“30 Maj–12 Epril. Ista: ‘Bae Hem I Girap long Ded, wetem Paoa blong Hiling long Ol Wing blong Hem’” Kam Folem Mi—Blong Wanwan Man, Woman mo Famli: Buk blong Momon 2020 (2020)
“30 Maj–12 Epril. Ista,” Kam Folem Mi—Blong Wanwan Man, Woman mo Famli: 2020
Kraes mo Olgeta Aposol, we i kam long Del Parson
30 Maj–12 Epril
Ista
“Bae Hem I Girap long Ded, wetem Paoa blong Hiling long Ol Wing blong Hem”
Long ol dei we i stap go from Ista Sandei, tingting blong lukluk nomo long stadi blong yuwan mo famli skripja stadi blong Buk blong Momon abaot strong testemoni abaot laef, ded, Laef bakegen long Ded blong Jisas Kraes, mo paoa we i pem praes from man, we Jisas Kraes i bin pem.
Raetemdaon Ol Filing mo Tingting blong Yu
Ol Aposol blong bifo, oli bin tok stret long testemoni blong olgeta abaot Jisas Kraes mo Laef Bakegen long Ded blong Hem. Plante milian oli biliv long Jisas Kraes, mo oli traehad blong folem Hem from se ol toktok blong Hem, oli raetemdaon insaed long Baebol. Yet, sam oli save askem olgetawan sapos Jisas Kraes i Sevya blong ful wol, mo afta, ?from wanem ol witnes blong Hem, oli smol nomo we oli stap long wan smol pat blong wol nomo?
Buk blong Momon i stap olsem wan nara witnes we i save winim tingting blong ol man se Jisas Kraes, Hem i Sevya blong wol, “we Hem i stap soemaot Hem long evri nesen” (taetol pej blong Buk blong Momon) mo i stap givim wan fasin blong sevem man long evriwan we bae oli kam long Hem. Antap long hemia, seken witnes ia i mekem i klia se wanem ia, fasin blong sevem man. Hemia nao from wanem Nifae, Jekob, Momon, mo evri profet oli bin wok blong “wok strong wetem strong tingting blong raetem ol toktok ia long ol buk”—blong talem long ol fiuja jeneresen se, olgeta tu, “oli … bin save long Kraes, mo [oli] bin gat wan hop blong glori blong hem” (Jekob 4:3–4). Long Ista taem ia, tingting bak long ol testemoni insaed long Buk blong Momon, se paoa blong Atonmen blong Kraes i blong wol ia, mo i blong yuwan—i pemaot ful wol, mo i pemaot yu.
Sam Aedia blong Skripja Stadi blong Yuwan
2 Nifae 9:6–15, 22; Alma 11:41–45; 40:21–23; 3 Nifae 26:4–5
From laef bakegen long ded blong Jisas Kraes, evri pipol bambae oli laef bakegen long ded.
Hem i wan tradisen, long Ista, blong tingting hevi long Laef Bakegen long Ded blong Jisas Kraes; ?be hem i minim wanem stret blong laef bakegen long ded? ?Wanem niu lukluk nao Buk blong Momon i givim abaot laef bakegen long ded? Maet olsem pat blong yu tingting long Ista long yia ia, yu save raetemdaon ol trutok abaot laef bakegen long ded, we yu save faenem long 2 Nifae 9:6–15, 22; Alma 11:41–45; 40:21–23; mo 3 Nifae 26:4–5. Yu save raetemdaon tu from wanem yu ting se hem i impoten blong save wanwan long ol trutok ia.
Maet yu luk se ol trutok abaot laef bakegen long ded, plante taem, oli tijim wetem ol trutok abaot Las Jajmen. Tingting hevi long wanem hemia i tijim yu abaot hamas Laef Bakegen long Ded i impoten insaed long plan blong fasin blong sevem man.
Luk tu long Luk 24:36–43; Ol Wok 24:15; 1 Korin 15:12–23.
Mosaea 3:7; 15:5–9; Alma 7:11–13
Jisas Kraes i tekem long Hemwan ol sin blong mi, ol sobodi blong mi, mo ol samting we mi slak long olgeta.
Baebol i tijim klia se Jisas Kraes i bin pem praes from ol sing blong yumi. Be, Buk blong Momon, i talem moa mekem se yumi andastanem moa abaot sakrifaes blong Kraes mo ol safaring blong Hem, long wan wei we i moa impoten. Yu save faenem samfala long ol tijing ia long Mosaea 3:7; 15:5–9; mo Alma 7:11–13 Afta we yu ridim ol skripja ia, tingting blong raetemdaon wanem yu bin faenem, i go long wan jat olsem hemia:
|
?Sevya i bin safa long wanem? |
?From wanem Hem i bin safa? |
?Hemia i minim wanem long mi? |
|---|---|---|
?Sevya i bin safa long wanem? | ?From wanem Hem i bin safa? | ?Hemia i minim wanem long mi? |
Luk tu long Aesea 53; Hibrus 4:14–16.
Getsemane, i kam long Michael T. Malm
Mosaea 5:1–2; 27:8–28; Alma 15:3–12; 24:7–19
Atonmen blong Jisas Kraes i save klinim mi, mo i helpem mi blong kam stret evriwan.
Oli save talem se Buk blong Momon i wan bigfala stori blong ol pipol we oli bin jenis from Atonmen blong Jisas Kraes. I tru we, sam long ol pipol we oli mekem ol bigfala sin, mo oli bin ol enemi blong ol pipol blong God bifo paoa blong Sevya i bin wok insaed long olgeta mo mekem wan bigfala jenis i hapen folem fet blong olgeta long Hem. Yu save ridim sam long ol eksperiens ia long Mosaea 5:1–2; 27:8–28; mo Alma 15:3–12; 24:7–19; yu save tingting long sam nara eksampol blong stadi long olgeta tu. Long saed blong ol eksperiens ia, ?wanem nao yu luk se oli gat we oli semsemmak? ?Wanem samting we i defren we yu bin luk? ?Wanem nao ol stori ia oli stap tijim yu abaot wei we Atonmen blong Sevya i save jenisim yu?
Luk tu long Alma 5:6–14; 13:11–12; 18; 19:1–16; 22:1–26; 36:16–21; Ita 12:27; Moronae 10:32–33.
Sam Aedia blong Famli Skripja Stadi mo Famli Haos Naet
Taem yu stap selebretem Ista wetem famli blong yu, lukaotem samfala wei blong lanem tugeta abaot Sevya mo Atonmen blong Hem, wetem Laef Bakegen long ded. Hemia samfala tingting:
3 Nifae 11; 17
Sam famli oli bin faenem se blong stap stadi long stori blong Sevya we i bin laef bakegen long ded, mo i visitim Ol Amerika, i wan mining long olgeta long taem blong Ista. Leftemap tingting blong ol memba blong famli blong traem tingting se bae i olsem wanem blong save filim ol kil blong bodi blong Hem (luk long 3 Nifae 11:14–15) o blong stap wan long ol pikinini ia we Hem i bin blesem (luk long 3 Nifae 17:21). ?Olsem wanem stori ia i mekem yumi talem tangkyu bigwan moa from Laef Bakegen long Ded blong Sevya? Wan peinting we i stap soem stori ia i kam wetem aotlaen ia; i gat sam moa we oli save faenem long ChurchofJesusChrist.org. Ol memba blong famli blong yu, maet bae oli laekem blong droem pikja blong olgeta long saed blong wanem we oli bin ridim finis.
Ol Mesej we oli kam long Jeneral Konfrens
Long plante pat blong wol, jeneral konfrens blong Epril blong yia ia i tekem ples long wiken bifo Ista. Maet blong lisin long ol mesej blong konfrens i save helpem famli blong yu blong lukluk long Sevya long Ista ia. Eksampol: yu save invaetem ol memba blong famli blong lisin long ol mesej blong konfrens we oli stap testifae abaot Jisas Kraes mo Laef Bakegen long Ded blong Hem—speseli ol testemoni blong ol Aposol, we oli ol spesel witnes blong Jisas Kraes. Afta, oli save luklukbak long ol mesej ia tugeta, mo faenemaot ol tijing we i save mekem ol testemoni blong yufala long saed blong Sevya oli kam strong moa.
“Kraes we I Laef: Testemoni blong Olgeta Aposol”
Olsem wan famli, ridim “Kraes we I Laef: Testemoni blong Olgeta Aposol” (Ensign o Liahona, May 2017, insaed long kova long fored; luk tu long ChurchofJesusChrist.org) mo invaetem wanwan memba blong famli blong jusum wan mesej blong Ista aot long testemoni blong hem blong serem wetem ol narawan. Eksampol: yu save krietem ol posta blong soem long sosol media, long fored blong doa blong yu, o long wan windo.
Videos: Special Witnesses of Christ
ChurchofJesusChrist.org mo long Gospel Laebri ap i gat plante vidio we oli singaotem Special Witnesses of Christ. Hem i tekem ol vidio blong wanwan memba blong Fas Presidensi mo Kworom blong Olgeta Twelef Aposol we oli stap testifae abaot Jisas Kraes. Famli blong yu i save lukluk wan o moa long wan long ol vidio ia, mo toktok raon long wanem oli stap tijim yumi abaot wanem Sevya i bin mekem long yumi.
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Stap Kam Antap long Fasin blong Yumi blong Stap Tij
Laef folem gospel blong Jisas Kraes. Impoten samting we yu save mekem olsem papa mo mama i blong laef folem gospel wetem ful hat blong yufala. Hemia i bes wei blong kwalifae blong gat Tabu Spirit olsem kompanion blong yu. Yu no nid blong yu stap stret evriwan, be jes wok strong wetem strong tingting blong mekem bes blong yu mo blong askem fogivnes tru long Atonmen blong Sevya. (Luk long Teaching in the Savior’s Way, 13–14.)
Pikja blong Kraes wetem Ol Man blong Nifae, i kam long Ben Sowards