I Swit I Bitim Evri Samting we I Swit, i kam long Miguel Ángel González Romero

20–26 Jenuware

1 Nifae 11–15

“Oli Blokem Olgeta Wetem Stret mo Gud Fasin mo Paoa blong God”

Ridim 1 Nifae 11–15 mo, insaed long maen blong yu, tingting long ol pikinini we yu stap tijim, mo raetemdaon ol filing mo ol tingting we yu kasem.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Soem wan pikja blong visen blong Lihae abaot tri blong laef, mo invaetem ol pikinini blong serem wanem oli tingbaot we oli bin lanem abaot visen ia las wik. Askem long olgeta sapos oli bin lanem wan niu samting abaot visen ia.

Stap Tijim Doktrin: Ol Smol Pikinini

1 Nifae 11:16–33

Papa long Heven i sendem Jisas Kraes i kam long wol ia from se Hem i lavem mi.

Nifae i bin luk laef mo wok blong Jisas Kraes long wan visen. Tingting hevi long wanem ol pikinini long klas blong yu oli save lanem abaot Sevya long 1 Nifae 11.

Samfala Aktiviti we Yu Save Mekem

• Givim long wanwan pikinini wan pikja we i soem wan taem long laef blong Sevya we ol profet oli talemaot finis, we i stap long 1 Nifae 11:20, 24, 27, 31, and 33 (luk long Gospel Art Buk ol namba 30, 35, 39, 42, 57). Taem yu ridim ol ves ia, askem ol pikinini blong leftemap ol pikja blong olgeta taem oli harem wan ves we i stret long pikja blong olgeta.

• Talem long ol pikinini abaot sam samting we Nifae i bin lanem se Jisas Kraes bae i mekem truaot long laef blong Hem (luk long 1 Nifae 11:16–33), mo soem long olgeta sam pikja blong ol taem ia (luk, blong eksampol, Gospel Art Buk, namba 41, 46, 47, 49, 56, 57, 58, 59). Serem wanem we Sevya i bin mekem blong yu. Soem ol pikja blong helpem ol pikinini blong tingbaot sam wei we yumi save serem lav blong God (luk long Gospel Art Buk, namba 109, 110, 115).

1 Nifae 13:26–29, 35–36, 40

Buk blong Momon i tijim sam naesfala trutok.

?From wanem nao yu glad from Buk blong Momon? Tingbaot olsem wanem nao yu save serem testemoni blong yu wetem ol pikinini.

Samfala Aktiviti we Yu Save Mekem

• Dro wan pikja long bod, mo invaetem ol pikinini blong jenisim o karemaot sam pat blong pikja ia blong mekem se i nomo semmak. Helpem olgeta blong andastanem se, semmak olsem pikja ia, sam samting insaed long Baebol, oli bin jenisim mo tekemaot long ol taem we i pas. Ridim sam pat blong 1 Nifae 13:40 we i tijim olsem wanem nao Buk blong Momon (we Nifae i singaotem “ol lasfala histri”) i helpem yumi blong andastanem “ol samting we oli klia mo gudfala” we i bin lus long Baebol.

• Haedem sam pikja, raon long rum, we oli ripresentem ol trutok blong gospel we Buk blong Momon i talem i moa klia, olsem baptaes, sakramen, mo laef bakegen long ded. Invaetem ol pikinini blong faenem ol pikja ia. Eksplenem se Buk blong Momon i bin karembak ol trutok blong gospel we i bin lus.

1 Nifae 15:23–25

Tok blong God i givim paoa long mi.

?Olsem wanem nao yu save yusum pikja blong aean rel blong tijim ol pikinini abaot strong paoa, sefti, mo paoa blong toktok blong God?

Samfala Aktiviti we Yu Save Mekem

• Soem wan pikja blong drim blong Lihae, olsem hemia long aotlaen blong las wik insaed long Kam Folem Mi—Blong Wanwan Man, Woman o Famli. Invaetem ol pikinini blong faenem aean rel insaed long pikja ia, mo helpem olgeta blong andastanem olsem wanem nao toktok blong God i save protektem yumi taem yumi hang long hem (luk 1 Nifae 15:23–24). Givim ol pikinini wan samting we i semmak olsem wan aean rel blong oli holem, olsem wan paep o wan stik, taem yu ridim ves 24. ?Wea nao yumi save faenem toktok blong God? ?Wanem nao yumi save mekem blong mekem se toktok blong God i pat blong laef blong yumi evri dei?

• Helpem ol pikinini blong kalarem mo finisim aktiviti pej blong wik ia. ?Olsem wanem nao yumi save “hang strong” long toktok blong God? (1 Nifae 15:24).

Stap Tijim Doktrin: Ol Bigfala Pikinini

1 Nifae 11:16–33

Papa long Heven i sendem Jisas Kraes i kam long wol ia from se Hem i lavem mi.

Nifae i bin gat wan visen we hem i witnes long plan we Papa long Heven i gat blong yumi, mo Jisas Kraes hem i gat bigfala pat long visen ia.

Samfala Aktiviti we Yu Save Mekem

• Invaetem ol pikinini blong majem ol ves ia long 1 Nifae 11: 16–33 wetem ol pikja we i soem wanem we ol ves ia oli tokbaot (olsem 1 Nifae 11:20, 24, 27, 29, 31, 33; luk long Gospel Art Buk, namba 30, 35, 38, 39, 42, 57). ?Wanem nao ol pikinini oli save lanem abaot Kraes long ol ves mo ol pikja ia?

• Askem ol pikinini from wanem nao Jisas Kraes i impoten long olgeta. Singsing wan singsing abaot Sevya, olsem “He Sent His Son” (Children’s Songbook, 34–35), mo askem ol pikinini wanem nao singsing ia i stap tijim abaot Jisas. Invaetem ol pikinini blong faenem taem truaot long wik blong tingbaot Jisas Kraes mo serem ol eksperiens blong olgeta long klas nekis wik.

Gospel blong Jisas Kraes i stap insaed long Buk blong Momon.

1 Nifae 13:26–29, 35–36, 40

Buk blong Momon i tij abaot ol impoten trutok.

?Wanem nao ol pikinini oli save abaot Apostasi? ?Olsem wanem nao yu save helpem olgeta blong andastan se Buk blong Momon i impoten blong karembak ol trutok blong gospel we i bin lus long taem blong Apostasi?

Samfala Aktiviti we Yu Save Mekem

• Ridim 1 Nifae 13:26–29 tugeta, mo invaetem ol pikinini blong lukaotem wanem nao i save hapen sapos ol man oli no gat “ol klia mo naesfala” trutok blong gospel. ?Olsem wanem nao Lod i putumbak ol trutok we oli bin lus? (luk long ol ves 35–36, 40). Invaetem ol pikinini blong serem ol testemoni blong olgeta abaot ol trutok we oli bin lanem long Buk blong Momon, o serem testemoni blong yuwan.

• Soem vidio “The Book of Mormon—a Book from God” (ChurchofJesusChrist.org) blong soemaot olsem wanem nao Baebol mo Buk blong Momon i wok tugeta blong tijim trutok. ?From wanem nao bae i help moa blong gat moa bitim wan witnes nomo? Dro wan raon mak long bod, mo raetem nem blong hem se Baebol, mo invaetem wanwan pikinini blong dro wan nara stret laen i pas tru long mak ia blong soemaot se ol tijing insaed long Baebol i save gat plante mining sapos i gat Baebol nomo. Waepemaot ol laen ia, mo dro wan nara raon mak mo raetem nem blong hem se Buk blong Momon. Invaetem wan pikinini blong dro wan stret laen we i pas tru long tugeta mak blong soem se i gat wan rod nomo blong talemaot mining blong gospel taem yumi yusum Baebol mo Buk blong Momon tugeta.

• Helpem ol pikinini blong lanem namba eit toktok blong bilif.

1 Nifae 15:23–25

Toktok blong God i givim paoa long mi blong winim temtesen.

?Olsem wanem nao yu save helpem ol pikinini we yu tijim blong mekem ol testemoni blong olgeta long saed blong gospel i kam moa strong? Tingting hevi long kwestin ia taem yu stap ridim 1 Nifae 15:23–25, mo yusum ol aktiviti andanit ia blong helpem ol tingting we yu gat.

Samfala Aktiviti we Yu Save Mekem

• Askem ol pikinini blong talem sot stori blong visen blong tri blong laef (luk long 1 Nifae 8; 11). ?Wanem nao i stap blokem ol man blong kasem tri ia? ?Wanem nao i helpem olgeta blong kasem tri ia? Invaetem ol pikinini blong ridim 1 Nifae 15: 23–25. ?Olsem wanem nao aean rel i helpem ol man blong go tru long klaod blong tudak ia? ?Olsem wanem nao taem yumi stap ridim toktok blong God i stap helpem yumi blong winim temtesen mo ol rabis fasin blong tedei?

• Finisim aktiviti pej ia wetem ol pikinini. Taem oli stap mekem hemia, askem olgeta blong tokbaot sam long ol temtesen we ol pikinini oli stap fesem. ?Olsem wanem nao oli save tingbaot blong hang strong long aean rel ia evri dei? Singsing “The Iron Rod” (Hymns, namba 274) olsem pat blong aktiviti ia.

Stap Leftemap Tingting blong Lanem Samting long Hom

Leftemap tingting blong ol pikinini blong soem long ol famli blong olgeta “ol aean rel” we oli bin mekem long aktiviti pej mo serem olsem wanem nao oli save hang long aean rel ia taem oli stap ridim ol skripja.

Stap Kam Antap long Fasin blong Yumi Blong Stap Tij

Yusum ol pikja blong pulum olgeta blong lanem samting. Taem yu tijim wan skripja stori long ol pikinini, faenem ol wei we bae i helpem olgeta blong luk ol stori ia long maen blong olgeta. Yu save yusum ol pikja, ol vidio, ol papet, ol klos, mo sam narafala moa.