“4–10 Mei. Mosaea 11–17: ‘Wan Laet … we I Neva Save Kam Tudak,’” Kam Folem Mi—Blong Praemeri: Buk blong Momon 2020 (2020)
“4–10 Mei. Mosaea 11–17” Kam Folem Mi—Blong Praemeri: 2020
Abinadae long Fored blong King Noa, i kam long Andrew Bosley
4–10 Mei.
Mosaea 11–17
“Wan Laet … we I Neva Save Kam Tudak”
Tingting hevi mo prea blong save olsem wanem nao yu save yusum stori blong Abinadae mo ol tijing blong hem long Mosaea 11–17 blong helpem ol pikinini we yu stap tijim. Raetemdaon ol filing mo tingting we yu kasem.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Letem ol pikinini blong serem wanem we oli save abaot stori blong Abinadae mo King Noa. Pikja long aotlaen blong wik ia long Kam Folem Mi—Blong Wanwan Man, Woman mo Famli i save help.
Tijim Doktrin: Ol Smol Pikinini
Mi save stanap from trutok, iven sapos mi stanap miwan.
Tugeta Abinadae mo Alma i gat strong paoa long tingting blong faet from trutok. ?Olsem wanem nao yu save yusum stori ia blong bildimap strong paoa long tingting blong ol pikinini blong ol taem we maet bae oli mas faet from ol bilif blong olgeta?
Samfala Aktiviti we Yu Save Mekem
-
Tokbaot smol stori blong Abinadae, King Noa, mo Alma olsem we i stap long Mosaea 11–13 mo 17. Maet yu save yusum “Japta 14: Abinadae mo King Noa” (Ol Stori long Buk blong Momon, 38–42 o vidio blong hem long ChurchofJesusChrist.org). Invaetem ol pikinini blong aktemaot stori ia, givim olgeta janis blong aktem ol defren pat.
-
Maj wetem ol pikinini taem olgeta i sing wan singsing we i givim insperesen long fasin blong gat strong paoa long tingting, olsem “I Will Be Valiant” (Children’s Songbook, 162). Ridim ol toktok blong singsing ia tugeta, mo helpem ol pikinini blong luksave wanem nao wan man we i no fraet wan man we i gat strong paoa long tingting i save mekem. Jusum sam ves long Mosaea 11–13 mo 17 blong ridim long ol pikinini blong soemaot olsem wanem nao Abinadae mo Alma i no bin fraet (eksampol, luk long Mosaea 13:1–4, 9).
Mi mas obei long ol Ten Komanmen
Ol pris blong King Noa oli save ol komanmen be oli no folem. Ol toktok blong Abinadae i save helpem ol pikinini blong andastanem se i impoten blong stap obei long ol komanmen.
Samfala Aktiviti we Yu Save Mekem
-
Invaetem ol Pikinini blong kaon kasem 10. O givim long olgeta 10 pis pepa we i gat namba long hem mo letem olgeta i putum ol pepa ia folem oda. Eksplenem se Papa long Heven i bin givim long yumi ol Ten Komanmen blong helpem yumi blong go bak stap wetem Hem. Helpem ol pikinini blong talem wetem yu samfala long ol Ten Komanmen long Mosaea 12:33–36 mo 13:11–24.
-
Soem wan pikja blong Moses wetem ol Ten Komanmen (olsem hemia long Gospel Pikja Buk, namba 14), mo eksplenem smol olsem wanem nao Moses i bin kasem ol komanmen long God (luk long Eksodas 19–20). Afta soem wan pikja blong Abinadae (luk long aotlaen blong wik ia long Kam, Folem Mi—Blong Wanwan Man, Woman mo Ol Famli), mo talem long ol pikinini se Abinadae i stap rimaenem King Noa mo ol pris blong hem abaot ol Ten Komanmen. Jusum sam long ol komanmen ia long Mosaea 12:33–36 mo 13:11–24 we yu filim se oli impoten blong ol pikinini we yu tijim mo tokbaot wetem olgeta ol blesing we bae kam taem yu stap obei long ol komanmen ia.
-
Sing tugeta wan singsing, olsem “Keep the Commandments” (Children’s Songbook, 146) ?From wanem nao yumi folem ol komanmen?
Ol profet oli no fraet blong testifae long Jisas Kraes.
Abinadae i bin tijim King Noa mo ol narafala man abaot Jisas Kraes, iven long taem we i gat denja. ?Olsem wanem nao stori blong Abinadae i save mekem ol testemoni blong ol pikinini long ol profet i kam moa strong?
Samfala Aktiviti we Yu Save Mekem
-
Serem wetem ol pikinini sam long ol samting we Abinadae i bin tijim abaot Jisas Kraes long Mosaea 14:5 mo 15:7–9. Helpem ol pikinini blong andastanem se Abinadae i wantem King Noa mo ol pipol blong hem blong folem Jisas blong oli save stap hapi. Long taem blong yumi, ol profet we oli laef oli tijim yumi abaot Sevya. Ridim wan toktok blong jeneral konfrens, o serem wan sot vidio blong wan long ol profet we i stap laef we i stap serem testemoni blong hem abaot Jisas Kraes (eksampol: luk “Special Witnesses of Christ” vidio long ChurchofJesusChrist.org).
-
Soem o dro wan pikja blong ol jen, wan kalabus, mo wan faea. Tijim ol pikinini se Abinadae hem i no fraet blong oli fasem hem, putum hem long kalabus, mo iven bonem hem long faea from testemoni blong hem long Jisas Kraes. Iven sapos bae yumi neva save fesem ol denja olsem ia, ?olsem wanem nao yumi save gat strong paoa long tingting olsem Abinadae blong serem testemoni blong yumi tugeta long ol toktok mo ol joes blong yumi?
Stap Tijim Doktrin: Ol Bigfala Pikinini
Mi save stanap from trutok, iven sapos mi stanap miwan.
?Olsem wanem nao yu save mekem rere ol pikinini we yu stap tijim blong gat strong paoa long tingting blong stanap from raet samting, iven sapos oli mas mekem hemia olgetawan?
Samfala Aktiviti we Yu Save Mekem
-
Invaetem ol pikinini blong dro ol pikja abaot ol defren pat blong stori blong Abinadae, King Noa, mo Alma we i stap long Mosaea 11–13 mo 17. Helpem olgeta blong yusum ol pikja blong olgeta blong talem stori ia bakegen, o yusum “Japta 14: Abinadae mo King Noa” (Ol Stori long Buk blong Momon, 38–42 o vidio blong hem long ChurchofJesusChrist.org). ?Olsem wanem nao Abinadae mo Alma i faet from raet? ?From wanem nao King Noa i no faet from raet? (luk long Mosaea 17:11–12 Helpem ol pikinini blong tingbaot ol taem we oli mas faet from wanem we hem i raet.
-
Helpem ol pikinini blong tingbaot samfala taem we oli save faet from raet samting, mo askem olgeta blong aktemaot sam long ol situesen ia. Eksampol, wanem nao oli save mekem sapos wan man i wantem mekem olgeta blong wajem wan rabis muvi o sapos we ol fren blong olgeta oli no wantem letem wan i joenem olgeta long wan gem we oli stap plei long hem?
-
Soem vidio ia “Dare to Stand Alone” (ChurchofJesusChrist.org). ?Olsem wanem nao Presiden Thomas S. Monson hem i semmak olsem Abinadae?
Mi mas obei long olgeta Ten Komanmen.
Abinadae i bin tijim King Noa mo ol nogud pris blong hem abaot ol Ten Komanmen. Ol pikinini we yu stap tijim, ?oli andastanem from wanem yumi mas lavem mo stap obei long ol komanmen?
Samfala Aktiviti we Yu Save Mekem
-
Givim wok long wanwan pikinini blong ridim wan long ol komanmen long Mosaea 12:35 mo 13:11–24. Helpem ol pikinini blong tingbaot sam gudfala wei we yumi save helpem wanwan long yumi blong rimemba wanwan komanmen (olsem ol toktok we i raem, wan aksen, o wan sot mining). Singsing ia “The Commandments” (Children’s Songbook, 112) i save help tu. Givim long ol pikinini ol pis pepa we i sep blong wan hat, mo invaetem olgeta blong raetem wan o moa long olgeta Ten Komanmen long ol hat blong olgeta (luk long Mosaea 13:11)—maet bae oli raetem wan komanmen ia we oli filim se oli mas traehad moa blong stap obei long hem.
-
Sing tugeta wan singsing abaot ol komanmen, olsem “Keep the Commandments” (Children’s Songbook, 146). ?Wanem nao ol blesing we oli kam taem yumi stap obei ol komanmen?
Ol skripja oli tijim yumi ol komanmen blong God.
Taem mi sin, mi lusum rod; from Jisas Kraes, mi save faenem rod bakegen.
Blong tij abaot Jisas Kraes, Abinadae i talem toktok blong profet Aesea, we i komperem yumi wetem sipsip we i lus. ?Olsem wanem nao yumi save yusum toktok ia blong tijim ol pikinini abaot Sevya?
Samfala Aktiviti we Yu Save Mekem
-
Invaetem ol pikinini blong serem ol eksperiens we oli bin lusum wan samting o olgeta nao oli i bin lus. ?Oli bin filim olsem wanem? ?Oli bin mekem wanem? Ridim tugeta Mosaea 14:6 mo 16:4–9. ?Olsem wanem nao, samtaem, yumi stap go “olbaot” aot long God? ?Olsem wanem nao Jisas Kraes i stap helpem yumi blong kambak?
-
Invaetem ol pikinini blong traem tingbaot wan grup blong ol sipsip. ?Wanem nao sam risen we maet i mekem se wan long ol sipsip ia i go lus? Mekem wan lis blong ol ansa blong olgeta long bod. ?Olsem wanem nao yumi semmak olsem wan sipsip we i go wokbaot olbaot? ?Olsem wanem nao maet bae Papa long Heven i filim taem yumi “kambak” tru long fasin blong sakem sin mo Atonmen blong Sevya? (luk long D&K 18:10–13). Serem testemoni blong yu abaot Sevya mo fasin blong sakem sin.
Stap Leftemap Tingting blong Lanem Samting long Hom
Invaetem ol pikinini blong askem long ol memba blong famli blong olgeta blong serem ol eksperiens we oli bin faet from trutok, o leftemap tingting blong ol pikinini blong serem ol eksperiens blong olgetawan.
Stap Kam Antap long Fasin blong Yumi Blong Stap Tij
Fasin blong ripit hem i ki blong lanem samting. Ol pikinini oli mekem gud moa taem oli harem wan gospel prinsipol o mekem wan aktiviti moa bitim wan taem. Traem blong stap ripitim ol aktiviti long plante defren wei.