Taem Yangfala Alma I Jenisim Laef blong Hem, i kam long Gary L. Kapp

18-24 Mei.

Mosaea 25–28

“Oli Singaotem Olgeta Ol Pipol blong God”

Afta we “voes blong Lod i kam long [Alma],” hem i bin raetemdaon olgeta samting we Lod i bin talem long hem “blong mekem se hem i save holem olgeta” (Mosaea 26:13, 33). ?Olsem wanem nao bae yu folem eksampol blong Alma?

Raetemdaon Ol Filing mo Tingting blong Yu

Afta long tri jeneresen blong stap laef long ol defren graon, Ol Man blong Nifae oli bin wan bakegen. Ol pipol blong Limhae, ol pipol blong Alma, mo ol pipol blong Mosaea—iven ol pipol blong Sarahemla, we oli no kamaot long laen blong Nifae—evriwan, “oli bin kaontem olgeta wetem Ol Man blong Nifae” (Mosaea 25:13). Plante long olgeta oli bin wantem tu blong kam ol memba blong Jos we Alma i bin stanemap. Mekem se, evriwan we oli bin “wantem blong tekem long [olgeta] nem blong Kraes,” oli bin baptaes, “mo oli singaotem olgeta ol pipol blong God” (Mosaea 25:23–24). Afta plante yia blong faet mo stap prisena, i luk se Ol Man blong Nifae oli stap glad long wan taem blong pis.

Be, i no tekem taem nating blong olgeta we oli no biliv oli stat blong mekem nogud bakegen long Ol Sent. Wanem we i mekem hat i soa long hemia, i we, plante long olgeta ia we oli no bin biliv, oli ol pikinini blong olgeta we oli stap biliv—“jeneresen ia we i stap kam antap” (Mosaea 26:1), wetem ol boe blong Mosaea, mo wan boe blong Alma. Nao merikel i hapen, mo stori blong merikel ia i bin givim hop long ol papa mo mama we oli wari tumas blong plante jeneresen. Be stori blong jenis long laef blong Alma i no jes blong ol papa mo mama we oli gat ol pikinini we oli mestem rod. Tru jenis long laef, i wan merikel we, long wan wei o wan nara wei, bae i nid blong hapen insaed long evriwan long yumi.

Sam Aedia blong Skripja Stadi blong Yuwan

Mosaea 26:1–6

Mi mi responsibol long ol fet mo testemoni blong miwan.

Olgeta we oli bin harem toktok blong King Benjamin, oli bin gotru long wan gudfala jenis long laef (luk long Mosaea 5:1–7), be jenis long laef, i wan eksperiens we i blong yuwan, we oli no save pasem i go olsem wan propeti o wan samting we yumi pasem i go long ol pikinini. Yumi evriwan i mas gotru long jenis blong yumiwan long laef i go long gospel blong Jisas Kraes. Taem yu stap ridim Mosaea 26:1–6 abaot “jeneresen we i stap kam antap” blong Ol Man blong Nifae we oli no biliv, luk gud wanem nao i kamaot long fasin blong olgeta blong no stap bilif. Maet bae yu tingting tu abaot ol pipol we yu wantem tumas se bae yu tekem olgeta oli kam long Kraes. Maet yu no save givim jenis ia long laef blong olgeta, be Spirit i save talem long yu olgeta samting we yu save mekem blong helpem olgeta blong faenem fet. Taem yu stap rid long Mosaea 25–28 abaot wei we Alma mo ol nara memba blong Jos oli stap helpem jeneresen we i stap kam antap, bae sam moa tingting i kam long yu.

Luk tu long Doktrin mo Ol Kavenan 68:25–29.

Mosaea 26:6–39

Ol fetful wokman blong God oli stap lukaot blong mekem tingting blong Hem.

Samtaem, yumi save ting se wan lida blong Jos olsem Alma, oltaem nomo hem i save stret samting blong mekem. Long Mosaea 26 yumi stap rid abaot wan problem insaed long Jos we Alma i neva fesem, mo “hem i fraet se bae hem i mekem wan rong samting long ae blong God” (Mosaea 26:13). ?Wanem nao Alma i bin mekem taem hem i bin stap long situesen ia? (luk long Mosaea 26:13–14, 33–34, 38–39). ?Wanem tingting nao eksperiens blong Alma i givim long wei blong fesem ol had problem insaed long famli blong yu, o insaed long seves blong yu insaed long Jos?

Bae i intresting tu blong listim daon ol trutok we God i talemaot long Alma, we oli stap long Mosaea 26:15–32. Luk se sam long ol trutok ia, oli no ansarem stret kwestin blong Alma. Wanem tingting nao hemia i givim long yu abaot prea mo fasin blong kasem revelesen we i blong yuwan?

Mosaea 27:8–37

Evri man mo woman i mas bon bakegen.

Hem i klia gud se Yangfala Alma i nidim blong hem i bon bakegen long saed blong spirit, from se hem mo ol boe blong Mosaea oli “oli ol moa nogud long ol rabis man blong mekem ol sin,” we oli bin go raon blong “prapa spolem gud jos blong God” (Mosaea 28:4; 27:10). Be i no longtaem afta we hem i jenisim laef blong hem, Alma i testifae se fasin blong jenisim laef, i stap nomo—mo i nid— evriwan i kasem. Hem i talem : “No sapraes se evri man, … oli mas bon bakegen” (Mosaea 27:25; oli ademap italik). Yes, hemia i minim yu tu.

Taem yu stap rid abaot eksperiens blong Alma we yu save faenem long Mosaea 27:8–37, traem putum yu long ples blong hem. Yu no stap traem blong prapa spolem Jos, be yu save tingting abaot sam samting abaot yuwan we yu nidim blong jenisim. ?Hu nao, olsem papa blong Alma, i stap sapotem yu mo i stap prea from yu “wetem plante fet”? ?Wanem eksperiens nao i bin help “blong winim tingting blong yu abaot paoa mo atoriti blong God”? (Mosaea 27:14). ?Wanem “bigfala samting” nao Lod i bin mekem blong yu mo famli blong yu we yu mas “tingbaot”? (Mosaea 27:16). ?Wanem samting yu lanem aot long ol toktok mo ol aksen blong Yangfala Alma long saed blong mining blong stap bon bakegen? Ol kwestin olsem i save helpem yu blong skelem progres blong yu long rod ia blong yu bon bakegen.

Luk tu long Mosaea 5:6–9; Alma 36; “Conversion” (Gospel Topics, topics.ChurchofJesusChrist.org).

Papa blong Hem i Stap Glad, i kam long Walter Rane

Mosaea 27:14, 19–24

God i stap harem ol prea blong mi mo bae i ansarem olgeta folem tingting blong Hem.

Mebi yu save wan papa o mama we i stap long wan situesen olsem blong Olfala Alma, we boe blong hem o gel blong hem oli stap mekem ol joes we i stap prapa spolem hem. O mebi, yu nao, yu papa o mama ia. ?Wanem nao yu faenem insaed long Mosaea 27:14, 19–24 we i givim hop long yu? ?Olsem wanem ol ves ia oli lidim tingting blong yumi long wei we yumi stap invaetem ol narawan blong kam long Kraes?

Sam Aedia blong Famli Skripja Stadi mo Famli Haos Naet

Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:

Mosaea 25:5–11

?Olsem wanem nao ol pipol blong Mosaea oli bin filim afta we Mosaea i bin ridim ol histri blong ol pipol blong Senif i go long ol pipol blong Alma? ?Weswe? ?Famli blong yu i stap kipim eni histri we yu save ridim i go long olgeta? Mebi yu save ademap histri blong yu long histri ia, o yu save stat blong kipim wan histri blong yufalawan. ?Wanem nao bae yu save putum insaed we bae i save helpem famli blong yu (mo ol fiuja jeneresen) blong yufala i “fulap wetem bigfala glad we i bigwan tumas” mo lanem abaot “fasin ia blong God, we i gud tumas”? (Mosaea 25:8, 10).

Mosaea 25:16

?From wanem nao i impoten blong ol pipol blong Limhae blong oli tingbaot se Lod i bin mekem olgeta oli kam fri long fasin blong stap olsem prisena? ?Wanem nao Lod i bin mekem blong yumi we yumi mas tingbaot?

Mosaea 26:29–31; 27:35

Folem ol ves ia, ?wanem nao wan i mas mekem blong kasem fogivnes?

Mosaea 27:21–24

Taem yu stap ridim ol ves ia, tingting long wan we famli blong yu i save prea from mo livim kakae from.

Mosaea 27–28

Blong helpem famli blong yu i gat wan pikja blong ol stori we oli stap long ol japta ia, yu save invaetem olgeta blong droem ol pikja blong ol pipol we oli stap insaed, mo yusum ol pikja blong talem bakegen stori ia. O maet bae oli laekem blong aktem stori ia; ?olsem wanem nao oli save rolplei jenis ia we Alma mo ol boe blong Mosaea oli go tru long hem?

Blong gat moa aedia blong stap tijim ol pikinini, luk long aotlaen blong wik ia insaed long Kam Folem Mi—Blong Praemeri.

Stap Kam Antap long Fasin blong Yumi blong Stap Tij

Yusum art. “Buk ia, Gospel Art Buk mo LDS Media Library long ChurchofJesusChrist.org i holem plante pikja mo vidio we i save helpem [famli blong yu] blong gat wan pikja long maen abaot ol aedia, o ol taem ia we i bin hapen finis” (Teaching in the Savior’s Way, 22).

Pikja blong wan enjel i kamkamaot long Alma, i kam long Kevin Keele