“3–9 Febwari. 2 Nifae 1–5: ‘Mifala I Bin Laef Folem Fasin blong Stap Hapi,’” Kam Folem Mi—Blong Wanwan Man, Woman mo Famli: Buk blong Momon 2020 (2020)
“3–9 Febwari. 2Nifae 1–5,” Kam Folem Mi—Blong Wanwan Man, Woman mo Famli: 2020
Adam mo Iv, i kam long Douglas Fryer
3–9 Febwari
2 Nifae 1–5
“Mifala I Bin Laef Folem Fasin blong Stap Hapi”
Ol skripja oli openem doa blong yumi kasem revelesen blong yumiwan. Taem yu stap ridim 2 Nifae 1–5, bae yu save faenem se Lod i gat wan samting i stap, we Hem i wantem tijim long yu.
Raetemdaon Ol Filing mo Tingting blong Yu
Sapos yu save se bae laef blong yu i finis, ?wanem ol las mesej nao bae yu wantem serem wetem olgeta we yu lavem tumas? Taem profet Lihae i bin filim se hem i stap kam kolosap long en blong laef blong hem, hem i singaotem ol pikinini blong hem oli kam tugeta wan las taem, blong hem i profesae mo serem ol trutok blong gospel we hem i laekem mo holemtaet wetem ol pipol we hem i laekem tumas. Hem i tijim fasin blong stap fri, blong stap obei, Foldaon blong Adam mo Iv, fasin blong pemaot man tru long Jisas Kraes, mo glad. I no evriwan long ol pikinini blong hem we oli akseptem las testemoni blong hem, be olgeta we oli bin akseptem—wetem ol milian we oli stap ridim tedei—oli bin faenem, insaed long testemoni blong hem, ol prinsipol blong stap laef “folem fasin blong stap hapi” (2 Nifae 5:27).
Sam Aedia blong Skripja Stadi blong Yuwan
Mi mi fri blong jusum laef we i no save finis.
Elda D. Todd Christofferson i talem: “God i wantem luk se ol pikinini blong Hem oli mas tekem aksen i folem fridom blong joes we Hem i bin givim long olgeta. … Hem i plan mo tingting blong Hem se, yumi nao, i gat rol ia blong mekem desisen long wanem i stap hapen insaed long laef blong yumiwan.” (“Free Forever, to Act for Themselves,” Ensign o Liahona, Nov. 2014,16). Long ol tijing blong Hem abaot fridom blong joes, Lihae i poenem ol stamba kondisen we i mekem se i posibol blong gat fridom blong joes, mo i givim paoa long yumi blong kasem ful paoa blong yumi we i kam long heven, mo i tekem olgeta samting ia:
-
Wan save long saed blong wanem i gud mo nogud (2 Nifae 2:5)
-
Wan loa we God i givim long ol man (2 Nifae 2:5)
-
Ol joes we oli agens, mo oli switim man (2 Nifae 2:11)
-
Paoa blong tekem aksen (2 Nifae 2:16)
Taem yu stap ridim 2 Nifae 2, ?wanem nao yu stap lanem abaot wanwan long ol kondisen ia blong fridom blong joes mo rilesensip bitwin olgeta? ?Wanem nao i save hapen long fridom blong joes blong yumi sapos i no gat wan o moa long wan long ol kondisen ia? ?Wanem moa yu stap lanem abaot fridom blong joes we i kamaot long ol toktok blong Lihae?
Foldaon mo Atonmen blong Jisas Kraes, oli ol stamba pat insaed long plan blong Papa long Heven.
Plante pipol oli stap biliv se Foldaon blong Adam mo Iv, i wan nogud taem. Be, ol tijing blong Lihae abaot Foldaon ia, i soemaot se from wanem i bin wan pat we i impoten insaed long plan blong Papa, blong yumi save progres blong taem we i no save finis. Taem yu stap ridim ol ves ia, lukluk se from wanem nao i bin nid blong Foldaon i mas hapen blong mekem se, yumi—ol pikinini blong Papa long Heven–yumi save progres. ?Olsem wanem nao sakrifaes ia blong Sevya, we i pem praes, i bin pemaot yumi long Foldaon ia?
Luk tu long Moses 5:9–12; 6:51–62; “Fall of Adam and Eve,” Gospel Topics, topics.ChurchofJesusChrist.org.
God i bin odenem Josef Smit finis bifo blong hem i putumbak gospel ia.
Las pat blong 2 Nifae 3 i tekem wan profesi, we Josef blong Ijip nao i talem abaot wan fiuja sia we bae i tekem sem nem blong hem (luk long ves 14–15)—Josef Smit. Hem i gat fulap samting blong talem abaot misin blong Josef Smit. Ol ves ia, ves 6–24 ?oli talem wanem abaot wanem we Josef Smit, we i wan “sia we God i jusum,” bae i mekem blong blesem ol pipol blong God? ?Olsem wanem nao wok blong Josef Smit i bin wan “wok we i gat bigfala valiu” long yu?
Wan impoten pat blong misin blong Josef Smit, hem i blong tekem ol raeting blong laen blong Josef oli kamtru; hemia ol raeting we oli stap long Buk blong Momon. ?Wanem nao yu lanem aot long japta ia abaot hamas nao Buk blong Momon i impoten?
Luk tu long Josef Smit Translesen, Jenesis 50:24–38 (insaed long Baebol Apendiks).
Profet blong Lod, i kam long David Lindsley
Mi save tanem mi i go long God long taem we mi no strong.
Nifae i jes lusum papa blong hem. Responsabiliti ia blong lidim famli blong hem, naoia i stap long solda blong hem. Hem i filim se temtesen i raonem hem, mo tingting blong hem i bin slak from ol sin blong hem. I nomata se situesen blong yu i defren long hemia blong Nifae, bae yu save luk yu insaed long samfala tingting mo filing we hem i bin raetemdaon long 2 Nifae 4:15–35. ?Wanem nao i bin helpem Nifae long ol hadtaem blong hem? ?Olsem wanem nao wei we Nifae i fesem ol jalenj blong hem, i helpem yu blong fesem ol traehad blong yu?
Hapines, oli faenem insaed long fasin blong laef folem gospel.
?Hapines, hem i wanem? ?Hao bae yu tokbaot hapines? Nifae i bin raetem se ol pipol blong hem oli bin “laef folem fasin blong stap hapi” (2 Nifae 5:27). Yu save lukluk long ol joes we Nifae mo ol pipol blong hem oli bin mekem we i bin lidim olgeta i go long fasin blong stap hapi—ol wei we oli bin sapsapotem olgeta mo famli blong olgeta, wanem oli bin tekem se i impoten long komuniti blong olgeta, mo ol narawan moa. ?Wanem nao yu lanem we i save helpem yu blong bildim wan laef blong stap hapi, semmak olsem ol pipol blong Nifae?
?Wanem strong nogud tok i bin foldaon long Ol Man blong Leman?
Long taem blong Nifae, strong nogud tok we i stap long Ol Man blong Leman, i we, Lod i bin “katemaot olgeta long fored blong Lod … from ol rabis fasin blong olgeta” (2 Nifae 5:20–21). Hemia i minim se Spirit blong Lod i nomo stap insaed long laef blong olgeta. Taem we Ol Man blong Leman oli bin akseptem mo folem gospel blong Jisas Kraes, “strong nogud tok blong God i nomo folem olgeta” (Alma 23:18).
Buk blong Momon i talem tu se wan mak, we i blong gat dak skin, i bin foldaon long Ol Man blong Leman afta we Ol Man blong Nifae oli seperetem olgeta long Ol Man blong Leman. Wanem i stap biaen long fasin blong mak ia, yumi no andastanem fulwan. Mak ia, long fas ples, i blong oli luksave huia Ol Man blong Leman mo huia Ol Man blong Nifae. Afta long hemia, taem we tufala, Ol Man blong Nifae mo Ol Man blong Leman oli bin gotru long ol taem blong nogud fasin mo fasin blong stap stret mo gud, mak ia, oli nomo bin save yusum blong talemaot se huia i wan Man blong Leman, long fored blong God.
Long taem blong yumi tedei, ol profet oli talem nomo se blong gat dak skin, i no minim se God i no laekem yu, o God i sakem wan nogud strong tok long yu. Jos i akseptem mo folem tijing blong Nifae se Lod “i no tanem baksaed blong hem long eniwan we i kam long hem, blak mo waet, slef mo fri, man mo woman” (2 Nifae 26:33). Presiden Russell M. Nelson: “Lod i talem bigwan stamba doktrin blong hem se evri pikinini blong Hem oli gat semmak janis. … Ol samting we oli defren long ol kalja, lanwis, seks, kala blong skin, mo sitisensip, oli go nating nomo taem wan we i fetful i kam insaed long kavenan rod mo i kam long Ridima we yumi lavem tumas” (“President Nelson Remarks at Worldwide Priesthood Celebration” [June 1, 2018], newsroom.ChurchofJesusChrist.org).
Luk tu long “Till We All Come in the Unity of the Faith” (video, ChurchofJesusChrist.org).
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit bambae i helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:
2 Nifae 1:13–25
?Wanem nao ol ves ia oli stap tijim yumi abaot ol bigfala samting we papa mo mama i wantem blong pikinini blong tufala?
2 Nifae 3:6
Ridim tugeta “Seer” insaed long Bible Dictionary, o long Gaed long Ol Skripja. ?Olsem wanem nao Josef Smit i bin wan sia? ?From wanem yumi mas glad mo talem tangkyu from ol wok we Josef Smit i bin mekem i kamtru? (luk long 2 Nifae 3:6–24).
2 Nifae 4:20–25
Taem yufala i stap ridim 2 Nifae 4:20–25 tugeta, stop smol afta long wanwan ves, mo invaetem ol memba blong famli blong yu blong oli serem wan taem we oli bin eksperiensem, o filim wanem we Nifae i stap tokbaot. ?Wanem nao God i mekem long famli blong yumi?
2 Nifae 5
?Wanem sam wei we famli blong yu i stap laef “folem fasin blong stap hapi”? Taem famli blong yu i stap ridim 2 Nifae 5, yu save toktok raon long ol samting we Ol Man blong Nifae oli stap kea long hem: famli (ves 6), olgeta komanmen (ves 10), olgeta skripja (ves 12), edukesen (ves 15), ol tempol (ves 16), wok (ves 17), mo ol koling blong Jos (ves 26). Wan wei blong mekem hemia, hem i blong faenem sam samting we oli ripresentem olgeta samting ia, mo tokbaot olsem wanem yumi soem se, semmak olsem Ol Man blong Nifae, yumi tu, yumi tekem olgeta samting ia oli impoten.
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Stap Kam Antap long Fasin blong Yumi blong Stap Tij
Save luk samting. Sapos yu rili lukluk long wanem i stap hapen long laef blong ol pikinini blong yu, bae yu faenem ol gudgudfala taem blong save tij. Ol tingting we ol pikinini blong yu oli mekem, o ol kwestin we oli askem, oli save kam ol janis blong save tij. (Luk long Teaching in the Savior’s Way,16.)
Lihae mo Ol Pipol blong Hem Oli Kasem Niufala Wol, i kam long Clark Kelley Price