“17–23 Febwari. 2 Nifae 11-25: ‘Mifala I Glad long Kraes,’” Kam Folem Mi—Blong Wanwan Man, Woman mo Famli: Buk blong Momon 2020 (2020)
“17–23 Febwari. 2 Nifae 11–25,” Kam Folem Mi—Blong Wanwan Man, Woman mo Famli: 2020
17–23 Febwari
2 Nifae 11–25
“Mifala I Glad long Kraes”
Nifae i tijim se ol toktok blong Aesea “oli klia long olgeta we oli fulap wetem spirit blong profesi” (2 Nifae 25:4). Taem yu stap rid, lukaotem spirit blong profesi i stap wetem yu taem yu rere yuwan long saed blong spirit, mo stap lisin long Spirit, mo stap raetemdaon ol filing mo tingting we oli kam long yu.
Raetemdaon Ol Filing mo Tingting blong Yu
Blong stap raet antap long ol buk o pej we oli wokem long aean, i no wan isi samting, mo spes long ol smol buk blong Nifae, i smol nomo. ?So from wanem nao Nifae i mas wok had bigwan blong kopi plante raeting blong Aesea i go long buk blong hem? Hem i bin mekem olsem blong “evri man long ol pipol blong mi we oli luk ol toktok ia bae oli save leftemap hat blong olgeta mo glad from evri man” (2 Nifae 11:8). Long wan wei, invitesen ia blong ridim ol raeting blong Aesea, i wan invitesen blong stap glad. Yu save stap glad, semmak olsem Nifae, long ol profesi blong Aesea long saed blong kam tugeta blong Isrel, taem ia we bae Mesaea i kam, mo pis blong taosen yia we i kam olsem promes long olgeta we oli stret mo gud. Yu save stap glad se, iven long wan dei blong “trabol, mo tudak,” yu “bin luk wan bigfala laet” (2 Nifae 18:22; 19:2). Yu save stap glad se yu save “kasem wota aot long ol wel blong fasin blong sevem man” (2 Nifae 22:3). Long nara toktok, yu save “glad long Kraes” (2 Nifae 25:26).
Sam Aedia blong Skripja Stadi blong Yuwan
?Olsem wanem nao mi save andastanem gud moa ol tijing blong Aesea?
Nifae i luksave mo talem se, long sam, “ol toktok blong Aesea oli no klia” (2 Nifae 25:4). Hemia i tru long olgeta we oli no save gud long kalja fasin blong Ol Jiu bifo, mo oli no save ol ples, olsem we Nifae i bin save (luk long 2 Nifae 25:6). Be Nifae i givim advaes blong helpem yumi faenem mining long ol raeting blong Aesea:
-
“Yusum ol toktok blong hem” long yuwan (2 Nifae 11:2).Plante long ol tijing blong Aesea oli gat plante posibol mining mo fasin blong yusum. Eksampol: ol raeting blong hem long saed blong seraot mo kam tugeta blong Isrel i save mekem yu tingting abaot nid blong yu, blong yu “kam tugeta” i kambak long Sevya.
-
Blong yu lukaot blong yu “fulap long spirit blong profesi” (2 Nifae 25:4).Bes wei blong andastanem ol profesi blong Aesea i blong askem insperesen we i kam long Spirit. Prea blong kasem spirit i lidim yu. Maet bae yu no andastanem evri samting long wan taem ia nomo, be Spirit i save helpem yu blong lanem wanem yu nidim blong save blong laef blong yu tedei.
Maet bae yu faenem se bae i helpem yu tu blong stadi long ol help tul insaed long ol skripja, olsem ol futnot, ol heding blong ol japta, Gaed long Ol Skripja, mo ol narawan moa.
“Raet wei, hem i blong biliv long Kraes.”
Nifae hem i stat blong talem ol toktok blong Aesea mo i finis blong talem ol toktok blong Aesea wetem testemoni blong hem abaot Jisas Kraes (luk long 2 Nifae 11:2–8; 25:19–29). ?Wanem nao i kam long filing mo tingting blong yu abaot testemoni blong hem? Taem yu stap stadi long wik ia, tingting long ol tingting blong Nifae we hem i bin wantem blong “winim tingting blong ol pikinini blong [hem], … blong oli biliv long Kraes, mo blong oli stretem olgeta wetem God” (2 Nifae 25:23), mo notem ol ples we i winim tingting blong yu blong biliv, mo blong folem Jisas Kraes.
Bae i save help blong tingbaot se plante long ol tijing blong Aesea long saed blong Sevya, oli kam tru long ol simbol, o saen. Eksampol: yu save luk Sevya long ol simbol olsem Masta blong plantesen (luk long 2 Nifae 15:1–7), wan ston (luk long 2 Nifae 18:14), mo wan laet (luk long 2 Nifae 19:2). ?Wanem nara simbol i stap we i ripresentem Jisas Kraes, insaed long ol japta ia? ?Wanem nao ol simbol ia oli stap tijim yu abaot Hem?
Olgeta we oli gat hae tingting mo oli tingting long ol samting blong wol, bambae oli putum tingting blong olgeta i stap daon.
Nifae i bin luk finis se hae tingting bae i mekem se ol pipol blong hem bae oli foldaon (luk long 1 Nifae 12:19). So, i no wan sapraes we Nifae i wantem ripitim long ol pipol blong hem ol woning ia we Aesea i talem abaot fasin blong gat hae tingting. Long ol japta 12 mo 13, lukaotem ol toktok we Aesea i yusum blong tokbaot fasin blong gat hae tingting, olsem hae lukluk mo ol flas. Afta, yu save traem talem ol woning ia wetem stret toktok blong yuwan, olsem se yu nao yu stap raetem wan mesej i go long yuwan abaot fasin blong gat hae tingting.
Luk tu long “Japta 18: Beware of Pride” (Teachings of Presidents of the Church: Ezra Taft Benson [2014], 229–40).
2 Nifae 12:2–5; 21:9–12; 22; 24:1–3
Long Mileniom taem, ol pipol blong God bae oli glad long pis we bae i stap.
Bae i save help blong gat pikja ia, long maen blong yu, we yu luk yuwan long ples blong Nifae mo ol pipol blong hem. Traem tingting we yu ronwe long Jerusalem jes bifo Lod i prapa spolem gud ples ia (luk long 2 Nifae 25:10), mo naoia, yu yu pat blong seraot ia blong Israel. ?Bae yu filim olsem wanem blong ridim ol tijing blong Aesea long saed blong fiuja seraot blong Isrel mo wan taem blong pis long Mileniom? Olsem ol Lata-dei Sent, oli singaotem yumi blong help blong pulum tugeta ol pipol blong God long ol las dei, blong rere blong taosen yia blong rul blong Kraes. Taem yu stap ridim ol ves ia, tingting hevi long olsem wanem nao yu stap help blong mekem ol profesi ia we oli tokbaot oli kamtru. ?Wanem nao yumi filim insperesen blong go mekem blong pulum tugeta ol pipol blong God?
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:
2 Nifae 12:1–3
Sapos yu bin go long tempol finis—“bigfala hil blong haos blong Lod”—bae yu save serem wetem famli blong yu olsem wanem ol kavenan blong tempol oli stap helpem yu blong “wokbaot long ol rod blong Lod.” Sapos yu no go long tempol yet, blong ridim ol ves ia tugeta i save givim insperesen blong toktok raon long hao nao yufala i save rere blong kasem ol blesing blong tempol.
2 Nifae 15:18–23
?Famli blong yu i save tingting long sam eksampol blong taem tedei abaot ol tingting we oli no stret mo no gud, we ol ves ia oli tokbaot? ?Olsem wanem nao yumi save mekem blong ol giaman aedia ia abaot gud mo nogud, oli no trikim yumi?
2 Nifae 21
Sapos famli blong yu i nidim blong andastanem japta ia (we i semmak long Aesea 11), bae yu faenem sam niu tingting insaed long Doktrin mo Ol Kavenan 113:1–6; insaed ia, Profet Josef Smit i stap ansarem samfala kwestin abaot Aesea 11. ?Wanem nao yu lanem abaot Jisas Kraes aot long ol ves ia?
2 Nifae 21:9
?Wanem sam stret samting we yumi save mekem blong fulumap wol ia wetem “save blong Lod?
2 Nifae 25:23–26
?Olsem wanem nao yu save helpem ol memba blong famli blong yu blong “stap glad long Kraes”? Mebi yu save invaetem olgeta blong raet long pepa sam samting abaot Sevya we i mekem olgeta oli stap glad. Afta, long sam fiuja famli haos naet, o famli skripja stadi, wan i save ridim wan long ol pepa ia. Ol memba blong famli oli save ademap ol pis pepa ia truaot long yia.
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Stap Kam Antap long Stadi blong Yuwan
Lukaotem sam paten we i stap. Insaed long ol skripja, yumi save faenem ol paten we oli soem yumi olsem wanem nao Lod i stap wok. Eksampol: long 2 Nifae 11–25, yu save faenem ol paten we oli soem olsem wanem Lod i stap givim ol woning mo i stap fogiv.
Panama Siti Panama Tempol “Haos blong Lod bae i stanap antap long ol bigfala hil, mo bae i go hae antap i bitim ol hil, mo evri kantri bae oli go long hem” (2 Nifae 12:2).