Minerva K. Teichert (1888-1976), King Limhae mo Ol Pipol blong Hem Oli Ronwe, 1949-1951, oel long mesonaet, 35 7/8 x 48 inj. Brigham Yang Yunivesiti blong Art, 1969.

11–17 Mei.

Mosaea 18–24

Mifala I Bin Mekem Wan Kavenan wetem Hem

Presiden Thomas S. Monson i talem: “Taem yumi stap ridim mo tingting hevi long olgeta skripja, bae yumi eksperiensem ol swit kwaet toktok blong Spirit we i go long sol blong yumi” (“We Never Walk Alone,” Ensign o Liahona, Nov 2013, 122).

Raetemdaon Ol Filing mo Tingting blong Yu

Stori blong Alma mo ol pipol blong hem long Mosaea 18; 23–24 i soem wanem i minim blong “kam long yad blong God” (Mosaea 18:8). Taem oli kasem baptaes, oli bin mekem wan kavenan wetem God blong “wok blong Hem mo obei ol komanmen blong hem” (Mosaea 18:10). Hemia i bin bigfala komitmen we wanwan i mas mekem, mo tu, hem i tokbaot hao nao yumi mas mekem long wanwan long yumi. Yes, wokbaot we i gobak long Papa long Heven, hem i blong yuwan nomo, mo i no gat wan i save kipim ol kavenan long bihaf blong yumi, be hemia i no minim se yumi stap yumiwan. Yumi nidim wanwan long yumi. Olsem ol memba blong Jos blong Kraes, yumi mekem kavenan blong wok blong God taem yumi stap helpem mo givim seves long wanwan long yumi folem rod ia, “we yumi karem ol hevi samting blong wanwan long yumi” (Mosaea 18:8–10). Ol pipol blong Alma, i tru, oli bin gat ol hevi samting blong tekem, semmak olsem yumi tu. Mo wan wei we Lod i stap helpem yumi “save karem ol hevi samting blong olgeta isi nomo” (Mosaea 24:15), i taem Hem i givim yumi wan komuniti blong Ol Sent we oli bin promes blong krae wetem yumi, mo leftemap tingting blong yumi, semmak olsem we yumi bin promes blong mekem long olgeta.

Sam Aedia blong Skripja Stadi blong Yuwan

Mosaea 18:1–17

Baptaes hem i gat wan kavenan we hem i blong wok blong God mo stanap olsem wan witnes blong Hem.

Mosaea 18:8–10 : insaed i gat ol tijing blong Alma abaot kavenan blong baptaes, o promes ia we yumi mekem wetem God long taem blong baptaes. Taem yu stap ridim ol ves ia, tingting hevi long olgeta kwestin ia:

• ?Wanem nao yu stap lanem aot long ol promes ia we yu stap mekem long taem blong baptaes? ?Wanem nao God i stap promesem yu?

• ?Olsem wanem nao kavenan ia blong wok blong God (luk long ves 10i joen i go long ol traehad blong yumi blong givgivhan long wanwan long yumi? (luk long ol ves 8–9).

• ?Wanem nao yu stap mekem blong kipim ol promes blong yu i stap?

• ?Olsem wanem we taem yu stap kipim kavenan blong baptaes i stap helpem yu blong “stap fulap wetem Spirit”? (Mosaea 18:14). ?Olsem wanem nao Spirit i stap helpem yu blong kipim kavenan blong yu?

Taem mi mekem ol kavenan wetem God, mi stap kasem ol blesing blong Hem.

Stori ia i talemaot stret wei blong mekem baptaes. ?Wanem nao yu lanem long ol ves 14–17 long saed blong wei we oli sapos blong mekem wan baptaes? ?Wanem moa yu lanem abaot baptaes aot long Matiu 3:16; Rom 6:3–5; 3 Nifae 11:21–28; mo Doktrin mo Ol Kavenan 20:72–74?

Luk tu long Doktrin mo Ol Kavenan 20:37, 77, 79.

Mosaea 18:17–30

Pipol blong God oli mas yunaet.

Olsem we Alma mo ol pipol oli bin stap faenem, blong folem Jisas Kraes, samtaem i minim blong aot long wan wei blong laef we yumi yus long hem, mo folem wan niu mo defren samting. Be ol pipol blong Alma oli stap tekem paoa aot long olgeta wanwan from oli pat blong “jos blong Kraes” (Mosaea 18:17). ?Olsem wanem nao ol tijing insaed long Mosaea 18:17–30 i givim insperesen long yu blong stap olsem wan memba blong Jos we i gud moa? ?Wanem nao yu save mekem blong helpem ol memba blong wod o branj blong yu oli gat “hat blong olgeta oli joen tugeta blong kam wan long lav”? (Mosaea 18:21).

Luk tu long Henry B. Eyring, “Our Hearts Knit as One,” Ensign o Liahona, Nov. 2008, 68–71.

Mosaea 19–20

Ol toktok blong ol profet bambae oli kamtru.

Abinadae i mekem sem spesifik profesi abaot wanem bae i hapen long King Noa mo ol pipol blong hem sapos oli no wantem blong sakem sin. Be sam oli luk se i no posibol blong bilivim ol profesi ia (luk long Mosaea 12:1–8, 14–15), speseli from se Ol Man blong Nifae oli bin gud blong stap difendem olgeta agensem Ol Man blong Leman blong kolosap 50 yia (luk long Mosaea 9:16–18; 11:19). Be ol toktok blong ol profet, evriwan bae oli kamtru—long taem blong yumi tedei, semmak olsem long taem blong Abinadae.

?Wanem nao yu faenem long Mosaea 19–20 we bae i lidim Gidion blong talemaot se ol profesi blong Abinadae oli bin kamtru? (luk long Mosaea 20:21). ?Olsem wanem stori ia i mekem bilif blong yu i kam strong moa long ol woning mo ol kaonsel blong ol profet blong God, mo long komitmen blong yu blong folem toktok blong olgeta? ?Wetaem nao yu bin luk ol toktok blong ol profet oli kamtru long taem blong yumi tedei?

Mosaea 21–24

Lod i save mekem ol trabol blong mi oli nomo hevi.

Ol pipol blong Limhae mo ol pipol blong Alma, tufala tugeta i foldaon long fasin blong stap slef, nomata i from ol defren risen mo long ol defren situesen. ?Wanem nao yu lanem taem yu komperem ol stori blong ol pipol blong Limhae we i stap long Mosaea 19–22 mo stori blong ol pipol blong Alma long Mosaea 18; 23–24? Yu save luk olsem wanem wan long ol grup ia oli fesem fasin blong stap prisena, o long wanem wei nao wanwan long tufala pipol ia oli bin kam fri. Taem yu stap mekem olsem, lukaotem ol mesej we bae yu yusum long laef blong yu. Eksampol, ?Wanem yumi stap lanem aot long ol stori ia we i save helpem yu tekem ol hevi samting blong laef blong yu?

Mosaea 23:21–24; 24:8–17

Mi save trastem Lod.

I nomata we oli bin sakem ol sin blong olgeta, Alma mo ol pipol blong hem oli stap yet long fasin blong stap slef. Ol eksperiens ia i soem se blong trastem Lod mo blong stap laef folem ol kavenan blong yumi, i no stap blokem ol hadtaem blong yumi oltaem, be i helpem yumi blong winim olgeta hadtaem ia. Taem yu stap ridim Mosaea 23:21–24 mo 24:8–17, makem ol toktok mo ol sentens we i save helpem yu blong trastem God, i nomata situesen blong yu.

Luk tu long Thomas S. Monson, “I Will Not Fail Thee, no Fosake Thee,” Ensign o Liahona, Nov. 2013, 85–87.

Sam Aedia blong Famli Skripja Stadi mo Famli Haos Naet

Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:

Mosaea 18:1–4

I gat wan toktok we i talem se yu save kaontem ol sid we oli stap insaed long wan apol, be yu no save kaontem ol apol we oli kamaot long wan sid. I gat wan man nomo i bin lisin mo mekem folem testemoni blong Abinadae, be wan man ia nomo—Alma—i bin lidim tingting blong plante jeneresen blong Ol Man blong Nifae. Maet yu save yusum wan frut we i gat sid blong hem, blong save soem prinsipol ia. ?Olsem wanem nao mesej ia i go tu wetem famli blong yumi? ?Wanem nao yumi save mekem blong serem ol testemoni blong yumi wetem ol narawan?

Mosaea 18:8–10

?Wanem nao yumi save lanem abaot kavenan blong yumi blong baptaes, aot long ol ves ia? (luk tu long D&K 20: 73, 77 73). ?Wanem nao yumi stap mekem blong rere, o blong kipim kavenan blong yumi blong baptaes?

Mosaea 18:30

?Wanem ples nao i gat wan spesel mining long yumi from ol eksperiens long saed blong spirit we yumi bin gat long ples ia?

Mosaea 21:11–16; 24:10–15

?Wanem nao yumi lanem taem yumi komperem ol stori blong stap olsem ol prisena blong ol pipol blong Alma mo stori blong ol pipol blong Limhae?

Mosaea 21:15; 24:11–15

?Wanem nao ol ves ia oli stap tijim yumi abaot sam long ol wei we Lod i stap ansarem ol prea blong yumi?

Blong gat moa aedia blong stap tijim ol pikinini, luk long aotlaen blong wik ia insaed long Kam Folem Mi—Blong Praemeri.

Stap Kam Antap long Stadi blong Yuwan

Faenem wan taem we i stret long yu. Plante taem, i isi moa blong lanem samting taem we yu save stadi ol skripja we i no gat man i kam stopem yu smol. Faenem wan taem we i stret long yu, mo mekem bes blong stadi oltaem long sem taem ia long evri dei.

Ol Wota blong Momon, i kam long Jorge Cocco