“2–8 Maj. 2 Nifae 31–33: ‘Hemia I Rod,’” Kam Folem Mi—Blong Wanwan Man, Woman mo Famli: Buk blong Momon 2020 (2020)
“2–8 Maj. 2 Nifae 31–33,” Kam Folem Mi—Blong Wanwan Man, Woman mo Famli: 2020
Kraes I Stap Tijim Ol Disaepol blong Hem, i kam long Justin Kunz
2–8 Maj
2 Nifae 31–33
“Hemia I Rod”
Aotlaen ia i givim samfala prinsipol we bae i gat moa mining insaed long 2 Nifae 31–33. Be ol samting we oli moa impoten we bae yu lanem long stadi blong yu, bae oli kam long ol kwaet toktok blong Spirit. Lukaotem blong Spirit i lidim yu, mo raetemdaon ol kwaet toktok we oli kam.
Raetemdaon Ol Filing mo Tingting blong Yu
Long medel blong ol las toktok we Nifae i raetemdaon, yumi faenem toktok ia we hem i talemaot: “Lod i bin givim oda long mi, mo mi mas obei” (2 Nifae 33:15). Hemia i olsem wan stret toktok we i talem long sot toktok ful laef blong Nifae. Hem i bin lukaotem blong kasem tingting blong Lod, mo, wetem strong paoa long tingting, i bin traehad blong obei long tingting ia—i nomata se hemia i minim blong putum laef blong hem long denja blong kasem ol buk we oli wokem long bras aot long Leban, blong bildim wan bot mo krosem solwota, o blong stap fetful blong stap tijim doktrin blong Kraes wetem fasin blong tok stret mo wetem paoa. Nifae i save toktok we i winim tingting blong yumi, abaot nid blong “wokbaot i go wetem strong bilif long Kraes,” blong folem “rod we i stret mo i no isi we i lid i go long laef we i no save finis” (2 Nifae 31:20, 18), from se hemia nao rod we hem i bin folem. Hem i bin save, tru long eksperiens blong hem, se rod ia, i nomata se i strong samtaem, i wan rod we i karem glad i kam, mo “i no gat wan narafala rod o nem we oli givim andanit long heven, we tru long hem, God i sevem ol man insaed long kingdom blong hem” (2 Nifae 31:21).
Sam Aedia blong Skripja Stadi blong Yuwan
Jisas Kraes mo doktrin blong Hem i wan wei ia nomo we i go kasem laef we i no save finis.
Sapos yu mas talem sot rod ia we i go long laef we i no save finis, ?bae yu talem wanem? Nifae, wetem fasin blong hem blong save tok stret mo long wan simpol fasin, i talem hemia long wei ia: fet long Kraes, fasin blong sakem sin, baptaes, kasem presen we i Tabu Spirit, mo stap strong kasem en. Afta we yu stadi long ol tijing blong Nifae long 2 Nifae 31–32, tingting long wei we bae yu eksplenem ol samting ia long wan narawan wetem ol toktok blong yu nomo. Tingabaot olsem wanem we taem yu bin laef folem ol tijing ia, oli bin blesem yu. Yu save tingting blong lukluk long ol tijing blong Nifae we oli stap long 2 Nifae 31:18–20 mo skelem ol traehad blong yuwan blong “wokbaot i go” folem rod ia blong gospel.
Luk tu long 3 Nifae 11:32–39; 27:13–22; D. Todd Christofferson, “The Doctrine of Christ,” Ensign o Liahona, May 2012, 86–90; Brian K. Ashton, “Doktrin blong Kraes,” Ensign o https://www.ChurchofJesusChrist.org/languages/bis/content/general-conference/2016/10/the-doctrine-of-christ, Okt 2016.
Blong stap folem ol tijing blong Jisas Kraes i lidim yumi i go long laef we i no save finis.
Jisas Kraes i putum eksampol we i stret evriwan blong fasin blong stap obei taem Hem i bin kasem baptaes.
I nomata se baptaes blong yu i hapen yestedei, o 80 yia i pas, i wan taem we ol samting oli bin jenis—yu bin mekem wan kavenan we i blong laeftaem blong stap folem Jisas Kraes. Tingting long baptaes blong yu taem yu stap ridim abaot baptaes blong Sevya long 2 Nifae 31:4–13. ?From wanem Jisas i bin kasem baptaes? ?Long wanem wei nao ol risen we i mekem se Hem i bin baptaes oli semmak nomo long ol risen we i mekem se yu yu baptaes? ?Wanem nao yu stap mekem tedei blong gohed blong folem eksampol blong Sevya long saed blong fasin blong stap obei?
Odinens blong sakramen i wan janis we i kam evri wik blong yu komitim yuwan bakegen blong stap folem Jisas Kraes. Nekis taem we yu tekem sakramen, tingting blong ridim 2 Nifae 31:13 mo tingting hevi long strong tingting blong yu blong “folem Pikinini, wetem evri tingting blong hat” mo sapos yu glad blong “tekem long yu nem blong Kraes.”
Tabu Spirit bae i soemaot long mi wanem nao mi mas mekem.
Sapos baptaes mo konfemesen oli stap long “get we yumi go insaed” long rod ia we i stret mo i no isi (2 Nifae 31:17), ?wanem nao yumi stap mekem taem yumi stanap long rod ia? Hemia nao ol pipol blong Nifae oli bin stap askem olgetawan 2 Nifae 32:1? ?Wanem ansa nao Nifae i bin givim long 2 Nifae 31:19–20 mo japta 32? ?Wanem ansa yu faenem we i blong yuwan?
Luk tu long David A. Bednar, “Receive the Holy Ghost,” Ensign o Liahona, Nov. 2010, 94–97; “Holy Ghost,” Gospel Topics, topics.ChurchofJesusChrist.org.
Buk blong Momon i winim tingting blong evriwan blong biliv long Kraes.
Long 2 Nifae 33, taem Nifae i stap finisim ol raeting blong hem, hem i eksplenem ol risen from wanem hem i bin stap raet long fas ples. ?Wanem risen nao yu faenem insaed long japta ia? Tingtingbak long wanem yu bin ridim kasem naoia long 1 Nifae mo 2 Nifae, mo ol not we yu bin raetemdaon. ?Long wanem wei nao, ol stori mo ol tijing ia, oli bin mekem ol stamba tingting we Nifae i gat long yu oli hapen? Eksampol, ?olsem wanem nao ol raeting ia oli bin winim tingting blong yu blong “biliv long Kraes, mo blong stap strong kasem en”? (ves 4). Tingting blong raetemdaon ol eksperiens ia, o blong serem olgeta wetem wan memba blong famli o wan fren.
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:
2 Nifae 31:5–13
?I gat eni memba blong famli we i stap rere blong kasem baptaes, o i gat eniwan we i jes baptaes? Maet bae oli save serem from wanem oli bin baptaes. Folem ol tijing blong Nifae, ?wanem nao samfala risen we yumi sapos blong kasem baptaes? ?Wanem nao sam blesing we yumi kasem taem yumi kasem baptaes?
2 Nifae 31:17–21
?Olsem wanem nao bae yu save helpem famli blong yu i andastanem fasin blong tingting blong Nifae long saed blong “rod ia we i stret mo i no isi? (2 Nifae 31:18). Yu save wok tugeta blong droem wan pikja blong rod ia we Nifae i tokbaot long 2 Nifae 31:17–21, mo haelaetem ol samting we yumi mas mekem blong go insaed long rod ia mo gohed blong wokbaot long hem. ?Olsem wanem nao Sevya i stap helpem yumi blong progres folem rod ia?
2 Nifae 31:20
Sapos yu wantem helpem famli blong yu blong andastanem gud moa olsem wanem blong stap strong kasem en, pej 6 blong Prijim Gospel blong Mi i gat wan mining we i save help; i gat wan narawan tu i stap long mesej blong Elda Dale G. Renlund “Latter-day Saints Keep on Trying” (Ensign o Liahona, May 2015, 56–58).
2 Nifae 32:8–9
Blong helpem ol memba blong famli blong andastanem se yumi save “prea oltaem,” yu save mekem wan lis blong ol situesen we yumi save prea long hem (o dro sam pikja blong ripresentem ol situesen ia). Afta, famli blong yu i save singsing wan singsing we i stap tij abaot prea, olsem “?Yu Bin Mekem Prea” (STSP, pej 48), mi riplesem ol toktok blong singsing ia wetem ol toktok blong lis blong olgeta. ?Olsem wanem nao Lod i stap blesem yumi taem yumi stap prea oltaem?
2 Nifae 33:1–2
?Wanem nao i save lidim ol pipol blong “mekem hat blong olgeta i kam strong agensem Tabu Spirit”? ?Olsem wanem nao yumi save meksua se Tabu Spirit i gat wan “ples insaed long [yumi]”?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Stap Kam Antap long Fasin blong Yumi blong Stap Tij
Mekem olsem Sevya. Bae hem i help blong stadi long hao nao Sevya i bin stap tij—ol fasin we Hem i bin yusum mo olgeta samting we Hem i bin talem. Be paoa blong Jisas blong tij mo leftemap ol narawan, long en, i kam long huia Hem mo wei we Hem i bin stap laef. Moa yu wok strong wetem strong tingting blong traehad blong laef olsem Jisas Kraes mo dipen long paoa blong Hem we i pem praes from sin, moa bae i kam long yu blong save tij long wei we Hem i bin tij.
Blong Mekem Evri Stret mo Gud Fasin I Kamtru, i kam long Liz Lemon Swindle