Allen D. Haynie abaot taem we hem i pleiplei mo kam doti wetem graon long wan pul blong sofmad; stori i stap long mesej blong hem “Tingbaot Huia Yumi Bin Trastem” (Ensign o www.ChurchofJesusChrist.org/languages/bis/content/general-conference/2015/10/remembering-in-whom-we-have-trusted, Okt 2015, 1211–22). ?Wanem nao stori ia i tijim long yumi blong mas mekem blong save stap long sef ples insaed long kingdom blong God? ?Wanem moa yumi save lanem long Jekob 6:4–5?

Jekob 7:1–23

Mi save faet from wanem we mi save se i tru.

?Olsem wanem nao yu save givim insperesen long ol pikinini blong oli save faet from trutok olsem we Jekob i bin mekem?

Samfala Aktiviti we Yu Save Mekem

• Invaetem ol pikinini blong aktemaot wanem i bin hapen bitwin Jekob mo Serem, mo yusum Jekob 7:1–13 olsem wan gaed. O soem vidio blong “Jacob and Sherem” (ChurchofJesusChrist.org). Askem ol pikinini blong tokbaot ol pat blong stori we oli laekem. ?Olsem wanem nao Jekob i bin save se hem i raet? Invaetem ol pikinini blong serem ol eksperiens blong ol taem we oli bin faet from raet, o serem eksperiens blong yuwan.

• Invaetem ol pikinini blong sing wan singsing abaot fasin blong stap jusum raet, olsem “Dare to Do Right” o “Stand for the Right” (Children’s Songbook, 158, 159). Seraotem olgeta long tu grup, mo invaetem olgeta blong mekem wan posta o bana we i ripresentem ol samting we oli biliv long hem.

Stap Leftemap Tingting blong Lanem Samting long Hom

Invaetem pikinini blong tingting long wan wei we oli save helpem famli blong olgeta blong filim lav blong Sevya—eksampol, taem oli stap eksplenem wanem we oli bin lanem abaot hao nao Lod blong plantesen i stap kea from ol olif tri blong hem.

Stap Kam Antap long Fasin blong Yumi Blong Stap Tij

Ol pikinini oli laekem blong serem wanem we oli stap lanem. I nomata se oli yang, ol pikinini oli save mekem ol famli memba blong olgeta oli kam strong moa. Leftemap tingting blong olgeta blong serem wetem ol famli blong olgeta ol samting we oli stap lanem long Praemeri. (Luk long Teaching in the Savior’s Way, 30.)