Lihae i stap lukluk long Liahona

Lihae mo Liahona, i kam long Joseph Brickey

27 Jenuware –2 Febwari

1 Nifae 16—22

“Bae Mi Mekem Rere Rod Bifo long Yufala”

Ol stori we oli givim insperesen long 1 Nifae 16–22 oli tijim ol trutok we oli save blesem laef blong ol pikinini we yu stap tijim. Ridim ol japta ia mo raetemdaon ol filing mo tingting we yu kasem.

Raetemdaon Ol Filing mo Tingting blong Yu

serem pikja bokis

Invaetem Ol Pikinini blong Serem Wanem Oli Gat

Raetem ol toktok ia long bod, o soem ol pikja blong olgeta: Liahona, bonara, mo bot. Invaetem tri pikinini blong jusum wan toktok o pikja mo serem pat blong stori blong Nifae we i abaot samting ia. Helpem olgeta sapos i nid.

tijing pikja bokis

Stap Tijim Doktrin: Ol Smol Pikinini

1 Nifae 16:10, 28–29; 18:8–13, 20–22

Lod i save gaedem mo daerektem mi.

Tijim ol pikinini se iven long taem we oli stap fesem ol hadtaem, Lod i save gaedem olgeta (luk long 1 Nifae 16:29).

Samfala Aktiviti we yu Save Mekem

• Soem long ol pikinini wan kampas, wan map, o wan samting we i save helpem yumi blong faenem rod, mo eksplenem olsem wanem blong yusum ol tul ia. Komperem ol tul ia wetem Liahona taem yu stap talemsot stori long 1 Nifae 10: 16:10,28–29 mo 18, 9–12, 20-22. Poenemaot se taem famli blong Lihae i no obei, Liahona hem i no wok (luk tu long 1 Nifae 18:9–12, 20–22). ?Wanem nao i save helpem yumi blong faenem rod blong yumi i gobak long Papa long Heven?

• Karem wan kontena we i gat insaed samfala toktok we i tokbaot wan ples insaed o raonem bilding blong jos. Yusum kontena ia mo ol toktok ia blong ripresentem Liahona, mo givim janis long ol pikinini blong jusum samfala toktok ia mo traem talemaot se hem i stap tokbaot wanem ples ia. Afta wokbaot i go long ples ia tugeta. Eksplenem se taem yumi soemaot fet mo folem ol daereksen we Lod i givim long yumi, bae Hem i helpem yumi blong save gobak long Hem (luk long Alma 37:38–42). ?Olsem wanem nao Papa long Heven i stap gaedem yumi long wokbaot blong yumi i gobak long Hem?

1 Nifae 16:14–32

Mi save stap olsem wan gud eksampol long famli blong mi.

Olsem wanem Nifae i stap toktok wetem famli blong hem long hadtaem ia i save helpem ol pikinini blong luk se iven sapos oli smol, olgeta tu, oli save stap olsem ol eksampol long ol famli blong olgeta.

Samfala Aktiviti we Yu Save Mekem

• Givim wok long wanwan pikinini blong dro wan pikja blong wan samting aot long stori blong Nifae long taem we hem i brekem bonara blong hem (luk long 1 Nifae 16:14–32), olsem Nifae, wan bonara, o Liahona. Afta yusum ol pikja ia blong talem stori long klas, mo givim janis long ol pikinini blong mekem semmak. ?Olsem wanem nao yumi save stap olsem Nifae taem we ol famli blong yumi i stap go tru long ol hadtaem?

• Invaetem wanwan pikinini blong katemaot wan sekol long pepa mo dro wan fes we i no glad long wan saed mo wan glad fes long narasaed. Taem yu stap talem stori blong taem we Nifae i brekem bonara blong hem, invaetem ol pikinini blong yusum ol fes blong olgeta blong soemaot olsem wanem nao famli blong Nifae i stap filim long ol defren pat blong stori. ?Olsem wanem nao Nifae i help blong mekem famli blong hem i stap glad? ?Wanem nao yumi save mekem blong famli blong yumi i stap glad?

1 Nifae 17:7–19; 18:1–4

Papa long Heven i save helpem mi blong mekem ol samting we i had.

Semmak olsem Nifae, ol pikinini we yu stap tijim oli stap lan blong mekem ol samting we i had. Eksperiens blong Nifae i save helpem olgeta blong save se Papa long Heven bae i helpem taem oli askem.

Samfala Aktiviti we Yu Save Mekem

• Talem long ol pikinini se stori blong Nifae we i bin kasem oda blong bildim wan bot, yusum 1 Nifae 17:7–19 mo 18:1–4. Maet yu save yusum tu “Japta 7: Taem blong Bildimap Sip” (Ol Stori long Buk blong Momon, 21–22) o ol vidio blong hem long koleksen blong ol Vidio blong Buk blong Momon long ChurchofJesusChrist.org. Aktiviti pej blong wik ia i save talemaot strong stamba prinsipol ia se Papa long Heven i bin helpem Nifae, mo bae Hem i helpem yumi.

• Singsing tugeta nambatu ves blong “Nephi’s Courage” (Children’s Songbook, 120–21). ?Wanem nao i helpem Nifae blong gat strong paoa long tingting taem we ol brata blong hem oli bin stap jikim hem taem hem i stap traem blong bildim bot?

tijing pikja bokis

Stap Tijim Doktrin: Ol Bigfala Pikinini

1 Nifae 16:10, 28–29; 17:13–15; 18:8–13, 20–22

Taem mi stap folem ol komanmen, Lod i stap gaedem mi.

Yusum stori blong famli blong Lihae taem we Liahona i stap gaedem olgeta blong soem long ol pikinini olsem wanem nao God i save gaedem olgeta sapos olgeta i traehad blong mekem wanem we Hem i wantem.

Samfala Aktiviti we Yu Save Mekem

• Jusum wan o moa long ol riding ia blong ridim wetem ol pikinini: 1 Nifae 16:10, 28–29; 17:13–15; mo 18:8–13, 20–22. Askem olgeta blong faenemaot wanem nao yumi mas mekem blong God blong i lidim mo daerektem yumi, mo toktok raon long wanem we oli bin lanem.

• Afta we yu go tru long ol stori long 1 Nifae 16–18, intaviu samfala pikinini olsem se olgeta nao i bin travel wetem famli blong Lihae. Yu save askem ol kwestin olsem: ?From wanem nao yu glad from Liahona? ?Wanem nao yu mas mekem blong Liahona i save wok? (luk long 1 Nifae 16:28–29). Invaetem klas blong tokbaot ol samting we Lod i givim blong gaedem yumi tedei.

• Askem ol pikinini blong tingting long olsem wanem nao oli save yusum stori blong Liahona blong helpem wan fren we i nid blong mekem wan impoten desisen. Givim tingting se blong ademap long 1 Nifae 16:10, 26–31 mo 18:9–22, oli save luk tu long Alma 37:38–44. Serem wan eksperiens we Papa long Heven i bin helpem yu go tru wan had taem, o invaetem ol pikinini blong serem wan. ?Wanem nao yumi mas mekem blong save kasem help blong Hem?

1 Nifae 16:14–39; 18:1–5

Ol fasin mo ol joes blong mi i save lidim tingting blong famli blong mi blong mekem gud.

Fet blong Nifae hem i wan bigfala blesing long taem we famli blong hem i bin fesem plante hadtaem. ?Olsem wanem nao yu save helpem ol pikinini blong lanem samting aot long eksampol blong hem?

Samfala Aktiviti we Yu Save Mekem

• Invaetem ol pikinini blong dro ol pikja we i stap soemaot stori blong bonara blong Nifae we i bin brok (luk long 1 Nifae 16:14–39). Talem stori ia bakegen wetem olgeta, sapos i nid. Taem oli stap serem ol pikja blong olgeta, helpem olgeta blong faenem sam wei we fasin blong Nifae blong stap fetful i bin blesem famli blong hem. Invaetem ol pikinini blong tingting hevi long ol jalenj we olgeta o ol famli blong olgeta i stap fesem. ?Wanem nao oli save mekem blong folem eksampol blong Nifae?

• Ridim tugeta sam ves long 1 Nifae 16:21–32. Tokbaot sam gol we maet ol famli blong ol pikinini oli gat, olsem blong stap gat famli haos naet oltaem o famli prea. ?Olsem wanem nao ol pikinini oli save helpem ol famli blong olgeta blong winim ol gol ia? Invaetem olgeta blong plan blong mekem wan samting blong helpem ol famli blong olgeta blong winim ol gol ia long wik ia.

1 Nifae 19:22–24

Mi save yusum skripja long laef blong mi.

Helpem ol pikinini blong luksave se ol stori insaed long skripja i moa bitim wan stori nomo—oli gat ol stamba prinsipol we i save blesem ol laef.

Samfala Aktiviti we Yu Save Mekem

• Askem wan pikinini blong ridim 1 Nifae 19:22–24 bigwan, mo askem ol pikinini se i minim wanem blong “yusum ol skripja long laef” blong yuwan. Helpem olgeta blong faenemaot olsem wanem nao Nifae i yusum wan stori long skripja long eksperiens blong hem blong karembak ol buk we oli mekem aot long bras (luk long 1 Nifae 4:1–4; luk tu long Eksodas 14). ?Olsem wanem nao stori ia i bin helpem Nifae mo ol brata blong hem?

• Luklukbak long sam long olgeta stori we ol pikinini i bin lanem abaot Lihae mo famli blong hem long 1 Nifae, mo invaetem olgeta blong serem wanem we oli bin lanem aot long ol stori ia. Helpem olgeta blong tingbaot sam situesen long laef blong olgeta we i semmak long ol stori ia. Eksampol, taem we Lod i askem long Nifae blong bildim wan sip maet i save rimaenem olgeta long ol taem we olgeta i nid blong mekem wan samting we i had mo oli askem help blong Lod.

stap lanem samting pikja bokis

Stap Leftemap Tingting blong Lanem Samting long Hom

Invaetem ol pikinini blong jusum wan stori long 1 Nifae 16–22 mo serem wetem ol famli blong olgeta olsem wanem nao oli save “yusum” stori ia long laef blong olgeta.

Stap Kam Antap long Fasin blong Yumi blong Stap Tij

Yusum ol stori. Ol stori i helpem ol pikinini blong andastanem ol prinsipol blong gospel from se oli soemaot olsem wanem ol narafala man oli laef folem ol prinsipol ia.

aktiviti pej: God i helpem mi blong stap obei long ol komanmen blong Hem