27 Epril–3 Mei. Mosaea 7-10: ‘Wetem Paoa blong Lod,’” Kam Folem Mi—Blong Wanwan Man, Woman mo Famli: Buk blong Momon 2020 (2020)
27 Epril–3 Mei. Mosaea 7-10,” Kam Folem Mi—Blong Wanwan Man, Woman mo Famli: 2020
Minerva K. Teichert (1888-1976), Amon long Fored blong King Limhae, 1949-1951, oel long mesonaet, 35 15/16 x 48 inj. Brigham Yang Yunivesiti blong Art, 1969.
27 Epril–3 Mei
Mosaea 7–10
“Wetem Paoa blong Lod”
Olsem we yu bin ridim, Spirit i save tekem long tingting blong yu samfala sentens o fulap ves. Raetemdaon olsem wanem yu filim se ol skripja ia oli blong yu.
Raetemdaon Ol Filing mo Tingting blong Yu
Taem we ol pipol blong King Mosaea oli bin stap gohed blong “gat pis” long Sarahemla (Mosaea 7:1), tingting blong olgeta i go kasem wan nara grup blong Ol Man blong Nifae, we plante yia bifo, oli bin aot blong stap long graon blong Lihae-Nifae. Ol jeneresen oli pas, mo ol pipol blong Mosaea oli no bin harem eni samting abaot olgeta. Mekem se Mosaea i bin askem Amon blong lidim wan grup blong faenem Ol Man blong Nifae ia we oli bin aot. Grup ia i faenem se Ol Man blong Nifae ia, “from ol fasin nogud” (Mosaea 7:24), oli bin prisena blong Ol Man blong Leman. Be, taem we Amon mo ol brata blong hem oli go kasem olgeta, kwiktaem i bin gat hop blong oli kam fri.
Samtaem, yumi olsem Ol Man blong Nifae ia we oli prisena i stap, we yumi stap safa from ol sin blong yumi, mo yumi stap askem yumiwan hao nao bae yumi faenem pis bakegen. Samtaem yumi olsem Amon, we Spirit i pusum yumi blong go long ol narawan, mo long en, yumi faenem se ol traehad blong yumi oli bin givim insperesen long olgeta blong oli “leftemap hed blong [olgeta], mo stap glad, mo putum tras blong [olgeta] long God” (Mosaea 7:19). I nomata ol situesen blong yumi, yumi evriwan i nidim blong sakem sin, mo blong “tanem yumi i go long Lod wetem ful hat, wetem fet se bae “hem i mekem yumi kam fri wan dei” (Mosaea 7:33).
Sam Aedia blong Skripja Stadi blong Yuwan
Sapos mi tanem mi i go long Lod, trastem Hem, mo givim seves long Hem, bambae Hem i mekem yumi kam fri.
Taem hem i bin mit wetem Amon, we i bin wan Man blong Nifae we i kam long Sarahemla, i bin givim wan hop, mo hem i bin wantem pasem hop ia nao i go long ol pipol blong hem. Taem yu stap ridim Mosaea 7:14–33, luk wanem nao Limhae i bin talem long ol pipol blong hem blong leftemap tingting blong hem, mekem bilif blong olgeta i kam strong moa, mo givim hop long olgeta ia we God i glad blong helpem olgeta. I nomata yu no filim se yu yu rong long ol semfala sin we ol pipol blong Limhae oli bin mekem, ?olsem wanem nao bae ol toktok blong hem oli save mekem se yu tantanem yu i go long Lod. Bae yu luk se Limhae i rimaenem ol pipol blong hem abaot stori we i stap mekem ol pipol oli bin tingbaot we God i mekem olgeta oli kam fri (luk long ol ves 18–20). ?Olsem wanem nao ol stori ia, mo tu olgeta nara skripja stori insaed long ol skripja, o long eksperiens blong yuwan, oli helpem yu blong trastem God?
Olgeta 24 pej blong buk we ol pipol blong Limhae oli bin faenem ?oli wanem stret?
Long taem we smol grup blong ol pipol blong Limhae oli bin stap lukaotem graon blong Sarahemla mo no faenem, oli bin faenem 24 pej blong buk we oli wokem long gol, wetem ol raeting blong wan lanwis we oli no save gud long hem. Olgeta buk ia, we King Mosaea bae i transletem, i tokbaot wan pipol we oli save olgeta olsem Ol Man blong Jared, we oli bin aot long Taoa blong Babel, oli kam long graon blong promes, mo oli prapa spolem gud olgeta nao oli lus evriwan (luk long Mosaea 28:11–19). Afta long hemia, Moronae i bin raetem ol buk ia oli kam sot (luk long Ita 1:1–2), we i kam buk blong Ita. Luk gud se, long Mosaea 28:18, wanem samting nao histri ia i mekem long ol pipol blong Mosaea.
Lod i givim ol profet, ol sia, mo ol reveleta blong gud blong ol man.
Taem Limhae i harem se testemoni blong Amon, se Lod i mekem wan sia i stap, Limhae i bin “bin glad tumas, mo i bin talem tangkyu long God” (Mosaea 8:19). ?Yu yu ting se from wanem nao hem i bin filim olsem? ?Wanem nao yu lanem abaot ol sia aot long ol toktok blong Amon we oli stap long Mosaea 8:13–19? Long taem blong yumi tedei, “Fas Presidensi mo Kworom blong Olgeta Twelef Aposol nao oli ol profet, sia, mo reveleta we yumi sastenem olgeta” (Bible Dictionary, “Seer”). ?Wetaem nao las taem we yu bin tingting hevi long blesing ia blong gat ol profet, ol sia, mo ol reveleta long wol ia? Maet yu save raetemdaon olsem wanem ol profet, ol sia, mo ol reveleta oli bin “wan bigfala help” long yu (Mosaea 8:18).
Profet Josef Smit i bigfala sia we i stanap long hed blong dispensesen blong yumi (luk long D&K 21:1; 124:125; Josef Smit—Histri 1:62 ?Olsem wanem nao hem i stap olsem eksampol blong huia Amon i tokbaot se hem i wan sia long taem blong seves blong hem?
Mi save fesem plante jalenj blong mi “wetem paoa blong Lod.”
Senif i talem se hem i bin mekem ol mistek. Tingting blong hem i go tumas samtaem, mo hem i bin mekem se ol pipol blong hem—ol bubu blong ol pipol blong Limhae—oli stap long wan had situesen taem hem i bin mekem sam agrimen we i no waes wetem King Leman. Samtaem afta, hem i bin go faet agensem Ol Man blong Leman, mo i helpem ol pipol blong hem blong fesem ol jalenj blong olgeta wetem fet. Taem yu stap ridim Mosaea 9–10, lukaotem wanem nao ol pipol blong Senif oli mekem blong soem fet blong olgeta. ?Olsem wanem nao God i bin mekem olgeta oli kam strong moa? ?Hem i minim wanem long yu blong go “wetem paoa blong Lod”? (Mosaea 9:17; 10:10–11).
Joes blong mi i save lidim plante jeneresen.
Folem wanem we i stap long Mosaea 10:11–17, ?olsem wanem nao ol aksen mo fasin blong ol bubu blong Ol Man blong Leman i stopem Ol Man blong Leman blong save trutok? ?Olsem wanem nao ol joes blong ol bubu blong Ol Man blong Leman i jenisim ol fiuja jeneresen blong olgeta? Tingting long ol pipol we ol bilif mo joes blong yu i save lidim olgeta; ?Wanem nao yu stap mekem blong helpem olgeta blong gat moa fet long Kraes?
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:
Mosaea 7:19–20
Luk gud ol eksampol we Limhae i poenem blong save leftemap tingting blong ol pipol blong hem blong oli gat fet. ?Wanem eksampol, aot long ol skripja, i save givim insperesen long yumi blong “trastem God”? ?Hem i minim wanem blong putum tras blong yumi long God? (luk tu long Mosaea 9:17; 10:19). ?Wanem stori, aot long laef blong ol bubu blong yumi, bae yumi wantem serem blong oli givim bigfala tras long God?
Mosaea 7:26–27
?Wanem nao yu lanem abaot Sevya aot long ol ves ia? (luk tu long D&K 130:22). ?From wanem i impoten tumas blong yu, yu save olgeta samting ia?
Mosaea 8:13–18
Blong helpem ol memba blong famli blong andastanem wanem hem i wan sia, maet yu save soem long olgeta pikja blong sam tul we oli stap helpem yumi blong luk ol samting we yumi no bin save luk bifo, olsem ol spaeglas, wan teleskop, o maekroskop. ?Olsem wanem nao ol tul ia oli olsem wan sia? (luk long Moses 6:35–36). ?Wanem nao ol sia oli save luk we yumi, yumi no save luk? ?Wanem pruf nao yumi gat se Josef Smit i bin wan sia?
Yu save soem ol pikja blong ol profet, ol sia mo reveleta blong yumi we oli stap laef, mo askem famli blong yumi wanem nao oli save abaot olgeta. ?Olsem wanem nao yumi stap folem olgeta?
Mosaea 9:14–18; 10:1–10
Taem oli bin atakem Ol Man blong Leman, ol pipol blong Senif oli bin rere finis long saed blong bodi mo long saed blong spirit. ?Wanem nao yumi save lanem aot long Senif mo pipol blong hem long saed blong fasin blong stap rere from ol jalenj?
Blong gat moa aedia blong stap tijim ol pikinini, luk long aotlaen blong wik ia insaed long Kam Folem Mi—Blong Praemeri.
Stap Kam Antap long Stadi blong Yuwan
Lukaotem ol niu wei blong yu blong lukluk ol samting long saed blong spirit. Aotlaen ia i stap givim samfala ples long skripja mo samfala prinsipol we yumi save lukluk moa long olgeta, be yu no letem ol tingting ia oli stopem yu blong mekem moa samting long stadi blong yu. Maet sam ves oli toktok fulap long yu, o bae yu save faenem sam prinsipol we oli no tokbaot long ples ia. Letem Spirit i lidim yu.
Visen i go long Josef Smit, i kam long Clark Kelley Price