“2–8 Maj. 2 Nifae 31–33: ‘Hemia I Rod,’” Kam Folem Mi–Blong Praemeri: Buk blong Momon 2020 (2020)
“2–8 Maj. 2 Nifae 31–33” Kam Folem Mi–Blong Praemeri: 2020
Kraes I Stap Tijim Ol Disaepol blong Hem, i kam long Justin Kunz
2–8 Maj
2 Nifae 31–33
“Hemia I Rod”
Blong yu stat rere, ridim 2 Nifae 31–33. Lukaotem givhan blong Spirit abaot wanem blong tijim long ol pikinini. Aotlaen ia i save givim sam tingting long yu.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
From se Nifae i bin tij abaot baptaes blong Kraes, askem ol pikinini blong serem wan samting we oli bin lanem abaot baptaes. Oli save serem ol tingting mo filing blong olgeta abaot baptaes blong olgeta, o baptaes blong wan fren, o famli memba.
Stap Tijim Doktrin: Ol Smol Pikinini
Jisas Kraes i bin tijim mi olsem wanem blong gobak long Papa long Heven.
Nifae i bin tijim se, blong stap folem ol eksampol mo tijing blong Sevya hem i wan wei nomo we “God i sevem ol man insaed long kingdom blong hem” (2 Nifae 31:21).
Samfala Aktiviti we Yu Save Mekem
-
Soem ol pikja long aotlaen blong wik ia long Kam Folem Mi—Blong Wanwan Man, Woman mo Famli taem yu stap talemsot stori blong baptaes blong Jisas (luk long 2 Nifae 31:4–13). Eksplenem se baptaes hem i wan step i gobak long laef wetem Papa blong Heven. Invaetem wan we i jes kasem baptaes blong i talem long ol pikinini olsem wanem nao hem i filim abaot baptaes.
-
Eksplenem se Jisas Kraes i bin tijim yumi se yumi nid blong gobak long Hem afta we yumi ded. Dro wan rod long bod, putum wan pikja blong Kraes long en blong rod ia. Givim long ol pikinini ol pikja we i ripresentem sam pat blong doktrin blong Kraes (fet long Kraes, fasin blong sakem sin, baptaes, presen we i Tabu Spirit, mo stap strong kasem en). Helpem olgeta blong putum ol pikja ia folem rod ia.
-
Helpem ol pikinini blong lanem nambafo toktok blong bilif. Sing tugeta wan singsing abaot fasfala prinsipol blong gospel, olsem “Faith,” “When I Am Baptized,” o “Choose the Right Way” (Children’s Songbook, 96–97, 103, 160–61).
Mi save kakae gud long ol toktok blong Kraes.
?Olsem wanem nao ol eksperiens blong yu long saed blong stap “kakae gud long ol toktok blong Kraes” (2 Nifae 32:3) i save helpem ol pikinini blong andastanem toktok ia?
Samfala Aktiviti we Yu Save Mekem
-
Askem ol pikinini blong talem nem blong sam kakae we oli laekem tumas, mo invaetem olgeta blong aktemaot olsem wanem nao bae oli kakae gud ol kaekae ia. Ridim 2 Nifae 32:3, mo askem ol pikinini blong lisin long wanem Nifae i talem se yumi mas kakae gud. ?I minim wanem blong kakae gud long ol skripja? Eksplenem long ol pikinini se ol skripja hem i wan ples we yumi save faenem ol toktok blong Kraes.
-
Raetem ol toktok ia God mo Lod long bod. Invaetem ol pikinini blong openem i go long wan skripja mo lukaotem ol toktok ia. Helpem long olgeta sapos oli nidim. Testifae se taem yumi stap ridim ol skripja, bae yumi save lanem abaot God.
Papa long Heven i wantem mi blong prea oltaem.
Ol ves ia i save givim insperesen long ol pikinini blong mekem prea i kam pat blong laef blong olgeta evri dei.
Samfala Aktiviti we Yu Save Mekem
-
Askem long ol pikinini wetaem oli stap prea. ?Oli stap prea long moning? ?long naet? o ?bifo kakae? Helpem ol pikinini blong tingbaot sam aksen blong soemaot ol taem we yumi save prea, olsem taem we yumi wekap, go silip, mo kakae—o eni narafala taem. Ridim long olgeta, fas o nambatu laen long 2 Nifae 32:9, mo poenemaot sentens ia “prea oltaem.”
-
Askem ol pikinini se oli stap prea olsem wanem. ?Wanem nao oli stap mekem wetem hed, ol han blong olgeta, mo ol narafala moa? ?Wanem kaen samting nao oli stap talem? Askem olgeta blong tingting long maen blong olgeta se yu no save olsem wanem blong prea, mo letem olgeta oli tijim yu. ?From wanem nao Papa long Heven i wantem yumi blong prea?
Yumi save toktok long God tru long prea.
Stap Tijim Doktrin: Ol Bigfala Pikinini
Jisas Kraes i bin tijim mi olsem wanem blong gobak long Papa long Heven.
Yumi save gobak long God afta laef long wol ia taem yumi stap folem doktrin we Jisas Kraes i bin tijim: fet long Kraes, fasin blong sakem sin, kasem baptaes, presen we i Tabu Spirit, mo stap strong kasem en.
Samfala Aktiviti we Yu Save Mekem
-
Soem pikja long aotlaen blong wik ia long Kam Folem Mi—Blong Wanwan Man, Woman mo Famli, mo askem ol pikinini blong serem wanem oli save abaot baptaes blong Jisas (luk long Matiu 3:13–17). Putum ol toktok ia olbaot long bod: Jisas i witnes long Papa se bae Hem i obei long Hem . Invaetem ol pikinini blong ridim 2 Nifae 31:7 tugeta olsem wan klas mo putum ol toktok ia folem stret oda.
-
Askem ol pikinini se wanem nao bae olgeta i talem long wan man we hem i stap rere blong kasem baptaes mo helpem hem blong putum tugeta ol advaes blong olgeta long wan simpol kad we bae oli save givim long wan. ?Olsem wanem nao yumi save gohed blong folem eksampol blong Jisas afta we yumi kasem baptaes?
-
Eksplenem se doktrin blong Kraes i tekem ol samting we Jisas Kraes i bin tijim we yumi nid blong mekem blong gobak long Papa long Heven. Raetem long ol defdefren pis pepa fet long Kraes, fasin blong sakem sin, baptaes, presen we i Tabu Spirit, mo stap strong kasen en, mo saksakem ol pepa ia raon long rum. Ridim long ol pikinini 2 Nifae 31:11–19, mo invaetem ol pikinini blong, wan afta wan, oli jiam long wan pepa i go long narafala pepa taem oli harem yu ridimaot nem blong ol prinsipol ia. Helpem olgeta blong tingbaot wan eksperiens we oli gat wetem wanwan eksperiens ia.
Mi save kakae gud long ol toktok blong Kraes
?From wanem nao ol pikinini oli nid blong andastanem from wanem i impoten blong kakae gud long ol toktok blong Kraes?
Samfala Aktiviti we Yu Save Mekem
-
Askem ol pikinini blong tingbaot wan lafet. ?Bae i gat wanem kaekae longwe? ?Wanem nao bae olgeta i kakae faswan? Afta, invaetem olgeta blong tingting, insaed long maen blong olgeta, se wanem nao, kakae gud long ol skripja, i stap minim taem yu ridim 2 Nifae 32:3. ?From wanem nao Nifae i yusum toktok ia kakae gud blong tijim yumi olsem wanem nao yumi sapos blong stadi long toktok blong God? ?From wanem nao hem i no talem nomo se rid? ?I minim wanem blong kakae gud long ol skripja? Serem wetem ol pikinini ol blesing we yu bin kasem taem yu stap kakae gud long ol skripja.
-
Komplitim aktiviti pej wetem ol pikinini, mo invaetem olgeta blong mekem wan gol blong mekem wan samting blong kakae gud long ol skripja long wik ia.
Papa long Heven i wantem mi blong prea oltaem
Enemi i stap giaman long yumi blong yumi no prea. Tingbaot olsem wanem nao yumi save helpem ol pikinini blong winim temtesen mo blong “prea oltaem” (2 Nifae 32:9).
Samfala Aktiviti we Yu Save Mekem
-
Jusum wan toktok abaot prea long 2 Nifae 32:8–9, raetem long bod, mo kavremap wanwan toktok, wetem wan pis pepa. Invaetem ol pikinini blong gat ol janis blong karemaot wan pis pepa long wan taem kasem taem we oli save wokemaot sentens ia.
-
Ridim 2 Nifae 32:8–9 tugeta, mo askem ol pikinini blong serem wanem oli bin lanem abaot prea long ol ves ia. ?Hem i minim wanem blong “prea oltaem”? (ves 9). ?Olsem wanem nao yumi save mekem hemia?
-
?Wanem nao i save mekem se wan man i no wantem prea? Serem wan eksperiens long wan taem we yu bin prea i nomata we yu bin filim se yu no wantem. ?Olsem wanem nao yu bin filim afta? Invaetem wan pikinini blong ridim seken haf blong 2 Nifae 32;8, mo givim taem long ol pikinini blong tingting hevi long hem. ?From wanem nao Setan i no wantem yumi blong prea? ?Olsem wanem nao yumi save rimaenem yumi blong prea, i nomata se yumi filim se yumi no wantem mekem?
Stap Leftemap Tingting blong Lanem Samting long Hom
Leftemap tingting blong ol pikinini blong faenem wan man—wan fren, wan brata o sista, o wan nara memba blong famli—we oli save tijim hem olsem wanem blong prea.
Stap Kam Antap long Fasin blong Yumi blong Stap Tij
Ol pikinini oli laekem blong muvmuv. Invaetem ol pikinini blong aktemaot ol stori long skripja mo ol singsing. Yusum ol fasin blong olgeta blong laekem blong stap muvmuv blong mekem oli save lanem moa samting. (Luk long Teaching in the Savior’s Way, 25–26.)