“4–10 Mei. Mosaea 11–17: ‘Wan Laet … we I No Save Kam Tudak’” Kam Folem Mi—Blong Wanwan Man, Woman mo Famli: Buk blong Momon 2020 (2020)
“4–10 Mei. Mosaea 11–17,” Kam Folem Mi—Blong Wanwan Man, Woman mo Famli: 2020
Abinadae long Fored blong King Noa, i kam long Andrew Bosley
4–10 Mei
Mosaea 11–17
“Wan Laet … we I No Save Kam Tudak”
Ol toktok blong Abinadae oli mekem wan bigfala jenis long hat blong wan memba blong haos blong King (luk long Mosaea 17:2–4). Ridim Mosaea 11–17 wetem wan prea insaed long hat blong yu se bae yu kasem ol tingting mo ol filing blong save olsem wanem yu save jenis.
Raetemdaon Ol Filing mo Tingting blong Yu
Ol bigbigfala faea oli save stat wetem wan smosmol faea. Abinadae i bin wan man ia nomo we i stap testifae agensem wan king we i gat paoa wetem kaonsel bodi blong hem. Fulap long ol toktok blong Abinadae, oli sakemaot, mo oli panisim hem se bae hem i mas ded. Yet, testemoni blong hem abaot Jisas Kraes, we i “laet [ia] … we i no save kam tudak” (Mosaea 16:9), i laetem smol faea insaed long yangfala pris ia, Alma. Mo smol faea ia blong wan jenis long hat, sloslo i gro i go taem Alma i stap tekem plante moa oli kam blong sakem sin mo gat fet long Jisas Kraes. Olgeta flem blong faea we oli kilimded Abinadae, long en, i ded, be faea blong fet we ol toktok blong hem i bin laetem, bae i stap blong oltaem long Ol Man blong Nifae—mo olgeta we oli stap ridim toktok blong hem tedei. Plante long yumi bae i neva fesem evriwan wanem we Abinadae i bin fesem from testemoni blong yumi, be yumi evriwan i gat ol taem olsem we, taem yumi stap folem Jisas Kraes, hem i wan tes blong testem paoa long tingting mo fet blong yumi. Maet blong stadi long testemoni blong Abinadae bae i blo win long ol flem blong testemoni, mo long paoa blong tinting insaed long hat blong yu tu.
Sam Aedia blong Skripja Stadi blong Yuwan
Mi save stanap from trutok, iven taem mi stap stanap miwan.
Traem tingting se tingting blong Abinadae i slak hamas taem hem i stap askem wan pipol blong sakem sin, be oli no soem nating se oli intres blong jenisim ol nogud fasin blong olgeta. Mesej blong hem, oli sakemaot bakegen mo bakegen. “Be stil Abinadae i neva givap.
?Wetaem nao yu bin filim se yu stap stanap yuwan blong stap difendem trutok? Taem yu stap ridim Mosaea 11–13 mo 17, ?wanem nao yu lanem we i save helpem yu blong rere taem Lod i nidim yu blong stanap from gospel blong Hem? ?Wanem nara prinsipol yu lanem aot long eksampol blong Abinadae?
Mi nidim blong putum hat blong mi i andastanem toktok blong God.
Pris blong King Noa oli bin save gud long toktok blong God—oli bin save kwotem ol skripja mo oli klemem se oli tijim ol komanmen. Be ol komanmen ia, oli no bin “raetem insaed long hat blong olgeta,” mo oli “no putum fulwan hat blong [olgeta] blong andastanem samting (Mosaea 13:11; 12:27). From hemia, laef blong olgeta i no jenis.
Taem yu stap ridim Mosaea 12:19–30, tingting hevi long wanem nao i minim blong putum hat blong andastanem toktok blong God. ?Hemia i givim insperesen long yu blong mekem eni jenis long wei we yu stap lanem gospel?
Bae Lod i sastenem ol wokman blong Hem long wok blong Hem.
Long wan han, eksperiens blong Abinadae i givim plante eksampol long wei we Lod i stap sapotem ol wokman blong Hem—yu save faenem plante eksampol olsem long Mosaea 13:1–9. Long nara han, Lod i letem yu blong oli mekem i nogud long Abinadae, blong oli karem hem i prisena, mo i ded from testemoni blong hem. ?Wanem nao yu faenem insaed long ol ves ia we i soemaot se Abinadae i trastem Lod? ?Olsem wanem nao eksampol blong Abinadae i jenisim wei we yu stap lukluk ol koling blong yu mo ol responsabiliti blong yu?
Jisas Kraes i bin safa from mi.
King Noa mo ol pris blong hem oli bin biliv se fasin blong sevem man bae i kam tru long loa blong Moses; Abinadae i bin wantem olgeta i save se fasin blong sevem man i kam tru long Mesaea, we i Jisas Kraes. Long Mosaea 14–15, luk ol toktok mo ol sentens we oli tokbaot Sevya mo wanem nao Hem i bin safa from yu. ?Wanem ves nao i help blong mekem lav mo tangkyu blong yumi i go long Hem, i dip moa?
?Olsem Wanem Jisas Kraes I Tugeta, Papa mo Pikinini?
Ol skripja ia, samtaem oli mekem tingting i fasfas from se i luk se Abinadae i stap tijim se Papa long Heven mo Jisas Kraes, Tufala i wan semfala Man nomo, be yet, yumi save se Tufala i tu defren Man. “Abinadae i minim wanem? Hem i bin tijim se God, we i Pikinini—Jehova—bae i Ridima (luk long Mosaea 15:1), we i laef long bodi blong mit mo bun, we i haf man mo haf God (ol ves 2–3). Hem i bin putum Hem fulwan i folem tingting blong God Papa (ol ves 5–9). From hemia, Jisas Kraes i tugeta, Pikinini blong God, mo i stret man blong i ripresentem huia God Papa long wol ia (luk long John 14:6–10).
Abinadae i bin gohed blong eksplenem se Jisas Kraes I Papa tu long wei ia we taem yumi stap akseptem se Hem i pemaot man, yumi kam “laen blong hem” (Mosaea 15:11–12). Long nara toktok, yumi kam blong yumi bon bakegen long saed blong spirit, tru long Hem (luk long Mosaea 5:7).
luk long Jon 5:25–27; 8:28–29; 17:20–23; “The Father and the Son,” Ensign, Apr. 2002, 12–18.
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:
Mosaea 11–13; 17
Abinadae mo Alma oli ol eksampol blong insperesen blong stap tru long trutok, iven we taem yumi mekem olsem i no popula. Maet ol memba blong klas blong yu oli stap fesem fasin blong fosem man long ol sosol ples blong oli nomo holem standet blong olgeta. ?Wanem nao oli save lanem aot long Abinadae mo Alma long saed blong fasin blong stanap from trutok? Artwok we i kam wetem aotlaen ia, i save helpem famli blong yu blong gat wan pikja blong storian ia. Afta we yufala i stap long ol japta ia, tingting blong mekem wan rolplei blong sam eksampol blong ril laef, blong mekem se ol memba blong famli blong yu oli save praktis blong stap fesem fasin blong fosem man blong daonem standet blong olgeta. O yu save serem wetem wanwan long yufala ol eksperiens we yu bin gat blong stanap from trutok.
Mosaea 12:33–37; 13:11–24
?Hem i minim wanem blong mekem se yumi “raetem long hat [blong yumi]” ol komanmen ia blong God? (Mosaea 13:11). Mebi yu save raetem sam aedia (o droem sam pikja abaot ol aedia blong yu) long wan bigfala pepa we oli katem long sep blong wan hat. ?From wanem ol komanmen oli gat bigfala praes long yumi? ?Olsem wanem nao yumi save raetem olgeta insaed long hat blong yumi?
Blong stap stadi ol skripja, i save helpem yumi blong raetem olgeta komanmen insaed long hat blong yumi.
Mosaea 14
Long japta ia, bambae yu faenem samfala toktok mo sentens we i tokbaot Jisas Kraes. Mebi famli blong yu bae i save raetemdaon long wan lis taem yufala i stap faenem olgeta. ?Olsem wanem ol memba blong famli oli filim abaot Sevya taem yumi stap stadi long ol toktok mo sentens ia
Mosaea 15:26–27; 16:1–13
Ol ves ia oli tokbaot wanem bae i save hapen long ol pikinini blong God sapos Jisas i “no bin kam long wol” (Mosaea 16:6) o sapos oli no bin folem Hem. ?Wanem nao ol gudfala samting we oli bin hapen from se Hem i bin kam mo i bin pem praes from yumi? luk long vidio “Why We Need a Savior” (ChurchofJesusChrist.org).
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Stap Kam Antap long Fasin blong Yumi blong Stap Tij
Yusum ol stori mo ol eksampol blong tijim ol prinsipol blong gospel. Plante taem, Sevya i bin tijim ol prinsipol blong gospel we Hem i stap yusum ol stori mo ol parabol. Tingting long sam eksampol mo stori blong laef blong yuwan we i save mekem wan prinsipol blong gospel i laef insaed long famli blong yu (luk long Teaching in the Savior’s Way, 22).
Fes blong Hem i Saen we i Saen Tumas, i kam long Jeremy Winborg