Bae I Tekem Han blong Yu, I Lidim Yu, i kam long Sandra Rast

24 Febwari–1 Maj

2 Nifae 26–30

“Wan Gudfala Wok mo Wan Sapraes”

Lod i talem: “Mi givim oda long evri man, … se bae oli raetem ol toktok we mi talem long olgeta” (2 Nifae 29:11). Tru long Spirit, Lod bae i toktok long yu taem yu stap stadi long toktok blong Hem. Raetemdaon wanem we yu kasem.

Raetemdaon Ol Filing mo Tingting blong Yu

“Mi talemaot profesi long yufala long saed blong ol las dei,” Nifae i bin raetem (2 Nifae 26:14). Long nara toktok, hem i bin stap raet abaot taem blong yumi tedei. Mo i gud yumi tingting o wari long wanem hem i bin luk: ol pipol we oli tanem baksaed long paoa mo ol merikel we oli kam long God, fasin blong stap jalus mo stap long trabol we i kam bigwan, devel we i fasem ol pipol wetem ol strong rop. Bae antap long ol “wok blong tudak” blong ol las dei ia (2 Nifae 26:10, 22) we enemi i stap lidim, Nifae i bin tokbaot tu “wan gudfala wok mo wan sapraes” we Lod Hemwan i stap lidim (2 Nifae 27:26). Long medel blong wok ia, bae i gat wan buk—wan buk we i stap long das, i toktok i kam antap, i talemaot klia ol giaman blong Setan, mo buk ia bae i pulum ol stet mo gud pipol oli kam tugeta wan ples, i stap olsem wan saen. Buk ia, hem i Buk blong Momon, gudfala wok ia i wok blong jos blong Lod long ol las dei ia, mo sapraes ia, i we Hem i stap invaetem yumi evriwan, i nomata wiknes blong yumi, blong yumi tekpat long wok ia.

Sam Aedia blong Skripja Stadi blong Yuwan

2 Nifae 26:20–33

Jisas Kraes i stap invaetem evriwan blong kam long Hem.

Profet Josef Smit i bin tijim se Papa long Heven i “no gat limit nating long hamas sore mo blesing Hem i givim long yumi i bitim we yumi rere blong biliv o kasem samting long Hem” (The Joseph Smith Papers, “History, 1838–1856, volume D-1,” p. 4 [addenda], josephsmithpapers.org). Ridim wanem we Nifae i bin luk finis long 2 Nifae 26:20–22 mo wanem nao hem i tijim abaot Sevya long ol ves 23–33, mo komperem hemia long toktok we i kam long Josef Smit. ?Wanem nao yu lanem abaot sore blong Lod, sore ia we i no gat limit? ?Wanem nao yu save mekem olsem wan memba blong Jos blong Jisas Kraes blong yu kam moa olsem Kraes long fasin blong yu blong tritim ol pikinini blong God?

Luk tu long 3 Nifae 18:30–32.

2 Nifae 26–27

?Wanem nao buk ia we oli tokbaot long ol japta ia?

Profesi blong Nifae long 2 Nifae 26–27, we i kamaot bigwan long wan profesi we Aesea i bin mekem bifo (luk long Aesea 29), i talem finis se bae Buk blong Momon i kamaot. Profesi ia i tokbaot olgeta samting ia:

• Ol toktok blong laen blong Lihae (laen blong hem we i kam afta hem) i stap toktok “daon aot long das” wetem “spirit blong wan dedman” mo oli “silim insaed long wan buk” (2 Nifae 26:14–17; luk tu long Aesea 29:4).

• Wan pat blong buk ia, oli bin givim long wan man we i talem se: “Mi no save ridim buk ia” (2 Nifae 27:15–20; Josef Smit—Histri 1:64–65; luk tu long Aesea 29:11).

Antap long Aesea, ol nara profet blong Baebol oli tokbaot Buk blong Momon, i nomata we oli no talemaot nem blong hem. Eksampol: Esikel 37:15–20 i tokbaot wan “stik blong Josef” we i save tokbaot histri blong Ol Man blong Nifae, we oli kamaot long laen blong Josef. Histri ia, bae i kam wan wetem “stik blong Juda,” we i minim Baebol.

Ol nara eksampol, oli save faenem long Gaed long Ol Skripja, “Buk blong Momon” (scriptures.ChurchofJesusChrist.org).

2 Nifae 28

Setan i wantem blong giaman long man.

Plante long ol giaman mo trik blong Setan oli kamaot long klia ples long ples we Nifae i tokbaot ol las dei insaed long 2 Nifae 28. Traem luk sapos yu save faenem olgeta (eksampol, luk long ol ves 6, 8, 21–23, 29). ?From wanem nao yu nid blong save abaot ol giaman blong Setan?” ?Wanem nao bae yu mekem taem enemi bae i traem blong giaman long yu?

2 Nifae 28:27–31; 29

God i stap gohed blong givim revelesen blong lidim ol pikinini blong Hem.

Olsem ol Lata-dei Sent, yumi gat blesing ia blong gat fulap samting aot long toktok blong God, mekem se ol woning we Nifae i givim, oli blong yumi tu: !yumi neva mas filim se “yumi gat inaf! Taem yu stap ridim ol woning insaed long 2 Nifae 28 mo 29, tingting hevi long ol kwestin olsem ia:

• ?Olsem wanem nao Lod i wantem mi filim abaot toktok blong Hem? mo ?Olsem wanem Hem i wantem mi mekem wetem toktok blong Hem?

• ?From wanem nao, samtaem, ol pipol oli “kros” blong stap kasem moa trutok we i kam long God? (2 Nifae 28:28). ?Mi mi filim olsem? Sapos i olsem, hao nao mi save kam blong save akseptem moa trutok?

• ?Hem i minim wanem blong akseptem toktok blong God? ?Olsem wanem nao mi soem se mi wantem kasem moa toktok blong Hem?

Luk tu long Alma 12:10–11; 3 Nifae 26:6–10.

2 Nifae 29–30

God i bin mekem rere Buk blong Momon blong taem blong yumi tedei.

Nifae i bin save, tru long revelesen, iven bifo we oli bin raetem fulwan Buk blong Momon se, wan dei, bae buk ia “bae i gat bigfala yus long ol pikinini blong ol man” (2 Nifae 28:2). ?From wanem Buk blong Momon i gat bigfala yus long yu? Tingbaot kwestin ia taem yu stap ridim 2 Nifae 29–30. ?Wanem sam long ol “gudfala” wok we God i stap mekem long wol mo insaed long laef blong yu tru long Buk blong Momon?

Sam Aedia blong Famli Skripja Stadi mo Famli Haos Naet

Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:

2 Nifae 26:12–13

Nifae i tijim se Jisas Kraes i soemaot Hemwan tru long Tabu Spirit. ?Wanem eksperiens nao ol memba blong famli blong yu oli save serem wetem wanwan long olgeta we i tokbaot olsem wanem testemoni blong olgeta abaot Sevya i bin kam strong moa tru long Tabu Spirit?

2 Nifae 26:22; 28:19–22

Mebi famli blong yu bae i glad blong gat wan lesen we i yusum wan samting blong soem wanem 2 Nifae 26:22 i stap tijim abaot devel. Taem yu stap rid abaot ol trik blong Setan long 2 Nifae 28:19–22, yu save fasin sam tred raon long han blong wan, blong ripresentem “wan sofsof rop.” ?Olsem wanem nao wan sofsof rop i olsem ol temtesen blong Setan? ?Olsem wanem nao i kam wan strong rop? ?Olsem wanem nao yumi luksave ol giaman blong Setan?

Nifae i komperem ol temtesen blong devel long wan “sofsof rop.”

2 Nifae 27:20–21

?Wanem nao Lod i stap minim taem Hem i talem: “Mi mi save mekem wok blong mi”? ?Olsem wanem trutok ia i lidim tingting blong yumi long fasin we yumi stap givim seves insaed long Jos blong Hem?

2 Nifae 28:30–31

?Famli blong yu i save tingting long wan samting we, olsem revelesen we i kam long God, i moa gud blong kasem smosmol nomo long wan taem? ?From wanem God i soemaot trutok long yumi, “tijing folem tijing, rul folem rul smol long ples ia mo smol longwe,” be i no evriwan long wan taem nomo?

2 Nifae 29:7–9

?Wanem nao Lod i wantem pruvum o soemaot wetem Buk blong Momon?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Stap Kam Antap long Stadi blong Yuwan

Serem sam niu tingting. Toktok raon wetem ol narawan long wanem yu bin lanem we i save mekem andastaning blong yu i kam strong moa. Afta we yu ridim 2 Nifae 29:6–14, yu save filim insperesen blong eksplenem long wan fren from wanem yumi nidim Buk blong Momon.

Ol raeting blong Nifae oli tokbaot finis “wan gudfala wok mo wan sapraes” we bae i tekem ples long ol las dei (2 Nifae 27:26).