“23–29 Maj. Inos–Ol Toktok blong Momon: Hem I Wok Tru long Mi blong Mekem Samting we Hem I Wantem,” Kam Folem Mi—Blong Wanwan Man, Woman mo Famli: Buk blong Momon 2020 (2020)
“23–29 Maj. Inos–Ol Toktok blong Momon,” Kam Folem Mi—Blong Wanwan Man, Woman mo Famli: 2020
Jekob mo Inos, i kam long Scott Snow
23–29 Maj
Inos–Ol Toktok blong Momon
Hem I Wok Tru long Mi blong Mekem Samting we Hem I Wantem
Taem yu stap ridim Inos i go kasem Ol Toktok blong Momon, lukaotem ol mesej we oli gat valiu long yu mo long famli blong yu.
Raetemdaon Ol Filing mo Tingting blong Yu
Inos i go long dakbus blong kilim ol animol, be hem i go mo i bin prea “long ful dei … mo [kasem] taem we naet i bin kam (Inos 1:3–4). From se sol blong hem i hanggri tru blong kam klin aot long ol sin blong hem, Inos i bin glad blong prea i go kasem wetaem we i nid from, mo iven blong “traehad” long fored blong God (Inos 1:2). Ples ia nao tru prea i stap long hem: i no blong stap askem eni samting nomo we yumi wantem, be blong traem, wetem tru tingting, blong toktok wetem God, mo blong stretem tingting blong yumi i laen stret wetem tingting blong Hem. Taem yu prea olsem ia, taem voes blong yu “i kasem ol heven,” bae yu faenem olsem we Inos i faenem, se God i stap harem yu, mo Hem kea tru abaot yu, olgeta we yu lavem, mo iven ol enemi blong yu (luk long Inos 1:4–17). Long ol taem ia, God i save mekem yu save tingting blong Hem, mo bambae yu glad moa blong mekem samting, mo bae yu save mekem tingting blong Hem from se yu yu joen gud wetem Hem. Olsem Momon, bae yu “no save evri samting; be Lod i save evri samting we bae i kam; taswe, hem i wok tru long [yu] blong mekem samting we hem i wantem” (Ol Toktok blong Momon 1:7).
Sam Aedia blong Skripja Stadi blong Yuwan
Ol toktok blong wan papa o mama i save lidim tingting blong pikinini blong hem, blong taem we i no save finis.
?Wanem mesej ol ves ia oli gat blong talem long ol papa, mama mo ol pikinini?
Prea we i kam long hat blong mi, bambae God i ansarem olgeta.
Eksperiens blong Inos wetem prea, i wan we yumi save rimemba gud long ol skripja. Ol eksperiens blong yu, maet oli no bigwan olsem ia, be i no minim se oli no gat bigfala mining. Ol eksperiens blong Inos oli save talemaot sam wei blong kam antap long fasin blong yumi blong prea. Hemia samfala kwestin blong tingting long hem:
-
?Wanem toktok nao i tokbaot ol traehad blong Inos taem hem i bin stap prea?
-
?Wanem nao Inos i bin prea from fastaem? (luk long Inos 1:4). ?Wanem nao yu save lanem aot long wanem Inos i bin mekem afta we hem i bin kasem wan ansa? (luk long Inos 1:5–7).
-
?Hao nao Inos i tekem aksen folem ol ansa we hem i bin kasem?
-
?Wanem yumi save lanem aot long Inos abaot wei blong gat wan fet we “i no seksek” long Lod? (Inos 1:11).
Lod bambae i blesem mi taem mi stap obei long ol komanmen.
Wan long ol promes blong God we oli ripripitim insaed long Buk blong Momon, i we, sapos Ol Man blong Nifae oli obei ol komanmen, bambae oli kam antap (luk long 2 Nifae 1:20; Jerom 1:9–12; Omnae 1:6). Ol buk blong Jerom mo Omnae oli soem samfala wei we promes ia i bin kamtru. ?Wanem yumi stap lanem aot long ol stori ia we i save helpem yu blong “kam antap gud long graon”?
?Huia nao ol pipol blong Sarahemla?
Afta we Ol Man blong Nifae oli bin ronwe aot long graon blong Nifae, oli bin faenem samfala pipol we oli bin stap long wan ples, we nem blong hem i Sarahemla. Ol pipol blong Sarahemla, oli laen blong wan grup blong Ol Man Isrel, we, olsem famli blong Lihae, oli bin aot long Jerusalem, mo God i bin lidim olgeta i go long wan graon blong promes. Long medel blong grup ia, i gat Myulek, wan long ol boe blong Sedekaea, king blong Juda we Ol Man Babilonia oli bin holemtaet hem prisena samples long 587 B.K.B. (luk long Jeremaea 52:1–11; Mosaea 25:2; Hileman 8:21).
Afta we ol pipol blong Sarahemla oli bin kasem graon blong promes, oli bin mit wetem Koriantuma (luk long Omnae 1:21), las man we i laef aot long Ol Man blong Jared, we stori blong hem, oli tokbaot long buk blong Ita.
?Wanem hem i Ol Toktok blong Momon?
Ol Toktok blong Momon i stap olsem wan brij bitwin tufala buk ia we i stap long Buk blong Momon. Long ples ia, Momon i eksplenem tufala histri ia, mo ol toktok blong hem oli tijim wan impoten mesej abaot fasin blong trastem Lod, iven taem yumi no andastan fulwan daereksen we Hem i givim long yumi.
Taem we Nifae i bin stap raetem histri blong ol pipol blong hem, God i bin lidim hem blong krietem tufala buk ia, we oli singaotem ol smol buk mo ol bigfala buk blong Nifae. Nifae i no bin save from wanem God i bin askem hem blong mekem tufala buk ia, be hem i bin trastem se Lod i gat wan “waes stamba tingting … , we waes stamba tingting ia, mi no save” (1 Nifae 9:5; luk tu long “Wan Sot Toktok abaot Buk blong Momon”).
Plante handred yia afta, taem Momon i bin stap raetemsot ol bigfala buk ia blong Nifae, hem i bin kam krosem ol smol buk. Ol smol buk ia, oli tokbaot ol semfala samting we i bin hapen, we oli tokbaot insaed long ol bigfala buk we Momon i bin raetem sot nomo, be ol smol buk oli lukluk moa long ol samting long saed blong spirit, mo seves mo tijing blong ol profet. God i bin givim insperesen long Momon blong putum ol smol buk blong Nifae insaed long histri blong hem, antap long ol bigfala buk ia. Olsem Nifae, Momon i no bin andastanem stamba tingting blong God blong gat tufala buk ia, be hem i bin trastem se hem i blong wan “waes stamba tingting” (Ol Toktok blong Momon 1:7).
Tedei, yumi save wanem nao hem i bin stamba tingting blong God. Long 1828, afta we Josef Smit i bin transletem pat blong toktok blong bigfala buk blong Nifae, we Momon i bin raetem i kam sot, (116 pej we oli raetem long han)we Martin Haris i bin lusum ol pej ia. God i bin givim oda long Josef blong i no transletem bakegen pat ia, from se ol rabis man bae oli jenisim ol toktok mo traem blong talem nogud nem blong Josef (luk long D&K 10, heding seksen; D&K 10:14–19, 30–45). Tangkyu tumas. God i bin luk hemia finis, mo i bin putum ol smol buk oli stap, we i kavremap sem histri ia we i bin lus wetem ol 116 pej Ol smol buk ia, insaed long hem i gat ol buk we oli kam long Ol Toktok blong Momon, mo ol raeting blong ol bigfala buk we Momon i raetem sot, oli stat afta long Ol Toktok blong Momon.
Momon I Stap Putum Tugeta Ol Buk, i kam long Jorge Cocco
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:
Inos 1:1–17
Famli blong yu i save lukluk long wan pikja blong Inos we hem mi stap prea mo lukaotem long Inos 1:1–17 ol sentens ia we oli save yusum olsem wan taetol blong wan sentens. ?Yu save askem tu long ol memba blong famli blong droem ol pikja blong eksperiens blong Inos. ?Wanem nao yumi lanem aot long Inos abaot fasin blong askem fogivnes?
Jerom 1:2
?Olsem wanem nao stadi blong yu long Buk blong Momon, i “soemaot plan blong fasin blong sevem man” long yumi?
Omnae 1:12–22
?Wanem nao ol ves ia oli stap tijim yumi abaot hamas i impoten blong gat toktok blong God insaed long laef blong yumi?
Ol Toktok blong Momon 1:3–9
?Olsem wanem nao bambae yumi kasem moa blesing taem yumi stap raetem ol histri blong yumiwan mo blong famli? ?Olsem wanem nao yumi save mekem ol histri blong yumi oli lukluk moa long Kraes?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Stap Kam Antap long Fasin blong Yumi blong Stap Tij
Kam tugeta plante taem. Presiden Henry B. Eyring i tijim: “Neva mestem wan janis blong pulum tugeta ol pikinini blong oli lanem doktrin blong Jisas Kraes. Ol kaen taem olsem, oli no hapen fulap taem komperem long ol traehad blong enemi” (“The Power of Teaching Doctrine,” Ensign, May 1999, 74).
Inos I Stap Prea i kam long Robert T. Barrett