Taem Yangfala Alma I Jenisim Laef blong Hem, i kam long Gary L. Kapp

18-24 Mei.

Mosaea 25–28

“Oli Singaotem Olgeta Ol Pipol blong God”

Papa long Heven i save wanem ol pikinini long klas blong yu oli nid blong lanem mo olsem wanem blong kasem olgeta. Lukaotem help blong Hem taem yu stap ridim Mosaea 25–28 mo stadi long aotlaen ia.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Soem pikja long aotlaen blong wik ia insaed long Kam Folem Mi—Blong Wanwan Man, Woman mo Famli, mo askem ol pikinini blong talem long yu wanem i stap hapen long pikja ia. Sapos ol pikinini oli save long stori blong Yangfala Alma mo ol boe blong Mosaea, letem olgeta oli serem wanem we oli save.

Stap Tijim Doktrin: Ol Smol Pikinini

Mosaea 26:30–31

Lod i wantem mi blong fogiv.

Lod i tijim Alma se Hem i stap fogivim evriwan, olgeta we oli sakem sin. Yumi mas folem eksampol blong hem taem yumi stap fogivim olgeta we oli mekem sin agensem yumi.

Samfala Aktiviti we Yu Save Mekem

• Ridim sentens ia long ol pikinini, we i stap long Mosaea 26:31: “Be yufala i fofogivim yufala.” Letem ol pikinini oli praktis blong talem “Mi fogivim yu” smol taem, mo faenemaot sapos oli save se i minim wanem blong fogiv. Serem wan eksperiens long laef blong yu taem we yu bin fogivim wan, o taem wan i fogivim yu.

• Helpem ol pikinini blong aktem se oli stap fofogivim wanwan long olgeta. Askem wan pikinini blong priten se hem i mekem wan samting blong givim kil, o spolem wan narafala pikinini. ?Wanem nao narafala pikinini ia i save talem o mekem blong soem fogivnes?

• Invaetem ol pikinini blong dro ol fes we oli no hapi long wan saed blong pepa mo wan fes we i hapi long nara saed blong pepa. Askem olgeta blong leftemap ol fes we i no hapi mo tokbaot wan eksperiens blong wan taem we wan brata o sista o wan fren i mekem olgeta i harem nogud. Askem olgeta blong leftemap fes we i hapi mo tokbaot olsem wanem oli bin fogivim o bae oli fogivim man ia.

Mosaea 27:8–37

Gospel i helpem ol pipol blong jenis mo kam moa olsem Jisas

Fasin blong Yangfala Alma mo ol boe blong Mosaea blong jenisim laef i soemaot se, from Jisas Kraes mo gospel blong Hem, eni man i save jenis mo kam moa olsem Jisas.

Samfala Aktiviti we Yu Save Mekem

• Tokbaot smol abaot fasin we Yangfala Alma mo ol boe blong Mosaea oli bin jenisim laef blong olgeta we oli tokbaot long Mosaea 27:8–37. Blong kasem moa help, luk long “Japta 18: Yangfala Alma i Sakemaot Sin” (Ol Stori long Buk blong Momon, 49–52, o vidio blong hem long ChurchofJesusChrist.org). Afta, talem stori ia bakegen, mo letem ol pikinini oli tokbaot ol pat we oli tingbaot. Letem olgeta oli aktemaot stori ia, mo helpem olgeta blong luksave se Alma mo ol boe blong Mosaea oli wanem kaen man bifo mo afta we oli sakem sin.

• Helpem ol pikinini blong yusum aktiviti pej blong wik ia blong talem stori blong Alma mo ol boe blong Mosaea. Ridim Mosaea 27:24, mo helpem ol pikinini blong andastanem se Alma mo ol boe blong Mosaea i jenis from se oli bin sakem ol sin blong olgeta mo akseptem gospel blong Jisas Kraes.

  

  Papa blong Hem i Stap Glad, i kam long Walter Rane

Mosaea 28:1–8

Mi save serem gospel.

Afta we ol boe blong Mosaea oli bin jenisim laef, oli bin gat strong tingting blong serem gospel wetem evriwan, mo tu, wetem ol enemi blong olgeta, Ol Man blong Leman.

Samfala Aktiviti we Yu Save Mekem

• Yusum Mosaea 28:1–8 blong tokbaot long ol pikinini abaot ol boe blong Mosaea we oli disaed blong prijim gospel long Ol Man blong Leman. Blong kasem moa help, luk long “Japta 19: Ol Boe blong Mosaea Oli Kam Misinari” (Ol Stori long Buk blong Momon, 53 o vidio blong hem long ChurchofJesusChrist.org). ?From wanem nao oli wantem blong serem gospel? (luk long ves 3).

• Helpem wanwan pikinini blong tingbaot wan man we i nid blong save moa abaot gospel. Helpem ol pikinini blong plan from wanem bae oli talem long ol man we oli stap tingbaot ia.

• Singsing tugeta wan singsing abaot serem gospel, olsem“I Want to Be a Missionary Now” (Children’s Songbook, 168). Poenemaot ol sentens insaed long singsing ia we i stap talemaot olsem wanem yumi save serem gospel wetem ol narafala man.

Stap Tijim Doktrin: Ol Bigfala Pikinini

Mosaea 26:22–23, 29–30; 27:8–37

God i fogivim evriwan, olgeta we oli sakem sin.

Sapos i gat wan long klas blong yu we i stap askem hemwan sapos hem i save kasem fogivnes, toktok blong God i go long Bigfala Alma mo eksperiens blong Yangfala Alma i save help.

Samfala Aktiviti we Yu Save Mekem

• Askem ol pikinini blong priten se oli stap toktok long wan we i gat tingting ia se God bae i neva save fogivim hem. Invaetem olgeta blong luklukbak long ol toktok blong God i go long Bigfala Alma long Mosaea 26:22–23, 29–30. ?Wanem nao oli faenem blong helpem man ia?

• Bifo klas i stat, askem wan long ol pikinini blong rid abaot olsem wanem Yangfala Alma i bin jenisim laef, olsem we i stap long Mosaea 27:8–37, mo rere blong kam long klas mo talem stori ia olsem se hem nao hem i Yangfala Alma. (Sapos i nid, givim tingting blong hem i askem papa o mama blong help.) Taem pikinini ia i stap talem stori, askem ol kwestin olsem “Yu bin filim olsem wanem taem … ?”o “Afta, wanem i hapen?”

• Invaetem ol pikinini blong mekem wan lis blong ol toktok long Mosaea 27:8–10 we i tokbaot se Alma mo ol boe blong Mosaea oli bin olsem wanem bifo oli jenisim laef. Afta, askem olgeta blong mekem wan narafala lis long Mosaea 27:32–37 we i tokbaot se oli bin kam olsem wanem afta we oli bin sakem sin. Long ol ves 24–29, wanem nao i mekem bigfala jenis ia long Alma?

Mosaea 26:29–31

Blong kasem fogivnes, mi mas fogiv.

Helpem ol pikinini blong luksave wanem i joenem fasin blong fogivnes we oli givim long narafala man mo fogivnes we oli hop blong kasem.

Samfala Aktiviti we Yu Save Mekem

• Invaetem ol pikinini blong rid long Mosaea 26:29–31 mo kaontem hamas taem toktok ia “fogiv” i kamaot. ?Wanem nao ol ves ia oli stap tijim yumi long saed blong fasin blong fogivim narafala man? ?Olsem wanem nao fasin blong stap fogiv i stap helpem tugeta, man we i mekem rong samting, mo hemia we i stap fogiv?

• Askem wan pikinini blong dro wan brij long bod, mo serem toktok ia we i kam long Presiden Thomas S. Monson: “Hem we i no save fogivim narafala man i brekem brij ia we hem, hemwan i nid blong krosem sapos hem i wantem kasem heven, from evri man i gat nid blong fogiv” (George Herbert, we oli kwotem insaed long “Hidden Wedges,” Ensign, Mei 2002, 19). Waepemaot sam pat blong brij ia, mo askem ol pikinini blong helpem yu blong bildimbak, wan pis afta narafala pis, taem oli stap serem ol wei we oli save fogivim narafala man. Invaetem olgeta blong tingbaot wan we oli nid blong fogivim.

Mosaea 27:8–24

Mi save prea mo livim kakae, blong mekem se God i blesem olgeta we mi lavem.

Tingbaot olsem wanem yu save helpem ol pikinini blong andastanem se fasin blong livim kakae i save mekem fet blong olgeta i kam strong moa taem oli stap prea from ol man we oli lavem.

Samfala Aktiviti we Yu Save Mekem

• Ridim tugeta Mosaea 27:8–24, mo askem ol pikinini blong luksave wanem nao Alma mo ol pipol blong hem oli bin mekem blong helpem Yangfala Alma. Serem wan eksperiens we yu bin livim kakae mo prea from wan man, mo leftemap tingting blong ol pikinini blong serem ol eksperiens blong olgetawan.

• Invaetem ol pikinini blong tingbaot wan we oli save se hem i nidim help blong God long laef blong hem. Serem testemoni blong yu se ol pikinini i save prea mo livim kakae wetem fet blong God i blesem man o woman ia. Invaetem ol pikinini blong prea from huia we oli stap tingbaot mo, sapos oli save mekem, livim kakae from olgeta.

Stap Leftemap Tingting blong Lanem Samting long Hom

Askem ol pikinini blong pikimap wan samting we oli lanem long eksperiens blong Yangfala Alma mo ol boe blong Mosaea we oli wantem blong serem wetem ol famli blong olgeta.

Stap Kam Antap long Fasin blong Yumi Blong Stap Tij

Sapotem ol papa mo mama. “Ol papa mo mama oli ol impoten gospel tija long ol pikinini blong olgeta—tufala i gat tugeta bigfala wok mo bigfala paoa blong lidim tingting blong ol pikinini blong olgeta (luk long Dutronome 6:6–7). Taem yu tijim ol pikinini long jos, prea from ol wei we yu save sapotem ol papa mo mama” (Teaching in the Savior’s Way, 25).