Mi Fogivim Yu, i kam long Greg K. Olsen

9–15 Maj.

Jekob 1–4

Yufala I Stretem Yufala wetem God tru long Atonmen blong Kraes

Taem yu stap ridim Jekob 1–4, tingting hevi long wijwan prinsipol nao long ol japta ia i impoten tumas blong ol pikinini oli lanem. Lukaotem help blong Spirit blong save olsem wanem nao i stret blong tijim ol prinsipol ia, mo raetemdaon ol tingting mo filing blong yu.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Invaetem ol pikinini blong serem wan samting we olgeta o ol famli blong olgeta i bin mekem long wik ia we oli lanem aot long Jekob 1–4. Yu save askem long olgeta tu blong serem wan samting we oli tingbaot long lesen blong las wik. ?Wanem kwestin nao yu save askem long olgeta blong helpem olgeta blong tingbaot?

Stap Tijim Doktrin: Ol Smol Pikinini

Jekob 1:6–8, 18; 2:1–11

God i singaotem ol lida blong Jos blong helpem mi blong folem Jisas Kraes.

Helpem ol pikinini blong andastanem se bae oli kasem blesing sapos oli stap folem ol kaonsel blong ol Jos lida.

Samfala Aktiviti we Yu Save Mekem

• Mekem sam smol papet blong ripresentem Jekob, mo Josef, ol smol brata blong Nifae we oli ol lida long Jos. Serem sam ves long Jekob 1 mo 2 blong eksplenem, wanem nao, God i singaotem ol lida blong Jos blong mekem. Eksampol, ol lida oli winim tingting blong yumi blong “biliv long Kraes” (Jekob 1:8), invaetem yumi blong sakem sin (luk long Jekob 2:5–6, 9–10)), mo “talemaot long yufala ol toktok blong God” (Jekob 2:2, 11). Letem ol pikinini oli yusum ol papet blong priten blong mekem sam long ol samting ia.

• Invaetem sam pikinini blong talem nem blong sam lida blong Jos we oli save, olsem ol Praemeri lida, ol memba blong bisoprik, mo ol profet mo ol aposol. Helpem ol pikinini blong tingbaot sam wei we ol lida ia oli stap blesem yumi.

Ol lida blong Jos oli stap helpem yumi blong folem Jisas Kraes.

Jekob 2:12–14, 17–21.

Mi save helpem olgeta we i stap long nid taem mi serem samting wetem olgeta.

?Ol pikinini we yu tijim oli andastanem ol blesing we oli kam taem, olgeta, oli serem samting wetem olgeta we oli gat nid? ?Olsem wanem nao yu save helpem olgeta blong save se Papa long Heven mo Jisas Kraes, Tufala i wantem yumi blong helpem ol narafala man?

Samfala Aktiviti we Yu Save Mekem

• Eksplenem we sam long ol man long taem blong Jekob oli rij tumas, be oli no wantem serem wanem we oli gat wetem ol pua man. Ridim Jekob 2:17–19 blong helpem ol pikinini blong andastanem ol tijing blong Jekob i go long ol man ia. Taem yu stap mekem hemia, givim long ol pikinini ol pikja o ol samting blong holem we i semmak long ol toktok long ol ves ia.

• Invaetem ol pikinini blong aktemaot ol wei we oli save serem wanem we oli gat wetem wan man we i stap long nid. Testifae se yumi kasem blesing taem yumi stap serem samting wetem ol narafala man.

• Karem wan samting i kam long klas we yu save serem wetem ol pikinini. Givim sam long wanwan pikinini, mo eksplenem se yu stap serem samting. Askem olgeta se oli filim olsem wanem taem yu stap serem samting wetem olgeta. ?Olsem wanem nao olgeta i filim taem oli stap serem samting wetem ol narafala man? Helpem olgeta blong tingting long wan samting we oli save serem blong mekem wan nara man i hapi.

Jekob 4:6

Mi save mekem fet blong mi long Jisas Kraes i kam strong moa.

Taem Jekob i stap laef long wan stret mo gud laef i nomata se ol man raon long hem oli stap mekem ol fasin nogud, fet blong hem i kam strong moa mekem se i no save seksek. Tingting hevi long olsem wanem yu save helpem ol pikinini blong andastanem se i minim wanem blong gat fet we i no save seksek.

Samfala Aktiviti we Yu Save Mekem

• Helpem ol pikinini blong tingbaot sam samting we oli save mekem blong mekem bodi blong olgeta i kam strong moa. ?Wanem nao yumi save mekem blong mekem fet blong yumi i kam strong moa? Openem skripja long Jekob 4:6, mo helpem ol pikinini blong faenemaot wanem nao Jekob mo ol pipol blong hem oli bin faenem blong mekem fet blong olgeta i “no seksek.”

• Singsing “The Wise Man and the Foolish Man” (Children’s Songbook, 281) wetem ol pikinini. Long wan saed blong bod, dro wan haos we oli bildim antap long sanbij. Long narasaed blong bod, dro wan haos we oli bildim antap long ston. Sapos i posibol, karem sam sanbij mo wan ston i kam long klas. ?Wijwan nao i isi blong i seksek o muv? ?Wijwan yu wantem? ?Yu wantem fet blong yu i olsem sanbij o ston?

Stap Tijim Doktrin: Ol Bigfala Pikinini

Jekob 1:6–8, 18; 2:1–6, 11

God i singaotem ol lida blong Jos blong helpem mi blong folem Jisas Kraes.

Ol pikinini we yu stap tijim bae oli kasem blesing taem oli gat tras mo folem ol kaonsel blong ol lida blong Jos.

Samfala Aktiviti we Yu Save Mekem

• Ridim wetem ol pikinini, Jekob 1:6–8 mo 2:1–6, 11, mo semtaem helpem olgeta blong faenem ol toktok we i tokbaot olsem wanem nao ol wokman blong God oli stap lidim Jos. Askem olgeta blong raetem ol toktok ia long ol pis pepa mo soemaot ol pepa ia long bod. ?From wanem nao God i singaotem ol lida blong gaedem yumi? Askem ol pikinini blong serem ol eksperiens we oli lanem o kasem toktok long wan lida blong Jos o tija blong lidim olgeta, mo ol blesing we oli bin kasem.

• Askem ol pikinini blong dro wan pikja blong wan lida blong Jos we oli save, mo letem ol narawan oli traem wokemaot se huia nao oli bin droem. ?Wanem nao ol lida ia oli stap mekem blong helpem yumi blong folem Jisas Kraes? Invaetem ol pikinini blong raetem ol smolsmol not i go long ol lida blong Jos, mo talem tangkyu long olgeta from seves blong olgeta.

• Invaetem wan lokol lida blong Jos blong talemaot long ol pikinini wanem nao hem i stap mekem blong mekem fulwan koling blong hem. Askem ol pikinini blong talem sam samting we oli save mekem blong sastenem ol lida blong olgeta.

Jekob 2:12 –, 17–21.

Mi save mekem ol nara man oli hapi taem mi stap mi stap serem samting wetem olgeta.

Ol tru man we oli stap folem Kraes oli olgeta we oli wantem blong serem wanem we oli gat wetem ol narafala man. Leftemap tingting blong ol pikinini blong mekem olgeta we oli stap long nid oli glad taem oli serem samting wetem olgeta.

Samfala Aktiviti we Yu Save Mekem

• Talem long ol pikinini se plante man long taem blong Jekob oli gat hae tingting mo oli no kaen from se oli lavem ol rij samting (luk long Jekob 2:12–14, 17–21). Invaetem sam pikinini blong ridim Jekob 2:17–19 laod, mo helpem olgeta blong andastanem ol had toktok. ?Wanem nao yumi mas lukaotem bifo yumi lukaotem ol rij samting? ?Wanem nao yumi mas lukaot blong mekem wetem ol rij samting we yumi kasem?

• Ridim Jekob 2:17 long ol pikinini. ?Wanem blesing nao Papa long Heven i serem wetem yumi? ?From wanem nao Hem i wantem yumi blong serem samting wetem narafala man? Invaetem ol pikinini blong serem ol taem we, olgeta, oli bin serem wan samting wetem wan narafalawan, mo oli talem olsem wanem oli bin filim mo olsem wanem narawan ia i filim.

Jekob 4:4–13, 17 

Mi save mekem fet blong mi long Jisas Kraes i kam moa strong

Fet blong Jekob i kam blong no save seksek taem hem i stap luklukgud insaed long ol toktok blong ol profet mo kasem wan witnes blong hemwan (luk long Jekob 4:6). ?Olsem wanem nao yu save helpem ol pikinini blong gat strong tingting blong bildimap fet we i no save seksek?

Samfala Aktiviti we Yu Save Mekem

• Invaetem ol pikinini blong tingbaot sam samting we i stap kam strong mo sef taem taem i pas, olsem wan bigfala tri. ?Olsem wanem nao fet i semmak olsem ol samting ia we oli stap tingbaot? ?Wanem toktok nao insaed long Jekob 4:6, 10–11 i tokbaot gud wanem yumi save mekem blong mekem fet blong yumi i no seksek? Askem ol pikinini blong mekem wan lis long bod long ol wei we yumi save mekem fet blong yumi long Jisas Kraes i kam strong moa.

• Serem stori blong Elda Neil L. Andersen abaot wan tri we i stap gro long wan ples we i gat tumas win, insaed long mesej blong “Spiritual Whirlwinds” (Ensign o Liahona, Mei 2014, 18–21, o soem vidio “Spiritual Whirlwinds” (ChurchofJesusChrist.org). ?From wanem nao hem i impotem blong fet blong yumi i no seksek olsem wan strong stamba blong wan tri? ?Ol waelwin i ripresentem wanem? ?Wanem nao yumi save mekem blong bildimap fet we i no save seksek? Helpem ol pikinini blong tingting long sam nara stori we i tij abaot fet we i no save seksek.

Stap Leftemap Tingting blong Lanem Samting long Hom

Invaetem ol pikinini blong tingbaot wan samting we oli save serem wetem ol famli blong olgeta—hemia i tekem tu wan samting we oli lanem long klas tedei. Givim janis long olgeta long wan nara lesen blong oli tokbaot wanem we oli bin serem.

Stap Kam Antap long Fasin blong Yumi blong Stap Tij

Leftemap tingting blong gat fasin blong stap kwaet. Helpem ol pikinini blong andastanem se wan impoten pat blong stap kwaet, hem i blong stap tingting long Papa long Heven mo Jisas Kraes. Maet bae yu rimaenem olgeta blong stap kwaet taem oli singsing wan singsing kwaet kwaet nomo, o oli mekem tiun blong singsing ia nomo, o soem wan pikja blong Jisas Kraes.