“13–19 Epril. Mosaea 1–3: ‘Fulap long Lav long God mo long Evri Man,’” Kam Folem Mi—Blong Wanwan Man, Woman mo Famli: Buk blong Momon 2020 (2020)
“13–19 Epril. Mosaea 1–3,” Kam Folem Mi—Blong Wanwan Man, Woman mo Famli: 2020
Minerva K. Teichert (1888–1976), King Benjamin I Talem Tata, 1935, oel long mesonaet, 36 x 48 inj. Brigham Yang Yunivesiti blong Art
13–19 Epril.
Mosaea 1–3
“Fulap long Lav long God mo long Evri Man”
King Benjamin i givim wan risen blong from wanem nao yumi mas raetemdaon ol tingting mo filing blong yumi long saed blong spirit: “From i no save hapen se papa blong yumi, Lihae, i save tingbaot evri samting ia, blong hem i save tijim olgeta long ol pikinini blong hem, sapos i no bin gat help blong ol buk ia” (Mosaea 1:4).
Raetemdaon Ol Filing mo Tingting blong Yu
Taem yu harem toktok ia, king, yu save tingting long hat blong king, ol bigbigfala haos, ol wokman, mo ol jea blong king. Long Mosaea 1–3, bae yu rid abaot wan defren kaen king. Hem i no stap laef aot long ol wok blong ol pipol blong hem; King Benjamin “i bin wok wetem ol han blong [hem] nomo” (Mosaea 2:14). Hem i no stap mekem ol narafala man oli wok blong hem, hem nao i wok blong ol pipol “wetem ful paoa blong tingting, ful maen, mo ful paoa we Lod i bin givim long [hem]” (Mosaea 2:11). King ia i no wantem se ol pipol blong hem oli wosipim hem; be, hem i tijim olgeta blong wosipim wan King we i hae moa long hem, from se hem i bin andastanem se hem i “Lod we i gat Ol Paoa we i stap rul” (Mosaea 3:5). Olsem ol bigfala lida insaed long kingdom blong God, ol toktok blong King Benjamin mo eksampol blong hem oli poenem yumi long King we i stap long Heven, we i Sevya, Jisas Kraes. King Benjamin i testifae se Jisas “i aot long heven i kam daon” mo i “go long medel blong ol man, i mekem ol bigfala merikel. … Mo luk, hem i kam long ol man blong hem blong mekem se fasin blong sevem man i save kam long ol pikinini blong ol man, tru long fet long nem blong hem” (Mosaea 3:5, 9).
Sam Aedia blong Skripja Stadi blong Yuwan
Blong kasem toktok blong God, i nidim blong yu rere.
Taem King Benjamin i sendem toktok i go se hem i wantem toktok long ol pipol blong hem, plante pipol tumas oli bin kam “mekem se [oli] no kaontem olgeta tu” (Mosaea 2:2). Wan risen from wanem oli bin kam, i from fasin blong talem tangkyu mo from lav we oli gat long lida blong olgeta. Be moa impoten long hemia, oli bin kam blong oli tijim olgeta long toktok blong God.
Taem yu stap ridim Mosaea 2:1–9, lukaotem ol samting we ol pipol oli bin mekem blong soem se oli tekem ol toktok blong God oli impoten. ?Wanem nao King Benjamin i bin askem olgeta blong mekem blong save rere blong harem toktok blong God? (luk long ves 9). ?Olsem wanem yu save rere gud moa blong kasem toktok blong God long stadi blong yuwan mo famli stadi mo long taem blong ol miting long Jos?
Luk tu long Matiu 13:18–23; Alma 16:16–17.
Taem mi givim seves long ol narafala man, mi stap givim seves tu long God.
?Yu yu stap traehad tumas blong faenem taem blong givim seves, o yu wantem se seves blong yu i tekem moa glad i kam long yu? ?Yu yu ting se King Benjamin bae i talem wanem sapos yu askem hem from wanem hem i wok wetem “ful paoa blong tingting, ful maen, mo ful paoa”? (Mosaea 2:11). Taem yu stap ridim Mosaea 2:10–26faenemaot ol trutok we King Benjamin i bin tijim abaot seves, mo tingting hevi long hao nao yu save yusum ol trutok ia insaed long laef blong yu. Eksampol, ?hem i minim wanem long yu blong save se taem yu stap givim seves long ol nara pipol, yu stap givim seves tu long God? (luk long Mosaea 2:17). !Tingting long wan wei we yu save givim seves long wan long wik ia!
Luk tu long Matiu 25:40.
Taem mi givim seves long ol narafala man, mi stap givim seves tu long God.
Mi save winim man ia we i folem fasin blong wol mo kam wan sent tru long Atonmen blong Jisas Kraes.
King Benjamin, olsem evri profet, i bin testifae abaot Jisas Kraes, blong mekem se ol pipol blong hem “oli save kam klin aot long ol sin blong olgeta mo stap glad wetem wan glad we i bigwan tumas” (Mosaea 3:13). Hem i tijim tu se Sevya, tru long Atonmen blong Hem, i no mekem yumi kam klin nomo, be tu, Hem i givim yumi paoa blong sakemaot “man we i folem fasin blong wol” mo i kam “wan sent” (Mosaea 3:19; luk tu long Gaed long Ol Skripja, “Man, we I Folem Fasin blong Wol,” scriptures.ChurchofJesusChrist.org).
Elda David A. Bednar i eksplenem: “Atonmen blong Jisas Kraes nao i givim tugeta samting ia, paoa blong klinim mo pemaot man we i stap helpem yumi blong winim sin, mo paoa blong mekem man i kam tabu mo i kam strong moa, we i helpem yumi blong kam gud moa bitim we bae yumi save mekem sapos yumi stap dipen nomo long paoa blong yumiwan. Atonmen ia we i no gat en, hem i blong man we i mekem sin, mo tu, hem i blong sent ia we i stap insaed long wanwan long yumi” (“Clean Hands and a Pure Heart,” Ensign o Liahona, Nov. 2007, 82).
Hemia samfala kwestin blong tingting hevi long hem taem yu stap ridim testemoni blong King Benjamin abaot Sevya insaed long Mosaea 3:1–20:
-
?Wanem nao yumi stap lanem aot long ol ves ia abaot Sevya mo misin blong Hem?
-
?Olsem wanem nao Jisas Kraes i helpem mi blong winim sin? ?Olsem wanem nao Hem i bin helpem mi blong jenisim fasin blong mi mo kam moa olsem wan sent?
-
?Wanem nao mi lanem abaot fasin blong kam wan sent aot long Mosaea 3:19?
?From wanem King Benjamin i talem se Jisas hem i olsem “Papa blong heven mo blong wol?”
Presiden Joseph F. Smith i eksplenem: “Jisas Kraes, we yumi save long hem tu olsem Jehova, i man blong wokem ol samting blong Papa, we i Elohim, insaed long wok blong kriesen blong wol. … Jisas Kraes, we i Krieta, oltaem oli singaotem hem Papa blong heven mo wol … ; mo from se ol kriesen blong Hem, kwaliti blong hem i blong taem we i no save finis, nao i stret blong oli singaotem Hem, Papa we I No Save Finis blong heven mo wol” (Teachings of Presidents of the Church: Joseph F. Smith [1998], 357).
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:
Mosaea 1:1–7
?Olsem wanem nao ol buk ia we oli wokem long bras mo ol buk blong Nifae oli blesem ol pipol blong King Benjamin? ?Olsem wanem nao ol skripja oli blesem famli blong yumi?
Mosaea 2–3
Bae i wan gud taem aktiviti blong famli blong yu i krietem taem ia we King Benjamin i toktok. Yufala i save mekem wan smol taoa, mo letem ol memba blong famli oli tekem taem, wan afta wan, blong stanap antap long taoa ia mo ridim ol toktok blong King Benjamin. Haf blong famli oli save lisin, we oli sidaon insaed long wan tenet we oli mekemap.
Mosaea 2:9–19
?Wanem nao yumi lanem abaot seves aot long ol tijing mo eksampol blong King Benjamin? ?Wanem nao yumi filim insperesen blong go mekem?
Mosaea 2:15–25
?Bae i helpem famli blong yu blong toktok raon long fasin blong gat tingting i stap daon? ?From wanem King Benjamin i no stap tok flas abaot evri samting we hem i bin mekem? ?Wanem nao yumi save lanem aot long ol tijing blong hem abaot rilesensip blong yumi wetem God?
Mosaea 2:36–41
?Wanem nao King Benjamin i bin tijim abaot ol risal blong save trutok be no stap laef folem? ?Wanem nao hem i stap tijim abaot wei blong kasem tru hapines?
Mosaea 3:19.
?Wanem nao yumi nid blong mekem blong kam ol sent? ?Wanem fasin we i stap long ves ia, yumi save lukluk moa blong developem olsem wan famli?
Blong gat moa aedia blong stap tijim ol pikinini, luk long aotlaen blong wik ia insaed long Kam Folem Mi—Blong Praemeri.
Stap Kam Antap long Stadi blong Yuwan
Setem ol gol we yu save kontrolem. Blong spendem iven sam minit nomo long wan dei blong stap stadi long ol skripja i save blesem laef blong yu. Blong komitim yuwan blong stap stadi evri dei, mo faenem wan wei blong rimaenem yuwan bakegen long komitmen ia.
Toktok blong King Benjamin i kam long Jeremy Winborg