“9–15 Maj. Jekob 1–4: ‘Yufala I Stretem Yufala wetem God tru long Atonmen blong Kraes’” Kam Folem Mi—Blong Wanwan Man, Woman mo Famli: Buk blong Momon 2020 (2020)
“9–15 Maj. Jekob 1–4,” Kam Folem Mi—Blong Wanwan Man, Woman mo Famli: 2020
Mi Fogivim Yu, i kam long Greg K. Olsen
9-15 Maj
Jekob 1–4
Yufala I Stretem Yufala wetem God tru long Atonmen blong Kraes
Taem yu raetemdaon ol tingting mo filing we i kam long Spirit, yu stap soem se yu wantem blong Tabu Spirit i stap tijim yu. Taem yu stap ridim Mosaea 1-4, tingting abaot ol pipol we yu stap tijim olgeta.
Raetemdaon Ol Filing mo Tingting blong Yu
Ol Man blong Nifae oli bin tekem se Nifae i “bigfala man we i stap lukaotem gud olgeta” (Jekob 1:10). Nifae i bin difendem olgeta agensem ol atak we oli kam long enemi blong olgeta, mo hem i bin wonem olgeta abaot ol denja long saed blong spirit. Naoia, hem i go finis, mo wok ia blong lidim Ol Man blong Nifae long saed blong spirit, i foldaon long Jekob, we Nifae i bin konsekretem hem i kam wan pris mo wan tija blong ol pipol (luk long Jekob 1:18). Tru long insperesen, Jekob i bin faenem se ol pipol blong hem, oli nidim blong oli tijim olgeta wetem “ol strong tok,” from se oli bin “stat blong wok long sin” (Jekob 2:7, 5). Olgeta sin ia, oli bin semmak long wanem ol pipol tedei oli bin traehad wetem: lav blong ol rij samting, mo fasin blong no stap klin long saed blong seks. Be yet, nomata we Jekob i bin filim se hem i mas panisim fasin nogud ia, hat blong hem i brok, i harem i soa long olgeta ia we hat blong olgeta, fasin nogud “i stikim ol hat ia, i givim ol dip kil.” (Jekob 2:35). Jekob i bin testifae se hiling long tufala grup ia—olgeta we oli mekem sin, mo olgeta we oli kasem kil long saed blong spirit—hiling ia i kam long Sevya Jisas Kraes. Mesej blong Jekob, semmak olsem mesej blong Nifae we i bin stap fastaem long hem, i blong singaotem olgeta blong oli “stretem [olgeta] wetem [God] tru long atonmen blong Kraes” (Jekob 4:11).
Sam Aedia blong Skripja Stadi blong Yuwan
Lod i wantem mi blong mi wok bigwan long koling blong mi.
Long Jekob, blong stap tijim toktok blong God, i moa bitim wan wok we i kam long brata blong hem—hem i wan “wok we i kam long Lod,” mekem se hem i bin wok wetem strong tingting blong “givim ona mo wok strong insaed long ofis [blong hem]” (Jekob 1:17, 19). Presiden Gordon B. Hinckley i bin tijim se yumi givim ona mo wok strong long ol koling blong yumi “taem yumi givim seves wetem strong tingting, taem yumi stap tij wetem fet mo testemoni, taem we yumi leftemap mo mekem i kam strong moa, mo bildimap strong tingting blong stret mo gud fasin insaed long laef blong olgeta we yumi tajem hat blong olgeta” (“Magnify Your Calling,” Ensign, May 1989, 47). Tingting long ol “wok [blong yu] we oli kam long Lod” taem yu stap ridim Jekob 1:6–8, 15–19 mo 2:1–11. ?From wanem Jekob i bin fetful blong wok o givim seves? ?Eksampol ia blong hem i givim wanem insperesen long yu blong mekem blong givim ona mo wok strong long koling blong yu long Jos, mo long ol responsabiliti blong yu long hom?
Luk tu long “Rise to Your Call” (video, ChurchofJesusChrist.org).
Lod i laekem taem man i stap klin long saed blong seks.
Sin i gat ol risal blong hem long laef blong ol man, woman mo long ol sosaeti. Taem hem i stap tokbaot ol sin long saed blong seks, Jekob i givim woning long saed blong tufala samting ia we i kam afta. Taem yu ridim Jekob 2:31–35 mo 3:10, lukaotem ol wei we nogud tingting long saed blong seks i bin stap spolem Ol Man blong Nifae olsem wan pipol, mo i bin stap spolem wanwan man mo woman. ?Olsem wanem ol wei ia oli semmak long ol risal blong fasin blong gat nogud tingting long saed blong seks we yumi save luk tedei? ?Wanem nao yu faenem long ol toktok blong Jekob we oli save helpem yu blong tijim wan we yu lavem abaot hamas jastiti i impoten? ?Yu yu bin gat blesing from se yu bin traehad bigwan blong stap klin long saed blong seks?
Luk gud we Jekob tu i bin lukluk long praktis ia blong stap gat moa bitim wan waef. ?Wanem nao yu faenem insaed long Jekob 2:23–30 we i stap helpem yu blong andastanem from wanem, Lod, long sam situesen, mo blong smol taem nomo, i bin givim oda long ol pipol blong hem blong praktisim fasin blong gat fulap waef? ?Olsem wanem nao God i filim abaot olgeta we oli mekem olsem we Hem i no givim raet long olgeta?
Mi save stretem miwan wetem God tru long Atonmen blong Jisas Kraes.
Jekob i plis long ol pipol blong hem blong oli “stretem olgeta wetem God tru long atonmen blong Kraes” (Jekob 4:11). ?Yu yu ting se hemia i minim wanem? ?Bae i help blong lukluk i go long toktok ia stretem long wan diksonari? Maet yu save faenem ol toktok o ol sentens long japta ia we i talem long yu olsem wanem blong kam long Kraes blong yu save stretem yu wetem God. Eksampol, Jekob i tijim se loa blong Moses, long wan taem, God i bin givim blong poenem ol pipol i go long Jisas Kraes (luk long Jekob 4:5). ?God i bin givim wanem long yu blong poenem rod long yu i go long Kraes? ?Yu yu stap yusum olgeta samting ia blong kam kolosap moa long God?
Luk tu long 2 Nifae 10:24.
Mi save stap longwe long fasin blong stap blaen long saed blong spirit taem mi lukluk nomo i go long Sevya.
Taem we Jekob i bin wantem blong tanem ol pipol blong hem oli go fulwan long Lod, hem i bin givim ol woning long olgeta se bae oli no mas blaen long saed blong spirit, mo oli no mas ting nating long “ol klia toktok” blong gospel (luk long Jekob 4:13–14). Elda Quentin L. Cook i bin givim woning long ol semmak problem long taem blong yumi tedei: “I gat fasin i stap tedei, long medel blong sam long yumi, blong stap ‘lukluk i go i bitim mak ia,’ be oli no holemtaet wan testemoni abaot ol besik samting blong gospel. Yumi mekem hemia taem yumi riplesem ol bigfala tingting blong ol man wetem ol trutok blong gospel, taem yumi folem gospel we i go tumas, … yumi leftemap ol rul i go antap ova long doktrin. Taem yumi stap longwe long ol kaen fasin olsem, bae i helpem yumi blong stap longwe blong stap blaen wetem ol tingting blong man, mo blong stap kikim ston olsem we Jekob i bin tokbaot” (“Looking beyond the Mark,” Ensign, Maj 2003, 42).
Folem wanem i stap long Jekob 4:8–18, wanem nao yumi save mekem blong lukluk nomo long Sevya mo stap longwe blong stap blaen long saed blong spirit?
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:
Jekob 1:6–8, 15–19; 2:1–11; 4:18
?Wanem toktok o sentens nao long ol ves ia oli talemaot gud lav we Jekob i gat long olgeta we hem i stap lidim olgeta? ?Wanem nao ol lida blong Jos oli bin mekem blong helpem yumi blong filim se oli “tingting we i moa strong, mo moa wari from gudfala laef blong sol blong [yumi]”? (Jekob 2:3). Maet ol memba blong famli oli save serem ol defren wei we yumi save sastenem ol Lida blong yumi blong Jos. Yu save mekem plan blong mekem wan samting olsem wan famli blong ol lokol lida blong Jos; olsem blong raetem ol not blong talem tangkyu from seves blong olgeta, o blong tingbaot olgeta mo famli blong olgeta long prea blong olgeta.
Jekob 2:8
?Olsem wanem nao toktok blong God i hilim “sol we i gat soa”?
Jekob 2:12–21
?Wanem nao ol ves ia oli stap tij abaot wei we yumi sapos blong luk fasin blong kam rij long ol samting blong laef long wol ia? ?Wanem nao yumi stap mekem blong go aot long ol narawan we oli nidim help blong yumi?
Jekob 3:1–2
?Hem i minim wanem blong stap “klin long hat” mo “lukluk long God wetem strong tingting”?
Jekob 4:4–11
Wan wei blong helpem famli blong yu blong andastanem wanem i minim blong “no seksek” long bilif blong olgeta, i blong yu faenem wan bigfala tri we i stap kolosap mo askem ol memba blong famli blong seksek wanwan branj blong hem. Afta, letem olgeta oli traem blong seksekem stamba blong hem. ?From wanem i had moa blong seksekem stamba blong hem? ?Wanem nao yumi save lanem aot long ol tijing blong Jekob long saed blong fasin blong developem wan fet we i “no seksek”?
Semmak olsem stamba blong wan tri, fet blong yumi long Kraes i save kam we oli “no save seksekem.”
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Stap Kam Antap long Stadi blong Yuwan
Lisin long Spirit Taem yu stap stadi, luklukgud long ol tingting mo filing blong yu (luk long D&K 8:2–3), iven sapos yu luk se i no wetem wanem we yu stap ridim. Olgeta tingting mo filing ia, maet oli ol stret samting ia we God i wantem yu blong save mo mekem.
Bae Mi Sendem Toktok blong Olgeta I Go (Jekob we i Tija), i kam long Elspeth Caitlin Young