ol buk we oli wokem long gol

30 Disemba—5 Jenuware

Ol Pej blong Fas toktok blong Buk blong Momon

“Wan Narafala Testeman blong Jisas Kraes”

Blong yu stat rere blong tij, ridim taetol pej mo fas toktok blong Buk blong Momon; ol testemoni blong Olgeta Tri Witnes, Olgeta Eit Witnes, mo blong Profet Josef Smit; mo “Wan Smol Toktok long saed blong Buk blong Momon.” Tingting hevi long olsem wanem nao yu save givim insperesen long ol pikinini blong lanem samting aot long Buk blong Momon.

Raetemdaon Ol Filing mo Tingting blong Yu

serem pikja bokis

Invaetem Ol Pikinini blong Serem Wanem Oli Gat

Invaetem ol pikinini blong serem ol stori blong Buk blong Momon we olgeta i save, yusum ol pikja 67–86 insaed long Gospel Art Buk o ol narafala pikja we yu gat.

tijing pikja bokis

Stap Tijim Doktrin: Ol Smol Pikinini

Taetol pej blong Buk blong Momon

Buk blong Momon i save helpem mi blong gat fet long Jisas Kraes.

Helpem ol pikinini blong luksave se stamba tingting blong Buk blong Momon hem i blong serem testemoni blong Jisas Kraes.

Samfala Aktiviti we Yu Save Mekem

• Leftemap wan kopi blong Buk blong Momon, mo poenemaot toktok ia, Wan Narafala Testeman blong Jisas Kraes. Letem wanwan pikinini i gat janis blong talem, “Wan Narafala Testeman blong Jisas Kraes.” Tokbaot smol long ol pikinini olsem wanem nao Buk blong Momon i bin mekem fet blong yu long Jisas Kraes i kam moa strong.

• Talem wan stori blong Buk blong Momon we i tijim abaot Jisas Kraes, olsem stori blong Samuel Man blong Leman we i bin stap profesae abaot Kraes (luk long Hileman 14–16), Sevya we i stap blesem ol pikinini (luk long 3 Nifae 17), o Brata blong Jared we i luk Jisas Kraes (luk long Ita 2–3). Ol japta long Ol Stori long Buk blong Momon (mo ol vidio blong hem long ChurchofJesusChrist.org) oli save help. Poenemaot long ol pikinini wanem we yumi save lanem abaot Jisas long ol stori ia. Talem long olgeta se bae olgeta i lanem plante samting abaot Jisas Kraes long Buk blong Momon long yia ia.

• Singsing wan song abaot Buk blong Momon, olsem “Book of Mormon Stories” (Children’s Songbook, 118). Sing long singsing ia tugeta plante taem mo letem ol pikinini oli gat janis blong holem wan pikja blong Sevya taem yu stap singsing.

Fas Toktok blong Buk blong Momon.

Buk blong Momon hem i ki ston blong relijin blong yumi

Presiden Thomas S. Monson i bin eksplenem: “Sapos [Buk blong Momon] i tru—mo mi testifae se i tru—[nao] Josef Smit hem i wan profet … , Jos Ia blong Jisas Kraes blong Ol Lata-dei Sent hem i Jos blong Lod long wol ia, mo tabu prishud blong God i bin kambak” (“Paoa blong Buk blong Momon,” Ensign o www.ChurchofJesusChrist.org/languages/bis/content/general-conference/2017/04/the-power-of-the-book-of-mormon, Epril 2017).

Samfala Aktiviti we Yu Save Mekem

• Ridim long ol pikinini toktok ia blong Josef Smit we i stap long Fas Toktok blong Buk blong Momon: “Buk blong Momon i ki ston blong relijin blong yumi.” Eksplenem se long semmak wei we wan ki ston i holem tugeta ol narafala ston, testemoni blong yumi long Buk blong Momon i leftemap mo mekem testemoni blong yumi long ol narafala samting i kam moa strong, olsem Josef Smit mo gospel.

• Invaetem wan mama o papa blong wan long ol pikinini i serem olsem wanem hem i kasem wan testemoni long Buk blong Momon. Ridim wetem ol pikinini invitesen we i stap long en blong Fas Toktok long Buk blong Momon, mo helpem olgeta blong aktemaot ol samting we oli save mekem blong save kasem testemoni blong olgetawan.

“Testemoni blong Profet Josef Smit”

Buk blong Momon i bin kam long yumi tru long paoa blong God.

Testemoni blong Josef Smit i save helpem ol pikinini blong andastanem tabu stamba tingting blong Buk blong Momon.

Samfala Aktiviti we Yu Save Mekem

• Talem wan stori long ol pikinini long olsem wanem nao Buk blong Momon i bin kambak, olsem we oli tokbaot insaed long “Testemoni blong Profet Josef Smit.” Maet yu save yusum tu “Japta 1: Olsem Wanem Yumi Kasem Buk blong Momon” (Ol Stori long Buk blong Momon, 2–4, o vidio blong hem long ChurchofJesusChrist.org). Helpem ol pikinini blong aktemaot stori ia taem yu talem stori ia bakegen.

• Soem long ol pikinini pikja blong ol raeting we oli stap long ol buk we oli bin mekem wetem gol. Eksplenem se God i bin helpem Josef Smit blong transletem ol raeting ia i kam long ol toktok we yumi save ridim mo andastanem.

  tu gol buk we oli gat raeting long hem

  Josef Smit i bin transletem ol raeting we oli stap long ol gol buk ia.

tijing pikja bokis

Stap Tijim Doktrin: Ol Bigfala Pikinini

Taetol pej blong Buk blong Momon

Buk blong Momon i helpem mi blong gat fet long Jisas Kraes.

Tingbaot se stamba tingting blong tijim ol pikinini abaot Buk blong Momon hem i blong bildimap fet blong olgeta long Sevya.

Samfala Aktiviti we Yu Save Mekem

• Seraotem klas i go long grup blong tu pikinini long wan grup. Invaetem wanwan grup blong ridim seken paragraf blong taetol pej blong Buk blong Momon, mo lukaotem wan samting we i stap talem long olgeta wanem nao Buk blong Momon i save mekem. Afta invaetem wanwan grup blong serem wetem klas.

• Helpem ol pikinini blong faenem long taetol pej, toktok ia “blong winim tingting blong Ol Jiu mo Jentael se Jisas Hem i Kraes.” ?Olsem wanem nao Buk blong Momon i save winim tingting blong yu se Jisas Hem i Kraes? Invaetem olgeta blong serem wan stori long Buk blong Momon we i bin mekem fet blong olgeta long Kraes i kam strong moa, o serem wan blong yuwan.

Fas Toktok blong Buk blong Momon.

Buk blong Momon hem i ki ston blong relijin blong yumi

Blong kasem wan testemoni long Buk blong Momon bae i helpem ol pikinini blong save se Jos Ia blong Jisas Kraes blong Ol Lata‑dei Sent hem i tru Jos blong God.

Samfala Aktiviti we Yu Save Mekem

• Askem ol pikinini blong mekem olsem se yu yu neva save abaot Buk blong Momon. Invaetem olgeta blong wok wetem wan fren mo tingbaot samfala wei we bae oli save eksplenem long yu se hem i wanem mo i kam wea, mo oli yusum ol toktok we i stap long Fas Toktok. Afta letem wanwan grup i gat janis blong tijim yu. Pikja ia The Bible and the Book of Mormon Testify of Christ (ChurchofJesusChrist.org) i save help tu.

• Invaetem wan pikinini blong ridim toktok blong Josef Smit long namba sikis paragraf blong fas toktok. Yusum aktiviti pej blong wik ia, eksplenem olsem wanem nao wan ki ston i save holem wan pos i stap antap. Folem wanem i stap long las paragraf blong fas toktok, ?wanem nao sam narafala samting we bae yumi save taem yumi gat wan testemoni se Buk blong Momon i tru?

“Testemoni blong Olgeta Tri Witnes”; “Testemoni blong Olgeta Eit Witnes”

Mi save kam wan witnes blong Buk blong Momon.

?Olsem wanem nao yu save helpem ol pikinini blong kasem mo serem testemoni blong olgetawan long saed blong Buk blong Momon?

Samfala Aktiviti we Yu Save Mekem

• Invaetem ol pikinini blong tokbaot wan samting we oli bin luk we i no gat wan narawan long klas i bin luk. Eksplenem se Buk blong Momon i gat ol testemoni blong 11 narafala man wetem hemia blong Josef Smit, we oli bin luk ol buk we oli wokem long gol we oli yusum blong transletem Buk blong Momon aot long hem. Ridim ol testemoni tugeta. ?From wanem nao ol narafala witnes ia oli wantem ol narafala man blong save abaot ol testemoni blong olgeta?

• Askem sapos wan pikinini i wantem serem olsem wanem nao oli save se Buk blong Momon i tru. Ridim tugeta Moronae 10:3–5, mo invaetem wanwan pikinini blong ridim Buk blong Momon long yia ia mo kasem o mekem testemoni blong hem i kam strong moa se hemia i tru. Talem long ol pikinini olsem wanem nao yu bin kasem testemoni blong yu long saed blong Buk blong Momon.

stap lanem samting pikja bokis

Stap Leftemap Tingting blong Lanem Samting long Hom

Sapos yu save mekem, mekemsua se wanwan pikinini i gat wan kopi blong Buk blong Momon, mo invaetem olgeta blong stat ridim olgetawan mo wetem ol famli blong olgeta.

Stap Kam Antap long Fasin blong Yumi blong Stap Tij

Lukaotem insperesen blong yuwan. I no minim se bae yu mas luk ol aotlaen ia olsem ol instraksen we yu mas folem taem yu tij, be yusum olgeta olsem wan ples we i save givim laet long insperesen blong yuwan taem yu stap tingting hevi long ol nid blong ol pikinini we yu stap tijim.

aktiviti pej: Papa long Heven i stap ansarem ol prea