“16–22 Maj. Jekob 5–7: ‘Lod I Stap Wok Wetem Yumi” Kam Folem Mi—Blong Wanwan Man, Woman mo Famli: Buk blong Momon 2020 (2020)
“16–22 Maj. Jekob 5–7,” Kam Folem Mi—Blong Wanwan Man, Woman mo Famli: 2020
Stori olsem Parabol blong Olif Tri, i kam long Brad Teare
16–22 Maj.
Jekob 5–7
Lod I Stap Wok Wetem Yumi
Taem yu ridim olgeta skripja, hem i stap invaetem revelesen i kam. So taem yu stap ridim Jekob 5–7, askem Spirit blong i lidim yu blong helpem yu mo famli blong yu. ?Wanem mesej nao Lod i gat blong talem long yu?
Raetemdaon Ol Filing mo Tingting blong Yu
I gat plante, plante pipol we oli no harem yet abaot gospel blong Jisas Kraes. Sapos yu filim se wok ia blong karem tugeta olgeta insaed long Jos blong Lod i wan wok we i bigwan tumas, stori olsem parabol blong Ol Olif Tri long Jekob 5 i stap rimaenem gud yumi: plantesen ia, hem i blong Lod. Hem i givim long yumi, wan smol ples nomo, blong yumi givhan long Hem wetem wok blong Hem—famli blong yumi, ol fren blong yumi, ol pipol long ol ples we yumi save lidim tingting blong man. Mo samtaem, faswan we yumi stap help blong putum tugeta, hem i yumiwan bakegen. Be yumi neva stap yumiwan insaed long wok ia, from se Lod blong plantesen ia, Hem i stap wok long saed blong ol wokman blong Hem (luk long Jekob 5:72). God i save mi i lavem ol pikinini blong Hem, mo bambae Hem i rere wan rod blong wanwan long olgeta i harem gospel blong Hem, iven olgeta we oli bin sakemaot Hem fastaem (luk long Jekob 4:15–18). Mo afta, taem wok i finis, evriwan we oli bin “wok strong wetem strong tingting oltaem wetem [Hem] … bae oli gat glad wetem [Hem] from ol frut blong plantesen blong [Hem]” (Jekob 5:75).
Sam Aedia blong Skripja Stadi blong Yuwan
?Wanem hem i wan stori olsem parabol?
Ol stori olsem parabol, oli ol stori we oli tijim ol trutok long saed blong spirit tru long ol simbol, o saen. Eksampol, long stori olsem parabol blong Ol Olif Tri, wan plantesen i ripresentem wol, wan gudfala olif tri i ripresentem Isrel (olgeta we oli bin mekem kavenan wetem God), mo ol wael olif tri, oli ripresentem ol Jentael nesen (olgeta we oli no mekem ol kavenan yet wetem God).
Taem yu stap stadi long stori olsem parabol we i stap long Jekob 5, lukluk blong faenem sam moa simbol, mo tingting hevi long mining blong olgeta. Eksampol, ?yu ting se gudfala frut ia i ripresentem wanem? ?Nogud frut ia, yu ting se i simbol blong wanem?
Jisas Kraes i Lod blong plantesen.
Bifo yu statem stadi blong yu long saed blong stori olsem parabol blong ol olif tri insaed long Jekob 5, bae i save help blong luklukbak long Jekob 4:10–18 blong lanem from wanem nao Jekob i filim insperesen ia blong serem stori ia olsem parabol long ol pipol blong hem. Long Jekob 6:3–5, yu save faenem sam moa mesej we Jekob i wantem tokbaot bigwan; lukaotem ol mesej ia insaed long stori ia olsem parabol. ?Wanem mesej yu faenem we i blong yuwan insaed long Jekob 5?
Jekob 5 i wan longfala japta. Hem i japta we longfala moa bitim ol narawan insaed long Buk blong Momon. Maet bae i help blong serem japta ia long ol defren seksen ia, we i tokbaot ol defren taem blong histri blong wol:
-
Ol Ves 3–14:Taem we Isrel i seraot olbaot long wol bifo taem blong Kraes
-
Ol Ves 15–28:Seves blong Kraes mo blong Ol Aposol
-
Ol Ves 29–49:Bigfala Apostasi
-
Ol Ves 50–76:Kam tugeta blong Isrel long ol las dei.
-
Ol Ves 76–77:Mileniom taem mo en blong wol
Blong gat sam moa niu tingting abaot stori ia olsem parabol, luk long daegram we i kam wetem aotlaen ia.
Yumi evriwan i save wok blong God taem yumi helpem Hem blong mekem ol pikinini blong Hem oli kam tugeta bakegen.
God i stap invaetem mi blong helpem Hem blong karem ol pikinini blong Hem oli kam tugeta.
Ol “narafala wokman” (Jekob 5:70) we God i bin singaotem long plantesen blong Lod, insaed long olgeta i gat ol pipol olsem yufala—olsem ol memba blong Jos, yumi evriwan i responsibol blong helpem God blong karem ol pikinini blong Hem oli kam tugeta. ?Wanem prinsipol nao yu faenem insaed long Jekob 5, speseli ol ves 61–62 mo 70–75, long saed blong fasin blong stap wok insaed long plantesen blong Lod? ?Yu yu filim we Hem i stap singaotem yu blong wok insaed long plantesen blong Hem? ?Wanem eksperiens nao yu bin gat taem yu bin tekpat long wok ia blong Hem?
Luk tu long “Missionary Work,” Gospel Topics, topics.ChurchofJesusChrist.org; “Old Testament Olive Vineyard,” “Help the Church Grow” (videos, ChurchofJesusChrist.org).
Mi save stanap strong taem ol narafala pipol oli jalenjem bilif blong yumi.
Eksperiens blong Ol Man blong Nifae wetem Serem, plante taem, i ripit tedei: i gat ol pipol we oli skul gud, we oli save toktok gud, we oli stap traem blong prapa spolem gud fet blong yumi. Be “i no gat man i save seksekem” Jekob (Jekob 7:5). ?Olsem wanem nao Jekob i mekem taem oli atakem bilif blong hem? ?Wanem nao yumi lanem aot wei blong hem? ?Wanem nao yu save mekem naoia blong rere from ol taem olsem we bae oli jalenjem bilif blong yu?
Luk tu long “Answering Gospel Questions,” Gospel Topics, topics.ChurchofJesusChrist.org; Jeffrey R. Holland, “The Cost—and Blessings—of Discipleship,” Ensign o Liahona, May 2014, 6–9.
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:
Jekob 5
Sam famli oli bin faenem se i help blong droem ol simbol blong stori olsem parabol blong ol olif tri, taem oli bin stap ridim stori ia. Famli blong yu i save kam blong laekem wei ia, o i save gat wan nara wei we yu save helpem ol memba blong famli blong luk pikja blong ol simbol ia insaed long stori ia olsem parabol. Mebi yu save makem wan eria long wan tebol o floa blong ripresentem plantesen ia (o wol) mo ripresentem gudfala olif tri (o haos blong Isrel) wetem wan samting, olsem wan pasol, we oli save seraotem long ol pisis (blong ripresentem seraot blong Isrel), mo afta, oli tekem ol pisis ia oli kambak tugeta (blong ripresentem kam tugeta blong Isrel). ?Wanem nao stori ia olsem parabol i stap tijim yumi abaot Lod? ?Mo abaot ol wokman blong Hem?
Jekob 5:70–77
Taem yu stap ridim abaot “las taem” ia we Lod i stap wok long plantesen blong Hem, ?wanem nao i givim insperesen long yu mo long famli blong yu blong wok blong Lod “wetem evri paoa blong bodi blong yu”? (Jekob 5:71). Yu save invaetem ol memba blong famli blong yu blong mekem ves 75 i kam long yuwan taem yu ademap nem blong famli blong yu long ves ia—eksampol: “Yu [nem] yu kasem blesing.” Mebi oli save serem ol eksperiens we oli bin filim glad taem oli bin stap wok blong Lod blong plantesen; eksampol taem we oli bin stap serem gospel, stap givim seves long tempol, mo mekem ol memba blong Jos oli kam strong moa. (Luk tu long M. Russell Ballard, “Put Your Trust in the Lord,” Ensign o Liahona, Nov. 2013, 43–45.)
Jekob 6:4-7
?Olsem wanem nao Lod i sakem han blong sore blong Hem i kam long yumi? ?Toktok ia “stap tru” i minim wanem long ol ves ia? ?Olsem wanem nao i bin tru long yumi? ?Olsem wanem nao yumi save stap tru long Hem?
Jekob 7:1–12
?Wanem nao yumi lanem aot long ol ves ia abaot ol pipol we oli stap traem blong lidim ol narafala man oli go long rong rod? ?Olsem wanem yumi save folem eksampol blong Jekob mo stap strong long bilif blong yumi long Kraes?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Stap Kam Antap long Fasin blong Yumi blong Stap Tij
Lanem wan skripja baehat Jusum wan skripja we i gat bigfala mining long famli blong yu, mo lanem skripja ia baehat tugeta. Elda Richard G. Scott i tijim: “Wan skripja we yu lanem baehat i wan fren we i stap strong wetem yu, we i no kam slak wetem taem” (“The Power of Scripture,” Ensign o Liahona, Nov. 2011, 6).