“27 Jenuware –2 Febwari. 1 Nifae 16–22: ‘Bae Mi Mekem Rere Rod Bifo long Yufala,’” Kam Folem Mi—Blong Wanwan Man, Woman mo Famli: Buk blong Momon 2020 (2020)
“27Jenuware–2 Febwari. 1 Nifae 16–22,” Kam Folem Mi—Blong Wanwan Man, Woman, mo Famli: 2020
Lihae mo Liahona, i kam long Joseph Brickey
27 Jenuware –2 Febwari
1 Nifae 16–22
“Bae Mi Mekem Rere Rod Bifo long Yufala”
Taem yu stap ridim 1 Nifae 16–22, lukaotem ol skripja we oli toktok long tingting long yu. Sam pipol oli laekem blong haelaetem ol ves ia insaed long skripja blong olgeta; sam narawan oli raetem ol not long ol saedsaed blong buk. Tingting long hao nao bae yu raetemdaon ol tingting mo filing we yu stap kasem.
Raetemdaon Ol Filing mo Tingting blong Yu
Taem Lihae i stap wokbaot i go from graon blong promes, Lod i mekem wan promes long olgeta: “Bae mi mekem rere rod bifo long yufala, sapos i olsem se yufala i holem ol komanmen blong mi” (1 Nifae 17:13). I klia se promes ia i no minim se bae wokbaot ia bae i wan isiwan—ol memba blong famli oli no bin stap agri, ol bonara oli brok, ol pipol oli traehad mo oli ded, mo oli mas bildim wan sip wetem ol samting we oli faenem long ples blong olgeta. Be, taem famli i fesem fasin blong agens, o ol wok we oli luk se i no posibol blong mekem, Nifae i bin luksave se Lod i no bin stap longwe nating. Hem i bin save se God i “givim gudfala kaekae long olgeta, mo i mekem olgeta oli kam strong, mo i givim ol wei we oli save mekem samting we hem i bin talem long olgeta” (1 Nifae 17:3). Sapos yu bin stap askem yuwan finis se from wanem ol nogud samting oli stap hapen long ol gudfala pipol olsem Nifae mo famli blong hem, bae yu lukluk samting long wan defren wei long ol japta ia. Be moa impoten long hemia, bae yu luk wanem nao ol gudfala pipol oli mekem taem ol nogud samting oli stap hapen.
Sam Aedia blong Skripja Stadi blong Yuwan
Taem mi stap obei long ol komanmen, God bambae i helpem mi blong fesem olgeta jalenj.
Ol japta 16–18 blong 1 Nifae oli tokbaot samfala jalenj we famli blong Nifae i bin fesem, wetem hemia blong lukluk long bo blong bonara, we i bin brok (luk long 1 Nifae 16:17–32), ded blong Ismael (luk long 1 Nifae 16:34–39), bildim wan sip (luk long 1 Nifae 17:7–16; 18:1–4), mo famli we i no stap agri long samting (luk long 1 Nifae 18:9–22). ?Wanem nao Nifae i bin mekem blong fesem olgeta jalenj ia, we i defren long wanem ol memba blong famli blong hem oli bin mekem? ?Wanem nao i bin hapen afta we oli mekem olgeta samting ia?
Bae i save help blong raetemdaon wanem yu faenem insaed long wan tebol wetem ol heding olsem: “Jalenj,” “Aksen blong Nifae,” “Aksen blong Ol Narawan.” mo “Risal.” ?Yu ting se from wanem nao Nifae i bin save gohed blong stap fetful, be i no ol narawan? Tingtingbak long olsem wanem nao eksampol blong Nifae mo famli blong hem i save helpem yu wetem ol jalenj blong yu.
Luk tu long sam vidio we i go wetem topik ia long Book of Mormon Videos collection long ChurchofJesusChrist.org o insaed long Gospel Laebri ap.
1 Nifae 16:10–16, 23–31; 18:11–22
Lod i stap lidim mi tru long ol smol mo simpol wei.
Taem God i bin lidim famli blong Lihae i go long waelples, Hem i bin givim long olgeta wan ditel rod plan blong folem blong kasem graon blong promes. Be Hem i bin givim Liahona i go long Lihae mo famli blong hem, blong oli kasem ples we oli mas kasem. ?Wanem nao Papa long Heven i bin givim long yu blong gaedem mo daerektem yu? ?Yu ting se i minim wanem se, “tru long ol smol wei Lod i save mekem plante bigfala samting i hapen”? (1 Nifae 16:29).
Taem yu stap ridim 1 Nifae 16:10–16, 23–31 mo 18:11–22, tingting blong mekem wan lis blong ol prinsipol we oli soem olsem wanem God i stap lidim ol pikinini blong Hem (eksampol, 1 Nifae 16:10 i tijim se, samtaem, God i stap lidim yumi long sam wei we yumi no tingting long hem). ?Wanem eksperiens nao yu bin gat wetem olgeta prinsipol ia?
Luk tu long Alma 37:7, 38–47; Doktrin mo Ol Kavenan 64:33–34.
Sapos Yufala I Rere, Yufala I No Mas Fraet, i kam long Clark Kelley Price
Mi save “yusum evri skripja i kambak” long miwan.
Aesea i raet i go long evri pikinini blong Isrel, mo Nifae i bin luk se hemia i minim speseli famli blong hem—mo i minim se yu tu (luk long 1 Nifae 19:23–24). Long saed blong ol toktok we Nifae i kwotem we i kam long Aesea, Presiden Henry B. Eyring i talem: “Mi stap ridim ol toktok ia blong Aesea, … mi stap tekem se Nifae i tekem samfala pat blong Aesea we mi, mo mi no nid blong wari long pikja we i stap, mi save tekem i go stret long hat blong mi olsem se, Lod nao i stap toktok i kam long mi” (“The Book of Mormon Will Change Your Life,” Ensign, Feb 2004, 10).
Wetem ol toktok blong Presiden Eyring we i stap long maen blong yu, tingting long ol kwestin, olsem olgeta we oli kam afta ia, taem yu stap ridim ol japta 20–22:
-
1 Nifae 20:1–9.?Wijwan sentens nao insaed long ol ves ia, i stap tokbaot ol pikinini blong Isrel? ?Long wanem wei nao oli tokbaot Leman mo Lemyul? ?Wanem woning nao, mo wanem rod blong aksen nao yu bin faenem blong yu folem?
-
1 Nifae 20:17–22.?Olsem wanem nao Lod i bin lidim ol pikinini blong Isrel? ?Olsem wanem nao Hem i bin lidim famli blong Lihae? ?Olsem wanem nao Hem i stap lidim yu?
?Wanem moa nao yu faenem insaed long nao ol memba blong klas oli bin faenem insaed long 1 Nifae 20–22 we i mekem se yu filim olsem se Lod nao i stap toktok i kam stret long yu? ?Olsem wanem nao tingting blong Nifae long japta 22 i stap helpem yu blong andastanem ol profesi blong Aesea?
?Huia i haos blong Isrel mo Ol Jentael?
Haos blong Isrel, oli ol laen blong profet Jekob blong OlTesteman, Jekob ia we Lod nao i bin givim hem (luk long Jenesis 32:28; 35:10; luk tu long Bible Dictionary, “Israel”). Lod i bin mekem samfala kavenan wetem Isrel, mo wetem laen blong hem, oli bin tekem se oli ol kavenan pipol blong Lod. Be, sam jeneresen afta, plante long olgeta oli tanem baksaed long Lod mo oli bin go stap olbaot raon long wol.
Toktok ia, Ol Jentael long ol skripja ia oli tokbaot ol pipol we oli no gat gospel yet insaed long laef blong olgeta (luk long Bible Dictionary, “Gentile”). Aesea i tijim se long ol lata-dei, Ol Jentael bambae oli kasem gospel, mo bae oli wan bigfala tul blong tijim mo pulum tugeta haos blong Isrel (luk long 1 Nifae 21:22; 22:8–12; luk tu long Aesea 60; 66:18–20).
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:
1 Nifae 17:1-6, 17–22
Maet bae famli blong yu i save luk wanem i defren insaed long stori blong Nifae we i stap travel long waelples (luk long 1 Nifae 17:1–6), mo stori blong ol brata blong hem (luk long 1 Nifae 17:17–22). ?Yu ting se from wanem nao oli bin stap luk ol semfala samting we i stap hapen long ol defren wei? ?Wanem nao yumi save lanem aot long Nifae abaot fasin blong gat wan fetful lukluk long ol samting?
1 Nifae 17:17–22; 18:9–16
?Wanem nao ol risal blong fasin blong stap jalus, fasin blong no agri long samting, mo fasin blong stap komplen insaed long wan famli? ?Olsem wanem nao yumi save winim olgeta problem ia?
1 Nifae 19:22–24
Nifae i bin yusum ol skripja ia, i putum i kambak long famli blong hem, blong i “helpem [famli blong hem] mo blong [oli] lanem samting” (1 Nifae 19:23). I gat plante stori insaed long 1 Nifae 16–18 we famli blong yu i save yusum long laef blong olgeta. Mebi yu save rolplei wan long ol stori ia mo toktok raon long olsem wanem nao, hem i blong famli blong yu tu.
1 Nifae 21:14–16
?Olsem wanem mesej we i stap insaed long ol ves ia i stap helpem wan we i filim se oli fogetem hem?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Stap Kam Antap long Stadi blong Yuwan
Askem Lod blong kasem sam help. Ol skripja, God i givim tru long revelesen, mo yumi nidim revelesen blong rili andastanem olgeta. Lod i bin promesem: “Sapos yu askem mi wetem fet, … i tru we bae olgeta samting ia oli mas kam long yufala” (1 Nifae 15:11).
Oli bin Mekem I Strong Tumas long Mi, i kam long Walter Rane