“20–26 Epril. Mosaea 4–6: ‘Wan Bigfala Jenis’” Kam Folem Mi—Blong Wanwan Man, Woman mo Famli: Buk blong Momon 2020 (2020)
“20–26 Epril. Mosaea 4-6,” Kam Folem Mi—Blong Wanwan Man, Woman mo Famli: 2020
Stap Wok blong God blong Yu, i kam long Walter Rane
20–26 Epril
Mosaea 4–6
“Wan Bigfala Jenis”
Taem yu stap rid mo tingting hevi long Mosaea 4–6, lisin gud long ol kwaet toktok blong Tabu Spirit. ?Wanem gud samting nao yu filim insperesen blong go mekem? (luk long Mosaea 5:2).
Raetemdaon Ol Filing mo Tingting blong Yu
?Yu yu bin harem finis wan man i toktok mo yu filim insperesen blong jenisim laef blong yu? Maet yu bin disaed, from ol samting we yu bin harem finis, blong laef long wan wei we i defren smol—o i defren evriwan. Toktok blong King Benjamin i kaen toktok ia we man i harem mo jenisim laef, mo ol trutok we hem i bin tijim, oli mekem ol kaen jenis olsem nao long ol pipol we oli bin harem. King Benjamin i bin serem wetem ol pipol blong hem wanem we wan enjel i bin tijim hem— ol gudfala blesing oli posibol blong kam tru long “blad blong Kraes we i pem praes from ol sin blong yumi” (Mosaea 4:2). Mesej blong hem i bin jenisim fulwan olsem wanem oli bin stap lukluk olgetawan (luk long Mosaea 4:2), i jenisim wanem oli bin wantem (luk long Mosaea 5:2), mo i givim insperesen long olgeta blong kavenan wetem God, se oltaem bae oli mekem tingting blong Hem (luk long Mosaea 5:5). Olsem ia nao King Benjamin i bin stap tajem o jenisim laef blong ol pipol blong hem. ?Olsem wanem i tajem o jenisim laef blong yu?
Sam Aedia blong Skripja Stadi blong Yuwan
Tru long Jisas Kraes, mi save kasem mo mi save holemtaet fasin blong kam klin aot long ol sin.
Blong winim man we i folem fasin blong wol, hem i no wan isi samting. Hem i nidim plante traehad blong kam “wan sent tru long atonmen blong Kraes we i Lod” (Mosaea 3:19). Samtaem, iven taem yu filim se Hem i fogivim ol sin blong yu, yu stap traehad yet blong holemtaet filing ia mo stap long rod blong stret mo gud fasin. King Benjamin i tijim ol pipol blong hem blong mekem tugeta samting ia, kasem mo holemtaet fasin blong kam klin aot long ol sin, mo laef oltaem olsem wan sent. Taem yu stap stadi long japta 4 blong Mosaea, maet yu save askem yuwan ol kwestin olsem:
-
Ol Ves 1–12:?Fasin blong kam klin aot long ol sin i tekem wanem blesing i go long ol pipol blong King Benjamin? ?Wanem nao King Benjamin i bin tijim blong helpem olgeta blong holemtaet fasin blong kam klin aot long ol sin? ?Wanem nao hem i stap tijim abaot wei blong kasem fasin blong sevem man? Luk gud wanem we King Benjamin i talem se yumi “mas holemtaet long tingting oltaem” (ves 11). ?Wanem nao yumi filim insperesen blong go mekem blong tingbaot olgeta samting ia?
-
Ol Ves 12–16:Folem olgeta ves ia, ?wanem i stap hapen long laef blong yumi sapos yumi stap mekem olgeta samting we oli tokbaot insaed long ves 11? ?Yufala i bin eksperiensem ol jenis ia insaed long laef blong yufala? ?Olsem wanem oli go wetem ol jenis ia we oli tokbaot insaed long Mosaea 3:19?
-
Ol Ves 16–30:?Olsem wanem nao taem yumi stap serem samting we olgeta we oli pua, i stap helpem yumi blong holemtaet fasin blong kam klin aot long sin? ?Olsem wanem yu save yusum ves 27 mo praktisim hemia long ol traehad blong yu blong stap olsem Kraes?
Luk tu long David A. Bednar, “Holemtaet Oltaem Fasin blong Kam Klin Aot long Ol Sin blong Yufala,” Ensign o https://www.ChurchofJesusChrist.org/general-conference/2016/04/always-retain-a-remission-of-your-sins?lang=bis, Epril 2016; Dale G. Renlund, “Preserving the Heart’s Mighty Change,” Ensign o Liahona, Nov. 2009, 97–99.
Spirit blong Lod i save mekem wan bigfala jenis insaed long hat blong mi.
Hem i save hapen oltaem we oli pipol oli stap talem: “Mi no save jenis. Mi mi olsem nao.” Be long narasaed, eksperiens blong ol pipol blong King Benjamin i soem long yumi olsem wanem Spirit i save jenisim ol hat blong yumi long wan tru fasin. Presiden Russell M. Nelson i tijim: “Yumi save jenisim ol fasin blong yumi. Ol samting we yumi wantem tumas, oli save jenis. … Tru jenis long laef—jenis we i stap oltaem—i save kam nomo tru long paoa blong Atonmen blong Jisas Kraes we i save hilim man, klinim man, mo mekem man i save mekem samting. !Gospel blong Jisas Kraes i wan gospel we man i jenis!” (“Decisions for Eternity,” Ensign o Liahona, Nov. 2013, 108).
Taem yu stap rid abaot jenis ia we ol pipol blong King Benjamin oli go tru long hem, tingbaot hamas “bigfala jenis long hat” we i lidim man blong jenisim laef tru i bin hapen—o i save hapen—long laef blong yu. ?I bin gat samfala “bigfala” taem we i lidim hat blong yu blong i jenis, o jenis insaed long laef blong yu i bin hapen sloslo nomo?
Luk tu long Esikel 36:26–27; Alma 5:14; David A. Bednar, “Converted unto the Lord,” Ensign o Liahona, Nov. 2012, 106–9.
Sevya i save jenisim hat mo laef blong yumi. Ol Han blong Hilim Man, i kam long Adam Abram
Mi tekem long miwan nem blong Kraes taem mi mekem ol kavenan.
Wan risen we King Benjamin i wantem toktok long ol pipol blong hem, i bin blong “givim wan nem long ol pipol ia.” Sam oli bin Ol Man blong Nifae, mo ol narawan oli bin kamaot long laen blong Myulek, be hemia i no bin ol nem we i stap long tingting blong hem. Hem i bin invaetem ol pipol blong tekem long olgetawan “nem blong Kraes” olsem pat blong kavenan blong stap obei we oli bin mekem wetem God (Mosaea 1:11; 5:10). ?Wanem nao yu lanem aot long Mosaea 5:7–9 abaot mining blong tekem nem blong Kraes long yumiwan ?
Elda D. Todd Christofferson i tijim: “Stamba blong paoa blong gud fasin mo paoa long saed blong spirit, hem i God. Rod blong save yusum paoa ia, hem i tru long ol kavenan we yumi mekem wetem Hem” (“The Power of Covenants,” Ensign o Liahona, May 2009, 20). Taem yu stap ridim Mosaea 5:5–15, mekem wan lis blong ol blesing we bambae i kam long laef blong yu taem yu stap kipim ol kavenan we yu bin mekem wetem God. ?Olsem wanem nao we, taem yu stap kipim ol kavenan blong yu, i helpem yu blong holemtaet “bigfala jenis” ia we i kam long yu tru long Jisas Kraes mo Atonmen blong Hem?
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:
Mosaea 4:9–12
?Olsem wanem nao famli blong yu i save “biliv mo fulwan long God” (Mosaea 4:9) mo “holemtaet long tingting oltaem, se God i gat bigfala paoa”? Mosaea 4:11 Maet ol memba blong famli oli save ridim Mosaea 4:9–12 mo faenem ol sentens we i help blong bildimap fet long God. Afta, oli save raetemdaon ol sentens ia mo putum olgeta raon long haos blong rimaenem olgeta. ?Olsem wanem nao taem yumi stap rimemba ol samting ia, i stap helpem yumi blong “stap glad oltaem” mo “holemtaet fasin blong sakem sin [blong yumi]”? (Mosaea 4:12).
Mosaea 4:14–15
?Wanem nao yu lanem abaot fasin blong faet mo raorao aot long ol ves ia?
Mosaea 4:16–26
?Long wanem wei nao, yumi evriwan, yumi ol man blong askem samting? Folem ol ves ia, ?olsem wanem nao yumi sapos blong tritim evri pikinini blong God? (Mosaea 4:26). ?Huia i nidim help blong yumi?
Mosaea 4:27
?Weswe? ?Famli blong yu i stap ron i kwik i bitim paoa we hem i gat? Mebi yu save invaetem ol memba blong famli blong skelem ol aktiviti blong olgeta blong meksua se oli stap wok strong, be tu, blong skelem se oli waes tu.
Mosaea 5:5–15
?Blong stap tekem nem blong Kraes long yumi i minim wanem abaot rilesensip blong yumi wetem Hem? Bae i save help blong tokbaot from wanem, samtaem ol pipol oli stap raetem nem blong olgeta long ol samting blong olgeta. ?Olsem wanem nao yumi save soem we yumi, yumi “blong” Sevya?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Stap Kam Antap long Fasin blong Yumi blong Stap Tij
Mekem wan ples we oli filim lav long hem. Wei we ol memba blong famli oli stap tritim olgeta i save lidim bigwan spirit we i stap insaed long hom blong yu. Helpem ol memba blong famli blong mekem pat blong olgeta blong stanemap wan hom we i gat lav mo respek, blong mekem se evriwan i filim fri blong serem ol eksperiens, ol kwestin, mo ol testemoni. (Luk long Teaching in the Savior’s Way, 15.)
Oltaem Hem I Stap Kea long Mi, i kam long Greg K. Olsen