11–17 Mei. Mosaea 18–24: “Mifala I Bin Mekem Wan Kavenan wetem Hem” Kam Folem Mi—Blong Praemeri: Buk blong Momon 2020 (2020)
11–17 Mei. Mosaea 18–24,” Kam Folem Mi—Blong Praemeri: 2020
Minerva K. Teichert (1888-1976), King Limhae mo Ol Pipol blong Hem Oli Ronwe, 1949-1951, oel long mesonaet, 35 7/8 x 48 inj. Brigham Yang Yunivesiti Miusiom blong Art, 1969.
11–17 Mei.
Mosaea 18–24
Mifala I Bin Mekem Wan Kavenan wetem Hem
Taem yu stap rid long Mosaea 18–24, tingbaot ol pikinini we yu stap tijim. Tabu Spirit i save helpem yu blong luksave ol trutok we bae i stret long olgeta.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Soem wan pikja blong wan we i stap kasem baptaes, mo invaetem ol pikinini blong serem wan samting we oli save abaot baptaes. Oli save serem wan samting we oli lanem taem oli stap rid long Mosaea 18–24 wetem ol famli blong olgeta, taem oli go long wan baptaes, o long wan narafala taem.
Stap Tijim Doktrin: Ol Smol Pikinini
Taem mi baptaes, mi mekem wan kavenan wetem God.
Wan long ol impoten wei blong helpem ol pikinini blong rere from baptaes hem i blong tijim olgeta abaot kavenan we bae oli mekem taem oli kasem baptaes.
Samfala Aktiviti we Yu Save Mekem
-
Luklukbak long stori blong Alma mo ol pipol blong hem long Ol Wota blong Momon; yusum Mosaea 18:7–16 o “Japta 15: Alma i Tij mo i Mekem Baptaes” (Ol Stori long Buk blong Momon, 43–44, o vidio blong hem long ChurchofJesusChrist.org). Soem pikja long aotlaen blong wik ia long Kam Folem Mi—Blong Wanwan Man, Woman mo Famli, mo letem ol pikinini oli talem long yu wanem oli save abaot stori ia.
-
Yusum Mosaea 18:8–10 olsem wan gaed, nao, wetem ol toktok blong yuwan, tijim ol pikinini abaot sam samting we bae oli promes blong mekem taem oli kasem baptaes. Eksampol, bae oli promes blong folem Papa long Heven mo Jisas Kraes blong givim kamfot long olgeta we oli harem nogud. Serem wan stori long olsem wanem yu o wan we yu save i bin folem ol promes ia. (Luk tu long D&K 20:77, 79; Carole M. Stephens, “Yumi Gat Gud Risen blong Yumi Stap Glad,” Ensign o Liahona, Nov. 2013, 115–17.)
-
Eksplenem se taem yumi kasem baptaes, Papa long Heven i mekem ol promes tu long yumi. Serem ol promes ia, olsem oli tokbaot long Mosaea 18:9–10.
Taem mi kasem baptaes, mi kam wan memba blong Jos blong Jisas Kraes.
Helpem ol pikinini blong andastanem wanem i minim blong kam ol memba blong Jos tru long baptaes mo konfemesen.
Samfala Aktiviti we Yu Save Mekem
-
Invaetem wan we i jes kasem baptaes blong i serem eksperiens blong hem. Ridim Mosaea 18:17, mo eksplenem se taem yumi kasem baptaes, yumi kam ol memba blong Jos blong Jisas Kraes blong Ol Lata-dei Sent mo yumi mekem promes blong folem Jisas.
-
Soem long ol pikinini ol pikja we i ripresentem ol samting we oli tokbaot long Mosaea 18:17–28. Eksampol, pikja blong Odinesen blong Prishud (Gospel Art Buk, namba 106) i save ripresentem ves 18, mo pikja blong Peimen blong Taeting (Gospel Art Buk, namba 113) i save ripresentem ol ves 27–28. Letem ol pikinini oli tokbaot wanem oli luk long ol pikja ia, mo yusum ol pikja mo ol ves ia blong helpem olgeta blong luksave se i minim wanem blong stap olsem ol memba blong Jos.
Yumi mekem wan kavenan wetem God taem yumi kasem baptaes.
God i save mekem ol hevi samting oli nomo hevi.
?Wetaem nao God i bin mekem ol hevi samting we yu stap karem oli nomo hevi? Tingting long sam wei we yu save serem ol eksperiens mo ol testemoni blong yu wetem ol pikinini.
Samfala Aktiviti we Yu Save Mekem
-
Helpem ol pikinini blong tingbaot ol simpol aksen we oli save mekem taem yu talem long olgeta wanem i bin hapen long ol pipol blong Alma long Mosaea 24:8–17. Poenemaot se from se Alma i bin jusum blong folem ol tijing blong Abinadae abaot Jisas, oli bin tritim nogud hem mo ol pipol blong hem, be oli neva stop blong biliv long Jisas.
-
Ridim Mosaea 24:14–15 long ol pikinini. Fulumap wan basket wetem ol hevi samting (blong ripresentem ol hevi samting), mo invaetem wan pikinini blong holem bag ia. Eksplenem se taem yumi harem nogud, sik, o gat ol trabol, i filim olsem se yumi stap karem ol hevi samting. Invaetem wanwan pikinini blong gat janis blong helpem pikinini ia we i stap karem basket blong mekem se bae i nomo hevi. Eksplenem se Papa long Heven i save mekem ol hevi samting we yumi stap karem oli nomo hevi taem yumi stap lukaotem help blong Hem tru long prea, seves long ol narafala man, mo plante moa.
Stap Tijim Doktrin: Ol Bigfala Pikinini
Taem mi baptaes, mi mekem wan kavenan wetem God.
?Olsem wanem nao yu save helpem ol pikinini we yu stap tijim blong oli andastanem kavenan we yumi stap mekem taem yumi kasem baptaes?
Samfala Aktiviti we Yu Save Mekem
-
Givim wan pis pepa long wanwan pikinini. Ridim tugeta Mosaea 18:8–10, mo invaetem ol pikinini blong raetem o dro long wan saed blong pepa ia, ol promes we yumi mekem long taem blong baptaes mo, long narasaed, ol blesing we Papa long Heven i promesem yumi. Letem olgeta i serem wanem we oli faenem wetem klas. Taem oli stap serem, askem ol kwestin olsem: ?Olsem wanem nao yumi save “krae wetem olgeta we oli stap krae”? ?Wanem nao i minim blong stap olsem wan witnes blong God “long evri ples”? (ves 9). ?Wanem nao yumi save mekem blong kipim ol kavenan blong yumi?
-
Invaetem sam pikinini we oli bin kasem baptaes blong serem wanem oli save tingbaot abaot eksperiens blong olgeta. ?Wanem nao i mekem dei ia i bin spesel? ?Oli bin filim olsem wanem? Eksplenem se evri Sandei oli riniu kavenan blong baptaes blong olgeta taem oli tekem mo kakae sakramen. Helpem ol pikinini blong komperem kavenan blong baptaes olsem we oli tokbaot long Mosaea 18:8–10 wetem ol sakramen prea (luk long D&K 20:77, 79). ?Olsem wanem nao yumi save mekem sakramen wan spesel, kwaet taem, semmak olsem ol taem we yumi bin kasem baptaes?
-
Askem wan we i jes konvet blong serem olsem wanem hem i bin lanem abaot Jos mo olsem wanem oli bin filim taem oli bin kasem baptaes. Letem ol pikinini oli askem ol kwestin; ol kwestin olsem, wanem nao i helpem hem blong wantem blong mekem ol promes ia, mo luk hemia long Mosaea 18:7–16.
Mi wan memba Jos blong Jisas Kraes blong Ol Lata-dei Sent.
?Olsem wanem nao yu save givim insperesen long ol pikinini blong stap talem tangkyu long ol blesing we oli kasem olsem ol memba blong Jos?
Samfala Aktiviti we Yu Save Mekem
-
Invaetem ol pikinini blong ridim Mosaea 18:17–28, mo lukaotem ol tijing blong Jos blong Kraes long ol dei blong Alma we i semmak wetem ol tijing blong taem blong yumi. Raetem ol ansa blong olgeta long ol blok wud o plastik kap, mo letem ol pikinini oli yusum ol samting ia blong bildim wan samting we i save ripresentem Jos blong Jisas Kraes.
-
Singsing wetem ol pikinini, o ridim ol toktok blong “The Church of Jesus Christ” (Children’s Songbook, 77), mo invaetem olgeta blong lisin mo faenem ol samting we yumi promes blong mekem olsem ol memba blong Jos. Helpem olgeta blong tingbaot ol wei we oli save folem blong kipim ol promes ia.
Mosaea 21:1–5, 13–16; 22:1–11; 24:8–22
God i save mekem ol hevi samting oli nomo hevi.
Stori blong ol pipol blong Alma i save soem long ol pikinini se samtaem God i save help taem Hem i mekem yumi kam strong moa blong stap strong kasem en long taem blong ol hadtaem blong yumi, be i no blong tekemaot ol hadtaem ia. ?Olsem wanem nao yu save helpem olgeta blong lanem samting aot long stori ia?
Samfala Aktiviti we Yu Save Mekem
-
Helpem ol pikinini blong luksave ol impoten samting we i bin tekem ples long ol stori blong ol pipol blong Limhae long Mosaea 21:1–5, 13–16; mo 22:1–11 mo ol pipol blong Alma long Mosaea 24:8–22. Afta askem ol pikinini blong dro pikja blong wan long ol taem ia. Invaetem ol pikinini blong putum ol droing blong olgeta folem stret oda blong talem stori ia. Taem oli mekem olsem, poenemaot se God i helpem ol pipol blong save karem ol hevi samting blong olgeta.
-
Invaetem ol pikinini blong ridim Mosaea 21:14–15 mo 24:13–14. ?Olsem wanem nao Lod i ansa long ol prea blong ol pipol blong Limhae mo ol pipol blong Alma? Askem ol pikinini blong serem ol taem we oli bin prea from help long wan hadtaem mo Papa long Heven i bin helpem olgeta, o serem eksperiens blong yuwan.
Stap Leftemap Tingting blong Lanem Samting long Hom
Invaetem ol pikinini blong eksplenem long wan narawan wanem promes oli save mekem, o wanem oli bin promes blong mekem olsem pat blong kavenan blong baptaes blong olgeta.
Stap Kam Antap long Fasin blong Yumi Blong Stap Tij
Lisin long ol pikinini. Sapos ol pikinini oli no save stap kwaet, maet hem i taem blong traem wan nara aktiviti o go long wan sot, kwaet wokbaot. Long nara tingting, sapos oli stap tekpat mo lisin mo stap lanem samting, no filim se yu mas fos blong mas gohed blong kavremap ol nara pat blong lesen.